ශ්රීමද්වාල්මීකීය රාමායණේ කිෂ්කිංධාකාංඩම් ।
අථ නවමස්සර්ගඃ ।
වාලී නාම මම භ්රාතා ජ්යේෂ්ඨශ්ශත්රුනිෂූදනඃ ।
පිතුර්බහුමතෝ නිත්යං මමාපි ච තථා පුරා ॥ 1 ॥
පිතර්යුපරතේऽස්මාකං ජ්යේෂ්ඨෝऽයමිති මංත්රිභිඃ ।
කපීනාමීශ්වරෝ රාජ්යේ කෘතඃ පරමසම්මතඃ ॥ 2 ॥
රාජ්යං ප්රශාසතස්තස්ය පිතෘපෛතාමහං මහත් ।
අහං සර්වේෂු කාලේෂු ප්රණතඃ ප්රේෂ්යවත් ස්ථිතඃ ॥ 3 ॥
මායාවී නාම තේජස්වී පූර්වජෝ දුංදුභේඃ සුතඃ ।
තේන තස්ය මහද්වෛරං ස්ත්රීකෘතං විශ්ශ්රුතං පුරා ॥ 4 ॥
ස තු සුප්තජනේ රාත්රෞ කිෂ්කිංධාද්වාරමාගතඃ ।
නර්දති ස්ම සුසංරබ්ධෝ වාලිනං චාහ්වයද්රණේ ॥ 5 ॥
ප්රසුප්තස්තු මම භ්රාතා නර්දිතං භෛරවස්වනම් ।
ශ්රුත්වා න මමෘෂේ වාලී නිෂ්පපාත ජවාත්තදා ॥ 6 ॥
ස තු වෛ නිස්සෘතඃ ක්රෝධාත්තං හංතුමසුරෝත්තමම් ।
වාර්යමාණස්තත ස්ත්රීභිර්මයා ච ප්රණතාත්මනා ॥ 7 ॥
ස තු නිර්ධූය තාඃ සර්වා නිර්ජගාම මහාබලඃ ।
තතෝऽහමපි සෞහාර්දාන්නිස්සෘතෝ වාලිනා සහ ॥ 8 ॥
ස තු මේ භ්රාතරං දෘෂ්ට්වා මාං ච දූරාදවස්ථිතම් ।
අසුරෝ ජාතසංත්රාසඃ ප්රදුද්රාව තතෝ භෘශම් ॥ 9 ॥
තස්මින් ද්රවති සංත්රස්තේ හ්යාවාං ද්රුතතරං ගතෞ ।
ප්රකාශශ්ච කෘතෝ මාර්ගශ්චංද්රේණෝද්ගච්ඡතා තදා ॥ 10 ॥
ස තෘණෛරාවෘතං දුර්ගං ධරණ්යා විවරං මහත් ।
ප්රවිවේශාසුරෝ වේගාදාවාමාසාද්ය විෂ්ඨිතෞ ॥ 11 ॥
තං ප්රවිෂ්ටං රිපුං දෘෂ්ට්වා බිලං රෝෂවශං ගතඃ ।
මාමුවාච තදා වාලී වචනං ක්ෂුභිතේංද්රියඃ ॥ 12 ॥
ඉහ ත්වං තිෂ්ඨ සුග්රීව බිලද්වාරි සමාහිතඃ ।
යාවත්තත්ර ප්රවිශ්යාහං නිහන්මි සහසා රිපුම් ॥ 13 ॥
මයා ත්වේතද්වචශ්ශ්රුත්වා යාචිතස්ස පරංතපඃ ।
ශාපයිත්වා තු මාං පද්භ්යාං ප්රවිවේශ බිලං මහත් ॥ 14 ॥
තස්ය ප්රවිෂ්ටස්ය බිලං සාග්රස්සංවත්සරෝ ගතඃ ।
ස්ථිතස්ය මම බිලද්වාරි ස කාලෝ ව්යත්යවර්තත ॥ 15 ॥
අහං තු නෂ්ටං ජ්ඤාත්වා තං ස්නේහාදාගතසංභ්රමඃ ।
භ්රාතරං න ච පශ්යාමි පාපාශංකි ච මේ මනඃ ॥ 16 ॥
අථ දීර්ඝස්ය කාලස්ය බිලාත්තස්මාද්විනිස්සෘතම් ।
සඵේනං රුධිරං රක්තමහං දෘෂ්ට්වා සුදුඃඛිතඃ ॥ 17 ॥
නර්දතාමසුරාණාං ච ධ්වනිර්මේ ශ්රෝත්රමාගතඃ ।
නිරස්තස්ය ච සංග්රාමේ ක්රෝශතෝනිස්ස්වනෝ ගුරෝඃ ॥ 18 ॥
අහං ත්වවගතෝ බුද්ධ්යා චිහ්නෛස්තෛර්භ්රාතරං හතම් ।
පිධාය ච බිලද්වාරං ශිලයා ගිරිමාත්රයා ॥ 19 ॥
ශෝකාර්තශ්චෝදකං කෘත්වා කිෂ්කිංධාමාගතස්සඛේ ।
ගූහමානස්ය මේ තත්ත්වං යත්නතෝ මංත්රිභිශ්ශ්රුතම් ॥ 20 ॥
තතෝऽහං තෛස්සමාගම්ය සම්මතෛරභිෂේචිතඃ ।
රාජ්යං ප්රශාසතස්තස්ය න්යායතෝ මම රාඝව ॥ 21 ॥
ආජගාම රිපුං හත්වා වාලී තමසුරෝත්තමම් ।
අභිෂික්තං තු මාං දෘෂ්ට්වා වාලී සංරක්තලෝචනඃ ।
මදීයාන්මංත්රිණෝ බද්ධ්වා පරුෂං වාක්යමබ්රවීත් ॥ 22 ॥
නිග්රහේऽපි සමර්ථස්ය තං පාපං ප්රති රාඝව ।
න ප්රාවර්තත මේ බුද්ධිර්භ්රාතුර්ගෞරවයංත්රිතා ॥ 23 ॥
හත්වා ශත්රුං ස මේ භ්රාතා ප්රවිවේශ පුරං තදා ॥ 24 ॥
මානයංස්තං මහාත්මානං යථාවච්චාභ්යවාදයම් ।
උක්තාශ්ච නාශිෂස්තේන සංතුෂ්ටේනාංතරාත්මනා ॥ 25 ॥
නත්වා පාදාවහං තස්ය මකුටේනාස්පෘශං ප්රභෝ අපි වාලී මම ක්රෝධාන්න ප්රසාදං චකාර සඃ ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ නවමස්සර්ගඃ ॥
