శ్రీమద్వాల్మీకీయ రామాయణే కిష్కింధాకాండమ్ ।
అథ షట్షష్టితమస్సర్గః ।
అనేకశతసాహస్రీం విషణ్ణాం హరివాహినీమ్ ।
జాంబవాన్సముదీక్ష్యైవం హనూమంతమథాబ్రవీత్ ॥ 1 ॥
వీర వానరలోకస్య సర్వశాస్త్రవిదాం వర ।
తూష్ణీమేకాంతమాశ్రిత్య హనూమన్కిం న జల్పసి ॥ 2 ॥
హనూమన్హరిరాజస్య సుగ్రీవస్య సమో హ్యసి ।
రామలక్ష్మణయోశ్చాపి తేజసా చ బలేన చ ॥ 3 ॥
అరిష్టనేమినః పుత్రో వైనతేయో మహాబలః ।
గరుత్మానితి విఖ్యాత ఉత్తమస్సర్వపక్షిణామ్ ॥ 4 ॥
బహుశో హి మయా దృష్టః సాగరే స మహాబలః ।
భుజంగానుద్ధరన్పక్షీ మహావేగో మహాయశాః ॥ 5 ॥
పక్షయోర్యద్బలం తస్య తావద్భుజబలం తవ ।
విక్రమశ్చాపి వేగశ్చ న తే తేనావహీయతే ॥ 6 ॥
బలం బుద్ధిశ్చ తేజశ్చ సత్త్వం చ హరిపుంగవ ।
విశిష్టం సర్వభూతేషు కిమాత్మానం న బుధ్యసే ॥ 7 ॥
అప్సరాప్సరసాం శ్రేష్ఠా విఖ్యాతా పుంజికస్థలా ।
అంజనేతి పరిఖ్యాతా పత్నీ కేసరిణో హరేః ॥ 8 ॥
విఖ్యాతా త్రిషు లోకేషు రూపేణాప్రతిమా భువి ।
అభిశాపాదభూత్తాత వానరీ కామరూపిణీ ॥ 9 ॥
దుహితా వానరేంద్రస్య కుంజరస్య మహాత్మనః ।
మానుషం విగ్రహం కృత్వా రూపయౌవనశాలినీ ॥ 10 ॥
విచిత్రమాల్యాభరణా మహార్హక్షౌమవాసినీ ।
అచరత్పర్వతస్యాగ్రే ప్రావృడంబుదసన్నిభే ॥ 11 ॥
తస్యా వస్త్రం విశాలాక్ష్యాః పీతం రక్తదశం శుభమ్ ।
స్థితాయాః పర్వతస్యాగ్రే మారుతోఽపహరచ్ఛనైః ॥ 12 ॥
స దదర్శ తతస్తస్యా వృత్తావూరూ సుసంహతౌ ।
స్తనౌ చ పీనౌ సహితౌ సుజాతం చారు చాననమ్ ॥ 13 ॥
తాం విశాలాయతశ్రోణీం తనుమధ్యాం యశస్వినీమ్ ।
దృష్టవైవ శుభసర్వాంగీం పవనః కామమోహితః ॥ 14 ॥
స తాం భుజాభ్యాం దీర్ఘాభ్యాం పర్యష్వజత మారుతః ।
మన్మథావిష్టసర్వాంగో గతాత్మా తామనిందితామ్ ॥ 15 ॥
సా తు తత్రైవ సంభ్రాంతా సువ్రతా వాక్యమబ్రవీత్ ।
ఏకపత్నీవ్రతమిదం కో నాశయితుమిచ్ఛతి ॥ 16 ॥
అంజనాయా వచ్శుత్వా మారుతః ప్రత్యభాషత ।
న త్వాం హింసామి సుశ్రోణి మా భూత్తే సుభగే భయమ్ ॥ 17 ॥
మనసాఽస్మి గతో యత్త్వాం పరిష్వజ్య యశస్వినీమ్ ।
వీర్యవాన్బుద్ధిసంపన్నః పుత్రస్తవ భవిష్యతి ॥ 18 ॥
మహాసత్త్వో మహాతేజా మహాబలపరాక్రమః ।
లంఘనే ప్లవనే చైవ భవిష్యతి హి మత్సమః ॥ 19 ॥
ఏవముక్తా తతస్తుష్టా జననీ తే మహాకపే ।
గుహాయాం త్వాం మహాబాహో ప్రజజ్ఞే ప్లవగర్షభమ్ ॥ 20 ॥
అభ్యుత్థితం తతస్సూర్యం బాలో దృష్ట్వా మహావనే ।
ఫలం చేతి జిఘృక్షుస్త్వముత్ప్లుత్యాభ్యుద్గతో దివమ్ ॥ 21 ॥
శతాని త్రీణి గత్వాఽథ యోజనానాం మహాకపే ।
తేజసా తస్య నిర్ధూతో న విషాదం తతోగతః ॥ 22 ॥
తావదాపపత స్తూర్ణమంతరిక్షం మహాకపే ।
క్షిప్తమింద్రేణ తే వజ్రం కోపావిష్టేన ధీమతా ॥ 23 ॥
తదా శైలాగ్రశిఖరే వామో హనురభజ్యత ।
తతో హి నామధేయం తే హనుమానితి కీర్త్యతే ॥ 24 ॥
తస్త్వావి నిహతం దృష్ట్వా వాయుర్గంధవహస్స్వయమ్ ।
త్రైలోక్యే భృశసంకృద్ధో న వవౌ వై ప్రభంజనః ॥ 25 ॥
సంభ్రాంతాశ్చ సూరాస్సర్వే త్రైలోక్యే క్షుభితే సతి ।
ప్రసాదయంతి సంక్రుద్ధం మారుతం భువనేశ్వరాః ॥ 26 ॥
ప్రసాదితే చ పవనే బ్రహ్మా తుభ్యం వరం దదౌ ।
అశస్త్రవధ్యతాం తాత సమరే సత్యవిక్రమ ॥ 27 ॥
వజ్రస్య చ నిపాతేన విరుజం త్వాం సమీక్ష్య చ ।
సహస్రనేత్రః ప్రీతాత్మా దదౌ తే వరముత్తమమ్ ॥ 28 ॥
స్వచ్ఛందతశ్చ మరణం తేభూయాదితి వై ప్రభో ।
స త్వం కేసరిణః పుత్రః క్షేత్రజో భీమవిక్రమః ॥ 29 ॥
మారుతస్యౌరసః పుత్రస్తేజసా చాపి తత్సమః ।
త్వం హి వాయుసుతో వత్స ప్లవనే చాపి తత్సమః ॥ 30 ॥
వయమద్య గతప్రాణా భవాన్నస్త్రాతు సాంప్రతమ్ ।
దాక్ష్యవిక్రమసంపన్నః కపిరాజ ఇవాపరః ॥ 31 ॥
త్రివిక్రమే మయా తాత సశైలవనకాననా ।
త్రిస్సప్తకృత్వః పృథివీ పరిక్రాంతా ప్రదక్షిణమ్ ॥ 32 ॥
తథా చౌషధయోఽస్మాభిస్సంచితా దేవశాసనాత్ ।
నిష్పన్నమమృతం యాభిస్తదాసీన్నో మహద్బలమ్ ॥ 33 ॥
స ఇదానీమహం వృద్ధః పరిహీనపరాక్రమః ।
సాంప్రతం కాలమస్మాకం భవాన్సర్వగుణాన్వితః ॥ 34 ॥
తద్విజృంభస్వ విక్రాంతః ప్లవతాముత్తమో హ్యసి ।
త్వద్వీర్యం ద్రష్టుకామా హి సర్వా వానరవాహినీ ॥ 35 ॥
ఉత్తిష్ఠ హరిశార్దూల లంఘయస్వ మహార్ణవమ్ ।
పరా హి సర్వభూతానాం హనుమన్యా గతిస్తవ ॥ 36 ॥
విషణ్ణా హరయస్సర్వే హనుమన్కిముపేక్షసే ।
విక్రమస్వ మహావేగో విష్ణుస్త్రీన్విక్రమానివ ॥ 37 ॥
తతస్తు వై జాంబవతా ప్రచోదితః ప్రతీతవేగః పవనాత్మజః కపిః ।
ప్రహర్షయంస్తాం హరివీరవాహినీం చకార రూపం మహదాత్మనస్తదా ॥ 38 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కింధాకాండే షట్షష్టితమస్సర్గః ॥
