ශ්රීමද්වාල්මීකීය රාමායණේ කිෂ්කිංධාකාංඩම් ।
අථ අෂ්ටමස්සර්ගඃ ।
පරිතුෂ්ටස්තු සුග්රීවස්තේන වාක්යේන වානරඃ ।
ලක්ෂ්මණස්යාග්රතෝ රාමමිදං වචනමබ්රවීත් ॥ 1 ॥
සර්වථාऽහමනුග්රාහ්යෝ දේවතානාං න සංශයඃ ।
උපපන්න ගුණෝපේතස්සඛා යස්ය භවාන්මම ॥ 2 ॥
ශක්යං ඛලු භවේද්රාම සහායේන ත්වයාऽනඝ ।
සුරරාජ්යමපි ප්රාප්තුං ස්වරාජ්යං කිං පනඃ ප්රභෝ ॥ 3 ॥
සෝऽහං සභාජ්යෝ බංධූනාං සුහෘදාං චෛව රාඝව ।
යස්යාග්නිසාක්ෂිකං මිත්රං ලබ්ධං රාඝවවංශජම් ॥ 4 ॥
අහමප්යනුරූපස්තේ වයස්යෝ ජ්ඤාස්යසේ ශනෛඃ ।
න තු වක්තුං සමර්ථෝऽහං ස්වයමාත්මගතාන්ගුණාන් ॥ 5 ॥
මහාත්මනාං තු භූයිෂ්ඨං ත්වද්විධානාං කෘතාත්මනාම් ।
නිශ්චලා භවති ප්රීතිර්ධෛර්යමාත්මවතාමිව ॥ 6 ॥
රජතං වා සුවර්ණං වා වස්ත්රාණ්යාභරණානි ච ।
අවිභක්තානි සාධූනාමවගච්ඡංති සාධවඃ ॥ 7 ॥
ආඪ්යෝ වාපි දරිද්රෝ වා දුඃඛිතස්සුඛිතෝऽපි වා ।
නිර්දෝෂෝ වා සදෝෂෝ වා වයස්යඃ පරමා ගතිඃ ॥ 8 ॥
ධනත්යාගස්සුඛත්යාගෝ දේහත්යාගෝऽපි වා පුනඃ ।
වයස්යාර්ථේ ප්රවර්තංතේ ස්නේහං දෘෂ්ටවා තථාවිධම් ॥ 9 ॥
තත්තථේත්යබ්රවීද්රාමස්සුග්රීවං ප්රියවාදිනම් ।
ලක්ෂ්මණස්යාග්රතෝ ලක්ෂ්ම්යා වාසවස්යේව ධීමතඃ ॥ 10 ॥
තතෝ රාමං ස්ථිතං දෘෂ්ට්වා ලක්ෂ්මණං ච මහාබලම් ।
සුග්රීවස්සර්වතශ්චක්ෂුර්වනේ ලෝලමපාතයත් ॥ 11 ॥
ස දදර්ශ තතස්සාලමවිදූරේ හරීශ්වරඃ ।
සුපුෂ්පමීෂත්පත්රාඪ්යං භ්රමරෛරුපශෝභිතම් ॥ 12 ॥
තස්යෛකාං පර්ණබහුලාං භංක්ත්වා ශාඛාං සුපුෂ්පිතාම් ।
සාලස්යාස්තීර්ය සුග්රීවෝ නිෂසාද සරාඝවඃ ॥ 13 ॥
තාවාසීනෞ තතෝ දෘෂ්ට්වා හනූමානපි ලක්ෂ්මණම් ।
සාලශාඛාං සමුත්පාට්ය විනීතමුපවේශයත් ॥ 14 ॥
සුඛෝපවිෂ්ටං රාමං තු ප්රසන්නමුදධිං යථා ।
ඵලපුෂ්පසමාකීර්ණේ තස්මින් ගිරිවරෝත්තමේ ॥ 15 ॥
තතඃ ප්රහෘෂ්ටස්සුග්රීවශ්ලක්ෂ්ණං මධුරයා ගිරා ।
උවාච ප්රණයාද්රාමං හර්ෂව්යාකුලිතාක්ෂරම් ॥ 16 ॥
අහං විනිකෘතෝ භ්රාත්රා චරාම්යේෂ භයාර්දිතඃ ।
ඍෂ්යමූකං ගිරිවරං හෘතභාර්යස්සුදුඃඛිතඃ ॥ 17 ॥
සෝऽහං ත්රස්තෝ භයේ මග්නෝ වසාම්යුද්භ්රාංතචේතනඃ ।
වාලිනා නිකෘතෝ භ්රාත්රා කෘතවෛරශ්ච රාඝව ॥ 18 ॥
වාලිනෝ මේ භයාර්තස්ය සර්වලෝකාභයංකර ।
මමාපි ත්වමනාථස්ය ප්රසාදං කර්තුමර්හසි ॥ 19 ॥
ඒවමුක්තස්තු තේජස්වී ධර්මජ්ඤෝ ධර්මවත්සලඃ ।
ප්රත්යුවාච ස කාකුත්ස්ථස්සුග්රීවං ප්රහසන්නිව ॥ 20 ॥
උපකාරඵලං මිත්රමපකාරෝऽරිලක්ෂණම් ।
අද්යෛව තං හනිෂ්යාමි තව භාර්යාපහාරිණම් ॥ 21 ॥
ඉමේ හි මේ මහාවේගා පත්රිණස්තිග්මතේජසඃ ।
කාර්තිකේයවනෝද්භූතාශ්ශරා හේමවිභූෂිතාඃ ॥ 22 ॥
කංකපත්රපරිච්ඡන්නා මහේංද්රාශනිසන්නිභාඃ ।
සුපර්වාණස්සුතීක්ෂ්ණාග්රාස්සරෝෂා භුජගා ඉව ॥ 23 ॥
භ්රාතෘසංජ්ඤමමිත්රං තේ වාලිනං කෘතකිල්බිෂම් ।
ශරෛර්විනිහතං පශ්ය විකීර්ණමිව පර්වතම් ॥ 24 ॥
රාඝවස්ය වචශ්ශ්රුත්වා සුග්රීවෝ වාහිනීපතිඃ ।
ප්රහර්ෂමතුලං ලේභේ සාධු සාධ්විති චාබ්රවීත් ॥ 25 ॥
රාම ශෝකාභිභූතෝऽහං ශෝකාර්තානාං භවාන්ගතිඃ ।
වයස්ය ඉති කෘත්වා හි ත්වය්යහං පරිදේවයේ ॥ 26 ॥
ත්වං හි පාණිප්රදානේන වයස්යෝ මේऽග්නිසාක්ෂිකම් ।
කෘතඃ ප්රාණෛර්බහුමතස්සත්යේනාපි ශපාමි තේ ॥ 27 ॥
වයස්ය ඉති කෘත්වා ච විස්රබ්ධඃ ප්රවදාම්යහම් ।
දුඃඛමංතර්ගතං යන්මේ මනෝ හරති නිත්යශඃ ॥ 28 ॥
ඒතාවදුක්ත්වා වචනං බාෂ්පදූෂිතලෝචනඃ ।
බාෂ්පෝපහතයා වාචා නෝච්චෛශ්ශක්නෝති භාෂිතුම් ॥ 29 ॥
බාෂ්පවේගං තු සහසා නදීවේගමිවාගතම් ।
ධාරයාමාස ධෛර්යේණ සුග්රීවෝ රාමසන්නිධෞ ॥ 30 ॥
සන්නිගෘහ්ය තු තං බාෂ්පං ප්රමෘජ්ය නයනේ ශුභේ ।
විනිශ්ශ්වස්ය ච තේජස්වී රාඝවං වාක්යමබ්රවීත් ॥ 31 ॥
පුරාऽහං වාලිනා රාම රාජ්යාත්ස්වාදවරෝපිතඃ ।
පරුෂාණි ච සංශ්රාව්ය නිර්ධූතෝऽස්මි බලීයසා ॥ 32 ॥
හෘතා භාර්යා ච මේ තේන ප්රාණේභ්යෝऽපි ගරීයසී ।
සුහෘදශ්ච මදීයා යේ සංයතා බංධනේෂු තේ ॥ 33 ॥
යත්නවාංශ්ච සුදුෂ්ටාත්මා මද්විනාශාය රාඝව ।
බහුශස්තත්ප්රයුක්තාශ්ච වානරා නිහතා මයා ॥ 34 ॥
ශංකයා ත්වේතයා චේහ දෘෂ්ට්වා ත්වාමපි රාඝව ।
නෝපසර්පාම්යහං භීතෝ භයේ සර්වේ හි බිභ්යති ॥ 35 ॥
කේවලං හි සහායා මේ හනුමත්ප්රමුඛාස්ත්විමේ ।
අතෝऽහං ධාරයාම්යද්ය ප්රාණාන් කෘච්ඡ්රගතෝऽපි සන් ॥ 36 ॥
ඒතේ හි කපයස්ස්නිග්ධා මාං රක්ෂංති සමංතතඃ ।
සහ ගච්ඡංති ගංතව්යේ නිත්යං තිෂ්ඨංති ච ස්ථිතේ ॥ 37 ॥
සංක්ෂේපස්ත්වේෂ මේ රාම කිමුක්ත්වා විස්තරං හි තේ ।
ස මේ ජ්යේෂ්ඨෝ රිපුර්භ්රාතා වාලී විශ්රුතපෞරුෂඃ ॥ 38 ॥
තද්විනාශාද්ධි මේ දුඃඛං ප්රණෂ්ටං ස්යාදනංතරම් ।
සුඛං මේ ජීවිතං චෛව තද්විනාශනිබංධනම් ॥ 39 ॥
ඒෂ මේ රාම ශෝකාංතශ්ශෝකාර්තේන නිවේදිතඃ ।
දුඃඛිතස්සුඛිතෝ වාපි සඛ්යුර්නිත්යං සඛා ගතිඃ ॥ 40 ॥
ශ්රුත්වෛතද්වචනං රාමස්සුග්රීවමිදමබ්රවීත් ।
කිං නිමිත්තමභූද්වෛරං ශ්රෝතුමිච්ඡාමි තත්ත්වතඃ ॥ 41 ॥
සුඛං හි කාරණං ශ්රුත්වා වෛරස්ය තව වානර ।
අනංතරං විධාස්යාමි සංප්රධාර්ය බලාබලම් ॥ 42 ॥
බලවාන් හි මමාමර්ෂශ්ශ්රුත්වා ත්වාමවමානිතම් ।
වර්තතේ හෘදයෝත්කංපී ප්රාවෘඩ්වේග ඉවාංභසඃ ॥ 43 ॥
හෘෂ්ටඃ කථය විස්රබ්ධෝ යාවදාරෝප්යතේ ධනුඃ ।
සෘෂ්ටශ්ච හි මයා බාණෝ නිරස්තශ්ච රිපුස්තව ॥ 44 ॥
ඒවමුක්තස්තු සුග්රීවඃ කාකුත්ස්ථේන මහාත්මනා ।
ප්රහර්ෂමතුලං ලේභේ චතුර්භිස්සහ වානරෛඃ ॥ 45 ॥
තතඃ ප්රහෘෂ්ටවදනස්සුග්රීවෝ ලක්ෂ්මණාග්රජේ ।
වෛරස්ය කාරණං තත්ත්වමාඛ්යාතුමුපචක්රමේ ॥ 46 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ අෂ්ටමස්සර්ගඃ ॥
