ശ്രീമദ്വാല്മീകീയ രാമായണേ അരണ്യകാംഡമ് ।
അഥ ചതുഃപംചാശസ്സര്ഗഃ ।
ഹ്രിയമാണാ തു വൈദേഹീ കംചിന്നാഥമപശ്യതീ ।
ദദര്ശ ഗിരിശൃംഗസ്ഥാന്പംച വാനരപുംഗവാന് ॥ 1 ॥
തേഷാം മധ്യേ വിശാലാക്ഷീ കൌശേയം കനകപ്രഭമ് ।
ഉത്തരീയം വരാരോഹാ ശുഭാന്യാഭരണാനി ച ॥ 2 ॥
മുമോച യദി രാമായ ശംസേയുരിതി മൈഥിലീ ।
വസ്ത്രമുത്സൃജ്യ തന്മധ്യേ നിക്ഷിപ്തം സഹഭൂഷണമ് ॥ 3 ॥
സംഭ്രമാത്തു ദശഗ്രീവസ്തത്കര്മ ന സ ബുദ്ധവാന് ।
പിംഗാക്ഷാസ്താം വിശാലാക്ഷീം നേത്രൈരനിമിഷൈരിവ ॥ 4 ॥
വിക്രോശംതീം തഥാ സീതാം ദദൃശുർവാനരര്ഷഭാഃ ।
സ ച പംപാമതിക്രമ്യ ലംകാമഭിമുഖഃ പുരീമ് ॥ 5 ॥
ജഗാമ രുദതീം ഗൃഹ്യ വൈദേഹീം രാക്ഷസേശ്വരഃ ।
താം ജഹാര സുസംഹൃഷ്ടോ രാവണോ മൃത്യുമാത്മനഃ ॥ 6 ॥
ഉത്സംഗേനേവ ഭുജഗീം തീക്ഷ്ണദംഷ്ട്രാം മഹാവിഷാമ് ।
വനാനി സരിതശ്ശൈലാംത്സരാംസി ച വിഹായസാ ॥ 7 ॥
സ ക്ഷിപ്രം സമതീയായ ശരശ്ചാപാദിവ ച്യുതഃ ।
തിമിനക്രനികേതം തു വരുണാലയമക്ഷയമ് ॥ 8 ॥
സരിതാം ശരണം ഗത്വാ സമതീയായ സാഗരമ് ।
സംഭ്രമാത്പരിവൃത്തോര്മീ രുദ്ധമീനമഹോരഗഃ ॥ 9 ॥
വൈദേഹ്യാം ഹ്രിയമാണായാം ബഭൂവ വരുണാലയഃ ।
അംതരിക്ഷഗതാ വാചസ്സസൃജുശ്ചാരണാസ്തദാ ॥ 10 ॥
ഏതദംതോ ദശഗ്രീവ ഇതി സിദ്ധാസ്തദാബ്രുവന് ।
സ തു സീതാം വിവേഷ്ടംതീമംകേനാദായ രാവണഃ ॥ 11 ॥
പ്രവിവേശ പുരീം ലംകാം രൂപിണീം മൃത്യുമാത്മനഃ ।
സോഽഭിഗമ്യ പുരീം ലംകാം സുവിഭക്തമഹാപഥാമ് ॥ 12 ॥
സംരൂഢകക്ഷ്യാബഹുലം സ്വമംതഃപുരമാവിശത് ।
തത്ര താമസിതാപാംഗാം ശോകമോഹപരായണാമ് ॥ 13 ॥
നിദധേ രാവണസ്സീതാം മയോ മായാമിവസ്ത്രിയമ് ।
അബ്രവീച്ച ദശഗ്രീവഃ പിശാചീര്ഘോരദര്ശനാഃ ॥ 14 ॥
യഥാ നേമാം പുമാന് സ്ത്രീ വാ സീതാം പശ്യത്യസമ്മതഃ ।
മുക്താമണിസുവര്ണാനി വസ്ത്രാണ്യാഭരണാനി ച ॥ 15 ॥
യദ്യദിച്ഛേത്തദേവാസ്യാ ദേയം മച്ഛംദതോ യഥാ ।
യാ ച വക്ഷ്യതി വൈദേഹീം വചനം കിംചിദപ്രിയമ് ॥ 16 ॥
അജ്ഞാനാദ്യദി വാ ജ്ഞാനാന്ന തസ്യാ ജീവിതം പ്രിയമ് ।
തഥോക്ത്വാ രാക്ഷസീസ്താസ്തു രാക്ഷസേംദ്രഃ പ്രതാപവാന് ॥ 17 ॥
നിഷ്ക്രമ്യാംതഃ പുരാത്തസ്മാത്കിംകൃത്യമിതി ചിംതയന് ।
ദദര്ശാഷ്ടൌ മഹാവീര്യാന്രാക്ഷസാന്പിശിതാശനാന് ॥ 18 ॥
സ താംദൃഷ്ട്വാ മഹാവീര്യോ വരദാനേന മോഹിതഃ ।
ഉവാചൈതാനിദം വാക്യം പ്രശസ്യ ബലവീര്യതഃ ॥ 19 ॥
നാനാപ്രഹരണാഃ ക്ഷിപ്രമിതോ ഗച്ഛത സത്വരാഃ ।
ജനസ്ഥാനം ഹതസ്ഥാനം ഭൂതപൂർവം ഖരാലയമ് ॥ 20 ॥
തത്രോഷ്യതാം ജനസ്ഥാനേ ശൂന്യേ നിഹതരാക്ഷസേ ।
പൌരുഷം ബലമാശ്രിത്യ ത്രാസമുത്സൃജ്യ ദൂരതഃ ॥ 21 ॥
ബലം ഹി സുമഹദ്യന്മേ ജനസ്ഥാനേ നിവേശിതമ് ।
സദൂഷണഖരം യുദ്ധേ ഹതം രാമേണ സായകൈഃ ॥ 22 ॥
തത ക്രോധോ മമാമര്ഷാദ്ധൈര്യസ്യോപരി വര്തതേ ।
വൈരം ച സുമഹജ്ജാതം രാമം പ്രതി സുദാരുണമ് ॥ 23 ॥
നിര്യാതയിതുമിച്ഛാമി തച്ച വൈരമഹം രിപോഃ ।
ന ഹി ലപ്സ്യാമ്യഹം നിദ്രാമഹത്വാ സംയുഗേ രിപുമ് ॥ 24 ॥
തം ത്വിദാനീമഹം ഹത്വാ ഖരദൂഷണഘാതിനമ് ।
രാമം ശര്മോപലപ്സ്യാമി ധനം ലബ്ധ്വേവ നിര്ധനഃ ॥ 25 ॥
ജനസ്ഥാനേ വസദ്ഭിസ്തു ഭവദ്ഭീരാമമാശ്രിതാ ।
പ്രവൃത്തിരുപനേതവ്യാ കിഞ്കരോതീതി തത്ത്വതഃ ॥ 26 ॥
അപ്രമാദാച്ച ഗംതവ്യം സർവൈരപി നിശാചരൈഃ ।
കര്തവ്യശ്ച സദാ യത്നോ രാഘവസ്യ വധം പ്രതി ॥ 27 ॥
യുഷ്മാകം ച ബലജ്ഞോഽഹം ബഹുശോ രണമൂര്ധനി ।
അതശ്ചാസ്മിന് ജനസ്ഥാനേ മയാ യൂയം നിയോജിതാഃ ॥ 28 ॥
തതഃ പ്രിയം വാക്യമുപേത്യ രാക്ഷസാ മഹാര്ഥമഷ്ടാവഭിവാദ്യ രാവണമ് ।
വിഹായ ലംകാം സഹിതാഃ പ്രതസ്ഥിരേ യതോ ജനസ്ഥാനമലക്ഷ്യദര്ശനാഃ ॥ 29 ॥
തതസ്തു സീതാമുപലഭ്യ രാവണഃ സുസംപ്രഹൃഷ്ടഃ പരിഗൃഹ്യ മൈഥിലീമ് ।
പ്രസജ്യ രാമേണ ച വൈരമുത്തമം ബഭൂവ മോഹാന്മുദിതസ്സരാക്ഷസഃ ॥ 30 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ചതുഃപംചാശസ്സര്ഗഃ ॥
