ශ්රීමද්වාල්මීකීය රාමායණේ කිෂ්කිංධාකාංඩම් ।
අථ අෂ්ටපංචාශස්සර්ගඃ ।
ඉත්යුක්තඃ කරුණං වාක්යං වානරෛස්ත්යක්තජීවිතෛඃ ।
සබාෂ්පෝ වානරාන්ගෘධ්රඃ ප්රත්යුවාච මහාස්වනඃ ॥ 1 ॥
යවීයාන්මම භ්රාතා ජටායුර්නාම වානරාඃ ।
යමාඛ්යාත හතං යුද්ධේ රාවණේන බලීයසා ॥ 2 ॥
වෘද්ධභාවාදපක්ෂත්වාච්ඡෘණ්වංස්තදපි මර්ෂයේ ।
න හි මේ ශක්තිරස්ත්යද්ය භ්රාතුර්වෛරවිමෝක්ෂණේ ॥ 3 ॥
පුරා වෘත්රවධේ වෘත්තේ පරස්පරජයෛෂිණෞ ।
ආදිත්යමුපයාතෞ ස්වෝ ජ්වලංතං රශ්මිමාලිනම් ॥ 4 ॥
ආවෘත්ත්යාऽකාශමාර්ගේ තු ජවේන ස්ම ගතෞ භෘශම් ।
මධ්යං ප්රාප්තේ දිනකරේ ජටායුරවසීදති ॥ 5 ॥
තමහං භ්රාතරං දෘෂ්ට්වා සූර්යරශ්මිභිරර්දිතම් ।
පක්ෂාභ්යාං ඡාදයාමාස ස්නේහාත්පරමවිහ්වලඃ ॥ 6 ॥
නිර්දග්ධපක්ෂඃ පතිතෝ විංධ්යේऽහං වානරර්ෂභාඃ ।
අහමස්මින්වසන්භ්රාතුඃ ප්රවෘත්තිං නෝපලක්ෂයේ ॥ 7 ॥
ජටායුෂස්ත්වේවමුක්තෝ භ්රාත්රා සංපාතිනා තදා ।
යුවරාජෝ මහාප්රාජ්ඤඃ ප්රත්යුවාචාංගදස්තතඃ ॥ 8 ॥
ජටායුෂෝ යදි භ්රාතා ශ්රුතං තේ ගදිතං මයා ।
ආඛ්යා හි යදි ජානාසි නිලයං තස්ය රක්ෂසඃ ॥ 9 ॥
අදීර්ඝදර්ශිනං තං වෛ රාවණං රාක්ෂසාධිපම් ।
අංතිකේ යදි වා දූරේ යදි ජානාසි ශංස නඃ ॥ 10 ॥
තතෝऽබ්රවීන්මහාතේජා ජ්යේෂ්ඨෝ භ්රාතා ජටායුෂඃ ।
ආත්මානුරූපං වචනං වානරාන්සංප්රහර්ෂයන් ॥ 11 ॥
නිර්දග්ධපක්ෂෝ ගෘධ්රෝऽහං හීනවීර්යඃ ප්ලවංගමාඃ ।
වාඞ්මාත්රේණ තු රාමස්ය කරිෂ්යේ සාහ්යමුත්තමම් ॥ 12 ॥
ජානාමි වාරුණාන්ලෝකාන්විෂ්ණෝස්ත්රෛ වික්රමානපි ।
මහාසුරවිමර්දන්වා ශ්ච හ්යමෘතස්ය ච මංථනම් ॥ 13 ॥
රාමස්ය යදිදං කාර්යං කර්තව්යං ප්රථමං මයා ।
ජරයා ච හෘතං තේජඃ ප්රාණාශ්ච ශිථිලා මම ॥ 14 ॥
තරුණී රූපසංපන්නා සර්වාභරණභූෂිතා ।
හ්රියමාණා මයා දෘෂ්ටා රාවණේන දුරාත්මනා ॥ 15 ॥
ක්රෝශංතී රාම රාමේති ලක්ෂ්මණේති ච භාමිනී ।
භූෂණාන්යපවිධ්යංතී ගාත්රාණි ච විධුන්වතී ॥ 16 ॥
සූර්යප්රභේව ශෛලාග්රේ තස්යාඃ කෞශේයමුත්තමම් ।
අසිතේ රාක්ෂසේ භාති යථා වා තටිදංබුදේ ॥ 17 ॥
තාං තු සීතාමහං මන්යේ රාමස්ය පරිකීර්තනාත් ।
ශ්රූයතාං මේ කථයතෝ නිලයං තස්ය රක්ෂසඃ ॥ 18 ॥
පුත්රෝ විශ්රවස ස්සාක්ෂාද්භ්රාතා වෛශ්රවණස්ය ච ।
අධ්යාස්තේ නගරීං ලංකාං රාවණෝ නාම රාක්ෂසඃ ॥ 19 ॥
ඉතෝ ද්වීපස්සමුද්රස්ය සංපූර්ණේ ශතයෝජනේ ।
තස්මින්ලංකාපුරී රම්යා නිර්මිතා විශ්වකර්මණා ॥ 20 ॥
ජාංබූනදමයෛර්ද්වාරෛශ්චිත්රෛඃ කාංචනවේදිකෛඃ ।
ප්රාසාදෛර්හේමවර්ණෛශ්ච මහද්භිඃ සුසමා කෘතා ॥ 21 ॥
ප්රාකාරේණාර්කවර්ණේන මහතා ච සමාන්විතා ।
තස්යාං වසති වෛදේහී දීනා කෞශේයවාසිනී ॥ 22 ॥
රාවණාංතඃපුරේ රුද්ධා රාක්ෂසීභිස්සුරක්ෂිතා ।
ජනකස්යාත්මජාං රාජ්ඤස්තත්ර ද්රක්ෂ්යථ මෛථිලීම් ॥ 23 ॥
ලංකායාමථ ගුප්තායාං සාගරේණ සමංතතඃ ।
සංප්රාප්ය සාගරස්යාංතං සංපූර්ණං ශතයෝජනම් ॥ 24 ॥
ආසාද්ය දක්ෂිණං තීරං තතෝ ද්රක්ෂ්යථ රාවණම් ।
තත්රෛව ත්වරිතාඃ ක්ෂිප්රං වික්රමධ්වං ප්ලවංගමාඃ ॥ 25 ॥
ජ්ඤානේන ඛලු පශ්යාමි දෘෂ්ට්වා ප්රත්යාගමිෂ්යථ ।
ආද්යඃ පංථාඃ කුලිංගානාං යේ චාන්යේ ධාන්යජීවිනඃ ॥ 26 ॥
ද්විතීයෝ බලිභෝජානාං යේ ච වෘක්ෂඵලාශිනඃ ।
භාසාස්තෘතීයං ගච්ඡංති ක්රෞංචාශ්ච කුරරෛස්සහ ॥ 27 ॥
ශ්යේනාශ්චතුර්ථං ගච්ඡංති ගෘධ්රා ගච්ඡංති පංචමම් ।
බලවීර්යෝපපන්නානාං රූපයෞවනශාලිනාම් ॥ 28 ॥
ෂෂ්ඨස්තු පංථා හංසානාං වෛනතේයගතිඃ පරා ।
වෛනතේයාච්ච නෝ ජන්ම සර්වේෂාං වානරර්ෂභාඃ ॥ 29 ॥
ඉහස්ථෝऽහං ප්රපශ්යාමි රාවණං ජානකීං තථා ।
අස්මාකමපි සෞවර්ණං දිව්යං චක්ෂුර්බලං තථා ॥ 30 ॥
තස්මාදාහාරවීර්යේණ නිසර්ගේණ ච වානරාඃ ।
ආයෝජනශතාත්සාග්රාද්වයං පශ්යාම නිත්යශඃ ॥ 31 ॥
අස්මාකං විහිතා වෘත්තිර්නිසර්ගේණ ච දූරතඃ ।
විහිතා පාදමූලේ තු වෘත්තිශ්චරණයෝධිනාම් ॥ 32 ॥
ගර්හිතං තු කෘතං කර්ම යේන ස්ම පශිතාශිනා ।
ප්රතීකාර්යං ච මේ තස්ය වෛරං භ්රාතෘකෘතං භවේත් ॥ 33 ॥
උපායෝ දෘශ්යතාං කශ්චිල්ලංඝනේ ලවණාංභසඃ ।
අභිගම්ය තු වෛදේහීං සමෘද්ධාර්ථා ගමිෂ්යථ ॥ 34 ॥
සමුද්රං නේතුමිච්ඡාමි භවද්භිර්වරුණාලයම් ।
ප්රදාස්යාම්යුදකං භ්රාතුස්ස්වර්ගතස්ය මහාත්මනඃ ॥ 35 ॥
තතෝ නීත්වා තු තං දේශං තීරං නදනදීපතේඃ ।
නිර්දග්ධපක්ෂං සංපාතිං වානරාස්සුමහෞජසඃ ॥ 36 ॥
පුනඃ ප්රත්යානයිත්වා ච තං දේශං පතගේශ්වරම් ।
බභූවුර්වානරා හෘෂ්ටාඃ ප්රවෘත්තිමුපලභ්ය තේ ॥ 37 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ අෂ්ටපංචාශස්සර්ගඃ ॥
