শ্রীমদ্বাল্মীকীয় রামাযণে কিষ্কিংধাকাংডম্ ।
অথ একোনবিংশস্সর্গঃ ।
স বানরমহারাজশ্শয়ানশ্শরবিক্ষতঃ ।
প্রত্য়ুক্তো হেতুমদ্বাক্য়ৈর্নোত্তরং প্রত্যপদ্যত ॥ 1 ॥
অশ্মভিঃ প্রবিভিন্নাংগঃ পাদপৈরাহতো ভৃশম্ ।
রামবাণেন চাক্রাংতো জীবিতাংতে মুমোহ সঃ ॥ 2 ॥
তং ভার্য়া বাণমোক্ষেণ রামদত্তেন সংয়ুগে ।
হতং প্লবগশার্দূলং তারা শুশ্রাব বালিনম্ ॥ 3 ॥
সা সপুত্রাপ্রিয়ং শ্রুত্বা বধং ভর্তুস্সুদারুণম্ ।
নিষ্পপাত ভৃশং তস্মাদ্বিবিধা গিরিগহ্বরাত্ ॥ 4 ॥
যে ত্বংগদপরীবারা বানরা ভীমবিক্রমাঃ ।
তে সকার্মুকমালোক্য় রামং ত্রস্তাঃ প্রদুদ্রুবুঃ ॥ 5 ॥
সা দদর্শ ততস্ত্রস্তান্হরীনাপততো ভৃশম্ ।
যূথাদিব পরিভ্রষ্টান্মৃগান্নিহতয়ূথপান্ ॥ 6 ॥
তানুবাচ সমাসাদ্য় দুঃখিতাংদুখিতা সতী ।
রামবিত্রাসিতান্সর্বাননুবদ্ধানিবেষুভিঃ ॥ 7 ॥
বানরাঃ রাজসিংহস্য় যস্য় যূয়ং পুরস্সরাঃ ।
তং বিহায় সুসংত্রস্তাঃ কস্মাদ্দ্রবথ দুর্গতাঃ ॥ 8 ॥
রাজ্যহেতোস্স চেদ্ভ্রাতা ভ্রাত্রা রৌদ্রেণ পাতিতঃ ।
রামেণ প্রহিতৈরৌদ্রৈর্মার্গণৈর্দূরপাতিভিঃ ॥ 9 ॥
কপিপত্ন্য়া বচশ্শ্রুত্বা কপয়ঃ কামরূপিণঃ ।
প্রাপ্তকালমবিক্লিষ্টমূচুর্বচনমংগনাম্ ॥ 10 ॥
জীবপুত্রে নিবর্তস্ব পুত্রং রক্ষস্ব চাংগদম্ ।
অংতকো রামরূপেণ হত্বা নযতি বালিনম্ ॥ 11 ॥
ক্ষিপ্তান্ বৃক্ষান্সমাবিধ্য় বিপুলাশ্চ শিলাস্তথা ।
বালী বজ্রসমৈর্বাণৈ রামেণ বিনিপাতিতঃ ॥ 12 ॥
অভিদ্রুতমিদং সর্বং বিদ্রুতং প্রসৃতং বলম্ ।
অস্মিন্ প্লবগশার্দূলে হতে শক্রসমপ্রভে ॥ 13 ॥
রক্ষ্যতাং নগরদ্বারমংগদশ্চাভিষিচ্যতাম্ ।
পদস্থং বালিনঃ পুত্রং ভজিষ্য়ংতি প্লবংগমাঃ ॥ 14 ॥
অথবাঽরুচিতং স্থানমিহ তে রুচিরাননে ।
আবিশংতি হি দুর্গাণি ক্ষিপ্রমন্য়ানি বানরাঃ ॥ 15 ॥
অভার্য়াশ্চ সভার্য়াশ্চ সংত্যত্র বনচারিণঃ ।
লুব্ধেভ্য়ো বিপ্রয়ুক্তেভ্যস্তেভ্য়ো নস্তুমুলং ভযম্ ॥ 16 ॥
অল্পাংতরগতানাং তু শ্রুত্বা বচনমংগনা ।
আত্মনঃ প্রতিরূপং সা বভাষে চারুহাসিনী ॥ 17 ॥
পুত্রেণ মম কিং কার্য়ং রাজ্য়েনচ কিমাত্মনা ।
কপিসিংহে মহাভাগে তস্মিন্ভর্তরি নশ্যতি ॥ 18 ॥
পাদমূলং গমিষ্য়ামি তস্য়ৈবাহং মহাত্মনঃ ।
যোঽসৌ রামপ্রয়ুক্তেন শরেণ বিনিপাতিতঃ ॥ 19 ॥
এবমুক্ত্বা প্রদুদ্রাব রুদংতী শোককর্শিতা ।
শিরশ্চোরশ্চ বাহুভ্য়াং দুঃখেন সমভিধ্নতী ॥ 20 ॥
আব্রজংতী দদর্শাথ পতিং নিপতিতং ভুবি ।
হংতারং দানবেংদ্রাণাং সমরেষ্বনিবর্তিনম্ ॥ 21 ॥
ক্ষেপ্তারং পর্বতেংদ্রাণাং বজ্রাণামিব বাসবম্ ।
মহাবাতসমাবিষ্টং মহামেঘৌঘনিস্স্বনম্ ॥ 22 ॥
ক্রতুল্যপরাক্রাংতং বৃষ্টবেবোপরতং ঘনম্ ।
নর্দংতং নর্দতাং ভীমং শূরং শূরেণ পাতিতম্ ॥ 23 ॥
শার্দূলেনামিষস্য়ার্থে মৃগরাজং যথাহতম্ ।
অর্চিতং সর্বলোকস্য় সপতাকং সবেদিকম্ ॥ 24 ॥
নাগহেতোস্সুপর্ণেন চৈত্যমুন্মথিতং যথা ।
অবষ্টভ্য় চ তিষ্ঠংতং দদর্শ ধনুরুত্তম্ ॥ 25 ॥
রামং রামানুজং চৈব ভর্তুশ্চৈবানুজং শুভা ।
তাবতীত্য় সমাসাদ্য় ভর্তারং নিহতং রণে ॥ 26 ॥
সমীক্ষ্য় ব্যথিতা ভূমৌ সংভ্রাংতা নিপপাত হ ।
সুপ্ত্বেব পুনরুত্থায় আর্যপুত্রেতি শোচতী ॥ 27 ॥
রুরোদ সা পতিং দৃষ্ট্বা সংবীতং মৃত্য়ুদামভিঃ ।
তামবেক্ষ্য় তু সুগ্রীবঃ ক্রোশংতীং কুররীমিব ।
বিষাদমগমত্কষ্টং দৃষ্ট্বা চাংগদমাগতম্ ॥ 28 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে একোনবিংশস্সর্গঃ ॥
