ශ්රීමද්වාල්මීකීය රාමායණේ කිෂ්කිංධාකාංඩම් ।
අථ පංචත්රිංශස්සර්ගඃ ।
තථා බ්රුවාණං සෞමිත්රිං ප්රදීප්තමිව තේජසා ।
අබ්රවීල්ලක්ෂ්මණං තාරා තාරාධිපනිභානනා ॥ 1 ॥
නෛවං ලක්ෂ්මණ වක්තව්යෝ නායං පරුෂමර්හති ।
හරීණාමීශ්වරශ්ශ්රෝතුං තව වක්ත්රාද්විශේෂතඃ ॥ 2 ॥
නෛවාකෘතජ්ඤස්සුග්රීවෝ න ශඨෝ නාපි දාරුණඃ ।
නෛවානෘතකථෝ වීර න ජිහ්මශ්ච කපීශ්වරඃ ॥ 3 ॥
උපකාරං කෘතං වීරෝ නාප්යයං විස්මෘතඃ කපිඃ ।
රාමේණ වීර සුග්රීවෝ යදන්යෛර්දුෂ්කරං රණේ ॥ 4 ॥
රාමප්රසාදාත්කීර්තිංච කපිරාජ්යං ච ශාශ්වතම් ।
ප්රාප්තවානිහ සුග්රීවෝ රුමාං මාං ච පරංතප ॥ 5 ॥
සුදුඃඛං ශයිතඃ පූර්වං ප්රාප්යේදං සුඛමුත්තමම් ।
ප්රාප්තකාලං න ජානීතේ විශ්වාමිත්රෝ යථා මුනිඃ ॥ 6 ॥
ඝෘතාච්යාං කිල සංසක්තෝ දශවර්ෂාණි ලක්ෂ්මණ ।
අහෝऽමන්යත ධර්මාත්මා විශ්වාමිත්රෝ මහාමුනිඃ ॥ 7 ॥
ස හි ප්රාප්තං න ජානීතේ කාලං කාලවිදාං වරඃ ।
විශ්වාමිත්රෝ මහාතේජාඃ කිං පුනර්යඃ පෘථග්ජනඃ ॥ 8 ॥
දේහධර්මං ගතස්යාස්ය පරිශ්රාංතස්ය ලක්ෂ්මණ ।
අවිතෘප්තස්ය කාමේෂු කාමං ක්ෂංතුමිහාර්හසි ॥ 9 ॥
න ච රෝෂවශං තාත ගංතුමර්හසි ලක්ෂ්මණ ।
නිශ්චයාර්ථමවිජ්ඤාය සහසා ප්රාකෘතෝ යථා ॥ 10 ॥
සත්ත්වයුක්තා හි පුරුෂාස්ත්වද්විධාඃ පුරුෂර්ෂභ ।
අවිමෘශ්ය න රෝෂස්ය සහසා යාංති වශ්යතාම් ॥ 11 ॥
ප්රසාදයේ ත්වාං ධර්මජ්ඤ සුග්රීවාර්ථේ සමාහිතා ।
මහාන්රෝෂසමුත්පන්න ස්සංරංභස්ත්යජ්යතාමයම් ॥ 12 ॥
රුමාං මාං කපි රාජ්යං ච ධනධාන්යවසූනි ච ।
රාමප්රියාර්ථං සුග්රීවස්ත්යජේදිති මතිර්මම ॥ 13 ॥
සමානේෂ්යති සුග්රීව ස්සීතයා සහ රාඝවම් ।
ශශාංකමිව රෝහිණ්යා නිහත්වා රාවණං රණේ ॥ 14 ॥
ශතකෝටිසහස්රාණි ලංකායාං කිල රාක්ෂසාඃ ।
ආයුතානි ච ෂට්ත්රිංශත්සහස්රාණි ශතානි ච ॥ 15 ॥
අහත්වා තාංශ්ච දුර්ධර්ෂාන්රාක්ෂසාන්කාමරූපිණඃ ।
න ශක්යෝ රාවණෝ හංතුං යේන සා මෛථිලී හෘතා ॥ 16 ॥
තේ න ශක්යා රණේ හංතුමසහායේන ලක්ෂ්මණ ।
රාවණඃ ක්රූරකර්මා ච සුග්රීවේණ විශේෂතඃ ॥ 17 ॥
ඒවමාඛ්යාතවාන්වාලී ස හ්යභිජ්ඤෝ හරීශ්වරඃ ।
ආගමස්තු න මේ ව්යක්තශ්ශ්රවාත්තස්මාද්බ්රවීම්යහම් ॥ 18 ॥
ත්වත්සහායනිමිත්තං වෛ ප්රේෂිතා හරිපුංගවාඃ ।
ආනේතුං වානරාන්යුද්ධේ සුබහූන්හරියූධපාන් ॥ 19 ॥
තාංශ්ච ප්රතීක්ෂමාණෝऽයං වික්රාංතාත්සුමහාබලාන් ।
රාඝවස්යාර්ථසිධ්යර්ථං න නිර්යාති හරීශ්වරඃ ॥ 20 ॥
කෘතා තු සංස්ථා සෞමිත්රේ සුග්රීවේණ පුරා යථා ।
අද්ය තෛර්වානරෛස්සර්වෛරාගංතව්යං මහාබලෛඃ ॥ 21 ॥
ඍක්ෂකෝටිසහස්රාණි ගෝලාංගූලශතානි ච ।
අද්ය ත්වාමුපයාස්යංති ජහි කෝපමරිංදම ।
කෝට්යෝऽනේකාස්තු කාකුත්ස්ථ කපීනාං දීප්තතේජසාම් ॥ 22 ॥
තව හි මුඛමිදං නිරීක්ෂ්ය කෝපාත් ක්ෂතජනිභේ නයනේ නිරීක්ෂමාණාඃ ।
හරිවරවනිතා න යාංති ශාංතිං ප්රථමභයස්ය හි ශංකිතාස්තු සර්වාඃ ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ පංචත්රිංශස්සර්ගඃ ॥
