ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ പംചത്രിംശസ്സര്ഗഃ ।
തഥാ ബ്രുവാണം സൌമിത്രിം പ്രദീപ്തമിവ തേജസാ ।
അബ്രവീല്ലക്ഷ്മണം താരാ താരാധിപനിഭാനനാ ॥ 1 ॥
നൈവം ലക്ഷ്മണ വക്തവ്യോ നായം പരുഷമര്ഹതി ।
ഹരീണാമീശ്വരശ്ശ്രോതും തവ വക്ത്രാദ്വിശേഷതഃ ॥ 2 ॥
നൈവാകൃതജ്ഞസ്സുഗ്രീവോ ന ശഠോ നാപി ദാരുണഃ ।
നൈവാനൃതകഥോ വീര ന ജിഹ്മശ്ച കപീശ്വരഃ ॥ 3 ॥
ഉപകാരം കൃതം വീരോ നാപ്യയം വിസ്മൃതഃ കപിഃ ।
രാമേണ വീര സുഗ്രീവോ യദന്യൈര്ദുഷ്കരം രണേ ॥ 4 ॥
രാമപ്രസാദാത്കീര്തിംച കപിരാജ്യം ച ശാശ്വതമ് ।
പ്രാപ്തവാനിഹ സുഗ്രീവോ രുമാം മാം ച പരംതപ ॥ 5 ॥
സുദുഃഖം ശയിതഃ പൂർവം പ്രാപ്യേദം സുഖമുത്തമമ് ।
പ്രാപ്തകാലം ന ജാനീതേ വിശ്വാമിത്രോ യഥാ മുനിഃ ॥ 6 ॥
ഘൃതാച്യാം കില സംസക്തോ ദശവര്ഷാണി ലക്ഷ്മണ ।
അഹോഽമന്യത ധര്മാത്മാ വിശ്വാമിത്രോ മഹാമുനിഃ ॥ 7 ॥
സ ഹി പ്രാപ്തം ന ജാനീതേ കാലം കാലവിദാം വരഃ ।
വിശ്വാമിത്രോ മഹാതേജാഃ കിം പുനര്യഃ പൃഥഗ്ജനഃ ॥ 8 ॥
ദേഹധര്മം ഗതസ്യാസ്യ പരിശ്രാംതസ്യ ലക്ഷ്മണ ।
അവിതൃപ്തസ്യ കാമേഷു കാമം ക്ഷംതുമിഹാര്ഹസി ॥ 9 ॥
ന ച രോഷവശം താത ഗംതുമര്ഹസി ലക്ഷ്മണ ।
നിശ്ചയാര്ഥമവിജ്ഞായ സഹസാ പ്രാകൃതോ യഥാ ॥ 10 ॥
സത്ത്വയുക്താ ഹി പുരുഷാസ്ത്വദ്വിധാഃ പുരുഷര്ഷഭ ।
അവിമൃശ്യ ന രോഷസ്യ സഹസാ യാംതി വശ്യതാമ് ॥ 11 ॥
പ്രസാദയേ ത്വാം ധര്മജ്ഞ സുഗ്രീവാര്ഥേ സമാഹിതാ ।
മഹാന്രോഷസമുത്പന്ന സ്സംരംഭസ്ത്യജ്യതാമയമ് ॥ 12 ॥
രുമാം മാം കപി രാജ്യം ച ധനധാന്യവസൂനി ച ।
രാമപ്രിയാര്ഥം സുഗ്രീവസ്ത്യജേദിതി മതിര്മമ ॥ 13 ॥
സമാനേഷ്യതി സുഗ്രീവ സ്സീതയാ സഹ രാഘവമ് ।
ശശാംകമിവ രോഹിണ്യാ നിഹത്വാ രാവണം രണേ ॥ 14 ॥
ശതകോടിസഹസ്രാണി ലംകായാം കില രാക്ഷസാഃ ।
ആയുതാനി ച ഷട്ത്രിംശത്സഹസ്രാണി ശതാനി ച ॥ 15 ॥
അഹത്വാ താംശ്ച ദുര്ധര്ഷാന്രാക്ഷസാന്കാമരൂപിണഃ ।
ന ശക്യോ രാവണോ ഹംതും യേന സാ മൈഥിലീ ഹൃതാ ॥ 16 ॥
തേ ന ശക്യാ രണേ ഹംതുമസഹായേന ലക്ഷ്മണ ।
രാവണഃ ക്രൂരകര്മാ ച സുഗ്രീവേണ വിശേഷതഃ ॥ 17 ॥
ഏവമാഖ്യാതവാന്വാലീ സ ഹ്യഭിജ്ഞോ ഹരീശ്വരഃ ।
ആഗമസ്തു ന മേ വ്യക്തശ്ശ്രവാത്തസ്മാദ്ബ്രവീമ്യഹമ് ॥ 18 ॥
ത്വത്സഹായനിമിത്തം വൈ പ്രേഷിതാ ഹരിപുംഗവാഃ ।
ആനേതും വാനരാന്യുദ്ധേ സുബഹൂന്ഹരിയൂധപാന് ॥ 19 ॥
താംശ്ച പ്രതീക്ഷമാണോഽയം വിക്രാംതാത്സുമഹാബലാന് ।
രാഘവസ്യാര്ഥസിധ്യര്ഥം ന നിര്യാതി ഹരീശ്വരഃ ॥ 20 ॥
കൃതാ തു സംസ്ഥാ സൌമിത്രേ സുഗ്രീവേണ പുരാ യഥാ ।
അദ്യ തൈർവാനരൈസ്സർവൈരാഗംതവ്യം മഹാബലൈഃ ॥ 21 ॥
ഋക്ഷകോടിസഹസ്രാണി ഗോലാംഗൂലശതാനി ച ।
അദ്യ ത്വാമുപയാസ്യംതി ജഹി കോപമരിംദമ ।
കോട്യോഽനേകാസ്തു കാകുത്സ്ഥ കപീനാം ദീപ്തതേജസാമ് ॥ 22 ॥
തവ ഹി മുഖമിദം നിരീക്ഷ്യ കോപാത് ക്ഷതജനിഭേ നയനേ നിരീക്ഷമാണാഃ ।
ഹരിവരവനിതാ ന യാംതി ശാംതിം പ്രഥമഭയസ്യ ഹി ശംകിതാസ്തു സർവാഃ ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ പംചത്രിംശസ്സര്ഗഃ ॥
