ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଏକୋନଵିଂଶସ୍ସର୍ଗଃ ।
ସ ଵାନରମହାରାଜଶ୍ଶୟାନଶ୍ଶରଵିକ୍ଷତଃ ।
ପ୍ରତ୍ୟୁକ୍ତୋ ହେତୁମଦ୍ଵାକ୍ୟୈର୍ନୋତ୍ତରଂ ପ୍ରତ୍ୟପଦ୍ୟତ ॥ 1 ॥
ଅଶ୍ମଭିଃ ପ୍ରଵିଭିନ୍ନାଂଗଃ ପାଦପୈରାହତୋ ଭୃଶମ୍ ।
ରାମବାଣେନ ଚାକ୍ରାଂତୋ ଜୀଵିତାଂତେ ମୁମୋହ ସଃ ॥ 2 ॥
ତଂ ଭାର୍ୟା ବାଣମୋକ୍ଷେଣ ରାମଦତ୍ତେନ ସଂୟୁଗେ ।
ହତଂ ପ୍ଲଵଗଶାର୍ଦୂଲଂ ତାରା ଶୁଶ୍ରାଵ ଵାଲିନମ୍ ॥ 3 ॥
ସା ସପୁତ୍ରାପ୍ରିୟଂ ଶ୍ରୁତ୍ଵା ଵଧଂ ଭର୍ତୁସ୍ସୁଦାରୁଣମ୍ ।
ନିଷ୍ପପାତ ଭୃଶଂ ତସ୍ମାଦ୍ଵିଵିଧା ଗିରିଗହ୍ଵରାତ୍ ॥ 4 ॥
ୟେ ତ୍ଵଂଗଦପରୀଵାରା ଵାନରା ଭୀମଵିକ୍ରମାଃ ।
ତେ ସକାର୍ମୁକମାଲୋକ୍ୟ ରାମଂ ତ୍ରସ୍ତାଃ ପ୍ରଦୁଦ୍ରୁଵୁଃ ॥ 5 ॥
ସା ଦଦର୍ଶ ତତସ୍ତ୍ରସ୍ତାନ୍ହରୀନାପତତୋ ଭୃଶମ୍ ।
ୟୂଥାଦିଵ ପରିଭ୍ରଷ୍ଟାନ୍ମୃଗାନ୍ନିହତୟୂଥପାନ୍ ॥ 6 ॥
ତାନୁଵାଚ ସମାସାଦ୍ୟ ଦୁଃଖିତାଂଦୁଖିତା ସତୀ ।
ରାମଵିତ୍ରାସିତାନ୍ସର୍ଵାନନୁବଦ୍ଧାନିଵେଷୁଭିଃ ॥ 7 ॥
ଵାନରାଃ ରାଜସିଂହସ୍ୟ ୟସ୍ୟ ୟୂୟଂ ପୁରସ୍ସରାଃ ।
ତଂ ଵିହାୟ ସୁସଂତ୍ରସ୍ତାଃ କସ୍ମାଦ୍ଦ୍ରଵଥ ଦୁର୍ଗତାଃ ॥ 8 ॥
ରାଜ୍ୟହେତୋସ୍ସ ଚେଦ୍ଭ୍ରାତା ଭ୍ରାତ୍ରା ରୌଦ୍ରେଣ ପାତିତଃ ।
ରାମେଣ ପ୍ରହିତୈରୌଦ୍ରୈର୍ମାର୍ଗଣୈର୍ଦୂରପାତିଭିଃ ॥ 9 ॥
କପିପତ୍ନ୍ୟା ଵଚଶ୍ଶ୍ରୁତ୍ଵା କପୟଃ କାମରୂପିଣଃ ।
ପ୍ରାପ୍ତକାଲମଵିକ୍ଲିଷ୍ଟମୂଚୁର୍ଵଚନମଂଗନାମ୍ ॥ 10 ॥
ଜୀଵପୁତ୍ରେ ନିଵର୍ତସ୍ଵ ପୁତ୍ରଂ ରକ୍ଷସ୍ଵ ଚାଂଗଦମ୍ ।
ଅଂତକୋ ରାମରୂପେଣ ହତ୍ଵା ନୟତି ଵାଲିନମ୍ ॥ 11 ॥
କ୍ଷିପ୍ତାନ୍ ଵୃକ୍ଷାନ୍ସମାଵିଧ୍ୟ ଵିପୁଲାଶ୍ଚ ଶିଲାସ୍ତଥା ।
ଵାଲୀ ଵଜ୍ରସମୈର୍ବାଣୈ ରାମେଣ ଵିନିପାତିତଃ ॥ 12 ॥
ଅଭିଦ୍ରୁତମିଦଂ ସର୍ଵଂ ଵିଦ୍ରୁତଂ ପ୍ରସୃତଂ ବଲମ୍ ।
ଅସ୍ମିନ୍ ପ୍ଲଵଗଶାର୍ଦୂଲେ ହତେ ଶକ୍ରସମପ୍ରଭେ ॥ 13 ॥
ରକ୍ଷ୍ୟତାଂ ନଗରଦ୍ଵାରମଂଗଦଶ୍ଚାଭିଷିଚ୍ୟତାମ୍ ।
ପଦସ୍ଥଂ ଵାଲିନଃ ପୁତ୍ରଂ ଭଜିଷ୍ୟଂତି ପ୍ଲଵଂଗମାଃ ॥ 14 ॥
ଅଥଵାଽରୁଚିତଂ ସ୍ଥାନମିହ ତେ ରୁଚିରାନନେ ।
ଆଵିଶଂତି ହି ଦୁର୍ଗାଣି କ୍ଷିପ୍ରମନ୍ୟାନି ଵାନରାଃ ॥ 15 ॥
ଅଭାର୍ୟାଶ୍ଚ ସଭାର୍ୟାଶ୍ଚ ସଂତ୍ୟତ୍ର ଵନଚାରିଣଃ ।
ଲୁବ୍ଧେଭ୍ୟୋ ଵିପ୍ରୟୁକ୍ତେଭ୍ୟସ୍ତେଭ୍ୟୋ ନସ୍ତୁମୁଲଂ ଭୟମ୍ ॥ 16 ॥
ଅଲ୍ପାଂତରଗତାନାଂ ତୁ ଶ୍ରୁତ୍ଵା ଵଚନମଂଗନା ।
ଆତ୍ମନଃ ପ୍ରତିରୂପଂ ସା ବଭାଷେ ଚାରୁହାସିନୀ ॥ 17 ॥
ପୁତ୍ରେଣ ମମ କିଂ କାର୍ୟଂ ରାଜ୍ୟେନଚ କିମାତ୍ମନା ।
କପିସିଂହେ ମହାଭାଗେ ତସ୍ମିନ୍ଭର୍ତରି ନଶ୍ୟତି ॥ 18 ॥
ପାଦମୂଲଂ ଗମିଷ୍ୟାମି ତସ୍ୟୈଵାହଂ ମହାତ୍ମନଃ ।
ୟୋଽସୌ ରାମପ୍ରୟୁକ୍ତେନ ଶରେଣ ଵିନିପାତିତଃ ॥ 19 ॥
ଏଵମୁକ୍ତ୍ଵା ପ୍ରଦୁଦ୍ରାଵ ରୁଦଂତୀ ଶୋକକର୍ଶିତା ।
ଶିରଶ୍ଚୋରଶ୍ଚ ବାହୁଭ୍ୟାଂ ଦୁଃଖେନ ସମଭିଧ୍ନତୀ ॥ 20 ॥
ଆଵ୍ରଜଂତୀ ଦଦର୍ଶାଥ ପତିଂ ନିପତିତଂ ଭୁଵି ।
ହଂତାରଂ ଦାନଵେଂଦ୍ରାଣାଂ ସମରେଷ୍ଵନିଵର୍ତିନମ୍ ॥ 21 ॥
କ୍ଷେପ୍ତାରଂ ପର୍ଵତେଂଦ୍ରାଣାଂ ଵଜ୍ରାଣାମିଵ ଵାସଵମ୍ ।
ମହାଵାତସମାଵିଷ୍ଟଂ ମହାମେଘୌଘନିସ୍ସ୍ଵନମ୍ ॥ 22 ॥
କ୍ରତୁଲ୍ୟପରାକ୍ରାଂତଂ ଵୃଷ୍ଟଵେଵୋପରତଂ ଘନମ୍ ।
ନର୍ଦଂତଂ ନର୍ଦତାଂ ଭୀମଂ ଶୂରଂ ଶୂରେଣ ପାତିତମ୍ ॥ 23 ॥
ଶାର୍ଦୂଲେନାମିଷସ୍ୟାର୍ଥେ ମୃଗରାଜଂ ୟଥାହତମ୍ ।
ଅର୍ଚିତଂ ସର୍ଵଲୋକସ୍ୟ ସପତାକଂ ସଵେଦିକମ୍ ॥ 24 ॥
ନାଗହେତୋସ୍ସୁପର୍ଣେନ ଚୈତ୍ୟମୁନ୍ମଥିତଂ ୟଥା ।
ଅଵଷ୍ଟଭ୍ୟ ଚ ତିଷ୍ଠଂତଂ ଦଦର୍ଶ ଧନୁରୁତ୍ତମ୍ ॥ 25 ॥
ରାମଂ ରାମାନୁଜଂ ଚୈଵ ଭର୍ତୁଶ୍ଚୈଵାନୁଜଂ ଶୁଭା ।
ତାଵତୀତ୍ୟ ସମାସାଦ୍ୟ ଭର୍ତାରଂ ନିହତଂ ରଣେ ॥ 26 ॥
ସମୀକ୍ଷ୍ୟ ଵ୍ୟଥିତା ଭୂମୌ ସଂଭ୍ରାଂତା ନିପପାତ ହ ।
ସୁପ୍ତ୍ଵେଵ ପୁନରୁତ୍ଥାୟ ଆର୍ୟପୁତ୍ରେତି ଶୋଚତୀ ॥ 27 ॥
ରୁରୋଦ ସା ପତିଂ ଦୃଷ୍ଟ୍ଵା ସଂଵୀତଂ ମୃତ୍ୟୁଦାମଭିଃ ।
ତାମଵେକ୍ଷ୍ୟ ତୁ ସୁଗ୍ରୀଵଃ କ୍ରୋଶଂତୀଂ କୁରରୀମିଵ ।
ଵିଷାଦମଗମତ୍କଷ୍ଟଂ ଦୃଷ୍ଟ୍ଵା ଚାଂଗଦମାଗତମ୍ ॥ 28 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଏକୋନଵିଂଶସ୍ସର୍ଗଃ ॥
