ශ්රීමද්වාල්මීකීය රාමායණේ කිෂ්කිංධාකාංඩම් ।
අථ පංචමස්සර්ගඃ ।
ඍශ්යමූකාත්තු හනුමාන්ගත්වා තු මලයං ගිරිම් ।
ආචචක්ෂේ තදා වීරෞ කපිරාජාය රාඝවෞ ॥ 1 ॥
අයං රාමෝ මහාප්රාජ්ඤ ස්සංප්රාප්තෝ දෘඪවික්රමඃ ।
ලක්ෂ්මණේන සහ භ්රාත්රා රාමෝऽයං සත්යවික්රමඃ ॥ 2 ॥
ඉක්ෂ්වාකූණාං කුලේ ජාතෝ රාමෝ දශරථාත්මජඃ ।
ධර්මේ නිගදිතශ්චෛව පිතුර්නිර්දේශපාරගඃ ॥ 3 ॥
තස්යාස්ය වසතෝऽරණ්යේ නියතස්ය මහාත්මනඃ ।
රාවණේන හෘතා භාර්යා ස ත්වාං ශරණමාගතඃ ॥ 4 ॥
රාජසූයාශ්වමේධෛශ්ච වහ්නිර්යේනාභිතර්පිතඃ ।
දක්ෂිණාශ්ච තථෝත්සෘෂ්ටා ගාවශ්ශතසහස්රශඃ ॥ 5 ॥
තපසා සත්යවාක්යේන වසුධා යේන පාලිතා ।
ස්ත්රී හේතෝස්තස්ය පුත්රෝऽයං රාමස්ත්වාං ශරණං ගතඃ ॥ 6 ॥
භවතා සඛ්යකාමෞ තෞ භ්රාතරෞ රාමලක්ෂ්මණෞ ।
ප්රතිගෘහ්යාර්චයස්වෛතෞ පූජනීයතමාවුභෞ ॥ 7 ॥
ශ්රුත්වා හනුමතෝ වාක්යං සුග්රීවෝ හෘෂ්ටමානසඃ ।
භයං චරාඝවාද්ඝෝරං ප්රජහෞ විගතජ්වරඃ ॥ 8 ॥
සකෘත්වා මානුෂං රූපං සුග්රීවඃ ප්ලවගර්ෂභඃ ।
දර්ශනීයතමෝ භූත්වා ප්රීත්යා ප්රෝවාච රාඝවම් ॥ 9 ॥
භවාංධර්මවිනීතශ්ච වික්රාංතස්සර්වවත්සලඃ ।
ආඛ්යාතා වායුපුත්රේණ තත්ත්වතෝ මේ භවද්ගුණාඃ ॥ 10 ॥
තන්මමෛවෛෂ සත්කාරෝ ලාභශ්චෛවෝත්තමඃ ප්රභෝ ।
යත්ත්වමිච්ඡසි සෞහාර්දං වානරේණ මයා සහ ॥ 11 ॥
රෝචතේ යදි වා සඛ්යං බාහුරේෂ ප්රසාරිතඃ ।
ගෘහ්යතාං පාණිනා පාණිර්මර්යාදා බධ්යතාං ධ්රුවා ॥ 12 ॥
ඒතත්තු වචනං ශ්රුත්වා සුග්රීවේණ සුභාෂිතම් ।
සංප්රහෘෂ්ටමනා හස්තං පීඩයාමාස පාණිනා ॥ 13 ॥
හෘද්යං සෞහෘදමාලංබ්යපර්යෂ්වජත පීඩිතම් ।
තතෝ හනූමාන්සංත්යජ්ය භික්ෂුරූපමරිංදමඃ ॥ 14 ॥
කාෂ්ඨයෝස්ස්වේන රූපේණ ජනයාමාස පාවකම් ।
දීප්යමානං තතෝ වහ්නිං හ්නිං පුෂ්පෛරභ්යර්ච්ය සත්කෘතම් ॥ 15 ॥
තයෝර්මධ්යේऽථ සුප්රීතෝ නිදධේ සුසමාහිතඃ ।
තතෝऽග්නිං දීප්යමානං තෞ චක්රතුශ්ච ප්රදක්ෂිණම් ॥ 16 ॥
සුග්රීවෝ රාඝවශ්චෛව වයස්යත්වමුපාගතෞ ।
තතස්සුප්රීතමනසෞ තාවුභෞ හරිරාඝවෞ ॥ 17 ॥
අන්යෝන්යමභිවීක්ෂංතෞ න තෘප්තිමුපජග්මතුඃ ।
ත්වං වයස්යෝऽසි මේ හෘද්යෝ හ්යේකං දුඃඛං සුඛං ච නෞ ॥ 18 ॥
සුග්රීවෝ රාඝවං වාක්යමිත්යුවාච ප්රහෘෂ්ටවත් ।
තතස්සුපර්ණබහුලාං ඡිත්වා ශාඛාං සුපුෂ්පිතාම් ॥ 19 ॥
සාලස්යාස්තීර්ය සුග්රීවෝ නිෂසාද සරාඝවඃ ।
ලක්ෂ්මණායාථ සංහෘෂ්ටෝ හනූමාන් ප්ලවගර්ෂභඃ ॥ 20 ॥
ශාඛාං චංදනවෘක්ෂස්ය දදෞ පරමපුෂ්පිතාම් ।
තතඃ ප්රහෘෂ්ටස්සුග්රීවඃ ශ්ලක්ෂ්ණං මධුරයා ගිරා ॥ 21 ॥
ප්රත්යුවාච තදා රාමං හර්ෂව්යාකුලලෝචනඃ ।
අහං විනිකෘතෝ රාම චරාමීහ භයාර්දිතඃ ॥ 22 ॥
හෘතභාර්යෝ වනේ ත්රස්තෝ දුර්ගමේතදුපාශ්රිතඃ ।
සෝऽහං ත්රස්තෝ වනේ භීතෝ වසාම්යුද්භ්රාංතචේතනඃ ॥ 23 ॥
වාලිනා නිකෘතෝ භ්රාත්රා කෘතවෛරශ්ච රාඝව ।
වාලිනෝ මේ මහාභාග භයාර්තස්යාභයං කුරු ॥ 24 ॥
කර්තුමර්හසි කාකුත්ස්ථ භයං මේ න භවේද්යථා ।
ඒවමුක්තස්තු තේජස්වී ධර්මජ්ඤෝ ධර්මවත්සලඃ ॥ 25 ॥
ප්රත්යභාෂත කාකුත්ස්ථඃ සුග්රීවං ප්රහසන්නිව ।
උපකාරඵලං මිත්රං විදිතං මේ මහාකපේ ॥ 26 ॥
වාලිනං තං වධිෂ්යාමි තව භාර්යාපහාරිණම් ।
අමෝඝාස්සූර්යසංකාශා මමෛතේ නිශිතාශ්ශරාඃ ॥ 27 ॥
තස්මින්වාලිනි දුර්වෘත්තේ නිපතිෂ්යංති වේගිතාඃ ।
කංකපත්රප්රතිච්ඡන්නා මහේංද්රාශනිසන්නිභාඃ ॥ 28 ॥
තීක්ෂ්ණාග්රා ඍජුපර්වාණස්සරෝෂා භුජගා ඉව ।
තමද්ය වාලිනං පශ්ය තීක්ෂ්ණෛරාශීවිෂෝපමෛඃ ॥ 29 ॥
ශරෛර්විනිහතං භූමෞ විකීර්ණමිව පර්වතම් ।
ස තු තද්වචනං ශ්රුත්වා රාඝවස්යාත්මනෝ හිතම් ॥ 30 ॥
සුග්රීවඃ පරමප්රීතස්සුමහද්වාක්යමබ්රවීත් ।
තව ප්රසාදේන නෘසිංහ රාඝව ප්රියාං ච රාජ්යං ච සමාප්නුයාමහම් ।
තථා කුරු ත්වං නරදේව වෛරිණං යථා නිහංස්යද්ය රිපුංමමාග්රජම් ॥ 31 ॥
සීතා කපීංද්රක්ෂණදාචරාණාං රාජීවහේමජ්වලනෝපමානි ।
සුග්රීවරාමප්රණයප්රසංගේ වාමානි නේත්රාණි සමං ස්ඵුරංති ॥ 32 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ පංචමස්සර්ගඃ ॥
