śrīmadvālmīkīya rāmāyaṇē kiṣkindhākāṇḍam ।
atha chatuḥpañchāśassargaḥ ।
tathā bruvati tārē tu tārādhipativarchasi ।
atha mēnē hṛtaṃ rājyaṃ hanūmānaṅgadēna tat ॥ 1 ॥
buddhyā hyaṣṭāṅgayā yuktaṃ chaturbalasamanvitam ।
chaturdaśaguṇaṃ mēnē hanūmānvālinassutam ॥ 2 ॥
āpūryamāṇaṃ śaśvachcha tējōbalaparākramaiḥ ।
śaśinaṃ śuklapakṣādau vardhamānamiva śriyā ॥ 3 ॥
bṛhaspatisamaṃ buddhyā vikramē sadṛśaṃ pituḥ ।
śuśrūṣamāṇaṃ tārasya śakrasyēva purandaram ॥ 4 ॥
bharturarthē pariśrāntaṃ sarvaśāstravidāṃvaram ।
abhisandhātumārēbhē hanūmānaṅgadaṃ tataḥ ॥ 5 ॥
sa chaturṇāmupāyānāṃ tṛtīyamupavarṇayan ।
bhēdayāmāsa tānsarvān vānarānvākyasampadā ॥ 6 ॥
tēṣu sarvēṣu bhinnēṣu tatō'bhīṣayadaṅgadam ।
bhīṣaṇairbhahubhirvākyaiḥ kōpōpāyasamanvitaiḥ ॥ 7 ॥
tvaṃ samarthataraḥ pitrā yuddhē tārēya vai dhuram ।
dṛḍhaṃ dhārayituṃ śaktaḥ kapirājyaṃ yathā pitā ॥ 8 ॥
nityamasthirachittā hi kapayō haripuṅgava ।
nājñāpyaṃ viṣahiṣyanti putradārānvinā tvayā ॥ 9 ॥
tvāṃ naitēhyanuyuñjēyuḥ pratyakṣaṃ pravadāmi tē ।
yathāyaṃ jāmbavānnīlassuhōtraścha mahākapiḥ ॥ 10 ॥
na hyahaṃ tē imē sarvē sāmadānādibhirguṇaiḥ ।
daṇḍēna vā tvayā śakyāssugrīvādapakarṣitam ॥ 11 ॥
vigṛhyāsanamapyāhurdurbalēna balīyasaḥ ।
ātmarakṣākarastasmānna vigṛhṇīta durbalaḥ ॥ 12 ॥
yāṃ chēmāṃ manyasē dhātrīmētadbilamiti śrutam ।
ētallakṣmaṇabāṇānāmīṣatkāryaṃ vidāraṇē ॥ 13 ॥
svalpaṃ hi kṛtamindrēṇa kṣipatā hyaśaniṃ purā ।
lakṣmaṇō niśitairbāṇairbhindhyātpatrapuṭaṃ yathā ॥ 14 ॥
lakṣmaṇasya cha nārāchā bahavassanti tadvidhāḥ ।
vajrāśanisamasparśā girīṇāmapi dāraṇāḥ ॥ 15 ॥
avasthānē yadaiva tvamāsiṣyasi parantapa ।
tadaiva harayassarvē tyakṣyanti kṛtaniśchayāḥ ॥ 16 ॥
smarantaḥ putradārāṇāṃ nityōdvignā bubhukṣitāḥ ।
khēditā duḥkhaśayyābhistvāṃ kariṣyanti pṛṣṭhataḥ ॥ 17 ॥
sa tvaṃ hīnassuhṛdbhiścha hitakāmaiścha bandhubhiḥ ।
tṛṇādapi bhṛśōdvignasspandamānādbhaviṣyasi ॥ 18 ॥
na cha jātu na hiṃsyustvāṃ ghōrā lakṣmaṇasāyakāḥ ।
apavṛttaṃ jighāṃsantō mahāvēgā durāsadāḥ ॥ 19 ॥
na cha jātu na hiṃsyustvā ghōrā lakṣmaṇasāyakāḥ ।
apāvṛttaṃ jighāṃsantō mahāvēgā durāsadāḥ ॥ 20 ॥
asmābhistu gataṃ sārdhaṃ vinītavadupasthitam ।
ānupūrvyāttu sugrīvō rājyē tvāṃ sthāpayiṣyati ॥ 21 ॥
dharmakāmaḥ pitṛvyastē prītikāmō dṛḍhavrataḥ ।
śuchissatyapratijñaścha na tvāṃ jātu jighāṃsati ॥ 22 ॥
priyakāmaścha tē mātustadarthaṃ chāsya jīvitam ।
tasyāpatyaṃ cha nāstyanyattasmādaṅgada gamyatām ॥ 23 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē chatuḥpañchāśassargaḥ ॥
