શ્રીમદ્વાલ્મીકીય રામાયણે કિષ્કિંધાકાંડમ્ ।
અથ એકપંચાશસ્સર્ગઃ ।
ઇત્યુક્ત્વા હનુમાંસ્તત્ર પુનઃ કૃષ્ણાજિનાંબરામ્ ।
અબ્રવીત્તાં મહાભાગાં તાપસીં ધર્મચારિણીમ્ ॥ 1 ॥
ઇદં પ્રવિષ્ટાસ્સહસા બિલં તિમિરસંવૃતમ્ ।
ક્ષુત્પિપાસાપરિશ્રાંતાઃ પરિખિન્નાશ્ચ સર્વશઃ ॥ 2 ॥
મહદ્ધરણ્યા વિવરં પ્રવિષ્ટાઃ સ્મ પિપાસિતાઃ ।
ઇમાં સ્ત્વેવંવિધાન્ભાવાન્વિવિધાનદ્ભુતોપમાન્ ॥ 3 ॥
દૃષ્ટ્વા વયં પ્રવ્યથિતાસ્સંભ્રાંતા નષ્ટચેતસઃ ।
કસ્યૈતે કાંચના વૃક્ષાસ્તરુણાદિત્યસન્નિભાઃ ॥ 4 ॥
શુચીન્યભ્યવહાર્યાણિ મૂલાનિ ચ ફલાનિ ચ ।
કાંચનાનિ વિમાનાનિ રાજતાનિ ગૃહાણિ ચ ॥ 5 ॥
તપનીયગવાક્ષાણિ મણિજાલાવૃતાનિ ચ ।
પુષ્પિતાઃ ફલવંતશ્ચ પુણ્યાસ્સુરભિગંધિનઃ ॥ 6 ॥
ઇમે જાંબૂનદમયાઃ પાદપાઃ કસ્ય તેજસા ।
કાંચનાનિ ચ પદ્માનિ જાતાનિ વિમલે જલે ॥ 7 ॥
કથં મત્સ્યાશ્ચ સૌવર્ણા દૃશ્યંતે સહ કચ્છપૈઃ ।
આત્માનમનુભાવં ચ કસ્ય ચૈતત્તપોબલમ્ ॥ 8 ॥
અજાનતાં ન સ્સર્વેષાં સર્વમાખ્યાતુમર્હસિ ।
એવમુક્તા હનુમતા તાપસી ધર્મચારિણી ॥ 9 ॥
પ્રત્યુવાચ હનૂમંતં સર્વભૂતહિતે રતા ।
મયો નામ મહાતેજા માયાવી વાનરર્ષભઃ ॥ 10 ॥
તેનેદં નિર્મિતં સર્વં માયયા કાંચનં વનમ્ ।
પુરા દાનવમુખ્યાનાં વિશ્વકર્મા બભૂવ હ ॥ 11 ॥
યેનેદં કાંચનં દિવ્યં નિર્મિતં ભવનોત્તમમ્ ।
સ તુ વર્ષસહસ્રાણિ તપસ્તપ્ત્વા મહાવને ॥ 12 ॥
પિતામહાદ્વરં લેભે સર્વમૌશનસં ધનમ્ ।
વનં વિધાય બલવાન્સર્વકામેશ્વરસ્તદા ॥ 13 ॥
ઉવાસ સુખિતઃ કાલં કંચિદસ્મિન્મહાવને ।
તમપ્સરસિ હેમાયાં સક્તં દાનવપુંગવમ્ ॥ 14 ॥
વિક્રમ્યૈવાશનિં ગૃહ્ય જઘાનેત્રઃ પુરંદરઃ ।
ઇદં ચ બ્રહ્મણા દત્તં હેમાયૈ વનમુત્તમમ્ ॥ 15 ॥
શાશ્વતાઃ કામભોગશ્ચ ગૃહં ચેદં હિરણ્મયમ્ ।
દુહિતા મેરુસાવર્ણેરહં તસ્યાસ્સ્વયંપ્રભા ॥ 16 ॥
ઇદં રક્ષામિ ભવનં હેમાયા વાનરોત્તમ ।
મમ પ્રિયસખી હેમા નૃત્તગીતવિશારદા ॥ 17 ॥
તયા દત્તવરા ચાસ્મિ રક્ષામિ ભવનોત્તમમ્ ।
કિં કાર્યં કસ્ય વા હેતોઃ કાંતારાણિ પ્રપશ્યથ ॥ 18 ॥
કથં ચેદં વનં દુર્ગં યુષ્માભિરુપલક્ષિતમ્ ।
ઇમાન્યભ્યવહાર્યાણિ મૂલાનિ ચ ફલાનિ ચ ॥ 19 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે એકપંચાશસ્સર્ગઃ ॥
