శ్రీమద్వాల్మీకీయ రామాయణే కిష్కింధాకాండమ్ ।
అథ పంచత్రింశస్సర్గః ।
తథా బ్రువాణం సౌమిత్రిం ప్రదీప్తమివ తేజసా ।
అబ్రవీల్లక్ష్మణం తారా తారాధిపనిభాననా ॥ 1 ॥
నైవం లక్ష్మణ వక్తవ్యో నాయం పరుషమర్హతి ।
హరీణామీశ్వరశ్శ్రోతుం తవ వక్త్రాద్విశేషతః ॥ 2 ॥
నైవాకృతజ్ఞస్సుగ్రీవో న శఠో నాపి దారుణః ।
నైవానృతకథో వీర న జిహ్మశ్చ కపీశ్వరః ॥ 3 ॥
ఉపకారం కృతం వీరో నాప్యయం విస్మృతః కపిః ।
రామేణ వీర సుగ్రీవో యదన్యైర్దుష్కరం రణే ॥ 4 ॥
రామప్రసాదాత్కీర్తించ కపిరాజ్యం చ శాశ్వతమ్ ।
ప్రాప్తవానిహ సుగ్రీవో రుమాం మాం చ పరంతప ॥ 5 ॥
సుదుఃఖం శయితః పూర్వం ప్రాప్యేదం సుఖముత్తమమ్ ।
ప్రాప్తకాలం న జానీతే విశ్వామిత్రో యథా మునిః ॥ 6 ॥
ఘృతాచ్యాం కిల సంసక్తో దశవర్షాణి లక్ష్మణ ।
అహోఽమన్యత ధర్మాత్మా విశ్వామిత్రో మహామునిః ॥ 7 ॥
స హి ప్రాప్తం న జానీతే కాలం కాలవిదాం వరః ।
విశ్వామిత్రో మహాతేజాః కిం పునర్యః పృథగ్జనః ॥ 8 ॥
దేహధర్మం గతస్యాస్య పరిశ్రాంతస్య లక్ష్మణ ।
అవితృప్తస్య కామేషు కామం క్షంతుమిహార్హసి ॥ 9 ॥
న చ రోషవశం తాత గంతుమర్హసి లక్ష్మణ ।
నిశ్చయార్థమవిజ్ఞాయ సహసా ప్రాకృతో యథా ॥ 10 ॥
సత్త్వయుక్తా హి పురుషాస్త్వద్విధాః పురుషర్షభ ।
అవిమృశ్య న రోషస్య సహసా యాంతి వశ్యతామ్ ॥ 11 ॥
ప్రసాదయే త్వాం ధర్మజ్ఞ సుగ్రీవార్థే సమాహితా ।
మహాన్రోషసముత్పన్న స్సంరంభస్త్యజ్యతామయమ్ ॥ 12 ॥
రుమాం మాం కపి రాజ్యం చ ధనధాన్యవసూని చ ।
రామప్రియార్థం సుగ్రీవస్త్యజేదితి మతిర్మమ ॥ 13 ॥
సమానేష్యతి సుగ్రీవ స్సీతయా సహ రాఘవమ్ ।
శశాంకమివ రోహిణ్యా నిహత్వా రావణం రణే ॥ 14 ॥
శతకోటిసహస్రాణి లంకాయాం కిల రాక్షసాః ।
ఆయుతాని చ షట్త్రింశత్సహస్రాణి శతాని చ ॥ 15 ॥
అహత్వా తాంశ్చ దుర్ధర్షాన్రాక్షసాన్కామరూపిణః ।
న శక్యో రావణో హంతుం యేన సా మైథిలీ హృతా ॥ 16 ॥
తే న శక్యా రణే హంతుమసహాయేన లక్ష్మణ ।
రావణః క్రూరకర్మా చ సుగ్రీవేణ విశేషతః ॥ 17 ॥
ఏవమాఖ్యాతవాన్వాలీ స హ్యభిజ్ఞో హరీశ్వరః ।
ఆగమస్తు న మే వ్యక్తశ్శ్రవాత్తస్మాద్బ్రవీమ్యహమ్ ॥ 18 ॥
త్వత్సహాయనిమిత్తం వై ప్రేషితా హరిపుంగవాః ।
ఆనేతుం వానరాన్యుద్ధే సుబహూన్హరియూధపాన్ ॥ 19 ॥
తాంశ్చ ప్రతీక్షమాణోఽయం విక్రాంతాత్సుమహాబలాన్ ।
రాఘవస్యార్థసిధ్యర్థం న నిర్యాతి హరీశ్వరః ॥ 20 ॥
కృతా తు సంస్థా సౌమిత్రే సుగ్రీవేణ పురా యథా ।
అద్య తైర్వానరైస్సర్వైరాగంతవ్యం మహాబలైః ॥ 21 ॥
ఋక్షకోటిసహస్రాణి గోలాంగూలశతాని చ ।
అద్య త్వాముపయాస్యంతి జహి కోపమరిందమ ।
కోట్యోఽనేకాస్తు కాకుత్స్థ కపీనాం దీప్తతేజసామ్ ॥ 22 ॥
తవ హి ముఖమిదం నిరీక్ష్య కోపాత్ క్షతజనిభే నయనే నిరీక్షమాణాః ।
హరివరవనితా న యాంతి శాంతిం ప్రథమభయస్య హి శంకితాస్తు సర్వాః ॥ 23 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కింధాకాండే పంచత్రింశస్సర్గః ॥
