ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଚତୁଃପଂଚାଶସ୍ସର୍ଗଃ ।
ତଥା ବ୍ରୁଵତି ତାରେ ତୁ ତାରାଧିପତିଵର୍ଚସି ।
ଅଥ ମେନେ ହୃତଂ ରାଜ୍ୟଂ ହନୂମାନଂଗଦେନ ତତ୍ ॥ 1 ॥
ବୁଦ୍ଧ୍ୟା ହ୍ୟଷ୍ଟାଂଗୟା ୟୁକ୍ତଂ ଚତୁର୍ବଲସମନ୍ଵିତମ୍ ।
ଚତୁର୍ଦଶଗୁଣଂ ମେନେ ହନୂମାନ୍ଵାଲିନସ୍ସୁତମ୍ ॥ 2 ॥
ଆପୂର୍ୟମାଣଂ ଶଶ୍ଵଚ୍ଚ ତେଜୋବଲପରାକ୍ରମୈଃ ।
ଶଶିନଂ ଶୁକ୍ଲପକ୍ଷାଦୌ ଵର୍ଧମାନମିଵ ଶ୍ରିୟା ॥ 3 ॥
ବୃହସ୍ପତିସମଂ ବୁଦ୍ଧ୍ୟା ଵିକ୍ରମେ ସଦୃଶଂ ପିତୁଃ ।
ଶୁଶ୍ରୂଷମାଣଂ ତାରସ୍ୟ ଶକ୍ରସ୍ୟେଵ ପୁରଂଦରମ୍ ॥ 4 ॥
ଭର୍ତୁରର୍ଥେ ପରିଶ୍ରାଂତଂ ସର୍ଵଶାସ୍ତ୍ରଵିଦାଂଵରମ୍ ।
ଅଭିସଂଧାତୁମାରେଭେ ହନୂମାନଂଗଦଂ ତତଃ ॥ 5 ॥
ସ ଚତୁର୍ଣାମୁପାୟାନାଂ ତୃତୀୟମୁପଵର୍ଣୟନ୍ ।
ଭେଦୟାମାସ ତାନ୍ସର୍ଵାନ୍ ଵାନରାନ୍ଵାକ୍ୟସଂପଦା ॥ 6 ॥
ତେଷୁ ସର୍ଵେଷୁ ଭିନ୍ନେଷୁ ତତୋଽଭୀଷୟଦଂଗଦମ୍ ।
ଭୀଷଣୈର୍ଭହୁଭିର୍ଵାକ୍ୟୈଃ କୋପୋପାୟସମନ୍ଵିତୈଃ ॥ 7 ॥
ତ୍ଵଂ ସମର୍ଥତରଃ ପିତ୍ରା ୟୁଦ୍ଧେ ତାରେୟ ଵୈ ଧୁରମ୍ ।
ଦୃଢଂ ଧାରୟିତୁଂ ଶକ୍ତଃ କପିରାଜ୍ୟଂ ୟଥା ପିତା ॥ 8 ॥
ନିତ୍ୟମସ୍ଥିରଚିତ୍ତା ହି କପୟୋ ହରିପୁଂଗଵ ।
ନାଜ୍ଞାପ୍ୟଂ ଵିଷହିଷ୍ୟଂତି ପୁତ୍ରଦାରାନ୍ଵିନା ତ୍ଵୟା ॥ 9 ॥
ତ୍ଵାଂ ନୈତେହ୍ୟନୁୟୁଂଜେୟୁଃ ପ୍ରତ୍ୟକ୍ଷଂ ପ୍ରଵଦାମି ତେ ।
ୟଥାୟଂ ଜାଂବଵାନ୍ନୀଲସ୍ସୁହୋତ୍ରଶ୍ଚ ମହାକପିଃ ॥ 10 ॥
ନ ହ୍ୟହଂ ତେ ଇମେ ସର୍ଵେ ସାମଦାନାଦିଭିର୍ଗୁଣୈଃ ।
ଦଂଡେନ ଵା ତ୍ଵୟା ଶକ୍ୟାସ୍ସୁଗ୍ରୀଵାଦପକର୍ଷିତମ୍ ॥ 11 ॥
ଵିଗୃହ୍ୟାସନମପ୍ୟାହୁର୍ଦୁର୍ବଲେନ ବଲୀୟସଃ ।
ଆତ୍ମରକ୍ଷାକରସ୍ତସ୍ମାନ୍ନ ଵିଗୃହ୍ଣୀତ ଦୁର୍ବଲଃ ॥ 12 ॥
ୟାଂ ଚେମାଂ ମନ୍ୟସେ ଧାତ୍ରୀମେତଦ୍ବିଲମିତି ଶ୍ରୁତମ୍ ।
ଏତଲ୍ଲକ୍ଷ୍ମଣବାଣାନାମୀଷତ୍କାର୍ୟଂ ଵିଦାରଣେ ॥ 13 ॥
ସ୍ଵଲ୍ପଂ ହି କୃତମିଂଦ୍ରେଣ କ୍ଷିପତା ହ୍ୟଶନିଂ ପୁରା ।
ଲକ୍ଷ୍ମଣୋ ନିଶିତୈର୍ବାଣୈର୍ଭିଂଧ୍ୟାତ୍ପତ୍ରପୁଟଂ ୟଥା ॥ 14 ॥
ଲକ୍ଷ୍ମଣସ୍ୟ ଚ ନାରାଚା ବହଵସ୍ସଂତି ତଦ୍ଵିଧାଃ ।
ଵଜ୍ରାଶନିସମସ୍ପର୍ଶା ଗିରୀଣାମପି ଦାରଣାଃ ॥ 15 ॥
ଅଵସ୍ଥାନେ ୟଦୈଵ ତ୍ଵମାସିଷ୍ୟସି ପରଂତପ ।
ତଦୈଵ ହରୟସ୍ସର୍ଵେ ତ୍ୟକ୍ଷ୍ୟଂତି କୃତନିଶ୍ଚୟାଃ ॥ 16 ॥
ସ୍ମରଂତଃ ପୁତ୍ରଦାରାଣାଂ ନିତ୍ୟୋଦ୍ଵିଗ୍ନା ବୁଭୁକ୍ଷିତାଃ ।
ଖେଦିତା ଦୁଃଖଶୟ୍ୟାଭିସ୍ତ୍ଵାଂ କରିଷ୍ୟଂତି ପୃଷ୍ଠତଃ ॥ 17 ॥
ସ ତ୍ଵଂ ହୀନସ୍ସୁହୃଦ୍ଭିଶ୍ଚ ହିତକାମୈଶ୍ଚ ବଂଧୁଭିଃ ।
ତୃଣାଦପି ଭୃଶୋଦ୍ଵିଗ୍ନସ୍ସ୍ପଂଦମାନାଦ୍ଭଵିଷ୍ୟସି ॥ 18 ॥
ନ ଚ ଜାତୁ ନ ହିଂସ୍ୟୁସ୍ତ୍ଵାଂ ଘୋରା ଲକ୍ଷ୍ମଣସାୟକାଃ ।
ଅପଵୃତ୍ତଂ ଜିଘାଂସଂତୋ ମହାଵେଗା ଦୁରାସଦାଃ ॥ 19 ॥
ନ ଚ ଜାତୁ ନ ହିଂସ୍ୟୁସ୍ତ୍ଵା ଘୋରା ଲକ୍ଷ୍ମଣସାୟକାଃ ।
ଅପାଵୃତ୍ତଂ ଜିଘାଂସଂତୋ ମହାଵେଗା ଦୁରାସଦାଃ ॥ 20 ॥
ଅସ୍ମାଭିସ୍ତୁ ଗତଂ ସାର୍ଧଂ ଵିନୀତଵଦୁପସ୍ଥିତମ୍ ।
ଆନୁପୂର୍ଵ୍ୟାତ୍ତୁ ସୁଗ୍ରୀଵୋ ରାଜ୍ୟେ ତ୍ଵାଂ ସ୍ଥାପୟିଷ୍ୟତି ॥ 21 ॥
ଧର୍ମକାମଃ ପିତୃଵ୍ୟସ୍ତେ ପ୍ରୀତିକାମୋ ଦୃଢଵ୍ରତଃ ।
ଶୁଚିସ୍ସତ୍ୟପ୍ରତିଜ୍ଞଶ୍ଚ ନ ତ୍ଵାଂ ଜାତୁ ଜିଘାଂସତି ॥ 22 ॥
ପ୍ରିୟକାମଶ୍ଚ ତେ ମାତୁସ୍ତଦର୍ଥଂ ଚାସ୍ୟ ଜୀଵିତମ୍ ।
ତସ୍ୟାପତ୍ୟଂ ଚ ନାସ୍ତ୍ୟନ୍ୟତ୍ତସ୍ମାଦଂଗଦ ଗମ୍ୟତାମ୍ ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଚତୁଃପଂଚାଶସ୍ସର୍ଗଃ ॥
