śrīmadvālmīkīya rāmāyaṇē kiṣkindhākāṇḍam ।
atha ṣaṭṣaṣṭitamassargaḥ ।
anēkaśatasāhasrīṃ viṣaṇṇāṃ harivāhinīm ।
jāmbavānsamudīkṣyaivaṃ hanūmantamathābravīt ॥ 1 ॥
vīra vānaralōkasya sarvaśāstravidāṃ vara ।
tūṣṇīmēkāntamāśritya hanūmankiṃ na jalpasi ॥ 2 ॥
hanūmanharirājasya sugrīvasya samō hyasi ।
rāmalakṣmaṇayōśchāpi tējasā cha balēna cha ॥ 3 ॥
ariṣṭanēminaḥ putrō vainatēyō mahābalaḥ ।
garutmāniti vikhyāta uttamassarvapakṣiṇām ॥ 4 ॥
bahuśō hi mayā dṛṣṭaḥ sāgarē sa mahābalaḥ ।
bhujaṅgānuddharanpakṣī mahāvēgō mahāyaśāḥ ॥ 5 ॥
pakṣayōryadbalaṃ tasya tāvadbhujabalaṃ tava ।
vikramaśchāpi vēgaścha na tē tēnāvahīyatē ॥ 6 ॥
balaṃ buddhiścha tējaścha sattvaṃ cha haripuṅgava ।
viśiṣṭaṃ sarvabhūtēṣu kimātmānaṃ na budhyasē ॥ 7 ॥
apsarāpsarasāṃ śrēṣṭhā vikhyātā puñjikasthalā ।
añjanēti parikhyātā patnī kēsariṇō harēḥ ॥ 8 ॥
vikhyātā triṣu lōkēṣu rūpēṇāpratimā bhuvi ।
abhiśāpādabhūttāta vānarī kāmarūpiṇī ॥ 9 ॥
duhitā vānarēndrasya kuñjarasya mahātmanaḥ ।
mānuṣaṃ vigrahaṃ kṛtvā rūpayauvanaśālinī ॥ 10 ॥
vichitramālyābharaṇā mahārhakṣaumavāsinī ।
acharatparvatasyāgrē prāvṛḍambudasannibhē ॥ 11 ॥
tasyā vastraṃ viśālākṣyāḥ pītaṃ raktadaśaṃ śubham ।
sthitāyāḥ parvatasyāgrē mārutō'paharachChanaiḥ ॥ 12 ॥
sa dadarśa tatastasyā vṛttāvūrū susaṃhatau ।
stanau cha pīnau sahitau sujātaṃ chāru chānanam ॥ 13 ॥
tāṃ viśālāyataśrōṇīṃ tanumadhyāṃ yaśasvinīm ।
dṛṣṭavaiva śubhasarvāṅgīṃ pavanaḥ kāmamōhitaḥ ॥ 14 ॥
sa tāṃ bhujābhyāṃ dīrghābhyāṃ paryaṣvajata mārutaḥ ।
manmathāviṣṭasarvāṅgō gatātmā tāmaninditām ॥ 15 ॥
sā tu tatraiva sambhrāntā suvratā vākyamabravīt ।
ēkapatnīvratamidaṃ kō nāśayitumichChati ॥ 16 ॥
añjanāyā vachśutvā mārutaḥ pratyabhāṣata ।
na tvāṃ hiṃsāmi suśrōṇi mā bhūttē subhagē bhayam ॥ 17 ॥
manasā'smi gatō yattvāṃ pariṣvajya yaśasvinīm ।
vīryavānbuddhisampannaḥ putrastava bhaviṣyati ॥ 18 ॥
mahāsattvō mahātējā mahābalaparākramaḥ ।
laṅghanē plavanē chaiva bhaviṣyati hi matsamaḥ ॥ 19 ॥
ēvamuktā tatastuṣṭā jananī tē mahākapē ।
guhāyāṃ tvāṃ mahābāhō prajajñē plavagarṣabham ॥ 20 ॥
abhyutthitaṃ tatassūryaṃ bālō dṛṣṭvā mahāvanē ।
phalaṃ chēti jighṛkṣustvamutplutyābhyudgatō divam ॥ 21 ॥
śatāni trīṇi gatvā'tha yōjanānāṃ mahākapē ।
tējasā tasya nirdhūtō na viṣādaṃ tatōgataḥ ॥ 22 ॥
tāvadāpapata stūrṇamantarikṣaṃ mahākapē ।
kṣiptamindrēṇa tē vajraṃ kōpāviṣṭēna dhīmatā ॥ 23 ॥
tadā śailāgraśikharē vāmō hanurabhajyata ।
tatō hi nāmadhēyaṃ tē hanumāniti kīrtyatē ॥ 24 ॥
tastvāvi nihataṃ dṛṣṭvā vāyurgandhavahassvayam ।
trailōkyē bhṛśasaṅkṛddhō na vavau vai prabhañjanaḥ ॥ 25 ॥
sambhrāntāścha sūrāssarvē trailōkyē kṣubhitē sati ।
prasādayanti saṅkruddhaṃ mārutaṃ bhuvanēśvarāḥ ॥ 26 ॥
prasāditē cha pavanē brahmā tubhyaṃ varaṃ dadau ।
aśastravadhyatāṃ tāta samarē satyavikrama ॥ 27 ॥
vajrasya cha nipātēna virujaṃ tvāṃ samīkṣya cha ।
sahasranētraḥ prītātmā dadau tē varamuttamam ॥ 28 ॥
svachChandataścha maraṇaṃ tēbhūyāditi vai prabhō ।
sa tvaṃ kēsariṇaḥ putraḥ kṣētrajō bhīmavikramaḥ ॥ 29 ॥
mārutasyaurasaḥ putrastējasā chāpi tatsamaḥ ।
tvaṃ hi vāyusutō vatsa plavanē chāpi tatsamaḥ ॥ 30 ॥
vayamadya gataprāṇā bhavānnastrātu sāmpratam ।
dākṣyavikramasampannaḥ kapirāja ivāparaḥ ॥ 31 ॥
trivikramē mayā tāta saśailavanakānanā ।
trissaptakṛtvaḥ pṛthivī parikrāntā pradakṣiṇam ॥ 32 ॥
tathā chauṣadhayō'smābhissañchitā dēvaśāsanāt ।
niṣpannamamṛtaṃ yābhistadāsīnnō mahadbalam ॥ 33 ॥
sa idānīmahaṃ vṛddhaḥ parihīnaparākramaḥ ।
sāmprataṃ kālamasmākaṃ bhavānsarvaguṇānvitaḥ ॥ 34 ॥
tadvijṛmbhasva vikrāntaḥ plavatāmuttamō hyasi ।
tvadvīryaṃ draṣṭukāmā hi sarvā vānaravāhinī ॥ 35 ॥
uttiṣṭha hariśārdūla laṅghayasva mahārṇavam ।
parā hi sarvabhūtānāṃ hanumanyā gatistava ॥ 36 ॥
viṣaṇṇā harayassarvē hanumankimupēkṣasē ।
vikramasva mahāvēgō viṣṇustrīnvikramāniva ॥ 37 ॥
tatastu vai jāmbavatā prachōditaḥ pratītavēgaḥ pavanātmajaḥ kapiḥ ।
praharṣayaṃstāṃ harivīravāhinīṃ chakāra rūpaṃ mahadātmanastadā ॥ 38 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē ṣaṭṣaṣṭitamassargaḥ ॥
