ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ചതുഃപംചാശസ്സര്ഗഃ ।
തഥാ ബ്രുവതി താരേ തു താരാധിപതിവര്ചസി ।
അഥ മേനേ ഹൃതം രാജ്യം ഹനൂമാനംഗദേന തത് ॥ 1 ॥
ബുദ്ധ്യാ ഹ്യഷ്ടാംഗയാ യുക്തം ചതുര്ബലസമന്വിതമ് ।
ചതുര്ദശഗുണം മേനേ ഹനൂമാന്വാലിനസ്സുതമ് ॥ 2 ॥
ആപൂര്യമാണം ശശ്വച്ച തേജോബലപരാക്രമൈഃ ।
ശശിനം ശുക്ലപക്ഷാദൌ വര്ധമാനമിവ ശ്രിയാ ॥ 3 ॥
ബൃഹസ്പതിസമം ബുദ്ധ്യാ വിക്രമേ സദൃശം പിതുഃ ।
ശുശ്രൂഷമാണം താരസ്യ ശക്രസ്യേവ പുരംദരമ് ॥ 4 ॥
ഭര്തുരര്ഥേ പരിശ്രാംതം സർവശാസ്ത്രവിദാംവരമ് ।
അഭിസംധാതുമാരേഭേ ഹനൂമാനംഗദം തതഃ ॥ 5 ॥
സ ചതുര്ണാമുപായാനാം തൃതീയമുപവര്ണയന് ।
ഭേദയാമാസ താന്സർവാന് വാനരാന്വാക്യസംപദാ ॥ 6 ॥
തേഷു സർവേഷു ഭിന്നേഷു തതോഽഭീഷയദംഗദമ് ।
ഭീഷണൈര്ഭഹുഭിർവാക്യൈഃ കോപോപായസമന്വിതൈഃ ॥ 7 ॥
ത്വം സമര്ഥതരഃ പിത്രാ യുദ്ധേ താരേയ വൈ ധുരമ് ।
ദൃഢം ധാരയിതും ശക്തഃ കപിരാജ്യം യഥാ പിതാ ॥ 8 ॥
നിത്യമസ്ഥിരചിത്താ ഹി കപയോ ഹരിപുംഗവ ।
നാജ്ഞാപ്യം വിഷഹിഷ്യംതി പുത്രദാരാന്വിനാ ത്വയാ ॥ 9 ॥
ത്വാം നൈതേഹ്യനുയുംജേയുഃ പ്രത്യക്ഷം പ്രവദാമി തേ ।
യഥായം ജാംബവാന്നീലസ്സുഹോത്രശ്ച മഹാകപിഃ ॥ 10 ॥
ന ഹ്യഹം തേ ഇമേ സർവേ സാമദാനാദിഭിര്ഗുണൈഃ ।
ദംഡേന വാ ത്വയാ ശക്യാസ്സുഗ്രീവാദപകര്ഷിതമ് ॥ 11 ॥
വിഗൃഹ്യാസനമപ്യാഹുര്ദുര്ബലേന ബലീയസഃ ।
ആത്മരക്ഷാകരസ്തസ്മാന്ന വിഗൃഹ്ണീത ദുര്ബലഃ ॥ 12 ॥
യാം ചേമാം മന്യസേ ധാത്രീമേതദ്ബിലമിതി ശ്രുതമ് ।
ഏതല്ലക്ഷ്മണബാണാനാമീഷത്കാര്യം വിദാരണേ ॥ 13 ॥
സ്വല്പം ഹി കൃതമിംദ്രേണ ക്ഷിപതാ ഹ്യശനിം പുരാ ।
ലക്ഷ്മണോ നിശിതൈര്ബാണൈര്ഭിംധ്യാത്പത്രപുടം യഥാ ॥ 14 ॥
ലക്ഷ്മണസ്യ ച നാരാചാ ബഹവസ്സംതി തദ്വിധാഃ ।
വജ്രാശനിസമസ്പര്ശാ ഗിരീണാമപി ദാരണാഃ ॥ 15 ॥
അവസ്ഥാനേ യദൈവ ത്വമാസിഷ്യസി പരംതപ ।
തദൈവ ഹരയസ്സർവേ ത്യക്ഷ്യംതി കൃതനിശ്ചയാഃ ॥ 16 ॥
സ്മരംതഃ പുത്രദാരാണാം നിത്യോദ്വിഗ്നാ ബുഭുക്ഷിതാഃ ।
ഖേദിതാ ദുഃഖശയ്യാഭിസ്ത്വാം കരിഷ്യംതി പൃഷ്ഠതഃ ॥ 17 ॥
സ ത്വം ഹീനസ്സുഹൃദ്ഭിശ്ച ഹിതകാമൈശ്ച ബംധുഭിഃ ।
തൃണാദപി ഭൃശോദ്വിഗ്നസ്സ്പംദമാനാദ്ഭവിഷ്യസി ॥ 18 ॥
ന ച ജാതു ന ഹിംസ്യുസ്ത്വാം ഘോരാ ലക്ഷ്മണസായകാഃ ।
അപവൃത്തം ജിഘാംസംതോ മഹാവേഗാ ദുരാസദാഃ ॥ 19 ॥
ന ച ജാതു ന ഹിംസ്യുസ്ത്വാ ഘോരാ ലക്ഷ്മണസായകാഃ ।
അപാവൃത്തം ജിഘാംസംതോ മഹാവേഗാ ദുരാസദാഃ ॥ 20 ॥
അസ്മാഭിസ്തു ഗതം സാര്ധം വിനീതവദുപസ്ഥിതമ് ।
ആനുപൂർവ്യാത്തു സുഗ്രീവോ രാജ്യേ ത്വാം സ്ഥാപയിഷ്യതി ॥ 21 ॥
ധര്മകാമഃ പിതൃവ്യസ്തേ പ്രീതികാമോ ദൃഢവ്രതഃ ।
ശുചിസ്സത്യപ്രതിജ്ഞശ്ച ന ത്വാം ജാതു ജിഘാംസതി ॥ 22 ॥
പ്രിയകാമശ്ച തേ മാതുസ്തദര്ഥം ചാസ്യ ജീവിതമ് ।
തസ്യാപത്യം ച നാസ്ത്യന്യത്തസ്മാദംഗദ ഗമ്യതാമ് ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ചതുഃപംചാശസ്സര്ഗഃ ॥
