ශ්රීමද්වාල්මීකීය රාමායණේ කිෂ්කිංධාකාංඩම් ।
අථ සප්තවිංශස්සර්ගඃ ।
අභිෂික්තේ තු සුග්රීවේ ප්රවිෂ්ටේ වානරේ ගුහාම් ।
ආජගාම සහ භ්රාත්රා රාමඃ ප්රස්රවණං ගිරිම් ॥ 1 ॥
ශාර්දූලමෘගසංඝුෂ්ටං සිංහෛර්භීමරවෛර්වෘතම් ।
නානාගුල්මලතාගූඪං බහුපාදපසංකුලම් ॥ 2 ॥
ඍක්ෂවානරගෝපුච්ඡෛර්මාර්ජාරෛශ්ච නිෂේවිතම් ।
මේඝරාශිනිභං ශෛලං නිත්යං ශුචිජලාශයම් ॥ 3 ॥
තස්ය ශෛලස්ය ශිඛරේ මහතීමායතාං ගුහාම් ।
ප්රත්යගෘහ්ණත වාසාර්ථං රාමස්සෞමිත්රිණා සහ ॥ 4 ॥
කෘත්වා ච සමයං රාමස්සුග්රීවේණ සහානඝඃ ।
කාලයුක්තං මහද්වාක්යමුවාච රඝුනංදනඃ ॥ 5 ॥
විනීතං භ්රාතරං භ්රාතා ලක්ෂ්මණං ලක්ෂ්මිවර්ධනම් ।
ඉයං ගිරිගුහා රම්යා විශාලා යුක්තමාරුතා ।
අස්යාං වත්ස්යාම සෞමිත්රේ වර්ෂරාත්රමරිංදම ॥ 6 ॥
ගිරිශෘංගමිදං රම්යමුන්නතං පාර්ථිවාත්මජ ॥ 7 ॥
ශ්වේතාභිඃ කෘෂ්ණතාම්රාභිශ්ශිලාභිරුපශෝභිතම් ।
නානාධාතුසමාකීර්ණං දරීනිර්ඣරශෝභිතම් ॥ 8 ॥
විවිධෛර්වෘක්ෂෂංඩෛශ්ච චාරුචිත්රලතායුතම් ।
නානාවිහගසංඝුෂ්ටං මයූරරවනාදිතම් ॥ 9 ॥
මාලතීකුංදගුල්මෛශ්ච සිංධුවාරෛශ්ශිරීෂකෛඃ ।
කදංබාර්ජුනසර්ජෛශ්ච පුෂ්පිතෛරුපශෝභිතම් ॥ 10 ॥
ඉයං ච නලිනී රම්යා ඵුල්ලපංකජමංඩිතා ।
නාතිදූරේ ගුහායානෞ භවිෂ්යති නෘපාත්මජ ॥ 11 ॥
ප්රාගුදක්ප්රවණේ දේශේ ගුහා සාධු භවිෂ්යති ।
පශ්චාච්චෛවෝන්නතා සෞම්ය නිවාතේයං භවිෂ්යති ॥ 12 ॥
ගුහාද්වාරේ ච සෞමිත්රේ ශිලා සමතලා ශුභා ।
ශ්ලක්ෂ්ණා චෛවායතා චෛව භින්නාංජනචයෝපමා ॥ 13 ॥
ගිරිශෘංගමිදං තාත පශ්ය චෝත්තරතඃ ශුභම් ।
භින්නාංජනචයාකාරමංභෝධරමිවෝත්ථිතම් ॥ 14 ॥
දක්ෂිණස්යාමපි දිශි ස්ථිතං ශ්වේතමිවාපරම් ।
කෛලාසශිඛරප්රඛ්යං නානාධාතුවිභූෂිතම් ॥ 15 ॥
ප්රාචීනවාහිනීං චෛව නදීං භෘශමකර්දමාම් ।
ගුහායාඃ පූර්වතඃ පශ්ය ත්රිකූටේ ජාහ්නවීමිව ॥ 16 ॥
චංදනෛස්තිලකෛස්තාලෛස්තමාලෛරතිමුක්තකෛඃ ।
පද්මකෛඃ සරලෛශ්චෛව අශෝකෛශ්චෛව ශෝභිතාම් ॥ 17 ॥
වානීරෛස්තිමිශෛශ්චෛව වකුලෛඃ කේතකෛර්ධවෛඃ ।
හිංතාලෛස්තිනිශෛර්නීපෛර්වේත්රකෛඃ කෘතමාලකෛඃ ॥ 18 ॥
තීරජෛශ්ශෝභිතා භාති නානාරූපෛ ස්තතස්තතඃ ।
වසනාභරණෝපේතා ප්රමදේවාභ්යලංකෘතා ॥ 19 ॥
ශතශඃ පක්ෂිසංඝෛශ්ච නානානාදෛර්විනාදිතා ।
ඒකෛකමනුරක්තෛශ්ච චක්රවාකෛරලංකෘතා ॥ 20 ॥
පුලිනෛරතිරම්යෛශ්ච හංසසාරසසේවිතෛඃ ।
ප්රහසංතීවභාත්යේෂා නාරී සර්වවිභූෂිතා ॥ 21 ॥
ක්වචින්නීලෝත්පලෛශ්ඡන්නා භාති රක්තෝත්පලෛඃ ක්වචිත් ।
ක්වචිදාභාති ශුක්ලෛශ්ච දිව්යෛඃ කුමුදකුට්මලෛඃ ॥ 22 ॥
පාරිප්ලවශතෛර්ජුෂ්ටා බර්හික්රෞංචවිනාදිතා ।
රමණීයා නදී සෞම්ය මුනිසංඝෛර්නිෂේවිතා ॥ 23 ॥
පශ්ය චංදනවෘක්ෂාණාං පංක්තීස්සුරචිතා ඉව ।
කකුභානාං ච දෘශ්යංතේ මනසේවෝදිතාස්සමම් ॥ 24 ॥
අහෝ සුරමණීයෝऽයං දේශශ්ශත්රුනිෂූදන ।
දෘඪං රංස්යාව සෞමිත්රේ සාධ්වත්ර නිවසාවහෛ ॥ 25 ॥
ඉතශ්ච නාතිදූරේ සා කිෂ්කිංධා චිත්රකානනා ।
සුග්රීවස්ය පුරී රම්යා භවිෂ්යති නෘපාත්මජ ॥ 26 ॥
ගීතවාදිත්රනිර්ඝෝෂශ්ශ්රූයතේ ජයතාං වර ।
නර්දතාං වානරාණාං ච මෘදංගාඩංබරෛ ස්සහ ॥ 27 ॥
ලබ්ධ්වා භාර්යාං කපිවරඃ ප්රාප්ය රාජ්යං සුහෘද්වෘතඃ ।
ධ්රුවං නංදති සුග්රීවස්සංප්රාප්ය මහතීං ශ්රියම් ॥ 28 ॥
ඉත්යුක්ත්වා න්යවසත්තත්ර රාඝවස්සහලක්ෂ්මණඃ ।
බහුදෘශ්යදරීකුංජේ තස්මින්ප්රස්රවණේ ගිරෞ ॥ 29 ॥
සුසුඛේऽපි බහුද්රව්යේ තස්මින්හි ධරණීධරේ ।
වසතස්තස්ය රාමස්ය රතිරල්පාපිනා භවේත් ॥ 30 ॥
හෘතාං හි භාර්යාං ස්මරතඃ ප්රාණේභ්යෝऽපි ගරීයසීම් ।
උදයාභ්යුදිතං දෘෂ්ට්වා ශශාංකං ච විශේෂතඃ ॥ 31 ॥
ආවිවේශ න තං නිද්රා නිශාසු ශයනං ගතම් ।
තත්සමුත්ථේන ශෝකේන බාෂ්පෝපහතචේතසම් ॥ 32 ॥
තං ශෝචමානං කාකුත්ස්ථං නිත්යං ශෝකපරායණම් ।
තුල්යදුඃඛෝऽබ්රවීද්භ්රාතා ලක්ෂ්මණෝऽනුනයන්වචඃ ॥ 33 ॥
අලං වීර ව්යථාං ගත්වා න ත්වං ශෝචිතුමර්හසි ।
ශෝචතෝ ව්යවසීදංති සර්වාර්ථා විදිතං හි තේ ॥ 34 ॥
භවාන්ක්රියාපරෝ ලෝකේ භවාන් දේවපරායණඃ ।
ආස්තිකෝ ධර්මශීලශ්ච ව්යවසායී ච රාඝව ॥ 35 ॥
න හ්යව්යවසිතශ්ශත්රුං රාක්ෂසං තං විශේෂතඃ ।
සමර්ථස්ත්වං රණේ හංතුං වික්රමෛර්ජිහ්මකාරිණම් ॥ 36 ॥
සමුන්මූලය ශෝකං ත්වං ව්යවසායං ස්ථිරං කුරු ।
තතස්සපරිවාරං තං නිර්මූලං කුරු රාක්ෂසම් ॥ 37 ॥
පෘථිවීමපි කාකුත්ස්ථ සසාගරවනාචලාම් ।
පරිවර්තයිතුං ශක්තඃ කිමංගපුන රාවණම් ॥ 38 ॥
ශරත්කාලං ප්රතීක්ෂස්ව ප්රාවෘට්කාලෝऽයමාගතඃ ।
තතස්සරාෂ්ට්රං සගණං රාවණං ත්වං වධිෂ්යසි ॥ 39 ॥
අහං තු ඛලු තේ වීර්යං ප්රසුප්තං ප්රතිබෝධයේ ।
දීප්සෛරාහුතිභිඃ කාලේ භස්මච්ඡන්නමිවානලම් ॥ 40 ॥
ලක්ෂ්මණස්ය තු තද්වාක්යං ප්රතිපූජ්ය හිතං ශුභම් ।
රාඝවස්සුහෘදං ස්නිග්ධමිදං වචනමබ්රවීත් ॥ 41 ॥
වාච්යං යදනුරක්තේන ස්නිග්ධේන ච හිතේන ච ।
සත්යවික්රමයුක්තේන තදුක්තං ලක්ෂ්මණ ත්වයා ॥ 42 ॥
ඒෂ ශෝකඃ පරිත්යක්තස්සර්වකාර්යාවසාදකඃ ।
වික්රමේෂ්වප්රතිහතං තේජඃ ප්රෝත්සාහයාම්යහම් ॥ 43 ॥
ශරත්කාලං ප්රතීක්ෂිෂ්යේ ස්ථිතෝऽස්මි වචනේ තව ।
සුග්රීවස්ය නදීනාං ච ප්රසාදමනුපාලයන් ॥ 44 ॥
උපකාරේණ වීරස්තු ප්රතීකාරේණ යුජ්යතේ ।
අකෘතජ්ඤෝऽප්රතිකෘතෝ හංති සත්ත්වවතාං මනඃ ॥ 45 ॥
අථෛව මුක්තඃප්රණිධාය ලක්ෂ්මණඃ කෘතාංජලිස්තත්ප්රතිපූජ්ය භාෂිතම් ।
උවාච රාමං ස්වභිරාමදර්ශනං ප්රදර්ශයංදර්ශනමාත්මනශ්ශුභම් ॥ 46 ॥
යථෝක්තමේතත්තව සර්වමීප්සිතං නරේංද්ර කර්තා න චිරාද්ධරීශ්වරඃ ।
ශරත්ප්රතීක්ෂඃ ක්ෂමතාමිමං භවාන් ජලප්රපාතං රිපුනිග්රහේ ධෘතඃ ॥ 47 ॥
නියම්ය කෝපං ප්රතිපාල්යතාං ශරත් ක්ෂමස්ව මාසාං ශ්චතුරෝ මයා සහ ।
වසාචලේऽස්මින්මෘගරාජසේවිතේ සංවර්ධයන් ශත්රුවධේ සමුද්යමම් ॥ 48 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ සප්තවිංශස්සර්ගඃ ॥
