શ્રીમદ્વાલ્મીકીય રામાયણે કિષ્કિંધાકાંડમ્ ।
અથ પંચમસ્સર્ગઃ ।
ઋશ્યમૂકાત્તુ હનુમાન્ગત્વા તુ મલયં ગિરિમ્ ।
આચચક્ષે તદા વીરૌ કપિરાજાય રાઘવૌ ॥ 1 ॥
અયં રામો મહાપ્રાજ્ઞ સ્સંપ્રાપ્તો દૃઢવિક્રમઃ ।
લક્ષ્મણેન સહ ભ્રાત્રા રામોઽયં સત્યવિક્રમઃ ॥ 2 ॥
ઇક્ષ્વાકૂણાં કુલે જાતો રામો દશરથાત્મજઃ ।
ધર્મે નિગદિતશ્ચૈવ પિતુર્નિર્દેશપારગઃ ॥ 3 ॥
તસ્યાસ્ય વસતોઽરણ્યે નિયતસ્ય મહાત્મનઃ ।
રાવણેન હૃતા ભાર્યા સ ત્વાં શરણમાગતઃ ॥ 4 ॥
રાજસૂયાશ્વમેધૈશ્ચ વહ્નિર્યેનાભિતર્પિતઃ ।
દક્ષિણાશ્ચ તથોત્સૃષ્ટા ગાવશ્શતસહસ્રશઃ ॥ 5 ॥
તપસા સત્યવાક્યેન વસુધા યેન પાલિતા ।
સ્ત્રી હેતોસ્તસ્ય પુત્રોઽયં રામસ્ત્વાં શરણં ગતઃ ॥ 6 ॥
ભવતા સખ્યકામૌ તૌ ભ્રાતરૌ રામલક્ષ્મણૌ ।
પ્રતિગૃહ્યાર્ચયસ્વૈતૌ પૂજનીયતમાવુભૌ ॥ 7 ॥
શ્રુત્વા હનુમતો વાક્યં સુગ્રીવો હૃષ્ટમાનસઃ ।
ભયં ચરાઘવાદ્ઘોરં પ્રજહૌ વિગતજ્વરઃ ॥ 8 ॥
સકૃત્વા માનુષં રૂપં સુગ્રીવઃ પ્લવગર્ષભઃ ।
દર્શનીયતમો ભૂત્વા પ્રીત્યા પ્રોવાચ રાઘવમ્ ॥ 9 ॥
ભવાંધર્મવિનીતશ્ચ વિક્રાંતસ્સર્વવત્સલઃ ।
આખ્યાતા વાયુપુત્રેણ તત્ત્વતો મે ભવદ્ગુણાઃ ॥ 10 ॥
તન્મમૈવૈષ સત્કારો લાભશ્ચૈવોત્તમઃ પ્રભો ।
યત્ત્વમિચ્છસિ સૌહાર્દં વાનરેણ મયા સહ ॥ 11 ॥
રોચતે યદિ વા સખ્યં બાહુરેષ પ્રસારિતઃ ।
ગૃહ્યતાં પાણિના પાણિર્મર્યાદા બધ્યતાં ધ્રુવા ॥ 12 ॥
એતત્તુ વચનં શ્રુત્વા સુગ્રીવેણ સુભાષિતમ્ ।
સંપ્રહૃષ્ટમના હસ્તં પીડયામાસ પાણિના ॥ 13 ॥
હૃદ્યં સૌહૃદમાલંબ્યપર્યષ્વજત પીડિતમ્ ।
તતો હનૂમાન્સંત્યજ્ય ભિક્ષુરૂપમરિંદમઃ ॥ 14 ॥
કાષ્ઠયોસ્સ્વેન રૂપેણ જનયામાસ પાવકમ્ ।
દીપ્યમાનં તતો વહ્નિં હ્નિં પુષ્પૈરભ્યર્ચ્ય સત્કૃતમ્ ॥ 15 ॥
તયોર્મધ્યેઽથ સુપ્રીતો નિદધે સુસમાહિતઃ ।
તતોઽગ્નિં દીપ્યમાનં તૌ ચક્રતુશ્ચ પ્રદક્ષિણમ્ ॥ 16 ॥
સુગ્રીવો રાઘવશ્ચૈવ વયસ્યત્વમુપાગતૌ ।
તતસ્સુપ્રીતમનસૌ તાવુભૌ હરિરાઘવૌ ॥ 17 ॥
અન્યોન્યમભિવીક્ષંતૌ ન તૃપ્તિમુપજગ્મતુઃ ।
ત્વં વયસ્યોઽસિ મે હૃદ્યો હ્યેકં દુઃખં સુખં ચ નૌ ॥ 18 ॥
સુગ્રીવો રાઘવં વાક્યમિત્યુવાચ પ્રહૃષ્ટવત્ ।
તતસ્સુપર્ણબહુલાં છિત્વા શાખાં સુપુષ્પિતામ્ ॥ 19 ॥
સાલસ્યાસ્તીર્ય સુગ્રીવો નિષસાદ સરાઘવઃ ।
લક્ષ્મણાયાથ સંહૃષ્ટો હનૂમાન્ પ્લવગર્ષભઃ ॥ 20 ॥
શાખાં ચંદનવૃક્ષસ્ય દદૌ પરમપુષ્પિતામ્ ।
તતઃ પ્રહૃષ્ટસ્સુગ્રીવઃ શ્લક્ષ્ણં મધુરયા ગિરા ॥ 21 ॥
પ્રત્યુવાચ તદા રામં હર્ષવ્યાકુલલોચનઃ ।
અહં વિનિકૃતો રામ ચરામીહ ભયાર્દિતઃ ॥ 22 ॥
હૃતભાર્યો વને ત્રસ્તો દુર્ગમેતદુપાશ્રિતઃ ।
સોઽહં ત્રસ્તો વને ભીતો વસામ્યુદ્ભ્રાંતચેતનઃ ॥ 23 ॥
વાલિના નિકૃતો ભ્રાત્રા કૃતવૈરશ્ચ રાઘવ ।
વાલિનો મે મહાભાગ ભયાર્તસ્યાભયં કુરુ ॥ 24 ॥
કર્તુમર્હસિ કાકુત્સ્થ ભયં મે ન ભવેદ્યથા ।
એવમુક્તસ્તુ તેજસ્વી ધર્મજ્ઞો ધર્મવત્સલઃ ॥ 25 ॥
પ્રત્યભાષત કાકુત્સ્થઃ સુગ્રીવં પ્રહસન્નિવ ।
ઉપકારફલં મિત્રં વિદિતં મે મહાકપે ॥ 26 ॥
વાલિનં તં વધિષ્યામિ તવ ભાર્યાપહારિણમ્ ।
અમોઘાસ્સૂર્યસંકાશા મમૈતે નિશિતાશ્શરાઃ ॥ 27 ॥
તસ્મિન્વાલિનિ દુર્વૃત્તે નિપતિષ્યંતિ વેગિતાઃ ।
કંકપત્રપ્રતિચ્છન્ના મહેંદ્રાશનિસન્નિભાઃ ॥ 28 ॥
તીક્ષ્ણાગ્રા ઋજુપર્વાણસ્સરોષા ભુજગા ઇવ ।
તમદ્ય વાલિનં પશ્ય તીક્ષ્ણૈરાશીવિષોપમૈઃ ॥ 29 ॥
શરૈર્વિનિહતં ભૂમૌ વિકીર્ણમિવ પર્વતમ્ ।
સ તુ તદ્વચનં શ્રુત્વા રાઘવસ્યાત્મનો હિતમ્ ॥ 30 ॥
સુગ્રીવઃ પરમપ્રીતસ્સુમહદ્વાક્યમબ્રવીત્ ।
તવ પ્રસાદેન નૃસિંહ રાઘવ પ્રિયાં ચ રાજ્યં ચ સમાપ્નુયામહમ્ ।
તથા કુરુ ત્વં નરદેવ વૈરિણં યથા નિહંસ્યદ્ય રિપુંમમાગ્રજમ્ ॥ 31 ॥
સીતા કપીંદ્રક્ષણદાચરાણાં રાજીવહેમજ્વલનોપમાનિ ।
સુગ્રીવરામપ્રણયપ્રસંગે વામાનિ નેત્રાણિ સમં સ્ફુરંતિ ॥ 32 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે પંચમસ્સર્ગઃ ॥
