śrīmadvālmīkīya rāmāyaṇē kiṣkindhākāṇḍam ।
atha pañchamassargaḥ ।
ṛśyamūkāttu hanumāngatvā tu malayaṃ girim ।
āchachakṣē tadā vīrau kapirājāya rāghavau ॥ 1 ॥
ayaṃ rāmō mahāprājña ssamprāptō dṛḍhavikramaḥ ।
lakṣmaṇēna saha bhrātrā rāmō'yaṃ satyavikramaḥ ॥ 2 ॥
ikṣvākūṇāṃ kulē jātō rāmō daśarathātmajaḥ ।
dharmē nigaditaśchaiva piturnirdēśapāragaḥ ॥ 3 ॥
tasyāsya vasatō'raṇyē niyatasya mahātmanaḥ ।
rāvaṇēna hṛtā bhāryā sa tvāṃ śaraṇamāgataḥ ॥ 4 ॥
rājasūyāśvamēdhaiścha vahniryēnābhitarpitaḥ ।
dakṣiṇāścha tathōtsṛṣṭā gāvaśśatasahasraśaḥ ॥ 5 ॥
tapasā satyavākyēna vasudhā yēna pālitā ।
strī hētōstasya putrō'yaṃ rāmastvāṃ śaraṇaṃ gataḥ ॥ 6 ॥
bhavatā sakhyakāmau tau bhrātarau rāmalakṣmaṇau ।
pratigṛhyārchayasvaitau pūjanīyatamāvubhau ॥ 7 ॥
śrutvā hanumatō vākyaṃ sugrīvō hṛṣṭamānasaḥ ।
bhayaṃ charāghavādghōraṃ prajahau vigatajvaraḥ ॥ 8 ॥
sakṛtvā mānuṣaṃ rūpaṃ sugrīvaḥ plavagarṣabhaḥ ।
darśanīyatamō bhūtvā prītyā prōvācha rāghavam ॥ 9 ॥
bhavāndharmavinītaścha vikrāntassarvavatsalaḥ ।
ākhyātā vāyuputrēṇa tattvatō mē bhavadguṇāḥ ॥ 10 ॥
tanmamaivaiṣa satkārō lābhaśchaivōttamaḥ prabhō ।
yattvamichChasi sauhārdaṃ vānarēṇa mayā saha ॥ 11 ॥
rōchatē yadi vā sakhyaṃ bāhurēṣa prasāritaḥ ।
gṛhyatāṃ pāṇinā pāṇirmaryādā badhyatāṃ dhruvā ॥ 12 ॥
ētattu vachanaṃ śrutvā sugrīvēṇa subhāṣitam ।
samprahṛṣṭamanā hastaṃ pīḍayāmāsa pāṇinā ॥ 13 ॥
hṛdyaṃ sauhṛdamālambyaparyaṣvajata pīḍitam ।
tatō hanūmānsantyajya bhikṣurūpamarindamaḥ ॥ 14 ॥
kāṣṭhayōssvēna rūpēṇa janayāmāsa pāvakam ।
dīpyamānaṃ tatō vahniṃ hniṃ puṣpairabhyarchya satkṛtam ॥ 15 ॥
tayōrmadhyē'tha suprītō nidadhē susamāhitaḥ ।
tatō'gniṃ dīpyamānaṃ tau chakratuścha pradakṣiṇam ॥ 16 ॥
sugrīvō rāghavaśchaiva vayasyatvamupāgatau ।
tatassuprītamanasau tāvubhau harirāghavau ॥ 17 ॥
anyōnyamabhivīkṣantau na tṛptimupajagmatuḥ ।
tvaṃ vayasyō'si mē hṛdyō hyēkaṃ duḥkhaṃ sukhaṃ cha nau ॥ 18 ॥
sugrīvō rāghavaṃ vākyamityuvācha prahṛṣṭavat ।
tatassuparṇabahulāṃ Chitvā śākhāṃ supuṣpitām ॥ 19 ॥
sālasyāstīrya sugrīvō niṣasāda sarāghavaḥ ।
lakṣmaṇāyātha saṃhṛṣṭō hanūmān plavagarṣabhaḥ ॥ 20 ॥
śākhāṃ chandanavṛkṣasya dadau paramapuṣpitām ।
tataḥ prahṛṣṭassugrīvaḥ ślakṣṇaṃ madhurayā girā ॥ 21 ॥
pratyuvācha tadā rāmaṃ harṣavyākulalōchanaḥ ।
ahaṃ vinikṛtō rāma charāmīha bhayārditaḥ ॥ 22 ॥
hṛtabhāryō vanē trastō durgamētadupāśritaḥ ।
sō'haṃ trastō vanē bhītō vasāmyudbhrāntachētanaḥ ॥ 23 ॥
vālinā nikṛtō bhrātrā kṛtavairaścha rāghava ।
vālinō mē mahābhāga bhayārtasyābhayaṃ kuru ॥ 24 ॥
kartumarhasi kākutstha bhayaṃ mē na bhavēdyathā ।
ēvamuktastu tējasvī dharmajñō dharmavatsalaḥ ॥ 25 ॥
pratyabhāṣata kākutsthaḥ sugrīvaṃ prahasanniva ।
upakāraphalaṃ mitraṃ viditaṃ mē mahākapē ॥ 26 ॥
vālinaṃ taṃ vadhiṣyāmi tava bhāryāpahāriṇam ।
amōghāssūryasaṅkāśā mamaitē niśitāśśarāḥ ॥ 27 ॥
tasminvālini durvṛttē nipatiṣyanti vēgitāḥ ।
kaṅkapatrapratichChannā mahēndrāśanisannibhāḥ ॥ 28 ॥
tīkṣṇāgrā ṛjuparvāṇassarōṣā bhujagā iva ।
tamadya vālinaṃ paśya tīkṣṇairāśīviṣōpamaiḥ ॥ 29 ॥
śarairvinihataṃ bhūmau vikīrṇamiva parvatam ।
sa tu tadvachanaṃ śrutvā rāghavasyātmanō hitam ॥ 30 ॥
sugrīvaḥ paramaprītassumahadvākyamabravīt ।
tava prasādēna nṛsiṃha rāghava priyāṃ cha rājyaṃ cha samāpnuyāmaham ।
tathā kuru tvaṃ naradēva vairiṇaṃ yathā nihaṃsyadya ripummamāgrajam ॥ 31 ॥
sītā kapīndrakṣaṇadācharāṇāṃ rājīvahēmajvalanōpamāni ।
sugrīvarāmapraṇayaprasaṅgē vāmāni nētrāṇi samaṃ sphuranti ॥ 32 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē pañchamassargaḥ ॥
