ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ද්විතීයස්සර්ගඃ ।
තෞ තු දෘෂ්ට්වා මහාත්මානෞ භ්රාතරෞ රාමලක්ෂ්මණෞ ।
වරායුධධරෞ වීරෞ සුග්රීවශ්ශංකිතෝऽභවත් ॥ 1 ॥
උද්විග්නහෘදයස්සර්වා දිශස්සමවලෝකයන් ।
න ව්යතිෂ්ඨත කස්මිංශ්චිද්දේශේ වානරපුංගවඃ ॥ 2 ॥
නෛව චක්රේ මනඃ ස්ථාතුං වීක්ෂමාණෝ මහාබලෞ ।
කපේඃ පරමභීතස්ය චිත්තං ව්යවසසාද හ ॥ 3 ॥
චිංතයිත්වා ස ධර්මාත්මා විමෘශ්ය ගුරුලාඝවම් ।
සුග්රීවඃ පරමෝද්විග්නස්සර්වෛරනුචරෛස්සහ ॥ 4 ॥
තතස්ස සචිවේභ්යස්තු සුග්රීවඃ ප්ලවගාධිපඃ ।
ශශංස පරමෝද්විග්නඃ පශ්යංස්තෞ රාමලක්ෂ්මණෞ ॥ 5 ॥
ඒතෞ වනමිදං දුර්ගං වාලිප්රණිහිතෞ ධ්රුවම් ।
ඡද්මනා චීරවසනෞ ප්රචරංතාවිහාගතෞ ॥ 6 ॥
තතස්සුග්රීවසචිවා දෘෂ්ට්වා පරමධන්විනෞ ।
ජග්මුර්ගිරිතටාත්තස්මාදන්යච්ඡිඛරමුත්තමම් ॥ 7 ॥
තේ ක්ෂිප්රමධිගම්යාථ යූථපා යූථපර්ෂභම් ।
හරයෝ වානරශ්රේෂ්ඨං පරිවාර්යෝපතස්ථිරේ ॥ 8 ॥
ඒකමේකායනගතාඃ ප්ලවමානා ගිරේර්ගිරිම් ।
ප්රකංපයංතෝ වේගේන ගිරීණාං ශිඛරාණ්යපි ॥ 9 ॥
තතශ්ශාඛාමෘගාස්සර්වේ ප්ලවමානා මහාබලාඃ ।
බභංජුශ්ච නගාංස්තත්ර පුෂ්පිතාංදුර්ගසංශ්රිතාන් ॥ 10 ॥
ආප්ලවංතෝ හරිවරාස්සර්වතස්තං මහාගිරිම් ।
මෘගමාර්ජාරශාර්දූලාංස්ත්රාසයංතෝ යයුස්තදා ॥ 11 ॥
තතස්සුග්රීවසචිවාඃ පර්වතේංද්රං සමාශ්රිතාඃ ।
සංගම්ය කපිමුඛ්යේන සර්වේ ප්රාංජලය ස්ථිතාඃ ॥ 12 ॥
තතස්තං භයසංවිග්නං වාලිකිල්බිෂශංකිතම් ।
උවාච හනුමාන්වාක්යං සුග්රීවං වාක්යකෝවිදඃ ॥ 13 ॥
සංභ්රමස්ත්යජ්යතාමේෂ සර්වෛර්වාලිකෘතේ මහාන් ।
මලයෝऽයං ගිරිවරෝ භයං නේහාස්ති වාලිනඃ ॥ 14 ॥
යස්මාදුද්විග්නචේතාස්ත්වං ප්රද්රුතෝ හරිපුංගව ।
තං ක්රූරදර්ශනං ක්රූරං නේහ පශ්යාමි වාලිනම් ॥ 15 ॥
යස්මාත්තව භයං සෞම්ය පූර්වජාත්පාපකර්මණඃ ।
ස නේහ වාලී දුෂ්ටාත්මා න තේ පශ්යාම්යහං භයම් ॥ 16 ॥
අහෝ ශාඛාමෘගත්වං තේ ව්යක්තමේව ප්ලවංගම ।
ලඝුචිත්තතයාऽත්මානං න ස්ථාපයසි යෝ මතෞ ॥ 17 ॥
බුද්ධිවිජ්ඤානසංපන්න ඉංගිතෛස්සර්වමාචර ।
න හ්යබුද්ධිං ගතෝ රාජා සර්වභූතානි ශාස්ති හි ॥ 18 ॥
සුග්රීවස්තු ශුභං වාක්යං ශ්රුත්වා සර්වං හනූමතඃ ।
තතශ්ශුභතරං වාක්යං හනූමංතමුවාච හ ॥ 19 ॥
දීර්ඝබාහූ විශාලාක්ෂෞ ශරචාපාසිධාරිණෞ ।
කස්ය න ස්යාද්භයං දෘෂ්ට්වා හ්යේතෞ සුරසුතෝපමෞ ॥ 20 ॥
වාලිප්රණිහිතාවේතෞ ශංකේऽහං පුරුෂෝත්තමෞ ।
රාජානෝ බහුමිත්රාශ්ච විශ්වාසෝ නාත්ර හි ක්ෂමඃ ॥ 21 ॥
අරයශ්ච මනුෂ්යේණ විජ්ඤේයාශ්ඡද්මචාරිණඃ ।
විශ්වස්තානාමවිශ්වස්තාරංධ්රේෂු ප්රහරංති හි ॥ 22 ॥
කෘත්යේෂු වාලී මේධාවී රාජානෝ බහුදර්ශිනඃ ।
භවංති පරහංතාරස්තේ ජ්ඤේයාඃ ප්රාකෘතෛර්නරෛඃ ॥ 23 ॥
තෞ ත්වයා ප්රාකෘතේනෛව ගත්වා ජ්ඤේයෞ ප්ලවංගම ।
ඉංගිතානාං ප්රකාරෛශ්ච රූපව්යාභාෂණේන ච ॥ 24 ॥
ලක්ෂයස්ව තයෝර්භාවං ප්රහෘෂ්ටමනසෞ යදි ।
විශ්වාසයන්ප්රශංසාභිරිංගිතෛශ්ච පුනඃ පුනඃ ॥ 25 ॥
මමෛවාභිමුඛං ස්ථිත්වා පෘච්ඡ ත්වං හරිපුංගව ।
ප්රයෝජනං ප්රවේශස්ය වනස්යාස්ය ධනුර්ධරෞ ॥ 26 ॥
ශුද්ධාත්මානෞ යදි ත්වේතෞ ජානීහි ත්වං ප්ලවංගම ।
ව්යාභාෂිතෛර්වා විජ්ඤේයා ස්යාද්දුෂ්ටාऽදුෂ්ටතා තයෝඃ ॥ 27 ॥
ඉත්යේවං කපිරාජේන සංදිෂ්ටෝ මාරුතාත්මජඃ ।
චකාර ගමනේ බුද්ධිං යත්ර තෞ රාමලක්ෂ්මණෞ ॥ 28 ॥
තථේති සංපූජ්ය වචස්තු තස්ය තත්කපේස්සුභීමස්ය දුරාසදස්ය ච ।
මහානුභාවෝ හනුමාන්යයෞ තදා ස යත්ර රාමෝऽතිබලශ්ච ලක්ෂ්මණඃ ॥ 29 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ද්විතීයස්සර්ගඃ ॥
