শ্রীমদ্বাল্মীকীয় রামাযণে কিষ্কিংধাকাংডম্ ।
অথ অষ্টপংচাশস্সর্গঃ ।
ইত্য়ুক্তঃ করুণং বাক্য়ং বানরৈস্ত্যক্তজীবিতৈঃ ।
সবাষ্পো বানরান্গৃধ্রঃ প্রত্য়ুবাচ মহাস্বনঃ ॥ 1 ॥
যবীয়ান্মম ভ্রাতা জটায়ুর্নাম বানরাঃ ।
যমাখ্য়াত হতং যুদ্ধে রাবণেন বলীযসা ॥ 2 ॥
বৃদ্ধভাবাদপক্ষত্বাচ্ছৃণ্বংস্তদপি মর্ষয়ে ।
ন হি মে শক্তিরস্ত্যদ্য় ভ্রাতুর্বৈরবিমোক্ষণে ॥ 3 ॥
পুরা বৃত্রবধে বৃত্তে পরস্পরজয়ৈষিণৌ ।
আদিত্যমুপয়াতৌ স্বো জ্বলংতং রশ্মিমালিনম্ ॥ 4 ॥
আবৃত্ত্য়াঽকাশমার্গে তু জবেন স্ম গতৌ ভৃশম্ ।
মধ্য়ং প্রাপ্তে দিনকরে জটায়ুরবসীদতি ॥ 5 ॥
তমহং ভ্রাতরং দৃষ্ট্বা সূর্যরশ্মিভিরর্দিতম্ ।
পক্ষাভ্য়াং ছাদয়ামাস স্নেহাত্পরমবিহ্বলঃ ॥ 6 ॥
নির্দগ্ধপক্ষঃ পতিতো বিংধ্য়েঽহং বানরর্ষভাঃ ।
অহমস্মিন্বসন্ভ্রাতুঃ প্রবৃত্তিং নোপলক্ষয়ে ॥ 7 ॥
জটায়ুষস্ত্বেবমুক্তো ভ্রাত্রা সংপাতিনা তদা ।
যুবরাজো মহাপ্রাজ্ঞঃ প্রত্য়ুবাচাংগদস্ততঃ ॥ 8 ॥
জটায়ুষো যদি ভ্রাতা শ্রুতং তে গদিতং ময়া ।
আখ্য়া হি যদি জানাসি নিলয়ং তস্য় রক্ষসঃ ॥ 9 ॥
অদীর্ঘদর্শিনং তং বৈ রাবণং রাক্ষসাধিপম্ ।
অংতিকে যদি বা দূরে যদি জানাসি শংস নঃ ॥ 10 ॥
ততোঽব্রবীন্মহাতেজা জ্য়েষ্ঠো ভ্রাতা জটায়ুষঃ ।
আত্মানুরূপং বচনং বানরান্সংপ্রহর্ষযন্ ॥ 11 ॥
নির্দগ্ধপক্ষো গৃধ্রোঽহং হীনবীর্য়ঃ প্লবংগমাঃ ।
বাঙ্মাত্রেণ তু রামস্য় করিষ্য়ে সাহ্যমুত্তমম্ ॥ 12 ॥
জানামি বারুণান্লোকান্বিষ্ণোস্ত্রৈ বিক্রমানপি ।
মহাসুরবিমর্দন্বা শ্চ হ্যমৃতস্য় চ মংথনম্ ॥ 13 ॥
রামস্য় যদিদং কার্য়ং কর্তব্য়ং প্রথমং ময়া ।
জরয়া চ হৃতং তেজঃ প্রাণাশ্চ শিথিলা মম ॥ 14 ॥
তরুণী রূপসংপন্না সর্বাভরণভূষিতা ।
হ্রিযমাণা ময়া দৃষ্টা রাবণেন দুরাত্মনা ॥ 15 ॥
ক্রোশংতী রাম রামেতি লক্ষ্মণেতি চ ভামিনী ।
ভূষণান্যপবিধ্য়ংতী গাত্রাণি চ বিধুন্বতী ॥ 16 ॥
সূর্যপ্রভেব শৈলাগ্রে তস্য়াঃ কৌশেযমুত্তমম্ ।
অসিতে রাক্ষসে ভাতি যথা বা তটিদংবুদে ॥ 17 ॥
তাং তু সীতামহং মন্য়ে রামস্য় পরিকীর্তনাত্ ।
শ্রূযতাং মে কথযতো নিলয়ং তস্য় রক্ষসঃ ॥ 18 ॥
পুত্রো বিশ্রবস স্সাক্ষাদ্ভ্রাতা বৈশ্রবণস্য় চ ।
অধ্য়াস্তে নগরীং লংকাং রাবণো নাম রাক্ষসঃ ॥ 19 ॥
ইতো দ্বীপস্সমুদ্রস্য় সংপূর্ণে শতয়োজনে ।
তস্মিন্লংকাপুরী রম্য়া নির্মিতা বিশ্বকর্মণা ॥ 20 ॥
জাংবূনদময়ৈর্দ্বারৈশ্চিত্রৈঃ কাংচনবেদিকৈঃ ।
প্রাসাদৈর্হেমবর্ণৈশ্চ মহদ্ভিঃ সুসমা কৃতা ॥ 21 ॥
প্রাকারেণার্কবর্ণেন মহতা চ সমান্বিতা ।
তস্য়াং বসতি বৈদেহী দীনা কৌশেযবাসিনী ॥ 22 ॥
রাবণাংতঃপুরে রুদ্ধা রাক্ষসীভিস্সুরক্ষিতা ।
জনকস্য়াত্মজাং রাজ্ঞস্তত্র দ্রক্ষ্যথ মৈথিলীম্ ॥ 23 ॥
লংকায়ামথ গুপ্তায়াং সাগরেণ সমংততঃ ।
সংপ্রাপ্য় সাগরস্য়াংতং সংপূর্ণং শতয়োজনম্ ॥ 24 ॥
আসাদ্য় দক্ষিণং তীরং ততো দ্রক্ষ্যথ রাবণম্ ।
তত্রৈব ত্বরিতাঃ ক্ষিপ্রং বিক্রমধ্বং প্লবংগমাঃ ॥ 25 ॥
জ্ঞানেন খলু পশ্য়ামি দৃষ্ট্বা প্রত্য়াগমিষ্যথ ।
আদ্য়ঃ পংথাঃ কুলিংগানাং যে চান্য়ে ধান্যজীবিনঃ ॥ 26 ॥
দ্বিতীয়ো বলিভোজানাং যে চ বৃক্ষফলাশিনঃ ।
ভাসাস্তৃতীয়ং গচ্ছংতি ক্রৌংচাশ্চ কুররৈস্সহ ॥ 27 ॥
শ্য়েনাশ্চতুর্থং গচ্ছংতি গৃধ্রা গচ্ছংতি পংচমম্ ।
বলবীর্য়োপপন্নানাং রূপয়ৌবনশালিনাম্ ॥ 28 ॥
ষষ্ঠস্তু পংথা হংসানাং বৈনতেযগতিঃ পরা ।
বৈনতেয়াচ্চ নো জন্ম সর্বেষাং বানরর্ষভাঃ ॥ 29 ॥
ইহস্থোঽহং প্রপশ্য়ামি রাবণং জানকীং তথা ।
অস্মাকমপি সৌবর্ণং দিব্য়ং চক্ষুর্বলং তথা ॥ 30 ॥
তস্মাদাহারবীর্য়েণ নিসর্গেণ চ বানরাঃ ।
আয়োজনশতাত্সাগ্রাদ্বয়ং পশ্য়াম নিত্যশঃ ॥ 31 ॥
অস্মাকং বিহিতা বৃত্তির্নিসর্গেণ চ দূরতঃ ।
বিহিতা পাদমূলে তু বৃত্তিশ্চরণয়োধিনাম্ ॥ 32 ॥
গর্হিতং তু কৃতং কর্ম যেন স্ম পশিতাশিনা ।
প্রতীকার্য়ং চ মে তস্য় বৈরং ভ্রাতৃকৃতং ভবেত্ ॥ 33 ॥
উপায়ো দৃশ্যতাং কশ্চিল্লংঘনে লবণাংভসঃ ।
অভিগম্য় তু বৈদেহীং সমৃদ্ধার্থা গমিষ্যথ ॥ 34 ॥
সমুদ্রং নেতুমিচ্ছামি ভবদ্ভির্বরুণালযম্ ।
প্রদাস্য়াম্য়ুদকং ভ্রাতুস্স্বর্গতস্য় মহাত্মনঃ ॥ 35 ॥
ততো নীত্বা তু তং দেশং তীরং নদনদীপতেঃ ।
নির্দগ্ধপক্ষং সংপাতিং বানরাস্সুমহৌজসঃ ॥ 36 ॥
পুনঃ প্রত্য়ানয়িত্বা চ তং দেশং পতগেশ্বরম্ ।
বভূবুর্বানরা হৃষ্টাঃ প্রবৃত্তিমুপলভ্য় তে ॥ 37 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে অষ্টপংচাশস্সর্গঃ ॥
