śrīmadvālmīkīya rāmāyaṇē kiṣkindhākāṇḍam ।
atha ēkapañchāśassargaḥ ।
ityuktvā hanumāṃstatra punaḥ kṛṣṇājināmbarām ।
abravīttāṃ mahābhāgāṃ tāpasīṃ dharmachāriṇīm ॥ 1 ॥
idaṃ praviṣṭāssahasā bilaṃ timirasaṃvṛtam ।
kṣutpipāsāpariśrāntāḥ parikhinnāścha sarvaśaḥ ॥ 2 ॥
mahaddharaṇyā vivaraṃ praviṣṭāḥ sma pipāsitāḥ ।
imāṃ stvēvaṃvidhānbhāvānvividhānadbhutōpamān ॥ 3 ॥
dṛṣṭvā vayaṃ pravyathitāssambhrāntā naṣṭachētasaḥ ।
kasyaitē kāñchanā vṛkṣāstaruṇādityasannibhāḥ ॥ 4 ॥
śuchīnyabhyavahāryāṇi mūlāni cha phalāni cha ।
kāñchanāni vimānāni rājatāni gṛhāṇi cha ॥ 5 ॥
tapanīyagavākṣāṇi maṇijālāvṛtāni cha ।
puṣpitāḥ phalavantaścha puṇyāssurabhigandhinaḥ ॥ 6 ॥
imē jāmbūnadamayāḥ pādapāḥ kasya tējasā ।
kāñchanāni cha padmāni jātāni vimalē jalē ॥ 7 ॥
kathaṃ matsyāścha sauvarṇā dṛśyantē saha kachChapaiḥ ।
ātmānamanubhāvaṃ cha kasya chaitattapōbalam ॥ 8 ॥
ajānatāṃ na ssarvēṣāṃ sarvamākhyātumarhasi ।
ēvamuktā hanumatā tāpasī dharmachāriṇī ॥ 9 ॥
pratyuvācha hanūmantaṃ sarvabhūtahitē ratā ।
mayō nāma mahātējā māyāvī vānararṣabhaḥ ॥ 10 ॥
tēnēdaṃ nirmitaṃ sarvaṃ māyayā kāñchanaṃ vanam ।
purā dānavamukhyānāṃ viśvakarmā babhūva ha ॥ 11 ॥
yēnēdaṃ kāñchanaṃ divyaṃ nirmitaṃ bhavanōttamam ।
sa tu varṣasahasrāṇi tapastaptvā mahāvanē ॥ 12 ॥
pitāmahādvaraṃ lēbhē sarvamauśanasaṃ dhanam ।
vanaṃ vidhāya balavānsarvakāmēśvarastadā ॥ 13 ॥
uvāsa sukhitaḥ kālaṃ kañchidasminmahāvanē ।
tamapsarasi hēmāyāṃ saktaṃ dānavapuṅgavam ॥ 14 ॥
vikramyaivāśaniṃ gṛhya jaghānētraḥ purandaraḥ ।
idaṃ cha brahmaṇā dattaṃ hēmāyai vanamuttamam ॥ 15 ॥
śāśvatāḥ kāmabhōgaścha gṛhaṃ chēdaṃ hiraṇmayam ।
duhitā mērusāvarṇērahaṃ tasyāssvayamprabhā ॥ 16 ॥
idaṃ rakṣāmi bhavanaṃ hēmāyā vānarōttama ।
mama priyasakhī hēmā nṛttagītaviśāradā ॥ 17 ॥
tayā dattavarā chāsmi rakṣāmi bhavanōttamam ।
kiṃ kāryaṃ kasya vā hētōḥ kāntārāṇi prapaśyatha ॥ 18 ॥
kathaṃ chēdaṃ vanaṃ durgaṃ yuṣmābhirupalakṣitam ।
imānyabhyavahāryāṇi mūlāni cha phalāni cha ॥ 19 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē ēkapañchāśassargaḥ ॥
