শ্রীমদ্বাল্মীকীয় রামাযণে কিষ্কিংধাকাংডম্ ।
অথ পংচত্রিংশস্সর্গঃ ।
তথা ব্রুবাণং সৌমিত্রিং প্রদীপ্তমিব তেজসা ।
অব্রবীল্লক্ষ্মণং তারা তারাধিপনিভাননা ॥ 1 ॥
নৈবং লক্ষ্মণ বক্তব্য়ো নায়ং পরুষমর্হতি ।
হরীণামীশ্বরশ্শ্রোতুং তব বক্ত্রাদ্বিশেষতঃ ॥ 2 ॥
নৈবাকৃতজ্ঞস্সুগ্রীবো ন শঠো নাপি দারুণঃ ।
নৈবানৃতকথো বীর ন জিহ্মশ্চ কপীশ্বরঃ ॥ 3 ॥
উপকারং কৃতং বীরো নাপ্যয়ং বিস্মৃতঃ কপিঃ ।
রামেণ বীর সুগ্রীবো যদন্য়ৈর্দুষ্করং রণে ॥ 4 ॥
রামপ্রসাদাত্কীর্তিংচ কপিরাজ্য়ং চ শাশ্বতম্ ।
প্রাপ্তবানিহ সুগ্রীবো রুমাং মাং চ পরংতপ ॥ 5 ॥
সুদুঃখং শয়িতঃ পূর্বং প্রাপ্য়েদং সুখমুত্তমম্ ।
প্রাপ্তকালং ন জানীতে বিশ্বামিত্রো যথা মুনিঃ ॥ 6 ॥
ঘৃতাচ্য়াং কিল সংসক্তো দশবর্ষাণি লক্ষ্মণ ।
অহোঽমন্যত ধর্মাত্মা বিশ্বামিত্রো মহামুনিঃ ॥ 7 ॥
স হি প্রাপ্তং ন জানীতে কালং কালবিদাং বরঃ ।
বিশ্বামিত্রো মহাতেজাঃ কিং পুনর্য়ঃ পৃথগ্জনঃ ॥ 8 ॥
দেহধর্মং গতস্য়াস্য় পরিশ্রাংতস্য় লক্ষ্মণ ।
অবিতৃপ্তস্য় কামেষু কামং ক্ষংতুমিহার্হসি ॥ 9 ॥
ন চ রোষবশং তাত গংতুমর্হসি লক্ষ্মণ ।
নিশ্চয়ার্থমবিজ্ঞায় সহসা প্রাকৃতো যথা ॥ 10 ॥
সত্ত্বয়ুক্তা হি পুরুষাস্ত্বদ্বিধাঃ পুরুষর্ষভ ।
অবিমৃশ্য় ন রোষস্য় সহসা যাংতি বশ্যতাম্ ॥ 11 ॥
প্রসাদয়ে ত্বাং ধর্মজ্ঞ সুগ্রীবার্থে সমাহিতা ।
মহান্রোষসমুত্পন্ন স্সংরংভস্ত্যজ্যতামযম্ ॥ 12 ॥
রুমাং মাং কপি রাজ্য়ং চ ধনধান্যবসূনি চ ।
রামপ্রিয়ার্থং সুগ্রীবস্ত্যজেদিতি মতির্মম ॥ 13 ॥
সমানেষ্যতি সুগ্রীব স্সীতয়া সহ রাঘবম্ ।
শশাংকমিব রোহিণ্য়া নিহত্বা রাবণং রণে ॥ 14 ॥
শতকোটিসহস্রাণি লংকায়াং কিল রাক্ষসাঃ ।
আয়ুতানি চ ষট্ত্রিংশত্সহস্রাণি শতানি চ ॥ 15 ॥
অহত্বা তাংশ্চ দুর্ধর্ষান্রাক্ষসান্কামরূপিণঃ ।
ন শক্য়ো রাবণো হংতুং যেন সা মৈথিলী হৃতা ॥ 16 ॥
তে ন শক্য়া রণে হংতুমসহায়েন লক্ষ্মণ ।
রাবণঃ ক্রূরকর্মা চ সুগ্রীবেণ বিশেষতঃ ॥ 17 ॥
এবমাখ্য়াতবান্বালী স হ্যভিজ্ঞো হরীশ্বরঃ ।
আগমস্তু ন মে ব্যক্তশ্শ্রবাত্তস্মাদ্ব্রবীম্যহম্ ॥ 18 ॥
ত্বত্সহাযনিমিত্তং বৈ প্রেষিতা হরিপুংগবাঃ ।
আনেতুং বানরান্য়ুদ্ধে সুবহূন্হরিয়ূধপান্ ॥ 19 ॥
তাংশ্চ প্রতীক্ষমাণোঽয়ং বিক্রাংতাত্সুমহাবলান্ ।
রাঘবস্য়ার্থসিধ্যর্থং ন নির্য়াতি হরীশ্বরঃ ॥ 20 ॥
কৃতা তু সংস্থা সৌমিত্রে সুগ্রীবেণ পুরা যথা ।
অদ্য় তৈর্বানরৈস্সর্বৈরাগংতব্য়ং মহাবলৈঃ ॥ 21 ॥
ঋক্ষকোটিসহস্রাণি গোলাংগূলশতানি চ ।
অদ্য় ত্বামুপয়াস্য়ংতি জহি কোপমরিংদম ।
কোট্য়োঽনেকাস্তু কাকুত্স্থ কপীনাং দীপ্ততেজসাম্ ॥ 22 ॥
তব হি মুখমিদং নিরীক্ষ্য় কোপাত্ ক্ষতজনিভে নযনে নিরীক্ষমাণাঃ ।
হরিবরবনিতা ন যাংতি শাংতিং প্রথমভযস্য় হি শংকিতাস্তু সর্বাঃ ॥ 23 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে পংচত্রিংশস্সর্গঃ ॥
