ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଏକପଂଚାଶସ୍ସର୍ଗଃ ।
ଇତ୍ୟୁକ୍ତ୍ଵା ହନୁମାଂସ୍ତତ୍ର ପୁନଃ କୃଷ୍ଣାଜିନାଂବରାମ୍ ।
ଅବ୍ରଵୀତ୍ତାଂ ମହାଭାଗାଂ ତାପସୀଂ ଧର୍ମଚାରିଣୀମ୍ ॥ 1 ॥
ଇଦଂ ପ୍ରଵିଷ୍ଟାସ୍ସହସା ବିଲଂ ତିମିରସଂଵୃତମ୍ ।
କ୍ଷୁତ୍ପିପାସାପରିଶ୍ରାଂତାଃ ପରିଖିନ୍ନାଶ୍ଚ ସର୍ଵଶଃ ॥ 2 ॥
ମହଦ୍ଧରଣ୍ୟା ଵିଵରଂ ପ୍ରଵିଷ୍ଟାଃ ସ୍ମ ପିପାସିତାଃ ।
ଇମାଂ ସ୍ତ୍ଵେଵଂଵିଧାନ୍ଭାଵାନ୍ଵିଵିଧାନଦ୍ଭୁତୋପମାନ୍ ॥ 3 ॥
ଦୃଷ୍ଟ୍ଵା ଵୟଂ ପ୍ରଵ୍ୟଥିତାସ୍ସଂଭ୍ରାଂତା ନଷ୍ଟଚେତସଃ ।
କସ୍ୟୈତେ କାଂଚନା ଵୃକ୍ଷାସ୍ତରୁଣାଦିତ୍ୟସନ୍ନିଭାଃ ॥ 4 ॥
ଶୁଚୀନ୍ୟଭ୍ୟଵହାର୍ୟାଣି ମୂଲାନି ଚ ଫଲାନି ଚ ।
କାଂଚନାନି ଵିମାନାନି ରାଜତାନି ଗୃହାଣି ଚ ॥ 5 ॥
ତପନୀୟଗଵାକ୍ଷାଣି ମଣିଜାଲାଵୃତାନି ଚ ।
ପୁଷ୍ପିତାଃ ଫଲଵଂତଶ୍ଚ ପୁଣ୍ୟାସ୍ସୁରଭିଗଂଧିନଃ ॥ 6 ॥
ଇମେ ଜାଂବୂନଦମୟାଃ ପାଦପାଃ କସ୍ୟ ତେଜସା ।
କାଂଚନାନି ଚ ପଦ୍ମାନି ଜାତାନି ଵିମଲେ ଜଲେ ॥ 7 ॥
କଥଂ ମତ୍ସ୍ୟାଶ୍ଚ ସୌଵର୍ଣା ଦୃଶ୍ୟଂତେ ସହ କଚ୍ଛପୈଃ ।
ଆତ୍ମାନମନୁଭାଵଂ ଚ କସ୍ୟ ଚୈତତ୍ତପୋବଲମ୍ ॥ 8 ॥
ଅଜାନତାଂ ନ ସ୍ସର୍ଵେଷାଂ ସର୍ଵମାଖ୍ୟାତୁମର୍ହସି ।
ଏଵମୁକ୍ତା ହନୁମତା ତାପସୀ ଧର୍ମଚାରିଣୀ ॥ 9 ॥
ପ୍ରତ୍ୟୁଵାଚ ହନୂମଂତଂ ସର୍ଵଭୂତହିତେ ରତା ।
ମୟୋ ନାମ ମହାତେଜା ମାୟାଵୀ ଵାନରର୍ଷଭଃ ॥ 10 ॥
ତେନେଦଂ ନିର୍ମିତଂ ସର୍ଵଂ ମାୟୟା କାଂଚନଂ ଵନମ୍ ।
ପୁରା ଦାନଵମୁଖ୍ୟାନାଂ ଵିଶ୍ଵକର୍ମା ବଭୂଵ ହ ॥ 11 ॥
ୟେନେଦଂ କାଂଚନଂ ଦିଵ୍ୟଂ ନିର୍ମିତଂ ଭଵନୋତ୍ତମମ୍ ।
ସ ତୁ ଵର୍ଷସହସ୍ରାଣି ତପସ୍ତପ୍ତ୍ଵା ମହାଵନେ ॥ 12 ॥
ପିତାମହାଦ୍ଵରଂ ଲେଭେ ସର୍ଵମୌଶନସଂ ଧନମ୍ ।
ଵନଂ ଵିଧାୟ ବଲଵାନ୍ସର୍ଵକାମେଶ୍ଵରସ୍ତଦା ॥ 13 ॥
ଉଵାସ ସୁଖିତଃ କାଲଂ କଂଚିଦସ୍ମିନ୍ମହାଵନେ ।
ତମପ୍ସରସି ହେମାୟାଂ ସକ୍ତଂ ଦାନଵପୁଂଗଵମ୍ ॥ 14 ॥
ଵିକ୍ରମ୍ୟୈଵାଶନିଂ ଗୃହ୍ୟ ଜଘାନେତ୍ରଃ ପୁରଂଦରଃ ।
ଇଦଂ ଚ ବ୍ରହ୍ମଣା ଦତ୍ତଂ ହେମାୟୈ ଵନମୁତ୍ତମମ୍ ॥ 15 ॥
ଶାଶ୍ଵତାଃ କାମଭୋଗଶ୍ଚ ଗୃହଂ ଚେଦଂ ହିରଣ୍ମୟମ୍ ।
ଦୁହିତା ମେରୁସାଵର୍ଣେରହଂ ତସ୍ୟାସ୍ସ୍ଵୟଂପ୍ରଭା ॥ 16 ॥
ଇଦଂ ରକ୍ଷାମି ଭଵନଂ ହେମାୟା ଵାନରୋତ୍ତମ ।
ମମ ପ୍ରିୟସଖୀ ହେମା ନୃତ୍ତଗୀତଵିଶାରଦା ॥ 17 ॥
ତୟା ଦତ୍ତଵରା ଚାସ୍ମି ରକ୍ଷାମି ଭଵନୋତ୍ତମମ୍ ।
କିଂ କାର୍ୟଂ କସ୍ୟ ଵା ହେତୋଃ କାଂତାରାଣି ପ୍ରପଶ୍ୟଥ ॥ 18 ॥
କଥଂ ଚେଦଂ ଵନଂ ଦୁର୍ଗଂ ୟୁଷ୍ମାଭିରୁପଲକ୍ଷିତମ୍ ।
ଇମାନ୍ୟଭ୍ୟଵହାର୍ୟାଣି ମୂଲାନି ଚ ଫଲାନି ଚ ॥ 19 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଏକପଂଚାଶସ୍ସର୍ଗଃ ॥
