ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ඒකපංචාශස්සර්ගඃ ।
ඉත්යුක්ත්වා හනුමාංස්තත්ර පුනඃ කෘෂ්ණාජිනාංබරාම් ।
අබ්රවීත්තාං මහාභාගාං තාපසීං ධර්මචාරිණීම් ॥ 1 ॥
ඉදං ප්රවිෂ්ටාස්සහසා බිලං තිමිරසංවෘතම් ।
ක්ෂුත්පිපාසාපරිශ්රාංතාඃ පරිඛින්නාශ්ච සර්වශඃ ॥ 2 ॥
මහද්ධරණ්යා විවරං ප්රවිෂ්ටාඃ ස්ම පිපාසිතාඃ ।
ඉමාං ස්ත්වේවංවිධාන්භාවාන්විවිධානද්භුතෝපමාන් ॥ 3 ॥
දෘෂ්ට්වා වයං ප්රව්යථිතාස්සංභ්රාංතා නෂ්ටචේතසඃ ।
කස්යෛතේ කාංචනා වෘක්ෂාස්තරුණාදිත්යසන්නිභාඃ ॥ 4 ॥
ශුචීන්යභ්යවහාර්යාණි මූලානි ච ඵලානි ච ।
කාංචනානි විමානානි රාජතානි ගෘහාණි ච ॥ 5 ॥
තපනීයගවාක්ෂාණි මණිජාලාවෘතානි ච ।
පුෂ්පිතාඃ ඵලවංතශ්ච පුණ්යාස්සුරභිගංධිනඃ ॥ 6 ॥
ඉමේ ජාංබූනදමයාඃ පාදපාඃ කස්ය තේජසා ।
කාංචනානි ච පද්මානි ජාතානි විමලේ ජලේ ॥ 7 ॥
කථං මත්ස්යාශ්ච සෞවර්ණා දෘශ්යංතේ සහ කච්ඡපෛඃ ।
ආත්මානමනුභාවං ච කස්ය චෛතත්තපෝබලම් ॥ 8 ॥
අජානතාං න ස්සර්වේෂාං සර්වමාඛ්යාතුමර්හසි ।
ඒවමුක්තා හනුමතා තාපසී ධර්මචාරිණී ॥ 9 ॥
ප්රත්යුවාච හනූමංතං සර්වභූතහිතේ රතා ।
මයෝ නාම මහාතේජා මායාවී වානරර්ෂභඃ ॥ 10 ॥
තේනේදං නිර්මිතං සර්වං මායයා කාංචනං වනම් ।
පුරා දානවමුඛ්යානාං විශ්වකර්මා බභූව හ ॥ 11 ॥
යේනේදං කාංචනං දිව්යං නිර්මිතං භවනෝත්තමම් ।
ස තු වර්ෂසහස්රාණි තපස්තප්ත්වා මහාවනේ ॥ 12 ॥
පිතාමහාද්වරං ලේභේ සර්වමෞශනසං ධනම් ।
වනං විධාය බලවාන්සර්වකාමේශ්වරස්තදා ॥ 13 ॥
උවාස සුඛිතඃ කාලං කංචිදස්මින්මහාවනේ ।
තමප්සරසි හේමායාං සක්තං දානවපුංගවම් ॥ 14 ॥
වික්රම්යෛවාශනිං ගෘහ්ය ජඝානේත්රඃ පුරංදරඃ ।
ඉදං ච බ්රහ්මණා දත්තං හේමායෛ වනමුත්තමම් ॥ 15 ॥
ශාශ්වතාඃ කාමභෝගශ්ච ගෘහං චේදං හිරණ්මයම් ।
දුහිතා මේරුසාවර්ණේරහං තස්යාස්ස්වයංප්රභා ॥ 16 ॥
ඉදං රක්ෂාමි භවනං හේමායා වානරෝත්තම ।
මම ප්රියසඛී හේමා නෘත්තගීතවිශාරදා ॥ 17 ॥
තයා දත්තවරා චාස්මි රක්ෂාමි භවනෝත්තමම් ।
කිං කාර්යං කස්ය වා හේතෝඃ කාංතාරාණි ප්රපශ්යථ ॥ 18 ॥
කථං චේදං වනං දුර්ගං යුෂ්මාභිරුපලක්ෂිතම් ।
ඉමාන්යභ්යවහාර්යාණි මූලානි ච ඵලානි ච ॥ 19 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ඒකපංචාශස්සර්ගඃ ॥
