শ্রীমদ্বাল্মীকীয় রামাযণে কিষ্কিংধাকাংডম্ ।
অথ দ্বিতীযস্সর্গঃ ।
তৌ তু দৃষ্ট্বা মহাত্মানৌ ভ্রাতরৌ রামলক্ষ্মণৌ ।
বরায়ুধধরৌ বীরৌ সুগ্রীবশ্শংকিতোঽভবত্ ॥ 1 ॥
উদ্বিগ্নহৃদযস্সর্বা দিশস্সমবলোকযন্ ।
ন ব্যতিষ্ঠত কস্মিংশ্চিদ্দেশে বানরপুংগবঃ ॥ 2 ॥
নৈব চক্রে মনঃ স্থাতুং বীক্ষমাণো মহাবলৌ ।
কপেঃ পরমভীতস্য় চিত্তং ব্যবসসাদ হ ॥ 3 ॥
চিংতয়িত্বা স ধর্মাত্মা বিমৃশ্য় গুরুলাঘবম্ ।
সুগ্রীবঃ পরমোদ্বিগ্নস্সর্বৈরনুচরৈস্সহ ॥ 4 ॥
ততস্স সচিবেভ্যস্তু সুগ্রীবঃ প্লবগাধিপঃ ।
শশংস পরমোদ্বিগ্নঃ পশ্য়ংস্তৌ রামলক্ষ্মণৌ ॥ 5 ॥
এতৌ বনমিদং দুর্গং বালিপ্রণিহিতৌ ধ্রুবম্ ।
ছদ্মনা চীরবসনৌ প্রচরংতাবিহাগতৌ ॥ 6 ॥
ততস্সুগ্রীবসচিবা দৃষ্ট্বা পরমধন্বিনৌ ।
জগ্মুর্গিরিতটাত্তস্মাদন্যচ্ছিখরমুত্তমম্ ॥ 7 ॥
তে ক্ষিপ্রমধিগম্য়াথ যূথপা যূথপর্ষভম্ ।
হরয়ো বানরশ্রেষ্ঠং পরিবার্য়োপতস্থিরে ॥ 8 ॥
একমেকাযনগতাঃ প্লবমানা গিরের্গিরিম্ ।
প্রকংপয়ংতো বেগেন গিরীণাং শিখরাণ্যপি ॥ 9 ॥
ততশ্শাখামৃগাস্সর্বে প্লবমানা মহাবলাঃ ।
বভংজুশ্চ নগাংস্তত্র পুষ্পিতাংদুর্গসংশ্রিতান্ ॥ 10 ॥
আপ্লবংতো হরিবরাস্সর্বতস্তং মহাগিরিম্ ।
মৃগমার্জারশার্দূলাংস্ত্রাসয়ংতো যয়ুস্তদা ॥ 11 ॥
ততস্সুগ্রীবসচিবাঃ পর্বতেংদ্রং সমাশ্রিতাঃ ।
সংগম্য় কপিমুখ্য়েন সর্বে প্রাংজলয় স্থিতাঃ ॥ 12 ॥
ততস্তং ভযসংবিগ্নং বালিকিল্বিষশংকিতম্ ।
উবাচ হনুমান্বাক্য়ং সুগ্রীবং বাক্যকোবিদঃ ॥ 13 ॥
সংভ্রমস্ত্যজ্যতামেষ সর্বৈর্বালিকৃতে মহান্ ।
মলয়োঽয়ং গিরিবরো ভয়ং নেহাস্তি বালিনঃ ॥ 14 ॥
যস্মাদুদ্বিগ্নচেতাস্ত্বং প্রদ্রুতো হরিপুংগব ।
তং ক্রূরদর্শনং ক্রূরং নেহ পশ্য়ামি বালিনম্ ॥ 15 ॥
যস্মাত্তব ভয়ং সৌম্য় পূর্বজাত্পাপকর্মণঃ ।
স নেহ বালী দুষ্টাত্মা ন তে পশ্য়াম্যহং ভযম্ ॥ 16 ॥
অহো শাখামৃগত্বং তে ব্যক্তমেব প্লবংগম ।
লঘুচিত্ততয়াঽত্মানং ন স্থাপযসি যো মতৌ ॥ 17 ॥
বুদ্ধিবিজ্ঞানসংপন্ন ইংগিতৈস্সর্বমাচর ।
ন হ্যবুদ্ধিং গতো রাজা সর্বভূতানি শাস্তি হি ॥ 18 ॥
সুগ্রীবস্তু শুভং বাক্য়ং শ্রুত্বা সর্বং হনূমতঃ ।
ততশ্শুভতরং বাক্য়ং হনূমংতমুবাচ হ ॥ 19 ॥
দীর্ঘবাহূ বিশালাক্ষৌ শরচাপাসিধারিণৌ ।
কস্য় ন স্য়াদ্ভয়ং দৃষ্ট্বা হ্য়েতৌ সুরসুতোপমৌ ॥ 20 ॥
বালিপ্রণিহিতাবেতৌ শংকেঽহং পুরুষোত্তমৌ ।
রাজানো বহুমিত্রাশ্চ বিশ্বাসো নাত্র হি ক্ষমঃ ॥ 21 ॥
অরযশ্চ মনুষ্য়েণ বিজ্ঞেয়াশ্ছদ্মচারিণঃ ।
বিশ্বস্তানামবিশ্বস্তারংধ্রেষু প্রহরংতি হি ॥ 22 ॥
কৃত্য়েষু বালী মেধাবী রাজানো বহুদর্শিনঃ ।
ভবংতি পরহংতারস্তে জ্ঞেয়াঃ প্রাকৃতৈর্নরৈঃ ॥ 23 ॥
তৌ ত্বয়া প্রাকৃতেনৈব গত্বা জ্ঞেয়ৌ প্লবংগম ।
ইংগিতানাং প্রকারৈশ্চ রূপব্য়াভাষণেন চ ॥ 24 ॥
লক্ষযস্ব তয়োর্ভাবং প্রহৃষ্টমনসৌ যদি ।
বিশ্বাসযন্প্রশংসাভিরিংগিতৈশ্চ পুনঃ পুনঃ ॥ 25 ॥
মমৈবাভিমুখং স্থিত্বা পৃচ্ছ ত্বং হরিপুংগব ।
প্রয়োজনং প্রবেশস্য় বনস্য়াস্য় ধনুর্ধরৌ ॥ 26 ॥
শুদ্ধাত্মানৌ যদি ত্বেতৌ জানীহি ত্বং প্লবংগম ।
ব্য়াভাষিতৈর্বা বিজ্ঞেয়া স্য়াদ্দুষ্টাঽদুষ্টতা তয়োঃ ॥ 27 ॥
ইত্য়েবং কপিরাজেন সংদিষ্টো মারুতাত্মজঃ ।
চকার গমনে বুদ্ধিং যত্র তৌ রামলক্ষ্মণৌ ॥ 28 ॥
তথেতি সংপূজ্য় বচস্তু তস্য় তত্কপেস্সুভীমস্য় দুরাসদস্য় চ ।
মহানুভাবো হনুমান্যয়ৌ তদা স যত্র রামোঽতিবলশ্চ লক্ষ্মণঃ ॥ 29 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে দ্বিতীযস্সর্গঃ ॥
