ශ්රීමද්වාල්මීකීය රාමායණේ කිෂ්කිංධාකාංඩම් ।
අථ චතුඃපංචාශස්සර්ගඃ ।
තථා බ්රුවති තාරේ තු තාරාධිපතිවර්චසි ।
අථ මේනේ හෘතං රාජ්යං හනූමානංගදේන තත් ॥ 1 ॥
බුද්ධ්යා හ්යෂ්ටාංගයා යුක්තං චතුර්බලසමන්විතම් ।
චතුර්දශගුණං මේනේ හනූමාන්වාලිනස්සුතම් ॥ 2 ॥
ආපූර්යමාණං ශශ්වච්ච තේජෝබලපරාක්රමෛඃ ।
ශශිනං ශුක්ලපක්ෂාදෞ වර්ධමානමිව ශ්රියා ॥ 3 ॥
බෘහස්පතිසමං බුද්ධ්යා වික්රමේ සදෘශං පිතුඃ ।
ශුශ්රූෂමාණං තාරස්ය ශක්රස්යේව පුරංදරම් ॥ 4 ॥
භර්තුරර්ථේ පරිශ්රාංතං සර්වශාස්ත්රවිදාංවරම් ।
අභිසංධාතුමාරේභේ හනූමානංගදං තතඃ ॥ 5 ॥
ස චතුර්ණාමුපායානාං තෘතීයමුපවර්ණයන් ।
භේදයාමාස තාන්සර්වාන් වානරාන්වාක්යසංපදා ॥ 6 ॥
තේෂු සර්වේෂු භින්නේෂු තතෝऽභීෂයදංගදම් ।
භීෂණෛර්භහුභිර්වාක්යෛඃ කෝපෝපායසමන්විතෛඃ ॥ 7 ॥
ත්වං සමර්ථතරඃ පිත්රා යුද්ධේ තාරේය වෛ ධුරම් ।
දෘඪං ධාරයිතුං ශක්තඃ කපිරාජ්යං යථා පිතා ॥ 8 ॥
නිත්යමස්ථිරචිත්තා හි කපයෝ හරිපුංගව ।
නාජ්ඤාප්යං විෂහිෂ්යංති පුත්රදාරාන්විනා ත්වයා ॥ 9 ॥
ත්වාං නෛතේහ්යනුයුංජේයුඃ ප්රත්යක්ෂං ප්රවදාමි තේ ।
යථායං ජාංබවාන්නීලස්සුහෝත්රශ්ච මහාකපිඃ ॥ 10 ॥
න හ්යහං තේ ඉමේ සර්වේ සාමදානාදිභිර්ගුණෛඃ ।
දංඩේන වා ත්වයා ශක්යාස්සුග්රීවාදපකර්ෂිතම් ॥ 11 ॥
විගෘහ්යාසනමප්යාහුර්දුර්බලේන බලීයසඃ ।
ආත්මරක්ෂාකරස්තස්මාන්න විගෘහ්ණීත දුර්බලඃ ॥ 12 ॥
යාං චේමාං මන්යසේ ධාත්රීමේතද්බිලමිති ශ්රුතම් ।
ඒතල්ලක්ෂ්මණබාණානාමීෂත්කාර්යං විදාරණේ ॥ 13 ॥
ස්වල්පං හි කෘතමිංද්රේණ ක්ෂිපතා හ්යශනිං පුරා ।
ලක්ෂ්මණෝ නිශිතෛර්බාණෛර්භිංධ්යාත්පත්රපුටං යථා ॥ 14 ॥
ලක්ෂ්මණස්ය ච නාරාචා බහවස්සංති තද්විධාඃ ।
වජ්රාශනිසමස්පර්ශා ගිරීණාමපි දාරණාඃ ॥ 15 ॥
අවස්ථානේ යදෛව ත්වමාසිෂ්යසි පරංතප ।
තදෛව හරයස්සර්වේ ත්යක්ෂ්යංති කෘතනිශ්චයාඃ ॥ 16 ॥
ස්මරංතඃ පුත්රදාරාණාං නිත්යෝද්විග්නා බුභුක්ෂිතාඃ ।
ඛේදිතා දුඃඛශය්යාභිස්ත්වාං කරිෂ්යංති පෘෂ්ඨතඃ ॥ 17 ॥
ස ත්වං හීනස්සුහෘද්භිශ්ච හිතකාමෛශ්ච බංධුභිඃ ।
තෘණාදපි භෘශෝද්විග්නස්ස්පංදමානාද්භවිෂ්යසි ॥ 18 ॥
න ච ජාතු න හිංස්යුස්ත්වාං ඝෝරා ලක්ෂ්මණසායකාඃ ।
අපවෘත්තං ජිඝාංසංතෝ මහාවේගා දුරාසදාඃ ॥ 19 ॥
න ච ජාතු න හිංස්යුස්ත්වා ඝෝරා ලක්ෂ්මණසායකාඃ ।
අපාවෘත්තං ජිඝාංසංතෝ මහාවේගා දුරාසදාඃ ॥ 20 ॥
අස්මාභිස්තු ගතං සාර්ධං විනීතවදුපස්ථිතම් ।
ආනුපූර්ව්යාත්තු සුග්රීවෝ රාජ්යේ ත්වාං ස්ථාපයිෂ්යති ॥ 21 ॥
ධර්මකාමඃ පිතෘව්යස්තේ ප්රීතිකාමෝ දෘඪව්රතඃ ।
ශුචිස්සත්යප්රතිජ්ඤශ්ච න ත්වාං ජාතු ජිඝාංසති ॥ 22 ॥
ප්රියකාමශ්ච තේ මාතුස්තදර්ථං චාස්ය ජීවිතම් ।
තස්යාපත්යං ච නාස්ත්යන්යත්තස්මාදංගද ගම්යතාම් ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ චතුඃපංචාශස්සර්ගඃ ॥
