ஶ்ரீமத்³வால்மீகீய ராமாயணே கிஷ்கிந்தா⁴காண்ட³ம் ।
அத² அஷ்டபஞ்சாஶஸ்ஸர்க:³ ।
இத்யுக்த: கருணம் வாக்யம் வானரைஸ்த்யக்தஜீவிதை: ।
ஸபா³ஷ்போ வானரான்க்³ருத்⁴ர: ப்ரத்யுவாச மஹாஸ்வன: ॥ 1 ॥
யவீயான்மம ப்⁴ராதா ஜடாயுர்னாம வானரா: ।
யமாக்²யாத ஹதம் யுத்³தே⁴ ராவணேன ப³லீயஸா ॥ 2 ॥
வ்ருத்³த⁴பா⁴வாத³பக்ஷத்வாச்ச்²ருண்வம்ஸ்தத³பி மர்ஷயே ।
ந ஹி மே ஶக்திரஸ்த்யத்³ய ப்⁴ராதுர்வைரவிமோக்ஷணே ॥ 3 ॥
புரா வ்ருத்ரவதே⁴ வ்ருத்தே பரஸ்பரஜயைஷிணௌ ।
ஆதி³த்யமுபயாதௌ ஸ்வோ ஜ்வலந்தம் ரஶ்மிமாலினம் ॥ 4 ॥
ஆவ்ருத்த்யாகாஶமார்கே³ து ஜவேன ஸ்ம க³தௌ ப்⁴ருஶம் ।
மத்⁴யம் ப்ராப்தே தி³னகரே ஜடாயுரவஸீத³தி ॥ 5 ॥
தமஹம் ப்⁴ராதரம் த்³ருஷ்ட்வா ஸூர்யரஶ்மிபி⁴ரர்தி³தம் ।
பக்ஷாப்⁴யாம் சா²த³யாமாஸ ஸ்னேஹாத்பரமவிஹ்வல: ॥ 6 ॥
நிர்த³க்³த⁴பக்ஷ: பதிதோ விந்த்⁴யேஹம் வானரர்ஷபா⁴: ।
அஹமஸ்மின்வஸன்ப்⁴ராது: ப்ரவ்ருத்திம் நோபலக்ஷயே ॥ 7 ॥
ஜடாயுஷஸ்த்வேவமுக்தோ ப்⁴ராத்ரா ஸம்பாதினா ததா³ ।
யுவராஜோ மஹாப்ராஜ்ஞ: ப்ரத்யுவாசாங்க³த³ஸ்தத: ॥ 8 ॥
ஜடாயுஷோ யதி³ ப்⁴ராதா ஶ்ருதம் தே க³தி³தம் மயா ।
ஆக்²யா ஹி யதி³ ஜானாஸி நிலயம் தஸ்ய ரக்ஷஸ: ॥ 9 ॥
அதீ³ர்க⁴த³ர்ஶினம் தம் வை ராவணம் ராக்ஷஸாதி⁴பம் ।
அந்திகே யதி³ வா தூ³ரே யதி³ ஜானாஸி ஶம்ஸ ந: ॥ 1௦ ॥
ததோப்³ரவீன்மஹாதேஜா ஜ்யேஷ்டோ² ப்⁴ராதா ஜடாயுஷ: ।
ஆத்மானுரூபம் வசனம் வானரான்ஸம்ப்ரஹர்ஷயன் ॥ 11 ॥
நிர்த³க்³த⁴பக்ஷோ க்³ருத்⁴ரோஹம் ஹீனவீர்ய: ப்லவங்க³மா: ।
வாங்மாத்ரேண து ராமஸ்ய கரிஷ்யே ஸாஹ்யமுத்தமம் ॥ 12 ॥
ஜானாமி வாருணான்லோகான்விஷ்ணோஸ்த்ரை விக்ரமானபி ।
மஹாஸுரவிமர்த³ன்வா ஶ்ச ஹ்யம்ருதஸ்ய ச மந்த²னம் ॥ 13 ॥
ராமஸ்ய யதி³த³ம் கார்யம் கர்தவ்யம் ப்ரத²மம் மயா ।
ஜரயா ச ஹ்ருதம் தேஜ: ப்ராணாஶ்ச ஶிதி²லா மம ॥ 14 ॥
தருணீ ரூபஸம்பன்னா ஸர்வாப⁴ரணபூ⁴ஷிதா ।
ஹ்ரியமாணா மயா த்³ருஷ்டா ராவணேன து³ராத்மனா ॥ 15 ॥
க்ரோஶந்தீ ராம ராமேதி லக்ஷ்மணேதி ச பா⁴மினீ ।
பூ⁴ஷணான்யபவித்⁴யந்தீ கா³த்ராணி ச விது⁴ன்வதீ ॥ 16 ॥
ஸூர்யப்ரபே⁴வ ஶைலாக்³ரே தஸ்யா: கௌஶேயமுத்தமம் ।
அஸிதே ராக்ஷஸே பா⁴தி யதா² வா தடித³ம்பு³தே³ ॥ 17 ॥
தாம் து ஸீதாமஹம் மன்யே ராமஸ்ய பரிகீர்தனாத் ।
ஶ்ரூயதாம் மே கத²யதோ நிலயம் தஸ்ய ரக்ஷஸ: ॥ 18 ॥
புத்ரோ விஶ்ரவஸ ஸ்ஸாக்ஷாத்³ப்⁴ராதா வைஶ்ரவணஸ்ய ச ।
அத்⁴யாஸ்தே நக³ரீம் லங்காம் ராவணோ நாம ராக்ஷஸ: ॥ 19 ॥
இதோ த்³வீபஸ்ஸமுத்³ரஸ்ய ஸம்பூர்ணே ஶதயோஜனே ।
தஸ்மின்லங்காபுரீ ரம்யா நிர்மிதா விஶ்வகர்மணா ॥ 2௦ ॥
ஜாம்பூ³னத³மயைர்த்³வாரைஶ்சித்ரை: காஞ்சனவேதி³கை: ।
ப்ராஸாதை³ர்ஹேமவர்ணைஶ்ச மஹத்³பி⁴: ஸுஸமா க்ருதா ॥ 21 ॥
ப்ராகாரேணார்கவர்ணேன மஹதா ச ஸமான்விதா ।
தஸ்யாம் வஸதி வைதே³ஹீ தீ³னா கௌஶேயவாஸினீ ॥ 22 ॥
ராவணாந்த:புரே ருத்³தா⁴ ராக்ஷஸீபி⁴ஸ்ஸுரக்ஷிதா ।
ஜனகஸ்யாத்மஜாம் ராஜ்ஞஸ்தத்ர த்³ரக்ஷ்யத² மைதி²லீம் ॥ 23 ॥
லங்காயாமத² கு³ப்தாயாம் ஸாக³ரேண ஸமந்தத: ।
ஸம்ப்ராப்ய ஸாக³ரஸ்யாந்தம் ஸம்பூர்ணம் ஶதயோஜனம் ॥ 24 ॥
ஆஸாத்³ய த³க்ஷிணம் தீரம் ததோ த்³ரக்ஷ்யத² ராவணம் ।
தத்ரைவ த்வரிதா: க்ஷிப்ரம் விக்ரமத்⁴வம் ப்லவங்க³மா: ॥ 25 ॥
ஜ்ஞானேன க²லு பஶ்யாமி த்³ருஷ்ட்வா ப்ரத்யாக³மிஷ்யத² ।
ஆத்³ய: பந்தா²: குலிங்கா³னாம் யே சான்யே தா⁴ன்யஜீவின: ॥ 26 ॥
த்³விதீயோ ப³லிபோ⁴ஜானாம் யே ச வ்ருக்ஷப²லாஶின: ।
பா⁴ஸாஸ்த்ருதீயம் க³ச்ச²ந்தி க்ரௌஞ்சாஶ்ச குரரைஸ்ஸஹ ॥ 27 ॥
ஶ்யேனாஶ்சதுர்த²ம் க³ச்ச²ந்தி க்³ருத்⁴ரா க³ச்ச²ந்தி பஞ்சமம் ।
ப³லவீர்யோபபன்னானாம் ரூபயௌவனஶாலினாம் ॥ 28 ॥
ஷஷ்ட²ஸ்து பந்தா² ஹம்ஸானாம் வைனதேயக³தி: பரா ।
வைனதேயாச்ச நோ ஜன்ம ஸர்வேஷாம் வானரர்ஷபா⁴: ॥ 29 ॥
இஹஸ்தோ²ஹம் ப்ரபஶ்யாமி ராவணம் ஜானகீம் ததா² ।
அஸ்மாகமபி ஸௌவர்ணம் தி³வ்யம் சக்ஷுர்ப³லம் ததா² ॥ 3௦ ॥
தஸ்மாதா³ஹாரவீர்யேண நிஸர்கே³ண ச வானரா: ।
ஆயோஜனஶதாத்ஸாக்³ராத்³வயம் பஶ்யாம நித்யஶ: ॥ 31 ॥
அஸ்மாகம் விஹிதா வ்ருத்திர்னிஸர்கே³ண ச தூ³ரத: ।
விஹிதா பாத³மூலே து வ்ருத்திஶ்சரணயோதி⁴னாம் ॥ 32 ॥
க³ர்ஹிதம் து க்ருதம் கர்ம யேன ஸ்ம பஶிதாஶினா ।
ப்ரதீகார்யம் ச மே தஸ்ய வைரம் ப்⁴ராத்ருக்ருதம் ப⁴வேத் ॥ 33 ॥
உபாயோ த்³ருஶ்யதாம் கஶ்சில்லங்க⁴னே லவணாம்ப⁴ஸ: ।
அபி⁴க³ம்ய து வைதே³ஹீம் ஸம்ருத்³தா⁴ர்தா² க³மிஷ்யத² ॥ 34 ॥
ஸமுத்³ரம் நேதுமிச்சா²மி ப⁴வத்³பி⁴ர்வருணாலயம் ।
ப்ரதா³ஸ்யாம்யுத³கம் ப்⁴ராதுஸ்ஸ்வர்க³தஸ்ய மஹாத்மன: ॥ 35 ॥
ததோ நீத்வா து தம் தே³ஶம் தீரம் நத³னதீ³பதே: ।
நிர்த³க்³த⁴பக்ஷம் ஸம்பாதிம் வானராஸ்ஸுமஹௌஜஸ: ॥ 36 ॥
புன: ப்ரத்யானயித்வா ச தம் தே³ஶம் பதகே³ஶ்வரம் ।
ப³பூ⁴வுர்வானரா ஹ்ருஷ்டா: ப்ரவ்ருத்திமுபலப்⁴ய தே ॥ 37 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே கிஷ்கிந்தா⁴காண்டே³ அஷ்டபஞ்சாஶஸ்ஸர்க:³ ॥
