ශ්රීමද්වාල්මීකීය රාමායණේ අරණ්යකාංඩම් ।
අථ චතුඃපංචාශස්සර්ගඃ ।
හ්රියමාණා තු වෛදේහී කංචින්නාථමපශ්යතී ।
දදර්ශ ගිරිශෘංගස්ථාන්පංච වානරපුංගවාන් ॥ 1 ॥
තේෂාං මධ්යේ විශාලාක්ෂී කෞශේයං කනකප්රභම් ।
උත්තරීයං වරාරෝහා ශුභාන්යාභරණානි ච ॥ 2 ॥
මුමෝච යදි රාමාය ශංසේයුරිති මෛථිලී ।
වස්ත්රමුත්සෘජ්ය තන්මධ්යේ නික්ෂිප්තං සහභූෂණම් ॥ 3 ॥
සංභ්රමාත්තු දශග්රීවස්තත්කර්ම න ස බුද්ධවාන් ।
පිංගාක්ෂාස්තාං විශාලාක්ෂීං නේත්රෛරනිමිෂෛරිව ॥ 4 ॥
වික්රෝශංතීං තථා සීතාං දදෘශුර්වානරර්ෂභාඃ ।
ස ච පංපාමතික්රම්ය ලංකාමභිමුඛඃ පුරීම් ॥ 5 ॥
ජගාම රුදතීං ගෘහ්ය වෛදේහීං රාක්ෂසේශ්වරඃ ।
තාං ජහාර සුසංහෘෂ්ටෝ රාවණෝ මෘත්යුමාත්මනඃ ॥ 6 ॥
උත්සංගේනේව භුජගීං තීක්ෂ්ණදංෂ්ට්රාං මහාවිෂාම් ।
වනානි සරිතශ්ශෛලාංත්සරාංසි ච විහායසා ॥ 7 ॥
ස ක්ෂිප්රං සමතීයාය ශරශ්චාපාදිව ච්යුතඃ ।
තිමිනක්රනිකේතං තු වරුණාලයමක්ෂයම් ॥ 8 ॥
සරිතාං ශරණං ගත්වා සමතීයාය සාගරම් ।
සංභ්රමාත්පරිවෘත්තෝර්මී රුද්ධමීනමහෝරගඃ ॥ 9 ॥
වෛදේහ්යාං හ්රියමාණායාං බභූව වරුණාලයඃ ।
අංතරික්ෂගතා වාචස්සසෘජුශ්චාරණාස්තදා ॥ 10 ॥
ඒතදංතෝ දශග්රීව ඉති සිද්ධාස්තදාබ්රුවන් ।
ස තු සීතාං විවේෂ්ටංතීමංකේනාදාය රාවණඃ ॥ 11 ॥
ප්රවිවේශ පුරීං ලංකාං රූපිණීං මෘත්යුමාත්මනඃ ।
සෝऽභිගම්ය පුරීං ලංකාං සුවිභක්තමහාපථාම් ॥ 12 ॥
සංරූඪකක්ෂ්යාබහුලං ස්වමංතඃපුරමාවිශත් ।
තත්ර තාමසිතාපාංගාං ශෝකමෝහපරායණාම් ॥ 13 ॥
නිදධේ රාවණස්සීතාං මයෝ මායාමිවස්ත්රියම් ।
අබ්රවීච්ච දශග්රීවඃ පිශාචීර්ඝෝරදර්ශනාඃ ॥ 14 ॥
යථා නේමාං පුමාන් ස්ත්රී වා සීතාං පශ්යත්යසම්මතඃ ।
මුක්තාමණිසුවර්ණානි වස්ත්රාණ්යාභරණානි ච ॥ 15 ॥
යද්යදිච්ඡේත්තදේවාස්යා දේයං මච්ඡංදතෝ යථා ।
යා ච වක්ෂ්යති වෛදේහීං වචනං කිංචිදප්රියම් ॥ 16 ॥
අජ්ඤානාද්යදි වා ජ්ඤානාන්න තස්යා ජීවිතං ප්රියම් ।
තථෝක්ත්වා රාක්ෂසීස්තාස්තු රාක්ෂසේංද්රඃ ප්රතාපවාන් ॥ 17 ॥
නිෂ්ක්රම්යාංතඃ පුරාත්තස්මාත්කිංකෘත්යමිති චිංතයන් ।
දදර්ශාෂ්ටෞ මහාවීර්යාන්රාක්ෂසාන්පිශිතාශනාන් ॥ 18 ॥
ස තාංදෘෂ්ට්වා මහාවීර්යෝ වරදානේන මෝහිතඃ ।
උවාචෛතානිදං වාක්යං ප්රශස්ය බලවීර්යතඃ ॥ 19 ॥
නානාප්රහරණාඃ ක්ෂිප්රමිතෝ ගච්ඡත සත්වරාඃ ।
ජනස්ථානං හතස්ථානං භූතපූර්වං ඛරාලයම් ॥ 20 ॥
තත්රෝෂ්යතාං ජනස්ථානේ ශූන්යේ නිහතරාක්ෂසේ ।
පෞරුෂං බලමාශ්රිත්ය ත්රාසමුත්සෘජ්ය දූරතඃ ॥ 21 ॥
බලං හි සුමහද්යන්මේ ජනස්ථානේ නිවේශිතම් ।
සදූෂණඛරං යුද්ධේ හතං රාමේණ සායකෛඃ ॥ 22 ॥
තත ක්රෝධෝ මමාමර්ෂාද්ධෛර්යස්යෝපරි වර්තතේ ।
වෛරං ච සුමහජ්ජාතං රාමං ප්රති සුදාරුණම් ॥ 23 ॥
නිර්යාතයිතුමිච්ඡාමි තච්ච වෛරමහං රිපෝඃ ।
න හි ලප්ස්යාම්යහං නිද්රාමහත්වා සංයුගේ රිපුම් ॥ 24 ॥
තං ත්විදානීමහං හත්වා ඛරදූෂණඝාතිනම් ।
රාමං ශර්මෝපලප්ස්යාමි ධනං ලබ්ධ්වේව නිර්ධනඃ ॥ 25 ॥
ජනස්ථානේ වසද්භිස්තු භවද්භීරාමමාශ්රිතා ।
ප්රවෘත්තිරුපනේතව්යා කිඤ්කරෝතීති තත්ත්වතඃ ॥ 26 ॥
අප්රමාදාච්ච ගංතව්යං සර්වෛරපි නිශාචරෛඃ ।
කර්තව්යශ්ච සදා යත්නෝ රාඝවස්ය වධං ප්රති ॥ 27 ॥
යුෂ්මාකං ච බලජ්ඤෝऽහං බහුශෝ රණමූර්ධනි ।
අතශ්චාස්මින් ජනස්ථානේ මයා යූයං නියෝජිතාඃ ॥ 28 ॥
තතඃ ප්රියං වාක්යමුපේත්ය රාක්ෂසා මහාර්ථමෂ්ටාවභිවාද්ය රාවණම් ।
විහාය ලංකාං සහිතාඃ ප්රතස්ථිරේ යතෝ ජනස්ථානමලක්ෂ්යදර්ශනාඃ ॥ 29 ॥
තතස්තු සීතාමුපලභ්ය රාවණඃ සුසංප්රහෘෂ්ටඃ පරිගෘහ්ය මෛථිලීම් ।
ප්රසජ්ය රාමේණ ච වෛරමුත්තමං බභූව මෝහාන්මුදිතස්සරාක්ෂසඃ ॥ 30 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ චතුඃපංචාශස්සර්ගඃ ॥
