ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ෂට්ෂෂ්ටිතමස්සර්ගඃ ।
අනේකශතසාහස්රීං විෂණ්ණාං හරිවාහිනීම් ।
ජාංබවාන්සමුදීක්ෂ්යෛවං හනූමංතමථාබ්රවීත් ॥ 1 ॥
වීර වානරලෝකස්ය සර්වශාස්ත්රවිදාං වර ।
තූෂ්ණීමේකාංතමාශ්රිත්ය හනූමන්කිං න ජල්පසි ॥ 2 ॥
හනූමන්හරිරාජස්ය සුග්රීවස්ය සමෝ හ්යසි ।
රාමලක්ෂ්මණයෝශ්චාපි තේජසා ච බලේන ච ॥ 3 ॥
අරිෂ්ටනේමිනඃ පුත්රෝ වෛනතේයෝ මහාබලඃ ।
ගරුත්මානිති විඛ්යාත උත්තමස්සර්වපක්ෂිණාම් ॥ 4 ॥
බහුශෝ හි මයා දෘෂ්ටඃ සාගරේ ස මහාබලඃ ।
භුජංගානුද්ධරන්පක්ෂී මහාවේගෝ මහායශාඃ ॥ 5 ॥
පක්ෂයෝර්යද්බලං තස්ය තාවද්භුජබලං තව ।
වික්රමශ්චාපි වේගශ්ච න තේ තේනාවහීයතේ ॥ 6 ॥
බලං බුද්ධිශ්ච තේජශ්ච සත්ත්වං ච හරිපුංගව ।
විශිෂ්ටං සර්වභූතේෂු කිමාත්මානං න බුධ්යසේ ॥ 7 ॥
අප්සරාප්සරසාං ශ්රේෂ්ඨා විඛ්යාතා පුංජිකස්ථලා ।
අංජනේති පරිඛ්යාතා පත්නී කේසරිණෝ හරේඃ ॥ 8 ॥
විඛ්යාතා ත්රිෂු ලෝකේෂු රූපේණාප්රතිමා භුවි ।
අභිශාපාදභූත්තාත වානරී කාමරූපිණී ॥ 9 ॥
දුහිතා වානරේංද්රස්ය කුංජරස්ය මහාත්මනඃ ।
මානුෂං විග්රහං කෘත්වා රූපයෞවනශාලිනී ॥ 10 ॥
විචිත්රමාල්යාභරණා මහාර්හක්ෂෞමවාසිනී ।
අචරත්පර්වතස්යාග්රේ ප්රාවෘඩංබුදසන්නිභේ ॥ 11 ॥
තස්යා වස්ත්රං විශාලාක්ෂ්යාඃ පීතං රක්තදශං ශුභම් ।
ස්ථිතායාඃ පර්වතස්යාග්රේ මාරුතෝऽපහරච්ඡනෛඃ ॥ 12 ॥
ස දදර්ශ තතස්තස්යා වෘත්තාවූරූ සුසංහතෞ ।
ස්තනෞ ච පීනෞ සහිතෞ සුජාතං චාරු චානනම් ॥ 13 ॥
තාං විශාලායතශ්රෝණීං තනුමධ්යාං යශස්විනීම් ।
දෘෂ්ටවෛව ශුභසර්වාංගීං පවනඃ කාමමෝහිතඃ ॥ 14 ॥
ස තාං භුජාභ්යාං දීර්ඝාභ්යාං පර්යෂ්වජත මාරුතඃ ।
මන්මථාවිෂ්ටසර්වාංගෝ ගතාත්මා තාමනිංදිතාම් ॥ 15 ॥
සා තු තත්රෛව සංභ්රාංතා සුව්රතා වාක්යමබ්රවීත් ।
ඒකපත්නීව්රතමිදං කෝ නාශයිතුමිච්ඡති ॥ 16 ॥
අංජනායා වච්ශුත්වා මාරුතඃ ප්රත්යභාෂත ।
න ත්වාං හිංසාමි සුශ්රෝණි මා භූත්තේ සුභගේ භයම් ॥ 17 ॥
මනසාऽස්මි ගතෝ යත්ත්වාං පරිෂ්වජ්ය යශස්විනීම් ।
වීර්යවාන්බුද්ධිසංපන්නඃ පුත්රස්තව භවිෂ්යති ॥ 18 ॥
මහාසත්ත්වෝ මහාතේජා මහාබලපරාක්රමඃ ।
ලංඝනේ ප්ලවනේ චෛව භවිෂ්යති හි මත්සමඃ ॥ 19 ॥
ඒවමුක්තා තතස්තුෂ්ටා ජනනී තේ මහාකපේ ।
ගුහායාං ත්වාං මහාබාහෝ ප්රජජ්ඤේ ප්ලවගර්ෂභම් ॥ 20 ॥
අභ්යුත්ථිතං තතස්සූර්යං බාලෝ දෘෂ්ට්වා මහාවනේ ।
ඵලං චේති ජිඝෘක්ෂුස්ත්වමුත්ප්ලුත්යාභ්යුද්ගතෝ දිවම් ॥ 21 ॥
ශතානි ත්රීණි ගත්වාऽථ යෝජනානාං මහාකපේ ।
තේජසා තස්ය නිර්ධූතෝ න විෂාදං තතෝගතඃ ॥ 22 ॥
තාවදාපපත ස්තූර්ණමංතරික්ෂං මහාකපේ ।
ක්ෂිප්තමිංද්රේණ තේ වජ්රං කෝපාවිෂ්ටේන ධීමතා ॥ 23 ॥
තදා ශෛලාග්රශිඛරේ වාමෝ හනුරභජ්යත ।
තතෝ හි නාමධේයං තේ හනුමානිති කීර්ත්යතේ ॥ 24 ॥
තස්ත්වාවි නිහතං දෘෂ්ට්වා වායුර්ගංධවහස්ස්වයම් ।
ත්රෛලෝක්යේ භෘශසංකෘද්ධෝ න වවෞ වෛ ප්රභංජනඃ ॥ 25 ॥
සංභ්රාංතාශ්ච සූරාස්සර්වේ ත්රෛලෝක්යේ ක්ෂුභිතේ සති ।
ප්රසාදයංති සංක්රුද්ධං මාරුතං භුවනේශ්වරාඃ ॥ 26 ॥
ප්රසාදිතේ ච පවනේ බ්රහ්මා තුභ්යං වරං දදෞ ।
අශස්ත්රවධ්යතාං තාත සමරේ සත්යවික්රම ॥ 27 ॥
වජ්රස්ය ච නිපාතේන විරුජං ත්වාං සමීක්ෂ්ය ච ।
සහස්රනේත්රඃ ප්රීතාත්මා දදෞ තේ වරමුත්තමම් ॥ 28 ॥
ස්වච්ඡංදතශ්ච මරණං තේභූයාදිති වෛ ප්රභෝ ।
ස ත්වං කේසරිණඃ පුත්රඃ ක්ෂේත්රජෝ භීමවික්රමඃ ॥ 29 ॥
මාරුතස්යෞරසඃ පුත්රස්තේජසා චාපි තත්සමඃ ।
ත්වං හි වායුසුතෝ වත්ස ප්ලවනේ චාපි තත්සමඃ ॥ 30 ॥
වයමද්ය ගතප්රාණා භවාන්නස්ත්රාතු සාංප්රතම් ।
දාක්ෂ්යවික්රමසංපන්නඃ කපිරාජ ඉවාපරඃ ॥ 31 ॥
ත්රිවික්රමේ මයා තාත සශෛලවනකානනා ।
ත්රිස්සප්තකෘත්වඃ පෘථිවී පරික්රාංතා ප්රදක්ෂිණම් ॥ 32 ॥
තථා චෞෂධයෝऽස්මාභිස්සංචිතා දේවශාසනාත් ।
නිෂ්පන්නමමෘතං යාභිස්තදාසීන්නෝ මහද්බලම් ॥ 33 ॥
ස ඉදානීමහං වෘද්ධඃ පරිහීනපරාක්රමඃ ।
සාංප්රතං කාලමස්මාකං භවාන්සර්වගුණාන්විතඃ ॥ 34 ॥
තද්විජෘංභස්ව වික්රාංතඃ ප්ලවතාමුත්තමෝ හ්යසි ।
ත්වද්වීර්යං ද්රෂ්ටුකාමා හි සර්වා වානරවාහිනී ॥ 35 ॥
උත්තිෂ්ඨ හරිශාර්දූල ලංඝයස්ව මහාර්ණවම් ।
පරා හි සර්වභූතානාං හනුමන්යා ගතිස්තව ॥ 36 ॥
විෂණ්ණා හරයස්සර්වේ හනුමන්කිමුපේක්ෂසේ ।
වික්රමස්ව මහාවේගෝ විෂ්ණුස්ත්රීන්වික්රමානිව ॥ 37 ॥
තතස්තු වෛ ජාංබවතා ප්රචෝදිතඃ ප්රතීතවේගඃ පවනාත්මජඃ කපිඃ ।
ප්රහර්ෂයංස්තාං හරිවීරවාහිනීං චකාර රූපං මහදාත්මනස්තදා ॥ 38 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ෂට්ෂෂ්ටිතමස්සර්ගඃ ॥
