శ్రీమద్వాల్మీకీయ రామాయణే కిష్కింధాకాండమ్ ।
అథ చతుఃపంచాశస్సర్గః ।
తథా బ్రువతి తారే తు తారాధిపతివర్చసి ।
అథ మేనే హృతం రాజ్యం హనూమానంగదేన తత్ ॥ 1 ॥
బుద్ధ్యా హ్యష్టాంగయా యుక్తం చతుర్బలసమన్వితమ్ ।
చతుర్దశగుణం మేనే హనూమాన్వాలినస్సుతమ్ ॥ 2 ॥
ఆపూర్యమాణం శశ్వచ్చ తేజోబలపరాక్రమైః ।
శశినం శుక్లపక్షాదౌ వర్ధమానమివ శ్రియా ॥ 3 ॥
బృహస్పతిసమం బుద్ధ్యా విక్రమే సదృశం పితుః ।
శుశ్రూషమాణం తారస్య శక్రస్యేవ పురందరమ్ ॥ 4 ॥
భర్తురర్థే పరిశ్రాంతం సర్వశాస్త్రవిదాంవరమ్ ।
అభిసంధాతుమారేభే హనూమానంగదం తతః ॥ 5 ॥
స చతుర్ణాముపాయానాం తృతీయముపవర్ణయన్ ।
భేదయామాస తాన్సర్వాన్ వానరాన్వాక్యసంపదా ॥ 6 ॥
తేషు సర్వేషు భిన్నేషు తతోఽభీషయదంగదమ్ ।
భీషణైర్భహుభిర్వాక్యైః కోపోపాయసమన్వితైః ॥ 7 ॥
త్వం సమర్థతరః పిత్రా యుద్ధే తారేయ వై ధురమ్ ।
దృఢం ధారయితుం శక్తః కపిరాజ్యం యథా పితా ॥ 8 ॥
నిత్యమస్థిరచిత్తా హి కపయో హరిపుంగవ ।
నాజ్ఞాప్యం విషహిష్యంతి పుత్రదారాన్వినా త్వయా ॥ 9 ॥
త్వాం నైతేహ్యనుయుంజేయుః ప్రత్యక్షం ప్రవదామి తే ।
యథాయం జాంబవాన్నీలస్సుహోత్రశ్చ మహాకపిః ॥ 10 ॥
న హ్యహం తే ఇమే సర్వే సామదానాదిభిర్గుణైః ।
దండేన వా త్వయా శక్యాస్సుగ్రీవాదపకర్షితమ్ ॥ 11 ॥
విగృహ్యాసనమప్యాహుర్దుర్బలేన బలీయసః ।
ఆత్మరక్షాకరస్తస్మాన్న విగృహ్ణీత దుర్బలః ॥ 12 ॥
యాం చేమాం మన్యసే ధాత్రీమేతద్బిలమితి శ్రుతమ్ ।
ఏతల్లక్ష్మణబాణానామీషత్కార్యం విదారణే ॥ 13 ॥
స్వల్పం హి కృతమింద్రేణ క్షిపతా హ్యశనిం పురా ।
లక్ష్మణో నిశితైర్బాణైర్భింధ్యాత్పత్రపుటం యథా ॥ 14 ॥
లక్ష్మణస్య చ నారాచా బహవస్సంతి తద్విధాః ।
వజ్రాశనిసమస్పర్శా గిరీణామపి దారణాః ॥ 15 ॥
అవస్థానే యదైవ త్వమాసిష్యసి పరంతప ।
తదైవ హరయస్సర్వే త్యక్ష్యంతి కృతనిశ్చయాః ॥ 16 ॥
స్మరంతః పుత్రదారాణాం నిత్యోద్విగ్నా బుభుక్షితాః ।
ఖేదితా దుఃఖశయ్యాభిస్త్వాం కరిష్యంతి పృష్ఠతః ॥ 17 ॥
స త్వం హీనస్సుహృద్భిశ్చ హితకామైశ్చ బంధుభిః ।
తృణాదపి భృశోద్విగ్నస్స్పందమానాద్భవిష్యసి ॥ 18 ॥
న చ జాతు న హింస్యుస్త్వాం ఘోరా లక్ష్మణసాయకాః ।
అపవృత్తం జిఘాంసంతో మహావేగా దురాసదాః ॥ 19 ॥
న చ జాతు న హింస్యుస్త్వా ఘోరా లక్ష్మణసాయకాః ।
అపావృత్తం జిఘాంసంతో మహావేగా దురాసదాః ॥ 20 ॥
అస్మాభిస్తు గతం సార్ధం వినీతవదుపస్థితమ్ ।
ఆనుపూర్వ్యాత్తు సుగ్రీవో రాజ్యే త్వాం స్థాపయిష్యతి ॥ 21 ॥
ధర్మకామః పితృవ్యస్తే ప్రీతికామో దృఢవ్రతః ।
శుచిస్సత్యప్రతిజ్ఞశ్చ న త్వాం జాతు జిఘాంసతి ॥ 22 ॥
ప్రియకామశ్చ తే మాతుస్తదర్థం చాస్య జీవితమ్ ।
తస్యాపత్యం చ నాస్త్యన్యత్తస్మాదంగద గమ్యతామ్ ॥ 23 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కింధాకాండే చతుఃపంచాశస్సర్గః ॥
