ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ପଂଚମସ୍ସର୍ଗଃ ।
ଋଶ୍ୟମୂକାତ୍ତୁ ହନୁମାନ୍ଗତ୍ଵା ତୁ ମଲୟଂ ଗିରିମ୍ ।
ଆଚଚକ୍ଷେ ତଦା ଵୀରୌ କପିରାଜାୟ ରାଘଵୌ ॥ 1 ॥
ଅୟଂ ରାମୋ ମହାପ୍ରାଜ୍ଞ ସ୍ସଂପ୍ରାପ୍ତୋ ଦୃଢଵିକ୍ରମଃ ।
ଲକ୍ଷ୍ମଣେନ ସହ ଭ୍ରାତ୍ରା ରାମୋଽୟଂ ସତ୍ୟଵିକ୍ରମଃ ॥ 2 ॥
ଇକ୍ଷ୍ଵାକୂଣାଂ କୁଲେ ଜାତୋ ରାମୋ ଦଶରଥାତ୍ମଜଃ ।
ଧର୍ମେ ନିଗଦିତଶ୍ଚୈଵ ପିତୁର୍ନିର୍ଦେଶପାରଗଃ ॥ 3 ॥
ତସ୍ୟାସ୍ୟ ଵସତୋଽରଣ୍ୟେ ନିୟତସ୍ୟ ମହାତ୍ମନଃ ।
ରାଵଣେନ ହୃତା ଭାର୍ୟା ସ ତ୍ଵାଂ ଶରଣମାଗତଃ ॥ 4 ॥
ରାଜସୂୟାଶ୍ଵମେଧୈଶ୍ଚ ଵହ୍ନିର୍ୟେନାଭିତର୍ପିତଃ ।
ଦକ୍ଷିଣାଶ୍ଚ ତଥୋତ୍ସୃଷ୍ଟା ଗାଵଶ୍ଶତସହସ୍ରଶଃ ॥ 5 ॥
ତପସା ସତ୍ୟଵାକ୍ୟେନ ଵସୁଧା ୟେନ ପାଲିତା ।
ସ୍ତ୍ରୀ ହେତୋସ୍ତସ୍ୟ ପୁତ୍ରୋଽୟଂ ରାମସ୍ତ୍ଵାଂ ଶରଣଂ ଗତଃ ॥ 6 ॥
ଭଵତା ସଖ୍ୟକାମୌ ତୌ ଭ୍ରାତରୌ ରାମଲକ୍ଷ୍ମଣୌ ।
ପ୍ରତିଗୃହ୍ୟାର୍ଚୟସ୍ଵୈତୌ ପୂଜନୀୟତମାଵୁଭୌ ॥ 7 ॥
ଶ୍ରୁତ୍ଵା ହନୁମତୋ ଵାକ୍ୟଂ ସୁଗ୍ରୀଵୋ ହୃଷ୍ଟମାନସଃ ।
ଭୟଂ ଚରାଘଵାଦ୍ଘୋରଂ ପ୍ରଜହୌ ଵିଗତଜ୍ଵରଃ ॥ 8 ॥
ସକୃତ୍ଵା ମାନୁଷଂ ରୂପଂ ସୁଗ୍ରୀଵଃ ପ୍ଲଵଗର୍ଷଭଃ ।
ଦର୍ଶନୀୟତମୋ ଭୂତ୍ଵା ପ୍ରୀତ୍ୟା ପ୍ରୋଵାଚ ରାଘଵମ୍ ॥ 9 ॥
ଭଵାଂଧର୍ମଵିନୀତଶ୍ଚ ଵିକ୍ରାଂତସ୍ସର୍ଵଵତ୍ସଲଃ ।
ଆଖ୍ୟାତା ଵାୟୁପୁତ୍ରେଣ ତତ୍ତ୍ଵତୋ ମେ ଭଵଦ୍ଗୁଣାଃ ॥ 10 ॥
ତନ୍ମମୈଵୈଷ ସତ୍କାରୋ ଲାଭଶ୍ଚୈଵୋତ୍ତମଃ ପ୍ରଭୋ ।
ୟତ୍ତ୍ଵମିଚ୍ଛସି ସୌହାର୍ଦଂ ଵାନରେଣ ମୟା ସହ ॥ 11 ॥
ରୋଚତେ ୟଦି ଵା ସଖ୍ୟଂ ବାହୁରେଷ ପ୍ରସାରିତଃ ।
ଗୃହ୍ୟତାଂ ପାଣିନା ପାଣିର୍ମର୍ୟାଦା ବଧ୍ୟତାଂ ଧ୍ରୁଵା ॥ 12 ॥
ଏତତ୍ତୁ ଵଚନଂ ଶ୍ରୁତ୍ଵା ସୁଗ୍ରୀଵେଣ ସୁଭାଷିତମ୍ ।
ସଂପ୍ରହୃଷ୍ଟମନା ହସ୍ତଂ ପୀଡୟାମାସ ପାଣିନା ॥ 13 ॥
ହୃଦ୍ୟଂ ସୌହୃଦମାଲଂବ୍ୟପର୍ୟଷ୍ଵଜତ ପୀଡିତମ୍ ।
ତତୋ ହନୂମାନ୍ସଂତ୍ୟଜ୍ୟ ଭିକ୍ଷୁରୂପମରିଂଦମଃ ॥ 14 ॥
କାଷ୍ଠୟୋସ୍ସ୍ଵେନ ରୂପେଣ ଜନୟାମାସ ପାଵକମ୍ ।
ଦୀପ୍ୟମାନଂ ତତୋ ଵହ୍ନିଂ ହ୍ନିଂ ପୁଷ୍ପୈରଭ୍ୟର୍ଚ୍ୟ ସତ୍କୃତମ୍ ॥ 15 ॥
ତୟୋର୍ମଧ୍ୟେଽଥ ସୁପ୍ରୀତୋ ନିଦଧେ ସୁସମାହିତଃ ।
ତତୋଽଗ୍ନିଂ ଦୀପ୍ୟମାନଂ ତୌ ଚକ୍ରତୁଶ୍ଚ ପ୍ରଦକ୍ଷିଣମ୍ ॥ 16 ॥
ସୁଗ୍ରୀଵୋ ରାଘଵଶ୍ଚୈଵ ଵୟସ୍ୟତ୍ଵମୁପାଗତୌ ।
ତତସ୍ସୁପ୍ରୀତମନସୌ ତାଵୁଭୌ ହରିରାଘଵୌ ॥ 17 ॥
ଅନ୍ୟୋନ୍ୟମଭିଵୀକ୍ଷଂତୌ ନ ତୃପ୍ତିମୁପଜଗ୍ମତୁଃ ।
ତ୍ଵଂ ଵୟସ୍ୟୋଽସି ମେ ହୃଦ୍ୟୋ ହ୍ୟେକଂ ଦୁଃଖଂ ସୁଖଂ ଚ ନୌ ॥ 18 ॥
ସୁଗ୍ରୀଵୋ ରାଘଵଂ ଵାକ୍ୟମିତ୍ୟୁଵାଚ ପ୍ରହୃଷ୍ଟଵତ୍ ।
ତତସ୍ସୁପର୍ଣବହୁଲାଂ ଛିତ୍ଵା ଶାଖାଂ ସୁପୁଷ୍ପିତାମ୍ ॥ 19 ॥
ସାଲସ୍ୟାସ୍ତୀର୍ୟ ସୁଗ୍ରୀଵୋ ନିଷସାଦ ସରାଘଵଃ ।
ଲକ୍ଷ୍ମଣାୟାଥ ସଂହୃଷ୍ଟୋ ହନୂମାନ୍ ପ୍ଲଵଗର୍ଷଭଃ ॥ 20 ॥
ଶାଖାଂ ଚଂଦନଵୃକ୍ଷସ୍ୟ ଦଦୌ ପରମପୁଷ୍ପିତାମ୍ ।
ତତଃ ପ୍ରହୃଷ୍ଟସ୍ସୁଗ୍ରୀଵଃ ଶ୍ଲକ୍ଷ୍ଣଂ ମଧୁରୟା ଗିରା ॥ 21 ॥
ପ୍ରତ୍ୟୁଵାଚ ତଦା ରାମଂ ହର୍ଷଵ୍ୟାକୁଲଲୋଚନଃ ।
ଅହଂ ଵିନିକୃତୋ ରାମ ଚରାମୀହ ଭୟାର୍ଦିତଃ ॥ 22 ॥
ହୃତଭାର୍ୟୋ ଵନେ ତ୍ରସ୍ତୋ ଦୁର୍ଗମେତଦୁପାଶ୍ରିତଃ ।
ସୋଽହଂ ତ୍ରସ୍ତୋ ଵନେ ଭୀତୋ ଵସାମ୍ୟୁଦ୍ଭ୍ରାଂତଚେତନଃ ॥ 23 ॥
ଵାଲିନା ନିକୃତୋ ଭ୍ରାତ୍ରା କୃତଵୈରଶ୍ଚ ରାଘଵ ।
ଵାଲିନୋ ମେ ମହାଭାଗ ଭୟାର୍ତସ୍ୟାଭୟଂ କୁରୁ ॥ 24 ॥
କର୍ତୁମର୍ହସି କାକୁତ୍ସ୍ଥ ଭୟଂ ମେ ନ ଭଵେଦ୍ୟଥା ।
ଏଵମୁକ୍ତସ୍ତୁ ତେଜସ୍ଵୀ ଧର୍ମଜ୍ଞୋ ଧର୍ମଵତ୍ସଲଃ ॥ 25 ॥
ପ୍ରତ୍ୟଭାଷତ କାକୁତ୍ସ୍ଥଃ ସୁଗ୍ରୀଵଂ ପ୍ରହସନ୍ନିଵ ।
ଉପକାରଫଲଂ ମିତ୍ରଂ ଵିଦିତଂ ମେ ମହାକପେ ॥ 26 ॥
ଵାଲିନଂ ତଂ ଵଧିଷ୍ୟାମି ତଵ ଭାର୍ୟାପହାରିଣମ୍ ।
ଅମୋଘାସ୍ସୂର୍ୟସଂକାଶା ମମୈତେ ନିଶିତାଶ୍ଶରାଃ ॥ 27 ॥
ତସ୍ମିନ୍ଵାଲିନି ଦୁର୍ଵୃତ୍ତେ ନିପତିଷ୍ୟଂତି ଵେଗିତାଃ ।
କଂକପତ୍ରପ୍ରତିଚ୍ଛନ୍ନା ମହେଂଦ୍ରାଶନିସନ୍ନିଭାଃ ॥ 28 ॥
ତୀକ୍ଷ୍ଣାଗ୍ରା ଋଜୁପର୍ଵାଣସ୍ସରୋଷା ଭୁଜଗା ଇଵ ।
ତମଦ୍ୟ ଵାଲିନଂ ପଶ୍ୟ ତୀକ୍ଷ୍ଣୈରାଶୀଵିଷୋପମୈଃ ॥ 29 ॥
ଶରୈର୍ଵିନିହତଂ ଭୂମୌ ଵିକୀର୍ଣମିଵ ପର୍ଵତମ୍ ।
ସ ତୁ ତଦ୍ଵଚନଂ ଶ୍ରୁତ୍ଵା ରାଘଵସ୍ୟାତ୍ମନୋ ହିତମ୍ ॥ 30 ॥
ସୁଗ୍ରୀଵଃ ପରମପ୍ରୀତସ୍ସୁମହଦ୍ଵାକ୍ୟମବ୍ରଵୀତ୍ ।
ତଵ ପ୍ରସାଦେନ ନୃସିଂହ ରାଘଵ ପ୍ରିୟାଂ ଚ ରାଜ୍ୟଂ ଚ ସମାପ୍ନୁୟାମହମ୍ ।
ତଥା କୁରୁ ତ୍ଵଂ ନରଦେଵ ଵୈରିଣଂ ୟଥା ନିହଂସ୍ୟଦ୍ୟ ରିପୁଂମମାଗ୍ରଜମ୍ ॥ 31 ॥
ସୀତା କପୀଂଦ୍ରକ୍ଷଣଦାଚରାଣାଂ ରାଜୀଵହେମଜ୍ଵଲନୋପମାନି ।
ସୁଗ୍ରୀଵରାମପ୍ରଣୟପ୍ରସଂଗେ ଵାମାନି ନେତ୍ରାଣି ସମଂ ସ୍ଫୁରଂତି ॥ 32 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ପଂଚମସ୍ସର୍ଗଃ ॥
