ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ପଂଚତ୍ରିଂଶସ୍ସର୍ଗଃ ।
ତଥା ବ୍ରୁଵାଣଂ ସୌମିତ୍ରିଂ ପ୍ରଦୀପ୍ତମିଵ ତେଜସା ।
ଅବ୍ରଵୀଲ୍ଲକ୍ଷ୍ମଣଂ ତାରା ତାରାଧିପନିଭାନନା ॥ 1 ॥
ନୈଵଂ ଲକ୍ଷ୍ମଣ ଵକ୍ତଵ୍ୟୋ ନାୟଂ ପରୁଷମର୍ହତି ।
ହରୀଣାମୀଶ୍ଵରଶ୍ଶ୍ରୋତୁଂ ତଵ ଵକ୍ତ୍ରାଦ୍ଵିଶେଷତଃ ॥ 2 ॥
ନୈଵାକୃତଜ୍ଞସ୍ସୁଗ୍ରୀଵୋ ନ ଶଠୋ ନାପି ଦାରୁଣଃ ।
ନୈଵାନୃତକଥୋ ଵୀର ନ ଜିହ୍ମଶ୍ଚ କପୀଶ୍ଵରଃ ॥ 3 ॥
ଉପକାରଂ କୃତଂ ଵୀରୋ ନାପ୍ୟୟଂ ଵିସ୍ମୃତଃ କପିଃ ।
ରାମେଣ ଵୀର ସୁଗ୍ରୀଵୋ ୟଦନ୍ୟୈର୍ଦୁଷ୍କରଂ ରଣେ ॥ 4 ॥
ରାମପ୍ରସାଦାତ୍କୀର୍ତିଂଚ କପିରାଜ୍ୟଂ ଚ ଶାଶ୍ଵତମ୍ ।
ପ୍ରାପ୍ତଵାନିହ ସୁଗ୍ରୀଵୋ ରୁମାଂ ମାଂ ଚ ପରଂତପ ॥ 5 ॥
ସୁଦୁଃଖଂ ଶୟିତଃ ପୂର୍ଵଂ ପ୍ରାପ୍ୟେଦଂ ସୁଖମୁତ୍ତମମ୍ ।
ପ୍ରାପ୍ତକାଲଂ ନ ଜାନୀତେ ଵିଶ୍ଵାମିତ୍ରୋ ୟଥା ମୁନିଃ ॥ 6 ॥
ଘୃତାଚ୍ୟାଂ କିଲ ସଂସକ୍ତୋ ଦଶଵର୍ଷାଣି ଲକ୍ଷ୍ମଣ ।
ଅହୋଽମନ୍ୟତ ଧର୍ମାତ୍ମା ଵିଶ୍ଵାମିତ୍ରୋ ମହାମୁନିଃ ॥ 7 ॥
ସ ହି ପ୍ରାପ୍ତଂ ନ ଜାନୀତେ କାଲଂ କାଲଵିଦାଂ ଵରଃ ।
ଵିଶ୍ଵାମିତ୍ରୋ ମହାତେଜାଃ କିଂ ପୁନର୍ୟଃ ପୃଥଗ୍ଜନଃ ॥ 8 ॥
ଦେହଧର୍ମଂ ଗତସ୍ୟାସ୍ୟ ପରିଶ୍ରାଂତସ୍ୟ ଲକ୍ଷ୍ମଣ ।
ଅଵିତୃପ୍ତସ୍ୟ କାମେଷୁ କାମଂ କ୍ଷଂତୁମିହାର୍ହସି ॥ 9 ॥
ନ ଚ ରୋଷଵଶଂ ତାତ ଗଂତୁମର୍ହସି ଲକ୍ଷ୍ମଣ ।
ନିଶ୍ଚୟାର୍ଥମଵିଜ୍ଞାୟ ସହସା ପ୍ରାକୃତୋ ୟଥା ॥ 10 ॥
ସତ୍ତ୍ଵୟୁକ୍ତା ହି ପୁରୁଷାସ୍ତ୍ଵଦ୍ଵିଧାଃ ପୁରୁଷର୍ଷଭ ।
ଅଵିମୃଶ୍ୟ ନ ରୋଷସ୍ୟ ସହସା ୟାଂତି ଵଶ୍ୟତାମ୍ ॥ 11 ॥
ପ୍ରସାଦୟେ ତ୍ଵାଂ ଧର୍ମଜ୍ଞ ସୁଗ୍ରୀଵାର୍ଥେ ସମାହିତା ।
ମହାନ୍ରୋଷସମୁତ୍ପନ୍ନ ସ୍ସଂରଂଭସ୍ତ୍ୟଜ୍ୟତାମୟମ୍ ॥ 12 ॥
ରୁମାଂ ମାଂ କପି ରାଜ୍ୟଂ ଚ ଧନଧାନ୍ୟଵସୂନି ଚ ।
ରାମପ୍ରିୟାର୍ଥଂ ସୁଗ୍ରୀଵସ୍ତ୍ୟଜେଦିତି ମତିର୍ମମ ॥ 13 ॥
ସମାନେଷ୍ୟତି ସୁଗ୍ରୀଵ ସ୍ସୀତୟା ସହ ରାଘଵମ୍ ।
ଶଶାଂକମିଵ ରୋହିଣ୍ୟା ନିହତ୍ଵା ରାଵଣଂ ରଣେ ॥ 14 ॥
ଶତକୋଟିସହସ୍ରାଣି ଲଂକାୟାଂ କିଲ ରାକ୍ଷସାଃ ।
ଆୟୁତାନି ଚ ଷଟ୍ତ୍ରିଂଶତ୍ସହସ୍ରାଣି ଶତାନି ଚ ॥ 15 ॥
ଅହତ୍ଵା ତାଂଶ୍ଚ ଦୁର୍ଧର୍ଷାନ୍ରାକ୍ଷସାନ୍କାମରୂପିଣଃ ।
ନ ଶକ୍ୟୋ ରାଵଣୋ ହଂତୁଂ ୟେନ ସା ମୈଥିଲୀ ହୃତା ॥ 16 ॥
ତେ ନ ଶକ୍ୟା ରଣେ ହଂତୁମସହାୟେନ ଲକ୍ଷ୍ମଣ ।
ରାଵଣଃ କ୍ରୂରକର୍ମା ଚ ସୁଗ୍ରୀଵେଣ ଵିଶେଷତଃ ॥ 17 ॥
ଏଵମାଖ୍ୟାତଵାନ୍ଵାଲୀ ସ ହ୍ୟଭିଜ୍ଞୋ ହରୀଶ୍ଵରଃ ।
ଆଗମସ୍ତୁ ନ ମେ ଵ୍ୟକ୍ତଶ୍ଶ୍ରଵାତ୍ତସ୍ମାଦ୍ବ୍ରଵୀମ୍ୟହମ୍ ॥ 18 ॥
ତ୍ଵତ୍ସହାୟନିମିତ୍ତଂ ଵୈ ପ୍ରେଷିତା ହରିପୁଂଗଵାଃ ।
ଆନେତୁଂ ଵାନରାନ୍ୟୁଦ୍ଧେ ସୁବହୂନ୍ହରିୟୂଧପାନ୍ ॥ 19 ॥
ତାଂଶ୍ଚ ପ୍ରତୀକ୍ଷମାଣୋଽୟଂ ଵିକ୍ରାଂତାତ୍ସୁମହାବଲାନ୍ ।
ରାଘଵସ୍ୟାର୍ଥସିଧ୍ୟର୍ଥଂ ନ ନିର୍ୟାତି ହରୀଶ୍ଵରଃ ॥ 20 ॥
କୃତା ତୁ ସଂସ୍ଥା ସୌମିତ୍ରେ ସୁଗ୍ରୀଵେଣ ପୁରା ୟଥା ।
ଅଦ୍ୟ ତୈର୍ଵାନରୈସ୍ସର୍ଵୈରାଗଂତଵ୍ୟଂ ମହାବଲୈଃ ॥ 21 ॥
ଋକ୍ଷକୋଟିସହସ୍ରାଣି ଗୋଲାଂଗୂଲଶତାନି ଚ ।
ଅଦ୍ୟ ତ୍ଵାମୁପୟାସ୍ୟଂତି ଜହି କୋପମରିଂଦମ ।
କୋଟ୍ୟୋଽନେକାସ୍ତୁ କାକୁତ୍ସ୍ଥ କପୀନାଂ ଦୀପ୍ତତେଜସାମ୍ ॥ 22 ॥
ତଵ ହି ମୁଖମିଦଂ ନିରୀକ୍ଷ୍ୟ କୋପାତ୍ କ୍ଷତଜନିଭେ ନୟନେ ନିରୀକ୍ଷମାଣାଃ ।
ହରିଵରଵନିତା ନ ୟାଂତି ଶାଂତିଂ ପ୍ରଥମଭୟସ୍ୟ ହି ଶଂକିତାସ୍ତୁ ସର୍ଵାଃ ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ପଂଚତ୍ରିଂଶସ୍ସର୍ଗଃ ॥
