શ્રીમદ્વાલ્મીકીય રામાયણે કિષ્કિંધાકાંડમ્ ।
અથ ચતુઃપંચાશસ્સર્ગઃ ।
તથા બ્રુવતિ તારે તુ તારાધિપતિવર્ચસિ ।
અથ મેને હૃતં રાજ્યં હનૂમાનંગદેન તત્ ॥ 1 ॥
બુદ્ધ્યા હ્યષ્ટાંગયા યુક્તં ચતુર્બલસમન્વિતમ્ ।
ચતુર્દશગુણં મેને હનૂમાન્વાલિનસ્સુતમ્ ॥ 2 ॥
આપૂર્યમાણં શશ્વચ્ચ તેજોબલપરાક્રમૈઃ ।
શશિનં શુક્લપક્ષાદૌ વર્ધમાનમિવ શ્રિયા ॥ 3 ॥
બૃહસ્પતિસમં બુદ્ધ્યા વિક્રમે સદૃશં પિતુઃ ।
શુશ્રૂષમાણં તારસ્ય શક્રસ્યેવ પુરંદરમ્ ॥ 4 ॥
ભર્તુરર્થે પરિશ્રાંતં સર્વશાસ્ત્રવિદાંવરમ્ ।
અભિસંધાતુમારેભે હનૂમાનંગદં તતઃ ॥ 5 ॥
સ ચતુર્ણામુપાયાનાં તૃતીયમુપવર્ણયન્ ।
ભેદયામાસ તાન્સર્વાન્ વાનરાન્વાક્યસંપદા ॥ 6 ॥
તેષુ સર્વેષુ ભિન્નેષુ તતોઽભીષયદંગદમ્ ।
ભીષણૈર્ભહુભિર્વાક્યૈઃ કોપોપાયસમન્વિતૈઃ ॥ 7 ॥
ત્વં સમર્થતરઃ પિત્રા યુદ્ધે તારેય વૈ ધુરમ્ ।
દૃઢં ધારયિતું શક્તઃ કપિરાજ્યં યથા પિતા ॥ 8 ॥
નિત્યમસ્થિરચિત્તા હિ કપયો હરિપુંગવ ।
નાજ્ઞાપ્યં વિષહિષ્યંતિ પુત્રદારાન્વિના ત્વયા ॥ 9 ॥
ત્વાં નૈતેહ્યનુયુંજેયુઃ પ્રત્યક્ષં પ્રવદામિ તે ।
યથાયં જાંબવાન્નીલસ્સુહોત્રશ્ચ મહાકપિઃ ॥ 10 ॥
ન હ્યહં તે ઇમે સર્વે સામદાનાદિભિર્ગુણૈઃ ।
દંડેન વા ત્વયા શક્યાસ્સુગ્રીવાદપકર્ષિતમ્ ॥ 11 ॥
વિગૃહ્યાસનમપ્યાહુર્દુર્બલેન બલીયસઃ ।
આત્મરક્ષાકરસ્તસ્માન્ન વિગૃહ્ણીત દુર્બલઃ ॥ 12 ॥
યાં ચેમાં મન્યસે ધાત્રીમેતદ્બિલમિતિ શ્રુતમ્ ।
એતલ્લક્ષ્મણબાણાનામીષત્કાર્યં વિદારણે ॥ 13 ॥
સ્વલ્પં હિ કૃતમિંદ્રેણ ક્ષિપતા હ્યશનિં પુરા ।
લક્ષ્મણો નિશિતૈર્બાણૈર્ભિંધ્યાત્પત્રપુટં યથા ॥ 14 ॥
લક્ષ્મણસ્ય ચ નારાચા બહવસ્સંતિ તદ્વિધાઃ ।
વજ્રાશનિસમસ્પર્શા ગિરીણામપિ દારણાઃ ॥ 15 ॥
અવસ્થાને યદૈવ ત્વમાસિષ્યસિ પરંતપ ।
તદૈવ હરયસ્સર્વે ત્યક્ષ્યંતિ કૃતનિશ્ચયાઃ ॥ 16 ॥
સ્મરંતઃ પુત્રદારાણાં નિત્યોદ્વિગ્ના બુભુક્ષિતાઃ ।
ખેદિતા દુઃખશય્યાભિસ્ત્વાં કરિષ્યંતિ પૃષ્ઠતઃ ॥ 17 ॥
સ ત્વં હીનસ્સુહૃદ્ભિશ્ચ હિતકામૈશ્ચ બંધુભિઃ ।
તૃણાદપિ ભૃશોદ્વિગ્નસ્સ્પંદમાનાદ્ભવિષ્યસિ ॥ 18 ॥
ન ચ જાતુ ન હિંસ્યુસ્ત્વાં ઘોરા લક્ષ્મણસાયકાઃ ।
અપવૃત્તં જિઘાંસંતો મહાવેગા દુરાસદાઃ ॥ 19 ॥
ન ચ જાતુ ન હિંસ્યુસ્ત્વા ઘોરા લક્ષ્મણસાયકાઃ ।
અપાવૃત્તં જિઘાંસંતો મહાવેગા દુરાસદાઃ ॥ 20 ॥
અસ્માભિસ્તુ ગતં સાર્ધં વિનીતવદુપસ્થિતમ્ ।
આનુપૂર્વ્યાત્તુ સુગ્રીવો રાજ્યે ત્વાં સ્થાપયિષ્યતિ ॥ 21 ॥
ધર્મકામઃ પિતૃવ્યસ્તે પ્રીતિકામો દૃઢવ્રતઃ ।
શુચિસ્સત્યપ્રતિજ્ઞશ્ચ ન ત્વાં જાતુ જિઘાંસતિ ॥ 22 ॥
પ્રિયકામશ્ચ તે માતુસ્તદર્થં ચાસ્ય જીવિતમ્ ।
તસ્યાપત્યં ચ નાસ્ત્યન્યત્તસ્માદંગદ ગમ્યતામ્ ॥ 23 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે ચતુઃપંચાશસ્સર્ગઃ ॥
