శ్రీమద్వాల్మీకీయ రామాయణే కిష్కింధాకాండమ్ ।
అథ ఏకపంచాశస్సర్గః ।
ఇత్యుక్త్వా హనుమాంస్తత్ర పునః కృష్ణాజినాంబరామ్ ।
అబ్రవీత్తాం మహాభాగాం తాపసీం ధర్మచారిణీమ్ ॥ 1 ॥
ఇదం ప్రవిష్టాస్సహసా బిలం తిమిరసంవృతమ్ ।
క్షుత్పిపాసాపరిశ్రాంతాః పరిఖిన్నాశ్చ సర్వశః ॥ 2 ॥
మహద్ధరణ్యా వివరం ప్రవిష్టాః స్మ పిపాసితాః ।
ఇమాం స్త్వేవంవిధాన్భావాన్వివిధానద్భుతోపమాన్ ॥ 3 ॥
దృష్ట్వా వయం ప్రవ్యథితాస్సంభ్రాంతా నష్టచేతసః ।
కస్యైతే కాంచనా వృక్షాస్తరుణాదిత్యసన్నిభాః ॥ 4 ॥
శుచీన్యభ్యవహార్యాణి మూలాని చ ఫలాని చ ।
కాంచనాని విమానాని రాజతాని గృహాణి చ ॥ 5 ॥
తపనీయగవాక్షాణి మణిజాలావృతాని చ ।
పుష్పితాః ఫలవంతశ్చ పుణ్యాస్సురభిగంధినః ॥ 6 ॥
ఇమే జాంబూనదమయాః పాదపాః కస్య తేజసా ।
కాంచనాని చ పద్మాని జాతాని విమలే జలే ॥ 7 ॥
కథం మత్స్యాశ్చ సౌవర్ణా దృశ్యంతే సహ కచ్ఛపైః ।
ఆత్మానమనుభావం చ కస్య చైతత్తపోబలమ్ ॥ 8 ॥
అజానతాం న స్సర్వేషాం సర్వమాఖ్యాతుమర్హసి ।
ఏవముక్తా హనుమతా తాపసీ ధర్మచారిణీ ॥ 9 ॥
ప్రత్యువాచ హనూమంతం సర్వభూతహితే రతా ।
మయో నామ మహాతేజా మాయావీ వానరర్షభః ॥ 10 ॥
తేనేదం నిర్మితం సర్వం మాయయా కాంచనం వనమ్ ।
పురా దానవముఖ్యానాం విశ్వకర్మా బభూవ హ ॥ 11 ॥
యేనేదం కాంచనం దివ్యం నిర్మితం భవనోత్తమమ్ ।
స తు వర్షసహస్రాణి తపస్తప్త్వా మహావనే ॥ 12 ॥
పితామహాద్వరం లేభే సర్వమౌశనసం ధనమ్ ।
వనం విధాయ బలవాన్సర్వకామేశ్వరస్తదా ॥ 13 ॥
ఉవాస సుఖితః కాలం కంచిదస్మిన్మహావనే ।
తమప్సరసి హేమాయాం సక్తం దానవపుంగవమ్ ॥ 14 ॥
విక్రమ్యైవాశనిం గృహ్య జఘానేత్రః పురందరః ।
ఇదం చ బ్రహ్మణా దత్తం హేమాయై వనముత్తమమ్ ॥ 15 ॥
శాశ్వతాః కామభోగశ్చ గృహం చేదం హిరణ్మయమ్ ।
దుహితా మేరుసావర్ణేరహం తస్యాస్స్వయంప్రభా ॥ 16 ॥
ఇదం రక్షామి భవనం హేమాయా వానరోత్తమ ।
మమ ప్రియసఖీ హేమా నృత్తగీతవిశారదా ॥ 17 ॥
తయా దత్తవరా చాస్మి రక్షామి భవనోత్తమమ్ ।
కిం కార్యం కస్య వా హేతోః కాంతారాణి ప్రపశ్యథ ॥ 18 ॥
కథం చేదం వనం దుర్గం యుష్మాభిరుపలక్షితమ్ ।
ఇమాన్యభ్యవహార్యాణి మూలాని చ ఫలాని చ ॥ 19 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కింధాకాండే ఏకపంచాశస్సర్గః ॥
