ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ප්රථමස්සර්ගඃ ।
ස තාං පුෂ්කරිණීං ගත්වා පද්මෝත්පලඣෂාකුලාම් ।
රාමස්සෞමිත්රි සහිතෝ විලලාපාකුලේංද්රියඃ ॥ 1 ॥
තස්ය දෘෂ්ට්වෛව තාං හර්ෂාදිංද්රියාණි චකංපිරේ ।
ස කාමවශමාපන්නස්සෞමිත්රිමිදමබ්රවීත් ॥ 2 ॥
සෞමිත්රේ ශෝභතේ පංපා වෛදූර්යවිමලෝදකා ।
ඵුල්ලපද්මෝත්පලවතී ශෝභිතා විවිධෛර්ද්රුමෛඃ ॥ 3 ॥
සෞමිත්රේ පශ්ය පංපායාඃ කානනං ශුභදර්ශනම් ।
යත්ර රාජංති ශෛලා වා ද්රුමාස්සශිඛරා ඉව ॥ 4 ॥
මාං තු ශෝකාභිසංතප්තං මාධවඃ පීඩයංති වෛ ।
භරතස්ය ච දුඃඛේන වෛදේහ්යා හරණේන ච ॥ 5 ॥
ශෝකාර්තස්යාපි මේ පංපා ශෝභතේ චිත්රකානනා ।
ව්යවකීර්ණා බහුවිධෛඃ පුෂ්පෛශ්ශීතෝදකා ශිවා ॥ 6 ॥
නලිනෛරපි සංඡන්නා හ්යත්යර්ථශුභදර්ශනා ।
සර්පව්යාලානුචරිතා මෘගද්විජසමාකුලා ॥ 7 ॥
අධිකං ප්රවිභාත්යේතන්නීලපීතං තු ශාද්වලම් ।
ද්රුමාණාං විවිධෛඃ පුෂ්පෛඃ පරිස්තෝමෛරිවාර්පිතම් ॥ 8 ॥
පුෂ්පභාරසමෘද්ධානි ශිඛරාණි සමංතතඃ ।
ලතාභිඃ පුෂ්පිතාග්රාභිරුපගූඪානි සර්වශඃ ॥ 9 ॥
සුඛානිලෝऽයං සෞමිත්රේ කාලඃ ප්රචුරමන්මථඃ ।
ගංධවාන්සුරභිර්මාසෝ ජාතපුෂ්පඵලද්රුමඃ ॥ 10 ॥
පශ්ය රූපාණි සෞමිත්රේ වනානාං පුෂ්පශාලිනාම් ।
සෘජතාං පුෂ්පවර්ෂාණි තෝයං තෝයමුචාමිව ॥ 11 ॥
ප්රස්තරේෂු ච රම්යේෂු විවිධාඃ කානනද්රුමාඃ ।
වායුවේගප්රචලිතාඃ පුෂ්පෛරවකිරංති ගාම් ॥ 12 ॥
පතිතෛඃ පතමානෛශ්ච පාදපස්ථෛශ්ච මාරුතඃ ।
කුසුමෛඃ පශ්ය සෞමිත්රේ ක්රීඩන්නිව සමංතතඃ ॥ 13 ॥
වික්ෂිපන්විවිධාශ්ශාඛා නගානාං කුසුමෝත්කචාඃ ।
මාරුතශ්චලිතස්ථානෛෂ්ෂට්පදෛරනුගීයතේ ॥ 14 ॥
මත්තකෝකිලසන්නාදෛර්නර්තයන්නිව පාදපාන් ।
ශෛලකංදරනිෂ්ක්රාංතඃ ප්රගීත ඉව චානිලඃ ॥ 15 ॥
තේන වික්ෂිපතාऽත්යර්ථං පවනේන සමංතතඃ ।
අමී සංසක්තශාඛාග්රා ග්රථිතා ඉව පාදපාඃ ॥ 16 ॥
ස ඒෂ සුඛසංස්පර්ශෝ වාති චංදනශීතලඃ ।
ගංධමභ්යවහන්පුණ්යං ශ්රමාපනයනෝऽනිලඃ ॥ 17 ॥
අමී පවනවික්ෂිප්තා විනදංතීව පාදපාඃ ।
ෂට්පදෛරනුකූජංතෝ වනේෂු මධුගංධිෂු ॥ 18 ॥
ගිරිප්රස්ථේෂු රම්යේෂු පුෂ්පවද්භිර්මනෝරමෛඃ ।
සංසක්තශිඛරාශ්ශෛලා විරාජංතේ මහාද්රුමෛඃ ॥ 19 ॥
පුෂ්පසංඡන්නශිඛරා මාරුතෝත්ක්ෂේපචංචලාඃ ।
අමී මධුකරෝත්තංසාඃ ප්රගීතා ඉව පාදපාඃ ॥ 20 ॥
සුපුෂ්පිතාංස්තු පශ්යේමාන්කර්ණිකාරාංත්සමංතතඃ ।
හාටකප්රතිසංඡන්නාන්නරාන්පීතාංබරානිව ॥ 21 ॥
අයං වසංතස්සෞමිත්රේ නානාවිහගනාදිතඃ ।
සීතයා විප්රහීනස්ය ශෝකසංදීපනෝ මම ॥ 22 ॥
මාං හි ශෝකසමාක්රාංතං සංතාපයති මන්මථඃ ।
හෘෂ්ටඃ ප්රවදමානශ්ච මමාහ්වයති කෝකිලඃ ॥ 23 ॥
ඒෂ දාත්යූහකෝ හෘෂ්ටෝ රම්යේ මාං වනනිර්ඣරේ ।
ප්රණදන්මන්මථාවිෂ්ටං ශෝචයිෂ්යති ලක්ෂ්මණ ॥ 24 ॥
ශ්රුත්වෛතස්ය පුරා ශබ්දමාශ්රමස්ථා මම ප්රියා ।
මාමාහූය ප්රමුදිතාඃ පරමං ප්රත්යනංදත ॥ 25 ॥
ඒවං විචිත්රාඃ පතගා නානාරාවවිරාවිණඃ ।
වෘක්ෂගුල්මලතාඃ පශ්ය සංපතංති සමංතතඃ ॥ 26 ॥
විමිශ්රා විහගාඃ පුංභිරාත්මව්යූහාභිනංදිතාඃ ।
භෘංගරාජප්රමුදිතාස්සෞමිත්රේ මධුරස්වනාඃ ॥ 27 ॥
දාත්යූහරතිවික්රංදෛඃ පුංස්කෝකිලරුතෛරපි ।
ස්වනංති පාදපාශ්චේමේ මමානංගප්රදීපනාඃ ॥ 28 ॥
අශෝකස්තබකාංගාරෂ්ෂට්පදස්වනනිඃස්වනඃ ।
මාං හි පල්ලවතාම්රාර්චිර්වසංතාග්නිඃ ප්රධක්ෂ්යති ॥ 29 ॥
න හි තාං සූක්ෂ්මපක්ෂ්මාක්ෂීං සුකේශීං මෘදුභාෂිණීම් ।
අපශ්යතෝ මේ සෞමිත්රේ ජීවිතේऽස්ති ප්රයෝජනම් ॥ 30 ॥
අයං හි දයිතස්තස්යාඃ කාලෝ රුචිරකානනඃ ।
කෝකිලාකුලසීමාංතෝ දයිතායා මමානඝ ॥ 31 ॥
මන්මථාऽයාසසංභූතෝ වසංතගුණවර්ධිතඃ ।
අයං මාං ධක්ෂ්යති ක්ෂිප්රං ශෝකාග්නිර්නචිරාදිව ॥ 32 ॥
අපශ්යතස්තාං දයිතාං පශ්යතෝ රුචිරද්රුමාන් ।
මමායමාත්මප්රභවෝ භූයස්ත්වමුපයාස්යති ॥ 33 ॥
අදෘශ්යමානා වෛදේහී ශෝකං වර්ධයතේ මම ।
දෘශ්යමානෝ වසංතශ්ච ස්වේදසංසර්ගදූෂකඃ ॥ 34 ॥
මාං හ්යද්ය මෘගශාබාක්ෂී චිංතාශෝකබලාත්කෘතම් ।
සංතාපයති සෞමිත්රේ ක්රූරශ්චෛත්රවනානිලඃ ॥ 35 ॥
අමී මයූරාශ්ශෝභංතේ ප්රනෘත්යංතස්තතස්තතඃ ।
ස්වෛඃ පක්ෂෛඃ පවනෝද්ධූතෛර්ගවාක්ෂෛඃ ස්ඵාටිකෛරිව ॥ 36 ॥
ශිඛිනීභිඃ පරිවෘතාස්තේ ඒතේ මදමූර්ඡිතාඃ ।
මන්මථාභිපරීතස්ය මම මන්මථවර්ධනාඃ ॥ 37 ॥
පශ්ය ලක්ෂ්මණ නෘත්යංතං මයූරමුපනෘත්යති ।
ශිඛිනී මන්මථාර්තෛෂා භර්තාරං ගිරිසානුනි ॥ 38 ॥
තාමේව මන්මථාවිෂ්ටෝ මයූරෝऽප්යුපධාවති ।
විතත්ය රුචිරෞ පක්ෂෞ රුතෛරුපහසන්නිව ॥ 39 ॥
මයූරස්ය වනේ නූනං රක්ෂසා න හෘතා ප්රියා ।
තස්මාන්නෘත්යති රම්යේෂු වනේෂු සහ කාංතයා ॥ 40 ॥
මම ත්වයං විනා වාසඃ පුෂ්පමාසේ සුදුස්සහඃ ।
පශ්ය ලක්ෂ්මණ සංරාගඃ තිර්යග්යෝනිගතේෂ්වපි ।
යදේෂා ශිඛිනී කාමාද්භර්තාරං රමතේऽංතිකේ ॥ 41 ॥
මාමප්යේවං විශාලාක්ෂී ජානකී ජාතසංභ්රමා ।
මදනේනාභිවර්තේත යදි නාऽපහෘතා භවේත් ॥ 42 ॥
පශ්ය ලක්ෂ්මණ පුෂ්පාණි නිෂ්ඵලානි භවංති මේ ।
පුෂ්පභාරසමෘද්ධානාං වනානාං ශිශිරාත්යයේ ॥ 43 ॥
රුචිරාණ්යපි පුෂ්පාණි පාදපානාමතිශ්රියා ।
නිෂ්ඵලානි මහීං යාංති සමං මධුකරෝත්කරෛඃ ॥ 44 ॥
නදංති කාමං ශකුනා මුදිතාස්සංඝශඃ කලම් ।
ආහ්වයංත ඉවාන්යෝන්යං කාමෝන්මාදකරා මම ॥ 45 ॥
වසංතෝ යදි තත්රාපි යත්ර මේ වසති ප්රියා ।
නූනං පරවශා සීතා සාපි ශෝචත්යහං යථා ॥ 46 ॥
නූනං න තු වසංතෝऽතං දේශං ස්පෘශති යත්ර සා ।
කථං හ්යසිතපද්මාක්ෂී වර්තයේත්සා මයා විනා ॥ 47 ॥
අථවා වර්තතේ තත්ර වසංතෝ යත්ර මේ ප්රියා ।
කිං කරිෂ්යති සුශ්රෝණී සා තු නිර්භර්ත්සිතා පරෛඃ ॥ 48 ॥
ශ්යාමා පද්මපලාශාක්ෂී මෘදුපූර්වාභිභාෂිණී ।
නූනං වසංතමාසාද්ය පරිත්යක්ෂ්යති ජීවිතම් ॥ 49 ॥
දෘඪං හි හෘදයේ බුද්ධිර්මම සංපරිවර්තතේ ।
නාලං වර්තයිතුං සීතා සාධ්වී මද්විරහං ගතා ॥ 50 ॥
මයි භාවස්තු වෛදේහ්යාස්තත්ත්වතෝ විනිවේශිතඃ ।
මමාපි භාවස්සීතායාං සර්වථා විනිවේශිතඃ ॥ 51 ॥
ඒෂ පුෂ්පවහෝ වායුස්සුඛස්පර්ශෝ හිමාවහඃ ।
තාං විචිංතයතඃ කාංතාං පාවකප්රතිමෝ මම ॥ 52 ॥
සදා සුඛමහං මන්යේ යං පුරා සහ සීතයා ।
මාරුතස්ස විනා සීතාං ශෝකං වර්ධයතේ මම ॥ 53 ॥
තාං විනා විහංගෝ යඃ පක්ෂී ප්රණදිතස්තදා ।
වායසඃ පාදපගතඃ ප්රහෘෂ්ටමභිනර්දති ॥ 54 ॥
ඒෂ වෛ තත්ර වෛදේහ්යා විහගඃ ප්රතිහාරකඃ ।
පක්ෂී මාං තු විශාලාක්ෂ්යාස්සමීපමුපනේෂ්යති ॥ 55 ॥
ශෘණු ලක්ෂ්මණ සන්නාදං වනේ මද්විවර්ධනම් ।
පුෂ්පිතාග්රේෂු වෘක්ෂේෂු ද්විජානාමුපකූජතාම් ॥ 56 ॥
වික්ෂිප්තාං පවනේනෛතාමසෞ තිලකමංජරීම් ।
ෂට්පදස්සහසාऽභ්යේති මදෝද්ධූතාමිව ප්රියාම් ॥ 57 ॥
කාමිනාමයමත්යංතමශෝකශ්ශෝකවර්ධනඃ ।
ස්තබකෛඃ පවනෝත්ක්ෂිප්තෛස්තර්ජයන්නිව මාං ස්ථිතඃ ॥ 58 ॥
අමී ලක්ෂ්මණ දෘශ්යංතේ චූතාඃ කුසුමශාලිනඃ ।
විභ්රමෝත්සික්තමනසඃ සාංගරාගා නරා ඉව ॥ 59 ॥
සෞමිත්රේ පශ්ය පංපායාශ්චිත්රාසු වනරාජිෂු ।
කින්නරා නරශාර්දූල විචරංති තතස්තතඃ ॥ 60 ॥
ඉමානි ශුභගංධීනි පශ්ය ලක්ෂ්මණ සර්වශඃ ।
නලිනානි ප්රකාශංතේ ජලේ තරුණසූර්යවත් ॥ 61 ॥
ඒෂා ප්රසන්නසලිලා පද්මනීලෝත්පලායුතා ।
හංසකාරංඩවාකීර්ණා පංපා සෞගංධිකාන්විතා ॥ 62 ॥
ජලේ තරුණසූර්යාභෛෂ්ෂට්පදාහතකේසරෛඃ ।
පංකජෛශ්ශෝභතේ පංපා සමංතාදභිසංවෘතා ॥ 63 ॥
චක්රවාකයුතා නිත්යං චිත්රප්රස්තවනාංතරා ।
මාතංගමෘගයූථෛශ්ච ශෝභතේ සලිලාර්ථිභිඃ ॥ 64 ॥
පවනාහතවේගාභිරූර්මිභිර්විමලේऽංභසි ।
පංකජානි විරාජංතේ තාඩ්යමානානි ලක්ෂ්මණ ॥ 65 ॥
පද්මපත්රවිශාලාක්ෂීං සතතං පංකජප්රියාම් ।
අපශ්යතෝ මේ වෛදේහීං ජීවිතං නාභිරෝචතේ ॥ 66 ॥
අහෝ කාමස්ය වාමත්වං යෝ ගතාමපි දුර්ලභාම් ।
ස්මාරයිෂ්යති කල්යාණීං කල්යාණතරවාදිනීම් ॥ 67 ॥
ශක්යෝ ධාරයිතුං කාමෝ භවේදභ්යාගතෝ මයා ।
යදි භූයෝ වසංතෝ මාං න හන්යාත්පුෂ්පිතද්රුමඃ ॥ 68 ॥
යානි ස්ම රමණීයානි තයා සහ භවංති මේ ।
තාන්යේවාරමණීයානි ජායංතේ මේ තයා විනා ॥ 69 ॥
පද්මකෝශපලාශානි ද්රෂ්ටුං දෘෂ්ටිර්හි මන්යතේ ।
සීතායා නේත්රකෝශාභ්යාං සදෘශානීති ලක්ෂ්මණ ॥ 70 ॥
පද්මකේසරසංසෘෂ්ටෝ වෘක්ෂාංතරවිනිස්සෘතඃ ।
නිශ්ශ්වාස ඉව සීතායා වාති වායුර්මනෝහරඃ ॥ 71 ॥
සෞමිත්රේ පශ්ය පංපායා දක්ෂිණේ ගිරිසානුනි ।
පුෂ්පිතාං කර්ණිකාරස්ය යෂ්ටිං පරමශෝභනාම් ॥ 72 ॥
අධිකං ශෛලරාජෝऽයං ධාතුභිඃ සුවිභූෂිතඃ ।
විචිත්රං සෘජතේ රේණුං වායුවේගවිඝට්ටිතම් ॥ 73 ॥
ගිරිප්රස්ථාස්තු සෞමිත්රේ සර්වතස්සංප්රපුෂ්පිතෛඃ ।
නිෂ්පත්රෛස්සර්වතෝ රම්යෛඃ ප්රදීප්තා ඉව කිංශුකෛඃ ॥ 74 ॥
පංපාතීරරුහාශ්චේමේ සංසක්තා මධුගංධිනඃ ।
මාලතීමල්ලිකාෂංඩාඃ කරවීරාශ්ච පුෂ්පිතාඃ ॥ 75 ॥
කේතක්යස්සිංදුවාරාශ්ච වාසංත්යශ්ච සුපුෂ්පිතාඃ ।
මාධව්යෝ ගංධපූර්ණාශ්ච කුංදගුල්මාශ්ච සර්වශඃ ॥ 76 ॥
චිරිබිල්වා මධූකාශ්ච වංජුලා වකුලාස්තථා ।
චංපකාස්තිලකාශ්චෛව නාගවෘක්ෂාස්සුපුෂ්පිතාඃ ॥ 77 ॥
නීපාශ්ච වරණාශ්චෛව ඛර්ජූරාශ්ච සුපුෂ්පිතා ।
පද්මකාශ්චෛව ශෝභංතේ නීලාශෝකාශ්ච පුෂ්පිතාඃ ।
ලෝධ්රාශ්ච ගිරිපෘෂ්ඨේෂු සිංහකේසරපිංජරාඃ ॥ 78 ॥
අංකෝලාශ්ච කුරංටාශ්ච චූර්ණකාඃ පාරිභද්රකාඃ ।
චූතාඃ පාටලයශ්චෛව කෝවිදාරාශ්ච පුෂ්පිතාඃ ॥ 79 ॥
මුචුකුංදාර්ජුනාශ්චෛව දෘශ්යංතේ ගිරිසානුෂු ।
කේතකෝද්දාලකාශ්චෛව ශිරීෂාඃ ශිංශුපා ධවාඃ ॥ 80 ॥
ශාල්මල්යඃ කිංශුකාශ්චෛව රක්තාඃ කුරවකාස්තථා ॥ 81 ॥
ත්රිනිශා නක්තමාලාශ්ච චංදනාස්ස්යංදනාස්තථා ।
පුෂ්පිතාන්පුෂ්පිතාග්රාභිර්ලතාභිඃ පරිවේෂ්ටිතාන් ।
ද්රුමාන්පශ්යේහ සෞමිත්රේ පංපායා රුචිරාන්බහූන් ॥ 82 ॥
වාතවික්ෂිප්තවිටපාන්යථාऽසන්නාංද්රුමානිමාන් ।
ලතාස්සමනුවර්තංතේ මත්තා ඉව වරස්ත්රියඃ ॥ 83 ॥
පාදපාත්පාදපං ගච්ඡන් ශෛලාච්ඡෛලං වනාද්වනම් ।
වාති නෛකරසාස්වාදස්සම්මෝදිත ඉවානිලඃ ॥ 84 ॥
කේචිත්පර්යාප්තකුසුමාඃ පාදපා මධුගංධිනඃ ।
කේචින්මුකුලසංවීතාඃ ශ්යාමවර්ණා ඉවාබභුඃ ॥ 85 ॥
ඉදං මෘෂ්ටමිදං ස්වාදු ප්රඵුල්ලමිදමිත්යපි ।
රාගයුක්තෝ මධුකරඃ කුසුමේෂ්වේව ලීයතේ ॥ 86 ॥
නිලීය පුනරුත්පත්ය සහසාऽන්යත්ර ගච්ඡති ।
මධුලුබ්ධෝ මධුකරඃ පංපාතීරද්රුමේෂ්වසෞ ॥ 87 ॥
ඉයං කුසුමසංඝාතෛරුපස්තීර්ණා සුඛාකෘතා ।
ස්වයං නිපතිතෛර්භූමිශ්ශයනප්රස්තරෛරිව ॥ 88 ॥
විවිධා විවිධෛඃ පුෂ්පෛස්තෛරේව නගසානුෂු ।
විකීර්ණෛ පීතරක්තාහි සෞමිත්රේ ප්රස්තරාඃ කෘතාඃ ॥ 89 ॥
හිමාංතේ පශ්ය සෞමිත්රේ වෘක්ෂාණාං පුෂ්පසංභවම් ।
පුෂ්පමාසේ හි තරවස්සංඝර්ෂාදිව පුෂ්පිතාඃ ॥ 90 ॥
ආහ්වයංත ඉවාන්යෝන්යං නගාෂ්ෂට්පදනාදිතාඃ ।
කුසුමෝත්තංසවිටපාශ්ශෝභංතේ බහු ලක්ෂ්මණ ॥ 91 ॥
ඒෂ කාරංඩවඃ පක්ෂී විගාහ්ය සලිලං ශුභම් ।
රමතේ කාංතයා සාර්ධං කාමමුද්දීපයන්මම ॥ 92 ॥
මංදාකින්යාස්තු යදිදං රූපමේවං මනෝහරම් ।
ස්ථානේ ජගති විඛ්යාතා ගුණාස්තස්යා මනෝරමාඃ ॥ 93 ॥
යදි දෘශ්යේත සා සාධ්වී යදි චේහ වසේමහි ।
ස්පෘහයේයං න ශක්රාය නායෝධ්යායෛ රඝූත්තම ॥ 94 ॥
නහ්යේවං රමණීයේෂු ශාද්වලේෂු තයා සහ ।
රමතෝ මේ භවේච්චිංතා න ස්පෘහාऽන්යේෂු වා භවේත් ॥ 95 ॥
අමී හි විවිධෛඃ පුෂ්පෛස්තරවෝ රුචිරච්ඡදාඃ ।
කානනේऽऽස්මින්විනා කාංතාං චිංතාමුත්පාදයංති මේ ॥ 96 ॥
පශ්ය ශීතජලාං චේමාං සෞමිත්රේ පුෂ්කරායුතාම් ।
චක්රවාකානුචරිතාං කාරංඩව නිෂේවිතාම් ॥ 97 ॥
ප්ලවෛඃ ක්රෞංචෛශ්ච සංපූර්ණාං මහාමෘගනිෂේවිතාම් ।
අධිකං ශෝභතේ පංපා විකූජද්භිඃර්විහංගමෛඃ ॥ 98 ॥
දීපයංතීව මේ කාමං විවිධා මුදිතා ද්විජාඃ ।
ශ්යාමාං චංද්රමුඛීං ස්මෘත්වා ප්රියාං පද්මනිභේක්ෂණාම් ॥ 99 ॥
පශ්ය සානුෂු චිත්රේෂු මෘගීභිස්සහිතාන්මෘගාන් ।
මාං පුනර්මෘගශාබාක්ෂ්යා වෛදේහ්යා විරහීකෘතම් ॥ 100 ॥
ව්යථයංතීව මේ චිත්තං සංචරංතස්තතස්තතඃ ।
අස්මින්සානුනි රම්යේ හි මත්තද්විජගණායුතේ ।
පශ්යේයං යදි තාං කාංතාං තතස්ස්වස්ති භවේන්මම ॥ 101 ॥
ජීවේයං ඛලු සෞමිත්රේ මයා සහ සුමධ්යමා ।
සේවතේ යදි වෛදේහී පංපායාඃ පවනං සුඛම් ॥ 102 ॥
පද්මසෞගංධිකවහං ශිවං ශෝකවිනාශනම් ।
ධන්යා ලක්ෂ්මණ සේවංතේ පංපෝපවනමාරුතම් ॥ 103 ॥
ශ්යාමා පද්මපලාශාක්ෂී ප්රියා විරහිතා මයා ।
කථං ධාරයති ප්රාණාන්විවශා ජනකාත්මජා ॥ 104 ॥
කින්නු වක්ෂ්යාමි රාජානං ධර්මජ්ඤං සත්යවාදිනම් ।
සීතායා ජනකං පෘෂ්ටඃ කුශලං ජනසංසදි ॥ 105 ॥
යා මාමනුගතා මංදං පිත්රා ප්රව්රාජිතං වනම් ।
සීතා සත්පථමාස්ථාය ක්ව නු සා වර්තතේ ප්රියා ॥ 106 ॥
තයා විහීනඃ කෘපණඃ කථං ලක්ෂ්මණ ධාරයේ ।
යා මාමනුගතා රාජ්යාද්භ්රෂ්ටං විගතචේතසම් ॥ 107 ॥
තච්චාර්වංචිතපද්මාක්ෂං සුගංධි ශුභමව්රණම් ।
අපශ්යතෝ මුඛං තස්යාස්සීදතීව මනෝ මම ॥ 108 ॥
ස්මිතහාස්යාංතරයුතං ගුණවන්මධුරං හිතම් ।
වෛදේහ්යා වාක්යමතුලං කදා ශ්රෝෂ්යාමි ලක්ෂ්මණ ॥ 109 ॥
ප්රාප්ය දුඛං වනේ ශ්යාමා මාං මන්මථවිකර්ශිතම් ।
නෂ්ටදුඃඛේව හෘෂ්ටේව සාධ්වී සාධ්වභ්යභාෂත ॥ 110 ॥
කිං නු වක්ෂ්යාමි කෞසල්යාමයෝධ්යායාං නෘපාත්මජ ।
ක්ව සා ස්නුෂේති පෘච්ඡංතීං කථං චාපි තු මනස්විනීම් ॥ 111 ॥
ගච්ඡ ලක්ෂ්මණ පශ්ය ත්වං භරතං භ්රාතෘවත්සලම් ।
න හ්යහං ජීවිතු ශක්තස්තාමෘතේ ජනකාත්මජාම් ॥ 112 ॥
ඉති රාමං මහාත්මානං විලපංතමනාථවත් ।
උවාච ලක්ෂ්මණෝ භ්රාතා වචනං යුක්තමව්යයම් ॥ 113 ॥
සංස්තංභ රාම භද්රං තේ මා ශුචඃ පුරුෂෝත්තම ।
නේදෘශානාං මතිර්මංදා භවත්යකලුෂාත්මනාම් ॥ 114 ॥
ස්මෘත්වා වියෝගජං දුඃඛං ත්යජ ස්නේහං ප්රියේ ජනේ ।
අතිස්නේහපරිෂ්වංගාද්වර්තිරාර්ද්රාපි දහ්යතේ ॥ 115 ॥
යදි ගච්ඡති පාතාලං තතෝऽභ්යධිකමේව වා ।
සර්වථා රාවණස්තාවන්න භවිෂ්යති රාඝව ॥ 116 ॥
ප්රවෘත්තිර්ලභ්යතාං තාවත්තස්ය පාපස්ය රක්ෂසඃ ।
තතෝ හාස්යති වා සීතාං නිධනං වා ගමිෂ්යති ॥ 117 ॥
යදි යාතිදිතේර්ගර්භං රාවණස්සහ සීතයා ।
තත්රාප්යේනං හනිෂ්යාමි න චේද්දාස්යති මෛථිලීම් ॥ 118 ॥
ස්වාස්ථ්යං භද්රං භජස්වාර්ය ත්යජ්යතාං කෘපණා මතිඃ ।
අර්ථෝ හි නෂ්ටකාර්යාර්ථෛර්නායත්නේනාධිගම්යතේ ॥ 119 ॥
උත්සාහෝ බලවානාර්ය නාස්ත්යුත්සාහාත්පරං බලම් ।
සෝත්සාහස්යාස්ති ලෝකේऽස්මින් න කිංචිදපි දුර්ලභම් ॥ 120 ॥
උත්සාහවංතඃ පුරුෂා නාවසීදංති කර්මසු ।
උත්සාහමාත්රමාශ්රිත්ය සීතාං ප්රතිලභේමහි ॥ 121 ॥
ත්යජ්යතාං කාමවෘත්තත්වං ශෝකං සන්න්යස්ය පෘෂ්ඨතඃ ।
මහාත්මානං කෘතාත්මානමාත්මානං නාවබුධ්යසේ ॥ 122 ॥
ඒවං සංබෝධිතස්තත්ර ශෝකෝපහතචේතනඃ ।
ත්යජ්ය ශෝකංච මෝහංච තතෝ ධෛර්යමුපාගමත් ॥ 123 ॥
සෝऽභ්යතික්රාමදව්යග්රස්තාමචිංත්යපරාක්රමඃ ।
රාමඃ පංපාං සුරුචිරාං රම්යපාරිප්ලවද්රුමාම් ॥ 124 ॥
නිරීක්ෂමාණස්සහසා මහාත්මා සර්වං වනං නිර්ඣරකංදරාශ්ච ।
උද්විග්නචේතාස්සහ ලක්ෂ්මණේන විචාර්ය දුඃඛෝපහතඃ ප්රතස්ථේ ॥ 125 ॥
තං මත්තමාතංගවිලාසගාමී ගච්ඡංතමව්යග්රමනා මහාත්මා ।
ස ලක්ෂ්මණෝ රාඝවමප්රමත්තෝ රරක්ෂ ධර්මේණ බලේන චෛව ॥ 126 ॥
තාවෘෂ්යමූකස්ය සමීපචාරී චරංදදර්ශාද්භුතදර්ශනීයෞ ।
ශාඛාමෘගාණාමධිපස්තරස්වී විතත්රසේ නෛව චිචේෂ්ට කිංචිත් ॥ 127 ॥
ස තෞ මහාත්මා ගජමංදගාමී ශාඛාමෘගස්තත්ර චරංචරංතෞ ।
දෘෂ්ට්වා විෂාදං පරමං ජගාම චිංතාපරීතෝ භයභාරමග්නඃ ॥ 128 ॥
තමාශ්රමං පුණ්යසුඛං ශරණ්යං සදෛව ශාඛාමෘගසේවිතාංතම් ।
ත්රස්තාශ්ච දෘෂ්ට්වා හරයෝऽභිජග්මුර්මහෞජසෞ රාඝවලක්ෂ්මණෞ තෞ ॥ 129 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ප්රථමස්සර්ගඃ ॥
