ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ഏകപംചാശസ്സര്ഗഃ ।
ഇത്യുക്ത്വാ ഹനുമാംസ്തത്ര പുനഃ കൃഷ്ണാജിനാംബരാമ് ।
അബ്രവീത്താം മഹാഭാഗാം താപസീം ധര്മചാരിണീമ് ॥ 1 ॥
ഇദം പ്രവിഷ്ടാസ്സഹസാ ബിലം തിമിരസംവൃതമ് ।
ക്ഷുത്പിപാസാപരിശ്രാംതാഃ പരിഖിന്നാശ്ച സർവശഃ ॥ 2 ॥
മഹദ്ധരണ്യാ വിവരം പ്രവിഷ്ടാഃ സ്മ പിപാസിതാഃ ।
ഇമാം സ്ത്വേവംവിധാന്ഭാവാന്വിവിധാനദ്ഭുതോപമാന് ॥ 3 ॥
ദൃഷ്ട്വാ വയം പ്രവ്യഥിതാസ്സംഭ്രാംതാ നഷ്ടചേതസഃ ।
കസ്യൈതേ കാംചനാ വൃക്ഷാസ്തരുണാദിത്യസന്നിഭാഃ ॥ 4 ॥
ശുചീന്യഭ്യവഹാര്യാണി മൂലാനി ച ഫലാനി ച ।
കാംചനാനി വിമാനാനി രാജതാനി ഗൃഹാണി ച ॥ 5 ॥
തപനീയഗവാക്ഷാണി മണിജാലാവൃതാനി ച ।
പുഷ്പിതാഃ ഫലവംതശ്ച പുണ്യാസ്സുരഭിഗംധിനഃ ॥ 6 ॥
ഇമേ ജാംബൂനദമയാഃ പാദപാഃ കസ്യ തേജസാ ।
കാംചനാനി ച പദ്മാനി ജാതാനി വിമലേ ജലേ ॥ 7 ॥
കഥം മത്സ്യാശ്ച സൌവര്ണാ ദൃശ്യംതേ സഹ കച്ഛപൈഃ ।
ആത്മാനമനുഭാവം ച കസ്യ ചൈതത്തപോബലമ് ॥ 8 ॥
അജാനതാം ന സ്സർവേഷാം സർവമാഖ്യാതുമര്ഹസി ।
ഏവമുക്താ ഹനുമതാ താപസീ ധര്മചാരിണീ ॥ 9 ॥
പ്രത്യുവാച ഹനൂമംതം സർവഭൂതഹിതേ രതാ ।
മയോ നാമ മഹാതേജാ മായാവീ വാനരര്ഷഭഃ ॥ 10 ॥
തേനേദം നിര്മിതം സർവം മായയാ കാംചനം വനമ് ।
പുരാ ദാനവമുഖ്യാനാം വിശ്വകര്മാ ബഭൂവ ഹ ॥ 11 ॥
യേനേദം കാംചനം ദിവ്യം നിര്മിതം ഭവനോത്തമമ് ।
സ തു വര്ഷസഹസ്രാണി തപസ്തപ്ത്വാ മഹാവനേ ॥ 12 ॥
പിതാമഹാദ്വരം ലേഭേ സർവമൌശനസം ധനമ് ।
വനം വിധായ ബലവാന്സർവകാമേശ്വരസ്തദാ ॥ 13 ॥
ഉവാസ സുഖിതഃ കാലം കംചിദസ്മിന്മഹാവനേ ।
തമപ്സരസി ഹേമായാം സക്തം ദാനവപുംഗവമ് ॥ 14 ॥
വിക്രമ്യൈവാശനിം ഗൃഹ്യ ജഘാനേത്രഃ പുരംദരഃ ।
ഇദം ച ബ്രഹ്മണാ ദത്തം ഹേമായൈ വനമുത്തമമ് ॥ 15 ॥
ശാശ്വതാഃ കാമഭോഗശ്ച ഗൃഹം ചേദം ഹിരണ്മയമ് ।
ദുഹിതാ മേരുസാവര്ണേരഹം തസ്യാസ്സ്വയംപ്രഭാ ॥ 16 ॥
ഇദം രക്ഷാമി ഭവനം ഹേമായാ വാനരോത്തമ ।
മമ പ്രിയസഖീ ഹേമാ നൃത്തഗീതവിശാരദാ ॥ 17 ॥
തയാ ദത്തവരാ ചാസ്മി രക്ഷാമി ഭവനോത്തമമ് ।
കിം കാര്യം കസ്യ വാ ഹേതോഃ കാംതാരാണി പ്രപശ്യഥ ॥ 18 ॥
കഥം ചേദം വനം ദുര്ഗം യുഷ്മാഭിരുപലക്ഷിതമ് ।
ഇമാന്യഭ്യവഹാര്യാണി മൂലാനി ച ഫലാനി ച ॥ 19 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ഏകപംചാശസ്സര്ഗഃ ॥
