શ્રીમદ્વાલ્મીકીય રામાયણે કિષ્કિંધાકાંડમ્ ।
અથ પંચત્રિંશસ્સર્ગઃ ।
તથા બ્રુવાણં સૌમિત્રિં પ્રદીપ્તમિવ તેજસા ।
અબ્રવીલ્લક્ષ્મણં તારા તારાધિપનિભાનના ॥ 1 ॥
નૈવં લક્ષ્મણ વક્તવ્યો નાયં પરુષમર્હતિ ।
હરીણામીશ્વરશ્શ્રોતું તવ વક્ત્રાદ્વિશેષતઃ ॥ 2 ॥
નૈવાકૃતજ્ઞસ્સુગ્રીવો ન શઠો નાપિ દારુણઃ ।
નૈવાનૃતકથો વીર ન જિહ્મશ્ચ કપીશ્વરઃ ॥ 3 ॥
ઉપકારં કૃતં વીરો નાપ્યયં વિસ્મૃતઃ કપિઃ ।
રામેણ વીર સુગ્રીવો યદન્યૈર્દુષ્કરં રણે ॥ 4 ॥
રામપ્રસાદાત્કીર્તિંચ કપિરાજ્યં ચ શાશ્વતમ્ ।
પ્રાપ્તવાનિહ સુગ્રીવો રુમાં માં ચ પરંતપ ॥ 5 ॥
સુદુઃખં શયિતઃ પૂર્વં પ્રાપ્યેદં સુખમુત્તમમ્ ।
પ્રાપ્તકાલં ન જાનીતે વિશ્વામિત્રો યથા મુનિઃ ॥ 6 ॥
ઘૃતાચ્યાં કિલ સંસક્તો દશવર્ષાણિ લક્ષ્મણ ।
અહોઽમન્યત ધર્માત્મા વિશ્વામિત્રો મહામુનિઃ ॥ 7 ॥
સ હિ પ્રાપ્તં ન જાનીતે કાલં કાલવિદાં વરઃ ।
વિશ્વામિત્રો મહાતેજાઃ કિં પુનર્યઃ પૃથગ્જનઃ ॥ 8 ॥
દેહધર્મં ગતસ્યાસ્ય પરિશ્રાંતસ્ય લક્ષ્મણ ।
અવિતૃપ્તસ્ય કામેષુ કામં ક્ષંતુમિહાર્હસિ ॥ 9 ॥
ન ચ રોષવશં તાત ગંતુમર્હસિ લક્ષ્મણ ।
નિશ્ચયાર્થમવિજ્ઞાય સહસા પ્રાકૃતો યથા ॥ 10 ॥
સત્ત્વયુક્તા હિ પુરુષાસ્ત્વદ્વિધાઃ પુરુષર્ષભ ।
અવિમૃશ્ય ન રોષસ્ય સહસા યાંતિ વશ્યતામ્ ॥ 11 ॥
પ્રસાદયે ત્વાં ધર્મજ્ઞ સુગ્રીવાર્થે સમાહિતા ।
મહાન્રોષસમુત્પન્ન સ્સંરંભસ્ત્યજ્યતામયમ્ ॥ 12 ॥
રુમાં માં કપિ રાજ્યં ચ ધનધાન્યવસૂનિ ચ ।
રામપ્રિયાર્થં સુગ્રીવસ્ત્યજેદિતિ મતિર્મમ ॥ 13 ॥
સમાનેષ્યતિ સુગ્રીવ સ્સીતયા સહ રાઘવમ્ ।
શશાંકમિવ રોહિણ્યા નિહત્વા રાવણં રણે ॥ 14 ॥
શતકોટિસહસ્રાણિ લંકાયાં કિલ રાક્ષસાઃ ।
આયુતાનિ ચ ષટ્ત્રિંશત્સહસ્રાણિ શતાનિ ચ ॥ 15 ॥
અહત્વા તાંશ્ચ દુર્ધર્ષાન્રાક્ષસાન્કામરૂપિણઃ ।
ન શક્યો રાવણો હંતું યેન સા મૈથિલી હૃતા ॥ 16 ॥
તે ન શક્યા રણે હંતુમસહાયેન લક્ષ્મણ ।
રાવણઃ ક્રૂરકર્મા ચ સુગ્રીવેણ વિશેષતઃ ॥ 17 ॥
એવમાખ્યાતવાન્વાલી સ હ્યભિજ્ઞો હરીશ્વરઃ ।
આગમસ્તુ ન મે વ્યક્તશ્શ્રવાત્તસ્માદ્બ્રવીમ્યહમ્ ॥ 18 ॥
ત્વત્સહાયનિમિત્તં વૈ પ્રેષિતા હરિપુંગવાઃ ।
આનેતું વાનરાન્યુદ્ધે સુબહૂન્હરિયૂધપાન્ ॥ 19 ॥
તાંશ્ચ પ્રતીક્ષમાણોઽયં વિક્રાંતાત્સુમહાબલાન્ ।
રાઘવસ્યાર્થસિધ્યર્થં ન નિર્યાતિ હરીશ્વરઃ ॥ 20 ॥
કૃતા તુ સંસ્થા સૌમિત્રે સુગ્રીવેણ પુરા યથા ।
અદ્ય તૈર્વાનરૈસ્સર્વૈરાગંતવ્યં મહાબલૈઃ ॥ 21 ॥
ઋક્ષકોટિસહસ્રાણિ ગોલાંગૂલશતાનિ ચ ।
અદ્ય ત્વામુપયાસ્યંતિ જહિ કોપમરિંદમ ।
કોટ્યોઽનેકાસ્તુ કાકુત્સ્થ કપીનાં દીપ્તતેજસામ્ ॥ 22 ॥
તવ હિ મુખમિદં નિરીક્ષ્ય કોપાત્ ક્ષતજનિભે નયને નિરીક્ષમાણાઃ ।
હરિવરવનિતા ન યાંતિ શાંતિં પ્રથમભયસ્ય હિ શંકિતાસ્તુ સર્વાઃ ॥ 23 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે પંચત્રિંશસ્સર્ગઃ ॥
