ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ഷട്ഷഷ്ടിതമസ്സര്ഗഃ ।
അനേകശതസാഹസ്രീം വിഷണ്ണാം ഹരിവാഹിനീമ് ।
ജാംബവാന്സമുദീക്ഷ്യൈവം ഹനൂമംതമഥാബ്രവീത് ॥ 1 ॥
വീര വാനരലോകസ്യ സർവശാസ്ത്രവിദാം വര ।
തൂഷ്ണീമേകാംതമാശ്രിത്യ ഹനൂമന്കിം ന ജല്പസി ॥ 2 ॥
ഹനൂമന്ഹരിരാജസ്യ സുഗ്രീവസ്യ സമോ ഹ്യസി ।
രാമലക്ഷ്മണയോശ്ചാപി തേജസാ ച ബലേന ച ॥ 3 ॥
അരിഷ്ടനേമിനഃ പുത്രോ വൈനതേയോ മഹാബലഃ ।
ഗരുത്മാനിതി വിഖ്യാത ഉത്തമസ്സർവപക്ഷിണാമ് ॥ 4 ॥
ബഹുശോ ഹി മയാ ദൃഷ്ടഃ സാഗരേ സ മഹാബലഃ ।
ഭുജംഗാനുദ്ധരന്പക്ഷീ മഹാവേഗോ മഹായശാഃ ॥ 5 ॥
പക്ഷയോര്യദ്ബലം തസ്യ താവദ്ഭുജബലം തവ ।
വിക്രമശ്ചാപി വേഗശ്ച ന തേ തേനാവഹീയതേ ॥ 6 ॥
ബലം ബുദ്ധിശ്ച തേജശ്ച സത്ത്വം ച ഹരിപുംഗവ ।
വിശിഷ്ടം സർവഭൂതേഷു കിമാത്മാനം ന ബുധ്യസേ ॥ 7 ॥
അപ്സരാപ്സരസാം ശ്രേഷ്ഠാ വിഖ്യാതാ പുംജികസ്ഥലാ ।
അംജനേതി പരിഖ്യാതാ പത്നീ കേസരിണോ ഹരേഃ ॥ 8 ॥
വിഖ്യാതാ ത്രിഷു ലോകേഷു രൂപേണാപ്രതിമാ ഭുവി ।
അഭിശാപാദഭൂത്താത വാനരീ കാമരൂപിണീ ॥ 9 ॥
ദുഹിതാ വാനരേംദ്രസ്യ കുംജരസ്യ മഹാത്മനഃ ।
മാനുഷം വിഗ്രഹം കൃത്വാ രൂപയൌവനശാലിനീ ॥ 10 ॥
വിചിത്രമാല്യാഭരണാ മഹാര്ഹക്ഷൌമവാസിനീ ।
അചരത്പർവതസ്യാഗ്രേ പ്രാവൃഡംബുദസന്നിഭേ ॥ 11 ॥
തസ്യാ വസ്ത്രം വിശാലാക്ഷ്യാഃ പീതം രക്തദശം ശുഭമ് ।
സ്ഥിതായാഃ പർവതസ്യാഗ്രേ മാരുതോഽപഹരച്ഛനൈഃ ॥ 12 ॥
സ ദദര്ശ തതസ്തസ്യാ വൃത്താവൂരൂ സുസംഹതൌ ।
സ്തനൌ ച പീനൌ സഹിതൌ സുജാതം ചാരു ചാനനമ് ॥ 13 ॥
താം വിശാലായതശ്രോണീം തനുമധ്യാം യശസ്വിനീമ് ।
ദൃഷ്ടവൈവ ശുഭസർവാംഗീം പവനഃ കാമമോഹിതഃ ॥ 14 ॥
സ താം ഭുജാഭ്യാം ദീര്ഘാഭ്യാം പര്യഷ്വജത മാരുതഃ ।
മന്മഥാവിഷ്ടസർവാംഗോ ഗതാത്മാ താമനിംദിതാമ് ॥ 15 ॥
സാ തു തത്രൈവ സംഭ്രാംതാ സുവ്രതാ വാക്യമബ്രവീത് ।
ഏകപത്നീവ്രതമിദം കോ നാശയിതുമിച്ഛതി ॥ 16 ॥
അംജനായാ വച്ശുത്വാ മാരുതഃ പ്രത്യഭാഷത ।
ന ത്വാം ഹിംസാമി സുശ്രോണി മാ ഭൂത്തേ സുഭഗേ ഭയമ് ॥ 17 ॥
മനസാഽസ്മി ഗതോ യത്ത്വാം പരിഷ്വജ്യ യശസ്വിനീമ് ।
വീര്യവാന്ബുദ്ധിസംപന്നഃ പുത്രസ്തവ ഭവിഷ്യതി ॥ 18 ॥
മഹാസത്ത്വോ മഹാതേജാ മഹാബലപരാക്രമഃ ।
ലംഘനേ പ്ലവനേ ചൈവ ഭവിഷ്യതി ഹി മത്സമഃ ॥ 19 ॥
ഏവമുക്താ തതസ്തുഷ്ടാ ജനനീ തേ മഹാകപേ ।
ഗുഹായാം ത്വാം മഹാബാഹോ പ്രജജ്ഞേ പ്ലവഗര്ഷഭമ് ॥ 20 ॥
അഭ്യുത്ഥിതം തതസ്സൂര്യം ബാലോ ദൃഷ്ട്വാ മഹാവനേ ।
ഫലം ചേതി ജിഘൃക്ഷുസ്ത്വമുത്പ്ലുത്യാഭ്യുദ്ഗതോ ദിവമ് ॥ 21 ॥
ശതാനി ത്രീണി ഗത്വാഽഥ യോജനാനാം മഹാകപേ ।
തേജസാ തസ്യ നിര്ധൂതോ ന വിഷാദം തതോഗതഃ ॥ 22 ॥
താവദാപപത സ്തൂര്ണമംതരിക്ഷം മഹാകപേ ।
ക്ഷിപ്തമിംദ്രേണ തേ വജ്രം കോപാവിഷ്ടേന ധീമതാ ॥ 23 ॥
തദാ ശൈലാഗ്രശിഖരേ വാമോ ഹനുരഭജ്യത ।
തതോ ഹി നാമധേയം തേ ഹനുമാനിതി കീര്ത്യതേ ॥ 24 ॥
തസ്ത്വാവി നിഹതം ദൃഷ്ട്വാ വായുര്ഗംധവഹസ്സ്വയമ് ।
ത്രൈലോക്യേ ഭൃശസംകൃദ്ധോ ന വവൌ വൈ പ്രഭംജനഃ ॥ 25 ॥
സംഭ്രാംതാശ്ച സൂരാസ്സർവേ ത്രൈലോക്യേ ക്ഷുഭിതേ സതി ।
പ്രസാദയംതി സംക്രുദ്ധം മാരുതം ഭുവനേശ്വരാഃ ॥ 26 ॥
പ്രസാദിതേ ച പവനേ ബ്രഹ്മാ തുഭ്യം വരം ദദൌ ।
അശസ്ത്രവധ്യതാം താത സമരേ സത്യവിക്രമ ॥ 27 ॥
വജ്രസ്യ ച നിപാതേന വിരുജം ത്വാം സമീക്ഷ്യ ച ।
സഹസ്രനേത്രഃ പ്രീതാത്മാ ദദൌ തേ വരമുത്തമമ് ॥ 28 ॥
സ്വച്ഛംദതശ്ച മരണം തേഭൂയാദിതി വൈ പ്രഭോ ।
സ ത്വം കേസരിണഃ പുത്രഃ ക്ഷേത്രജോ ഭീമവിക്രമഃ ॥ 29 ॥
മാരുതസ്യൌരസഃ പുത്രസ്തേജസാ ചാപി തത്സമഃ ।
ത്വം ഹി വായുസുതോ വത്സ പ്ലവനേ ചാപി തത്സമഃ ॥ 30 ॥
വയമദ്യ ഗതപ്രാണാ ഭവാന്നസ്ത്രാതു സാംപ്രതമ് ।
ദാക്ഷ്യവിക്രമസംപന്നഃ കപിരാജ ഇവാപരഃ ॥ 31 ॥
ത്രിവിക്രമേ മയാ താത സശൈലവനകാനനാ ।
ത്രിസ്സപ്തകൃത്വഃ പൃഥിവീ പരിക്രാംതാ പ്രദക്ഷിണമ് ॥ 32 ॥
തഥാ ചൌഷധയോഽസ്മാഭിസ്സംചിതാ ദേവശാസനാത് ।
നിഷ്പന്നമമൃതം യാഭിസ്തദാസീന്നോ മഹദ്ബലമ് ॥ 33 ॥
സ ഇദാനീമഹം വൃദ്ധഃ പരിഹീനപരാക്രമഃ ।
സാംപ്രതം കാലമസ്മാകം ഭവാന്സർവഗുണാന്വിതഃ ॥ 34 ॥
തദ്വിജൃംഭസ്വ വിക്രാംതഃ പ്ലവതാമുത്തമോ ഹ്യസി ।
ത്വദ്വീര്യം ദ്രഷ്ടുകാമാ ഹി സർവാ വാനരവാഹിനീ ॥ 35 ॥
ഉത്തിഷ്ഠ ഹരിശാര്ദൂല ലംഘയസ്വ മഹാര്ണവമ് ।
പരാ ഹി സർവഭൂതാനാം ഹനുമന്യാ ഗതിസ്തവ ॥ 36 ॥
വിഷണ്ണാ ഹരയസ്സർവേ ഹനുമന്കിമുപേക്ഷസേ ।
വിക്രമസ്വ മഹാവേഗോ വിഷ്ണുസ്ത്രീന്വിക്രമാനിവ ॥ 37 ॥
തതസ്തു വൈ ജാംബവതാ പ്രചോദിതഃ പ്രതീതവേഗഃ പവനാത്മജഃ കപിഃ ।
പ്രഹര്ഷയംസ്താം ഹരിവീരവാഹിനീം ചകാര രൂപം മഹദാത്മനസ്തദാ ॥ 38 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ഷട്ഷഷ്ടിതമസ്സര്ഗഃ ॥
