ශ්රීමද්වාල්මීකීය රාමායණේ කිෂ්කිංධාකාංඩම් ।
අථ චතුර්ථස්සර්ගඃ ।
තතඃ ප්රහෘෂ්ටෞ හනුමාන්කෘත්යවානිති තද්වචඃ ।
ශ්රුත්වා මධුරසංභාෂං සුග්රීවං මනසා ගතඃ ॥ 1 ॥
භව්යෝ රාජ්යාගමස්තස්ය සුග්රීවස්ය මහාත්මනඃ ।
යදයං කෘත්යවාන්ප්රාප්තඃ කෘත්යං චෛතදුපාගතම් ॥ 2 ॥
තතඃ පරමසංහෘෂ්ටෝ හනුමාන් ප්ලවගර්ෂභඃ ।
ප්රත්යුවාච තතෝ වාක්යං රාමං වාක්යවිශාරදඃ ॥ 3 ॥
කිං අර්ථං ත්වං වනං ඝෝරං පංපා කානන මංඩිතම් ।
ආගතඃ සානුජෝ දුර්ගං නානා ව්යාල මෘග ආයුතම් ॥ 4 ॥
තස්ය තද්වචනං ශ්රුත්වා ලක්ෂ්මණෝ රාමචෝදිතඃ ।
ආචචක්ෂේ මහාත්මානං රාමං දශරථාත්මජම් ॥ 5 ॥
රාජා දශරථෝ නාම ද්යුතිමාංධර්මවත්සලඃ ।
චාතුර්වර්ණ්යං ස්වධර්මේණ නිත්යමේවාභ්යපාලයත් ॥ 6 ॥
න ද්වේෂ්ටා විද්යතේ තස්ය න ච ස ද්වේෂ්ටි කංචන ।
ස ච සර්වේෂු භූතේෂු පිතාමහ ඉවාපරඃ ॥ 7 ॥
අග්නිෂ්ටෝමාදිභිර්යජ්ඤෛරිෂ්ටවානාප්තදක්ෂිණෛඃ ।
තස්යායං පූර්වජඃ පුත්රෝ රාමෝ නාම ජනෛඃ ශ්රුතඃ ॥ 8 ॥
ශරණ්යස්සර්වභූතානාං පිතුර්නිර්දේශපාරගඃ ।
වීරෝ දශරථස්යායං පුත්රාණාං ගුණවත්තමඃ ॥ 9 ॥
රාජලක්ෂණසංපන්නස්සම්යුක්තෝ රාජසංපදා ।
රාජ්යාද්භ්රෂ්ටෝ වනේ වස්තුං මයා සාර්ධමිහාගතඃ ॥ 10 ॥
භාර්යයා ච මහාතේජාස්සීතයාऽනුගතෝ වශී ।
දිනක්ෂයේ මහාතේජාඃ ප්රභයේව දිවාකරඃ ॥ 11 ॥
අහමස්යාවරෝ භ්රාතා ගුණෛර්දාස්යමුපාගතඃ ।
කෘතජ්ඤස්ය බහුජ්ඤස්ය ලක්ෂ්මණෝ නාම නාමතඃ ॥ 12 ॥
සුඛාර්හස්ය මහාර්හස්ය සර්වභූතහිතාත්මනඃ ।
ඓශ්වර්යේණ ච හීනස්ය වනවාසාශ්රිතස්ය ච ॥ 13 ॥
රක්ෂසාऽපහෘතා භාර්යා රහිතේ කාමරූපිණා ।
තච්ච න ජ්ඤායතේ රක්ෂඃ පත්නී යේනාස්ය සා හෘතා ॥ 14 ॥
දනුර්නාම දිතේඃ පුත්රශ්ශාපාද්රාක්ෂසතාං ගතඃ ।
ආඛ්යාතස්තේන සුග්රීවස්සමර්ථෝ වානරර්ෂභඃ ॥ 15 ॥
ස ජ්ඤාස්යති මහාවීර්යස්තව භාර්යාපහාරිණම් ।
ඒවමුක්ත්වා දනුස්ස්වර්ගං භ්රාජමානෝ ගතස්සුඛම් ॥ 16 ॥
ඒතත්තේ සර්වමාඛ්යාතං යථා තථ්යේන පෘච්ඡතඃ ।
අහං චෛව හි රාමශ්ච සුග්රීවං ශරණං ගතෞ ॥ 17 ॥
ඒෂ දත්ත්වා ච විත්තානි ප්රාප්ය චානුත්තමං යශඃ ।
ලෝකනාථඃ පුරා භූත්වා සුග්රීවං නාථමිච්ඡති ॥ 18 ॥
පිතා යස්ය පුරා හ්යාසීච්ඡරණ්යෝ ධර්මවත්සලඃ ।
තස්ය පුත්රශ්ශරණ්යශ්ච සුග්රීවං ශරණං ගතඃ ॥ 19 ॥
සර්වලෝකස්ය ධර්මාත්මා ශරණ්යශ්ශරණං පුරා ।
ගුරුර්මේ රාඝවස්සෝऽයං සුග්රීවං ශරණං ගතඃ ॥ 20 ॥
යස්ය ප්රසාදේ සතතං ප්රසීදේයුරිමාඃ ප්රජාඃ ।
ස රාමෝ වානරේංද්රස්ය ප්රසාදමභිකාංක්ෂතේ ॥ 21 ॥
යේන සර්වගුණෝපේතාඃ පෘථිව්යාං සර්වපාර්ථිවාඃ ।
මානිතාස්සතතං රාජ්ඤා සදා දශරථේන වෛ ॥ 22 ॥
තස්යායං පූර්වජඃ පුත්රස්ත්රිෂු ලෝකේෂු විශ්රුතඃ ।
සුග්රීවං වානරේංද්රං තු රාමශ්ශරණමාගතඃ ॥ 23 ॥
ශෝකාභිභූතේ රාමේ තු ශෝකාර්තේ ශරණං ගතේ ।
කර්තුමර්හති සුග්රීවඃ ප්රසාදං හරියූධපඃ ॥ 24 ॥
ඒවං බ්රුවාණං සෞමිත්රිං කරුණං සාශ්රුලෝචනම් ।
හනුමාන්ප්රත්යුවාචේදං වාක්යං වාක්යවිශාරදඃ ॥ 25 ॥
ඊදෘශා බුද්ධිසංපන්නා ජිතක්රෝධා ජිතේංද්රියාඃ ।
ද්රෂ්ටව්යා වානරේංද්රේණ දිෂ්ට්යා දර්ශනමාගතාඃ ॥ 26 ॥
ස හි රාජ්යාත්පරිභ්රෂ්ටඃ කෘතවෛරශ්ච වාලිනා ।
හෘතදාරෝ වනේ ත්යක්තෝ භ්රාත්රා විනිකෘතෝ භෘශම් ॥ 27 ॥
කරිෂ්යති ස සාහාය්යං යුවයෝර්භාස්කරාත්මජඃ ।
සුග්රීවස්සහ චාස්මාභි ස්සීතායාඃ පරිමාර්ගණේ ॥ 28 ॥
ඉත්යේවමුක්ත්වා හනුමාන් ශ්ලක්ෂ්ණං මධුරයා ගිරා ।
බභාෂේ සෝऽභිගච්ඡේම සුග්රීවමිති රාඝවම් ॥ 29 ॥
ඒවං බ්රුවාණං ධර්මාත්මා හනුමංතං ස ලක්ෂ්මණඃ ।
ප්රතිපූජ්ය යථාන්යායමිදං ප්රෝවාච රාඝවම් ॥ 30 ॥
කපිඃ කථයතේ හෘෂ්ටෝ යථාऽයං මාරුතාත්මජඃ ।
කෘත්යවාංත්සෝऽපි සංප්රාප්තඃ කෘතකෘත්යෝऽසි රාඝව ॥ 31 ॥
ප්රසන්නමුඛවර්ණශ්ච ව්යක්තං හෘෂ්ටශ්ච භාෂතේ ।
නානෘතං වක්ෂ්යතේ වීරෝ හනුමාන්මාරුතාත්මජඃ ॥ 32 ॥
තතස්ස තු මහාප්රාජ්ඤෝ හනුමාන්මාරුතාත්මජඃ ।
ජගාමාදාය තෞ වීරෞ හරිරාජාය රාඝවෞ ॥ 33 ॥
භික්ෂුරූපං පරිත්යජ්ය වානරං රූපමාස්ථිතඃ ।
පෘෂ්ඨමාරෝප්ය තෞ වීරෞ ජගාම කපිකුංජරඃ ॥ 34 ॥
ස තු විපුලයශාඃ කපිප්රවීරඃ පවනසුතඃ කෘතකෘත්යවත්ප්රහෘෂ්ටඃ ।
ගිරිවරමුරුවික්රමඃ ප්රයාත ස්ස ශුභමතිස්සහ රාමලක්ෂ්මණාභ්යාම් ॥ 35 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ චතුර්ථස්සර්ගඃ ॥
