ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଷଟ୍ଷଷ୍ଟିତମସ୍ସର୍ଗଃ ।
ଅନେକଶତସାହସ୍ରୀଂ ଵିଷଣ୍ଣାଂ ହରିଵାହିନୀମ୍ ।
ଜାଂବଵାନ୍ସମୁଦୀକ୍ଷ୍ୟୈଵଂ ହନୂମଂତମଥାବ୍ରଵୀତ୍ ॥ 1 ॥
ଵୀର ଵାନରଲୋକସ୍ୟ ସର୍ଵଶାସ୍ତ୍ରଵିଦାଂ ଵର ।
ତୂଷ୍ଣୀମେକାଂତମାଶ୍ରିତ୍ୟ ହନୂମନ୍କିଂ ନ ଜଲ୍ପସି ॥ 2 ॥
ହନୂମନ୍ହରିରାଜସ୍ୟ ସୁଗ୍ରୀଵସ୍ୟ ସମୋ ହ୍ୟସି ।
ରାମଲକ୍ଷ୍ମଣୟୋଶ୍ଚାପି ତେଜସା ଚ ବଲେନ ଚ ॥ 3 ॥
ଅରିଷ୍ଟନେମିନଃ ପୁତ୍ରୋ ଵୈନତେୟୋ ମହାବଲଃ ।
ଗରୁତ୍ମାନିତି ଵିଖ୍ୟାତ ଉତ୍ତମସ୍ସର୍ଵପକ୍ଷିଣାମ୍ ॥ 4 ॥
ବହୁଶୋ ହି ମୟା ଦୃଷ୍ଟଃ ସାଗରେ ସ ମହାବଲଃ ।
ଭୁଜଂଗାନୁଦ୍ଧରନ୍ପକ୍ଷୀ ମହାଵେଗୋ ମହାୟଶାଃ ॥ 5 ॥
ପକ୍ଷୟୋର୍ୟଦ୍ବଲଂ ତସ୍ୟ ତାଵଦ୍ଭୁଜବଲଂ ତଵ ।
ଵିକ୍ରମଶ୍ଚାପି ଵେଗଶ୍ଚ ନ ତେ ତେନାଵହୀୟତେ ॥ 6 ॥
ବଲଂ ବୁଦ୍ଧିଶ୍ଚ ତେଜଶ୍ଚ ସତ୍ତ୍ଵଂ ଚ ହରିପୁଂଗଵ ।
ଵିଶିଷ୍ଟଂ ସର୍ଵଭୂତେଷୁ କିମାତ୍ମାନଂ ନ ବୁଧ୍ୟସେ ॥ 7 ॥
ଅପ୍ସରାପ୍ସରସାଂ ଶ୍ରେଷ୍ଠା ଵିଖ୍ୟାତା ପୁଂଜିକସ୍ଥଲା ।
ଅଂଜନେତି ପରିଖ୍ୟାତା ପତ୍ନୀ କେସରିଣୋ ହରେଃ ॥ 8 ॥
ଵିଖ୍ୟାତା ତ୍ରିଷୁ ଲୋକେଷୁ ରୂପେଣାପ୍ରତିମା ଭୁଵି ।
ଅଭିଶାପାଦଭୂତ୍ତାତ ଵାନରୀ କାମରୂପିଣୀ ॥ 9 ॥
ଦୁହିତା ଵାନରେଂଦ୍ରସ୍ୟ କୁଂଜରସ୍ୟ ମହାତ୍ମନଃ ।
ମାନୁଷଂ ଵିଗ୍ରହଂ କୃତ୍ଵା ରୂପୟୌଵନଶାଲିନୀ ॥ 10 ॥
ଵିଚିତ୍ରମାଲ୍ୟାଭରଣା ମହାର୍ହକ୍ଷୌମଵାସିନୀ ।
ଅଚରତ୍ପର୍ଵତସ୍ୟାଗ୍ରେ ପ୍ରାଵୃଡଂବୁଦସନ୍ନିଭେ ॥ 11 ॥
ତସ୍ୟା ଵସ୍ତ୍ରଂ ଵିଶାଲାକ୍ଷ୍ୟାଃ ପୀତଂ ରକ୍ତଦଶଂ ଶୁଭମ୍ ।
ସ୍ଥିତାୟାଃ ପର୍ଵତସ୍ୟାଗ୍ରେ ମାରୁତୋଽପହରଚ୍ଛନୈଃ ॥ 12 ॥
ସ ଦଦର୍ଶ ତତସ୍ତସ୍ୟା ଵୃତ୍ତାଵୂରୂ ସୁସଂହତୌ ।
ସ୍ତନୌ ଚ ପୀନୌ ସହିତୌ ସୁଜାତଂ ଚାରୁ ଚାନନମ୍ ॥ 13 ॥
ତାଂ ଵିଶାଲାୟତଶ୍ରୋଣୀଂ ତନୁମଧ୍ୟାଂ ୟଶସ୍ଵିନୀମ୍ ।
ଦୃଷ୍ଟଵୈଵ ଶୁଭସର୍ଵାଂଗୀଂ ପଵନଃ କାମମୋହିତଃ ॥ 14 ॥
ସ ତାଂ ଭୁଜାଭ୍ୟାଂ ଦୀର୍ଘାଭ୍ୟାଂ ପର୍ୟଷ୍ଵଜତ ମାରୁତଃ ।
ମନ୍ମଥାଵିଷ୍ଟସର୍ଵାଂଗୋ ଗତାତ୍ମା ତାମନିଂଦିତାମ୍ ॥ 15 ॥
ସା ତୁ ତତ୍ରୈଵ ସଂଭ୍ରାଂତା ସୁଵ୍ରତା ଵାକ୍ୟମବ୍ରଵୀତ୍ ।
ଏକପତ୍ନୀଵ୍ରତମିଦଂ କୋ ନାଶୟିତୁମିଚ୍ଛତି ॥ 16 ॥
ଅଂଜନାୟା ଵଚ୍ଶୁତ୍ଵା ମାରୁତଃ ପ୍ରତ୍ୟଭାଷତ ।
ନ ତ୍ଵାଂ ହିଂସାମି ସୁଶ୍ରୋଣି ମା ଭୂତ୍ତେ ସୁଭଗେ ଭୟମ୍ ॥ 17 ॥
ମନସାଽସ୍ମି ଗତୋ ୟତ୍ତ୍ଵାଂ ପରିଷ୍ଵଜ୍ୟ ୟଶସ୍ଵିନୀମ୍ ।
ଵୀର୍ୟଵାନ୍ବୁଦ୍ଧିସଂପନ୍ନଃ ପୁତ୍ରସ୍ତଵ ଭଵିଷ୍ୟତି ॥ 18 ॥
ମହାସତ୍ତ୍ଵୋ ମହାତେଜା ମହାବଲପରାକ୍ରମଃ ।
ଲଂଘନେ ପ୍ଲଵନେ ଚୈଵ ଭଵିଷ୍ୟତି ହି ମତ୍ସମଃ ॥ 19 ॥
ଏଵମୁକ୍ତା ତତସ୍ତୁଷ୍ଟା ଜନନୀ ତେ ମହାକପେ ।
ଗୁହାୟାଂ ତ୍ଵାଂ ମହାବାହୋ ପ୍ରଜଜ୍ଞେ ପ୍ଲଵଗର୍ଷଭମ୍ ॥ 20 ॥
ଅଭ୍ୟୁତ୍ଥିତଂ ତତସ୍ସୂର୍ୟଂ ବାଲୋ ଦୃଷ୍ଟ୍ଵା ମହାଵନେ ।
ଫଲଂ ଚେତି ଜିଘୃକ୍ଷୁସ୍ତ୍ଵମୁତ୍ପ୍ଲୁତ୍ୟାଭ୍ୟୁଦ୍ଗତୋ ଦିଵମ୍ ॥ 21 ॥
ଶତାନି ତ୍ରୀଣି ଗତ୍ଵାଽଥ ୟୋଜନାନାଂ ମହାକପେ ।
ତେଜସା ତସ୍ୟ ନିର୍ଧୂତୋ ନ ଵିଷାଦଂ ତତୋଗତଃ ॥ 22 ॥
ତାଵଦାପପତ ସ୍ତୂର୍ଣମଂତରିକ୍ଷଂ ମହାକପେ ।
କ୍ଷିପ୍ତମିଂଦ୍ରେଣ ତେ ଵଜ୍ରଂ କୋପାଵିଷ୍ଟେନ ଧୀମତା ॥ 23 ॥
ତଦା ଶୈଲାଗ୍ରଶିଖରେ ଵାମୋ ହନୁରଭଜ୍ୟତ ।
ତତୋ ହି ନାମଧେୟଂ ତେ ହନୁମାନିତି କୀର୍ତ୍ୟତେ ॥ 24 ॥
ତସ୍ତ୍ଵାଵି ନିହତଂ ଦୃଷ୍ଟ୍ଵା ଵାୟୁର୍ଗଂଧଵହସ୍ସ୍ଵୟମ୍ ।
ତ୍ରୈଲୋକ୍ୟେ ଭୃଶସଂକୃଦ୍ଧୋ ନ ଵଵୌ ଵୈ ପ୍ରଭଂଜନଃ ॥ 25 ॥
ସଂଭ୍ରାଂତାଶ୍ଚ ସୂରାସ୍ସର୍ଵେ ତ୍ରୈଲୋକ୍ୟେ କ୍ଷୁଭିତେ ସତି ।
ପ୍ରସାଦୟଂତି ସଂକ୍ରୁଦ୍ଧଂ ମାରୁତଂ ଭୁଵନେଶ୍ଵରାଃ ॥ 26 ॥
ପ୍ରସାଦିତେ ଚ ପଵନେ ବ୍ରହ୍ମା ତୁଭ୍ୟଂ ଵରଂ ଦଦୌ ।
ଅଶସ୍ତ୍ରଵଧ୍ୟତାଂ ତାତ ସମରେ ସତ୍ୟଵିକ୍ରମ ॥ 27 ॥
ଵଜ୍ରସ୍ୟ ଚ ନିପାତେନ ଵିରୁଜଂ ତ୍ଵାଂ ସମୀକ୍ଷ୍ୟ ଚ ।
ସହସ୍ରନେତ୍ରଃ ପ୍ରୀତାତ୍ମା ଦଦୌ ତେ ଵରମୁତ୍ତମମ୍ ॥ 28 ॥
ସ୍ଵଚ୍ଛଂଦତଶ୍ଚ ମରଣଂ ତେଭୂୟାଦିତି ଵୈ ପ୍ରଭୋ ।
ସ ତ୍ଵଂ କେସରିଣଃ ପୁତ୍ରଃ କ୍ଷେତ୍ରଜୋ ଭୀମଵିକ୍ରମଃ ॥ 29 ॥
ମାରୁତସ୍ୟୌରସଃ ପୁତ୍ରସ୍ତେଜସା ଚାପି ତତ୍ସମଃ ।
ତ୍ଵଂ ହି ଵାୟୁସୁତୋ ଵତ୍ସ ପ୍ଲଵନେ ଚାପି ତତ୍ସମଃ ॥ 30 ॥
ଵୟମଦ୍ୟ ଗତପ୍ରାଣା ଭଵାନ୍ନସ୍ତ୍ରାତୁ ସାଂପ୍ରତମ୍ ।
ଦାକ୍ଷ୍ୟଵିକ୍ରମସଂପନ୍ନଃ କପିରାଜ ଇଵାପରଃ ॥ 31 ॥
ତ୍ରିଵିକ୍ରମେ ମୟା ତାତ ସଶୈଲଵନକାନନା ।
ତ୍ରିସ୍ସପ୍ତକୃତ୍ଵଃ ପୃଥିଵୀ ପରିକ୍ରାଂତା ପ୍ରଦକ୍ଷିଣମ୍ ॥ 32 ॥
ତଥା ଚୌଷଧୟୋଽସ୍ମାଭିସ୍ସଂଚିତା ଦେଵଶାସନାତ୍ ।
ନିଷ୍ପନ୍ନମମୃତଂ ୟାଭିସ୍ତଦାସୀନ୍ନୋ ମହଦ୍ବଲମ୍ ॥ 33 ॥
ସ ଇଦାନୀମହଂ ଵୃଦ୍ଧଃ ପରିହୀନପରାକ୍ରମଃ ।
ସାଂପ୍ରତଂ କାଲମସ୍ମାକଂ ଭଵାନ୍ସର୍ଵଗୁଣାନ୍ଵିତଃ ॥ 34 ॥
ତଦ୍ଵିଜୃଂଭସ୍ଵ ଵିକ୍ରାଂତଃ ପ୍ଲଵତାମୁତ୍ତମୋ ହ୍ୟସି ।
ତ୍ଵଦ୍ଵୀର୍ୟଂ ଦ୍ରଷ୍ଟୁକାମା ହି ସର୍ଵା ଵାନରଵାହିନୀ ॥ 35 ॥
ଉତ୍ତିଷ୍ଠ ହରିଶାର୍ଦୂଲ ଲଂଘୟସ୍ଵ ମହାର୍ଣଵମ୍ ।
ପରା ହି ସର୍ଵଭୂତାନାଂ ହନୁମନ୍ୟା ଗତିସ୍ତଵ ॥ 36 ॥
ଵିଷଣ୍ଣା ହରୟସ୍ସର୍ଵେ ହନୁମନ୍କିମୁପେକ୍ଷସେ ।
ଵିକ୍ରମସ୍ଵ ମହାଵେଗୋ ଵିଷ୍ଣୁସ୍ତ୍ରୀନ୍ଵିକ୍ରମାନିଵ ॥ 37 ॥
ତତସ୍ତୁ ଵୈ ଜାଂବଵତା ପ୍ରଚୋଦିତଃ ପ୍ରତୀତଵେଗଃ ପଵନାତ୍ମଜଃ କପିଃ ।
ପ୍ରହର୍ଷୟଂସ୍ତାଂ ହରିଵୀରଵାହିନୀଂ ଚକାର ରୂପଂ ମହଦାତ୍ମନସ୍ତଦା ॥ 38 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଷଟ୍ଷଷ୍ଟିତମସ୍ସର୍ଗଃ ॥
