শ্রীমদ্বাল্মীকীয় রামাযণে কিষ্কিংধাকাংডম্ ।
অথ চতুর্থস্সর্গঃ ।
ততঃ প্রহৃষ্টৌ হনুমান্কৃত্যবানিতি তদ্বচঃ ।
শ্রুত্বা মধুরসংভাষং সুগ্রীবং মনসা গতঃ ॥ 1 ॥
ভব্য়ো রাজ্য়াগমস্তস্য় সুগ্রীবস্য় মহাত্মনঃ ।
যদয়ং কৃত্যবান্প্রাপ্তঃ কৃত্য়ং চৈতদুপাগতম্ ॥ 2 ॥
ততঃ পরমসংহৃষ্টো হনুমান্ প্লবগর্ষভঃ ।
প্রত্য়ুবাচ ততো বাক্য়ং রামং বাক্যবিশারদঃ ॥ 3 ॥
কিং অর্থং ত্বং বনং ঘোরং পংপা কানন মংডিতম্ ।
আগতঃ সানুজো দুর্গং নানা ব্য়াল মৃগ আয়ুতম্ ॥ 4 ॥
তস্য় তদ্বচনং শ্রুত্বা লক্ষ্মণো রামচোদিতঃ ।
আচচক্ষে মহাত্মানং রামং দশরথাত্মজম্ ॥ 5 ॥
রাজা দশরথো নাম দ্য়ুতিমাংধর্মবত্সলঃ ।
চাতুর্বর্ণ্য়ং স্বধর্মেণ নিত্যমেবাভ্যপালযত্ ॥ 6 ॥
ন দ্বেষ্টা বিদ্যতে তস্য় ন চ স দ্বেষ্টি কংচন ।
স চ সর্বেষু ভূতেষু পিতামহ ইবাপরঃ ॥ 7 ॥
অগ্নিষ্টোমাদিভির্যজ্ঞৈরিষ্টবানাপ্তদক্ষিণৈঃ ।
তস্য়ায়ং পূর্বজঃ পুত্রো রামো নাম জনৈঃ শ্রুতঃ ॥ 8 ॥
শরণ্যস্সর্বভূতানাং পিতুর্নির্দেশপারগঃ ।
বীরো দশরথস্য়ায়ং পুত্রাণাং গুণবত্তমঃ ॥ 9 ॥
রাজলক্ষণসংপন্নস্সম্য়ুক্তো রাজসংপদা ।
রাজ্য়াদ্ভ্রষ্টো বনে বস্তুং ময়া সার্ধমিহাগতঃ ॥ 10 ॥
ভার্যয়া চ মহাতেজাস্সীতয়াঽনুগতো বশী ।
দিনক্ষয়ে মহাতেজাঃ প্রভয়েব দিবাকরঃ ॥ 11 ॥
অহমস্য়াবরো ভ্রাতা গুণৈর্দাস্যমুপাগতঃ ।
কৃতজ্ঞস্য় বহুজ্ঞস্য় লক্ষ্মণো নাম নামতঃ ॥ 12 ॥
সুখার্হস্য় মহার্হস্য় সর্বভূতহিতাত্মনঃ ।
ঐশ্বর্য়েণ চ হীনস্য় বনবাসাশ্রিতস্য় চ ॥ 13 ॥
রক্ষসাঽপহৃতা ভার্য়া রহিতে কামরূপিণা ।
তচ্চ ন জ্ঞাযতে রক্ষঃ পত্নী যেনাস্য় সা হৃতা ॥ 14 ॥
দনুর্নাম দিতেঃ পুত্রশ্শাপাদ্রাক্ষসতাং গতঃ ।
আখ্য়াতস্তেন সুগ্রীবস্সমর্থো বানরর্ষভঃ ॥ 15 ॥
স জ্ঞাস্যতি মহাবীর্যস্তব ভার্য়াপহারিণম্ ।
এবমুক্ত্বা দনুস্স্বর্গং ভ্রাজমানো গতস্সুখম্ ॥ 16 ॥
এতত্তে সর্বমাখ্য়াতং যথা তথ্য়েন পৃচ্ছতঃ ।
অহং চৈব হি রামশ্চ সুগ্রীবং শরণং গতৌ ॥ 17 ॥
এষ দত্ত্বা চ বিত্তানি প্রাপ্য় চানুত্তমং যশঃ ।
লোকনাথঃ পুরা ভূত্বা সুগ্রীবং নাথমিচ্ছতি ॥ 18 ॥
পিতা যস্য় পুরা হ্য়াসীচ্ছরণ্য়ো ধর্মবত্সলঃ ।
তস্য় পুত্রশ্শরণ্যশ্চ সুগ্রীবং শরণং গতঃ ॥ 19 ॥
সর্বলোকস্য় ধর্মাত্মা শরণ্যশ্শরণং পুরা ।
গুরুর্মে রাঘবস্সোঽয়ং সুগ্রীবং শরণং গতঃ ॥ 20 ॥
যস্য় প্রসাদে সততং প্রসীদেয়ুরিমাঃ প্রজাঃ ।
স রামো বানরেংদ্রস্য় প্রসাদমভিকাংক্ষতে ॥ 21 ॥
যেন সর্বগুণোপেতাঃ পৃথিব্য়াং সর্বপার্থিবাঃ ।
মানিতাস্সততং রাজ্ঞা সদা দশরথেন বৈ ॥ 22 ॥
তস্য়ায়ং পূর্বজঃ পুত্রস্ত্রিষু লোকেষু বিশ্রুতঃ ।
সুগ্রীবং বানরেংদ্রং তু রামশ্শরণমাগতঃ ॥ 23 ॥
শোকাভিভূতে রামে তু শোকার্তে শরণং গতে ।
কর্তুমর্হতি সুগ্রীবঃ প্রসাদং হরিয়ূধপঃ ॥ 24 ॥
এবং ব্রুবাণং সৌমিত্রিং করুণং সাশ্রুলোচনম্ ।
হনুমান্প্রত্য়ুবাচেদং বাক্য়ং বাক্যবিশারদঃ ॥ 25 ॥
ঈদৃশা বুদ্ধিসংপন্না জিতক্রোধা জিতেংদ্রিয়াঃ ।
দ্রষ্টব্য়া বানরেংদ্রেণ দিষ্ট্য়া দর্শনমাগতাঃ ॥ 26 ॥
স হি রাজ্য়াত্পরিভ্রষ্টঃ কৃতবৈরশ্চ বালিনা ।
হৃতদারো বনে ত্যক্তো ভ্রাত্রা বিনিকৃতো ভৃশম্ ॥ 27 ॥
করিষ্যতি স সাহায়্য়ং যুবয়োর্ভাস্করাত্মজঃ ।
সুগ্রীবস্সহ চাস্মাভি স্সীতায়াঃ পরিমার্গণে ॥ 28 ॥
ইত্য়েবমুক্ত্বা হনুমান্ শ্লক্ষ্ণং মধুরয়া গিরা ।
বভাষে সোঽভিগচ্ছেম সুগ্রীবমিতি রাঘবম্ ॥ 29 ॥
এবং ব্রুবাণং ধর্মাত্মা হনুমংতং স লক্ষ্মণঃ ।
প্রতিপূজ্য় যথান্য়াযমিদং প্রোবাচ রাঘবম্ ॥ 30 ॥
কপিঃ কথযতে হৃষ্টো যথাঽয়ং মারুতাত্মজঃ ।
কৃত্যবাংত্সোঽপি সংপ্রাপ্তঃ কৃতকৃত্য়োঽসি রাঘব ॥ 31 ॥
প্রসন্নমুখবর্ণশ্চ ব্যক্তং হৃষ্টশ্চ ভাষতে ।
নানৃতং বক্ষ্যতে বীরো হনুমান্মারুতাত্মজঃ ॥ 32 ॥
ততস্স তু মহাপ্রাজ্ঞো হনুমান্মারুতাত্মজঃ ।
জগামাদায় তৌ বীরৌ হরিরাজায় রাঘবৌ ॥ 33 ॥
ভিক্ষুরূপং পরিত্যজ্য় বানরং রূপমাস্থিতঃ ।
পৃষ্ঠমারোপ্য় তৌ বীরৌ জগাম কপিকুংজরঃ ॥ 34 ॥
স তু বিপুলযশাঃ কপিপ্রবীরঃ পবনসুতঃ কৃতকৃত্যবত্প্রহৃষ্টঃ ।
গিরিবরমুরুবিক্রমঃ প্রয়াত স্স শুভমতিস্সহ রামলক্ষ্মণাভ্য়াম্ ॥ 35 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে চতুর্থস্সর্গঃ ॥
