ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ନଵମସ୍ସର୍ଗଃ ।
ଵାଲୀ ନାମ ମମ ଭ୍ରାତା ଜ୍ୟେଷ୍ଠଶ୍ଶତ୍ରୁନିଷୂଦନଃ ।
ପିତୁର୍ବହୁମତୋ ନିତ୍ୟଂ ମମାପି ଚ ତଥା ପୁରା ॥ 1 ॥
ପିତର୍ୟୁପରତେଽସ୍ମାକଂ ଜ୍ୟେଷ୍ଠୋଽୟମିତି ମଂତ୍ରିଭିଃ ।
କପୀନାମୀଶ୍ଵରୋ ରାଜ୍ୟେ କୃତଃ ପରମସମ୍ମତଃ ॥ 2 ॥
ରାଜ୍ୟଂ ପ୍ରଶାସତସ୍ତସ୍ୟ ପିତୃପୈତାମହଂ ମହତ୍ ।
ଅହଂ ସର୍ଵେଷୁ କାଲେଷୁ ପ୍ରଣତଃ ପ୍ରେଷ୍ୟଵତ୍ ସ୍ଥିତଃ ॥ 3 ॥
ମାୟାଵୀ ନାମ ତେଜସ୍ଵୀ ପୂର୍ଵଜୋ ଦୁଂଦୁଭେଃ ସୁତଃ ।
ତେନ ତସ୍ୟ ମହଦ୍ଵୈରଂ ସ୍ତ୍ରୀକୃତଂ ଵିଶ୍ଶ୍ରୁତଂ ପୁରା ॥ 4 ॥
ସ ତୁ ସୁପ୍ତଜନେ ରାତ୍ରୌ କିଷ୍କିଂଧାଦ୍ଵାରମାଗତଃ ।
ନର୍ଦତି ସ୍ମ ସୁସଂରବ୍ଧୋ ଵାଲିନଂ ଚାହ୍ଵୟଦ୍ରଣେ ॥ 5 ॥
ପ୍ରସୁପ୍ତସ୍ତୁ ମମ ଭ୍ରାତା ନର୍ଦିତଂ ଭୈରଵସ୍ଵନମ୍ ।
ଶ୍ରୁତ୍ଵା ନ ମମୃଷେ ଵାଲୀ ନିଷ୍ପପାତ ଜଵାତ୍ତଦା ॥ 6 ॥
ସ ତୁ ଵୈ ନିସ୍ସୃତଃ କ୍ରୋଧାତ୍ତଂ ହଂତୁମସୁରୋତ୍ତମମ୍ ।
ଵାର୍ୟମାଣସ୍ତତ ସ୍ତ୍ରୀଭିର୍ମୟା ଚ ପ୍ରଣତାତ୍ମନା ॥ 7 ॥
ସ ତୁ ନିର୍ଧୂୟ ତାଃ ସର୍ଵା ନିର୍ଜଗାମ ମହାବଲଃ ।
ତତୋଽହମପି ସୌହାର୍ଦାନ୍ନିସ୍ସୃତୋ ଵାଲିନା ସହ ॥ 8 ॥
ସ ତୁ ମେ ଭ୍ରାତରଂ ଦୃଷ୍ଟ୍ଵା ମାଂ ଚ ଦୂରାଦଵସ୍ଥିତମ୍ ।
ଅସୁରୋ ଜାତସଂତ୍ରାସଃ ପ୍ରଦୁଦ୍ରାଵ ତତୋ ଭୃଶମ୍ ॥ 9 ॥
ତସ୍ମିନ୍ ଦ୍ରଵତି ସଂତ୍ରସ୍ତେ ହ୍ୟାଵାଂ ଦ୍ରୁତତରଂ ଗତୌ ।
ପ୍ରକାଶଶ୍ଚ କୃତୋ ମାର୍ଗଶ୍ଚଂଦ୍ରେଣୋଦ୍ଗଚ୍ଛତା ତଦା ॥ 10 ॥
ସ ତୃଣୈରାଵୃତଂ ଦୁର୍ଗଂ ଧରଣ୍ୟା ଵିଵରଂ ମହତ୍ ।
ପ୍ରଵିଵେଶାସୁରୋ ଵେଗାଦାଵାମାସାଦ୍ୟ ଵିଷ୍ଠିତୌ ॥ 11 ॥
ତଂ ପ୍ରଵିଷ୍ଟଂ ରିପୁଂ ଦୃଷ୍ଟ୍ଵା ବିଲଂ ରୋଷଵଶଂ ଗତଃ ।
ମାମୁଵାଚ ତଦା ଵାଲୀ ଵଚନଂ କ୍ଷୁଭିତେଂଦ୍ରିୟଃ ॥ 12 ॥
ଇହ ତ୍ଵଂ ତିଷ୍ଠ ସୁଗ୍ରୀଵ ବିଲଦ୍ଵାରି ସମାହିତଃ ।
ୟାଵତ୍ତତ୍ର ପ୍ରଵିଶ୍ୟାହଂ ନିହନ୍ମି ସହସା ରିପୁମ୍ ॥ 13 ॥
ମୟା ତ୍ଵେତଦ୍ଵଚଶ୍ଶ୍ରୁତ୍ଵା ୟାଚିତସ୍ସ ପରଂତପଃ ।
ଶାପୟିତ୍ଵା ତୁ ମାଂ ପଦ୍ଭ୍ୟାଂ ପ୍ରଵିଵେଶ ବିଲଂ ମହତ୍ ॥ 14 ॥
ତସ୍ୟ ପ୍ରଵିଷ୍ଟସ୍ୟ ବିଲଂ ସାଗ୍ରସ୍ସଂଵତ୍ସରୋ ଗତଃ ।
ସ୍ଥିତସ୍ୟ ମମ ବିଲଦ୍ଵାରି ସ କାଲୋ ଵ୍ୟତ୍ୟଵର୍ତତ ॥ 15 ॥
ଅହଂ ତୁ ନଷ୍ଟଂ ଜ୍ଞାତ୍ଵା ତଂ ସ୍ନେହାଦାଗତସଂଭ୍ରମଃ ।
ଭ୍ରାତରଂ ନ ଚ ପଶ୍ୟାମି ପାପାଶଂକି ଚ ମେ ମନଃ ॥ 16 ॥
ଅଥ ଦୀର୍ଘସ୍ୟ କାଲସ୍ୟ ବିଲାତ୍ତସ୍ମାଦ୍ଵିନିସ୍ସୃତମ୍ ।
ସଫେନଂ ରୁଧିରଂ ରକ୍ତମହଂ ଦୃଷ୍ଟ୍ଵା ସୁଦୁଃଖିତଃ ॥ 17 ॥
ନର୍ଦତାମସୁରାଣାଂ ଚ ଧ୍ଵନିର୍ମେ ଶ୍ରୋତ୍ରମାଗତଃ ।
ନିରସ୍ତସ୍ୟ ଚ ସଂଗ୍ରାମେ କ୍ରୋଶତୋନିସ୍ସ୍ଵନୋ ଗୁରୋଃ ॥ 18 ॥
ଅହଂ ତ୍ଵଵଗତୋ ବୁଦ୍ଧ୍ୟା ଚିହ୍ନୈସ୍ତୈର୍ଭ୍ରାତରଂ ହତମ୍ ।
ପିଧାୟ ଚ ବିଲଦ୍ଵାରଂ ଶିଲୟା ଗିରିମାତ୍ରୟା ॥ 19 ॥
ଶୋକାର୍ତଶ୍ଚୋଦକଂ କୃତ୍ଵା କିଷ୍କିଂଧାମାଗତସ୍ସଖେ ।
ଗୂହମାନସ୍ୟ ମେ ତତ୍ତ୍ଵଂ ୟତ୍ନତୋ ମଂତ୍ରିଭିଶ୍ଶ୍ରୁତମ୍ ॥ 20 ॥
ତତୋଽହଂ ତୈସ୍ସମାଗମ୍ୟ ସମ୍ମତୈରଭିଷେଚିତଃ ।
ରାଜ୍ୟଂ ପ୍ରଶାସତସ୍ତସ୍ୟ ନ୍ୟାୟତୋ ମମ ରାଘଵ ॥ 21 ॥
ଆଜଗାମ ରିପୁଂ ହତ୍ଵା ଵାଲୀ ତମସୁରୋତ୍ତମମ୍ ।
ଅଭିଷିକ୍ତଂ ତୁ ମାଂ ଦୃଷ୍ଟ୍ଵା ଵାଲୀ ସଂରକ୍ତଲୋଚନଃ ।
ମଦୀୟାନ୍ମଂତ୍ରିଣୋ ବଦ୍ଧ୍ଵା ପରୁଷଂ ଵାକ୍ୟମବ୍ରଵୀତ୍ ॥ 22 ॥
ନିଗ୍ରହେଽପି ସମର୍ଥସ୍ୟ ତଂ ପାପଂ ପ୍ରତି ରାଘଵ ।
ନ ପ୍ରାଵର୍ତତ ମେ ବୁଦ୍ଧିର୍ଭ୍ରାତୁର୍ଗୌରଵୟଂତ୍ରିତା ॥ 23 ॥
ହତ୍ଵା ଶତ୍ରୁଂ ସ ମେ ଭ୍ରାତା ପ୍ରଵିଵେଶ ପୁରଂ ତଦା ॥ 24 ॥
ମାନୟଂସ୍ତଂ ମହାତ୍ମାନଂ ୟଥାଵଚ୍ଚାଭ୍ୟଵାଦୟମ୍ ।
ଉକ୍ତାଶ୍ଚ ନାଶିଷସ୍ତେନ ସଂତୁଷ୍ଟେନାଂତରାତ୍ମନା ॥ 25 ॥
ନତ୍ଵା ପାଦାଵହଂ ତସ୍ୟ ମକୁଟେନାସ୍ପୃଶଂ ପ୍ରଭୋ ଅପି ଵାଲୀ ମମ କ୍ରୋଧାନ୍ନ ପ୍ରସାଦଂ ଚକାର ସଃ ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ନଵମସ୍ସର୍ଗଃ ॥
