śrīmadvālmīkīya rāmāyaṇē kiṣkindhākāṇḍam ।
atha pañchatriṃśassargaḥ ।
tathā bruvāṇaṃ saumitriṃ pradīptamiva tējasā ।
abravīllakṣmaṇaṃ tārā tārādhipanibhānanā ॥ 1 ॥
naivaṃ lakṣmaṇa vaktavyō nāyaṃ paruṣamarhati ।
harīṇāmīśvaraśśrōtuṃ tava vaktrādviśēṣataḥ ॥ 2 ॥
naivākṛtajñassugrīvō na śaṭhō nāpi dāruṇaḥ ।
naivānṛtakathō vīra na jihmaścha kapīśvaraḥ ॥ 3 ॥
upakāraṃ kṛtaṃ vīrō nāpyayaṃ vismṛtaḥ kapiḥ ।
rāmēṇa vīra sugrīvō yadanyairduṣkaraṃ raṇē ॥ 4 ॥
rāmaprasādātkīrtiñcha kapirājyaṃ cha śāśvatam ।
prāptavāniha sugrīvō rumāṃ māṃ cha parantapa ॥ 5 ॥
suduḥkhaṃ śayitaḥ pūrvaṃ prāpyēdaṃ sukhamuttamam ।
prāptakālaṃ na jānītē viśvāmitrō yathā muniḥ ॥ 6 ॥
ghṛtāchyāṃ kila saṃsaktō daśavarṣāṇi lakṣmaṇa ।
ahō'manyata dharmātmā viśvāmitrō mahāmuniḥ ॥ 7 ॥
sa hi prāptaṃ na jānītē kālaṃ kālavidāṃ varaḥ ।
viśvāmitrō mahātējāḥ kiṃ punaryaḥ pṛthagjanaḥ ॥ 8 ॥
dēhadharmaṃ gatasyāsya pariśrāntasya lakṣmaṇa ।
avitṛptasya kāmēṣu kāmaṃ kṣantumihārhasi ॥ 9 ॥
na cha rōṣavaśaṃ tāta gantumarhasi lakṣmaṇa ।
niśchayārthamavijñāya sahasā prākṛtō yathā ॥ 10 ॥
sattvayuktā hi puruṣāstvadvidhāḥ puruṣarṣabha ।
avimṛśya na rōṣasya sahasā yānti vaśyatām ॥ 11 ॥
prasādayē tvāṃ dharmajña sugrīvārthē samāhitā ।
mahānrōṣasamutpanna ssaṃrambhastyajyatāmayam ॥ 12 ॥
rumāṃ māṃ kapi rājyaṃ cha dhanadhānyavasūni cha ।
rāmapriyārthaṃ sugrīvastyajēditi matirmama ॥ 13 ॥
samānēṣyati sugrīva ssītayā saha rāghavam ।
śaśāṅkamiva rōhiṇyā nihatvā rāvaṇaṃ raṇē ॥ 14 ॥
śatakōṭisahasrāṇi laṅkāyāṃ kila rākṣasāḥ ।
āyutāni cha ṣaṭtriṃśatsahasrāṇi śatāni cha ॥ 15 ॥
ahatvā tāṃścha durdharṣānrākṣasānkāmarūpiṇaḥ ।
na śakyō rāvaṇō hantuṃ yēna sā maithilī hṛtā ॥ 16 ॥
tē na śakyā raṇē hantumasahāyēna lakṣmaṇa ।
rāvaṇaḥ krūrakarmā cha sugrīvēṇa viśēṣataḥ ॥ 17 ॥
ēvamākhyātavānvālī sa hyabhijñō harīśvaraḥ ।
āgamastu na mē vyaktaśśravāttasmādbravīmyaham ॥ 18 ॥
tvatsahāyanimittaṃ vai prēṣitā haripuṅgavāḥ ।
ānētuṃ vānarānyuddhē subahūnhariyūdhapān ॥ 19 ॥
tāṃścha pratīkṣamāṇō'yaṃ vikrāntātsumahābalān ।
rāghavasyārthasidhyarthaṃ na niryāti harīśvaraḥ ॥ 20 ॥
kṛtā tu saṃsthā saumitrē sugrīvēṇa purā yathā ।
adya tairvānaraissarvairāgantavyaṃ mahābalaiḥ ॥ 21 ॥
ṛkṣakōṭisahasrāṇi gōlāṅgūlaśatāni cha ।
adya tvāmupayāsyanti jahi kōpamarindama ।
kōṭyō'nēkāstu kākutstha kapīnāṃ dīptatējasām ॥ 22 ॥
tava hi mukhamidaṃ nirīkṣya kōpāt kṣatajanibhē nayanē nirīkṣamāṇāḥ ।
harivaravanitā na yānti śāntiṃ prathamabhayasya hi śaṅkitāstu sarvāḥ ॥ 23 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē pañchatriṃśassargaḥ ॥
