શ્રીમદ્વાલ્મીકીય રામાયણે કિષ્કિંધાકાંડમ્ ।
અથ નવમસ્સર્ગઃ ।
વાલી નામ મમ ભ્રાતા જ્યેષ્ઠશ્શત્રુનિષૂદનઃ ।
પિતુર્બહુમતો નિત્યં મમાપિ ચ તથા પુરા ॥ 1 ॥
પિતર્યુપરતેઽસ્માકં જ્યેષ્ઠોઽયમિતિ મંત્રિભિઃ ।
કપીનામીશ્વરો રાજ્યે કૃતઃ પરમસમ્મતઃ ॥ 2 ॥
રાજ્યં પ્રશાસતસ્તસ્ય પિતૃપૈતામહં મહત્ ।
અહં સર્વેષુ કાલેષુ પ્રણતઃ પ્રેષ્યવત્ સ્થિતઃ ॥ 3 ॥
માયાવી નામ તેજસ્વી પૂર્વજો દુંદુભેઃ સુતઃ ।
તેન તસ્ય મહદ્વૈરં સ્ત્રીકૃતં વિશ્શ્રુતં પુરા ॥ 4 ॥
સ તુ સુપ્તજને રાત્રૌ કિષ્કિંધાદ્વારમાગતઃ ।
નર્દતિ સ્મ સુસંરબ્ધો વાલિનં ચાહ્વયદ્રણે ॥ 5 ॥
પ્રસુપ્તસ્તુ મમ ભ્રાતા નર્દિતં ભૈરવસ્વનમ્ ।
શ્રુત્વા ન મમૃષે વાલી નિષ્પપાત જવાત્તદા ॥ 6 ॥
સ તુ વૈ નિસ્સૃતઃ ક્રોધાત્તં હંતુમસુરોત્તમમ્ ।
વાર્યમાણસ્તત સ્ત્રીભિર્મયા ચ પ્રણતાત્મના ॥ 7 ॥
સ તુ નિર્ધૂય તાઃ સર્વા નિર્જગામ મહાબલઃ ।
તતોઽહમપિ સૌહાર્દાન્નિસ્સૃતો વાલિના સહ ॥ 8 ॥
સ તુ મે ભ્રાતરં દૃષ્ટ્વા માં ચ દૂરાદવસ્થિતમ્ ।
અસુરો જાતસંત્રાસઃ પ્રદુદ્રાવ તતો ભૃશમ્ ॥ 9 ॥
તસ્મિન્ દ્રવતિ સંત્રસ્તે હ્યાવાં દ્રુતતરં ગતૌ ।
પ્રકાશશ્ચ કૃતો માર્ગશ્ચંદ્રેણોદ્ગચ્છતા તદા ॥ 10 ॥
સ તૃણૈરાવૃતં દુર્ગં ધરણ્યા વિવરં મહત્ ।
પ્રવિવેશાસુરો વેગાદાવામાસાદ્ય વિષ્ઠિતૌ ॥ 11 ॥
તં પ્રવિષ્ટં રિપું દૃષ્ટ્વા બિલં રોષવશં ગતઃ ।
મામુવાચ તદા વાલી વચનં ક્ષુભિતેંદ્રિયઃ ॥ 12 ॥
ઇહ ત્વં તિષ્ઠ સુગ્રીવ બિલદ્વારિ સમાહિતઃ ।
યાવત્તત્ર પ્રવિશ્યાહં નિહન્મિ સહસા રિપુમ્ ॥ 13 ॥
મયા ત્વેતદ્વચશ્શ્રુત્વા યાચિતસ્સ પરંતપઃ ।
શાપયિત્વા તુ માં પદ્ભ્યાં પ્રવિવેશ બિલં મહત્ ॥ 14 ॥
તસ્ય પ્રવિષ્ટસ્ય બિલં સાગ્રસ્સંવત્સરો ગતઃ ।
સ્થિતસ્ય મમ બિલદ્વારિ સ કાલો વ્યત્યવર્તત ॥ 15 ॥
અહં તુ નષ્ટં જ્ઞાત્વા તં સ્નેહાદાગતસંભ્રમઃ ।
ભ્રાતરં ન ચ પશ્યામિ પાપાશંકિ ચ મે મનઃ ॥ 16 ॥
અથ દીર્ઘસ્ય કાલસ્ય બિલાત્તસ્માદ્વિનિસ્સૃતમ્ ।
સફેનં રુધિરં રક્તમહં દૃષ્ટ્વા સુદુઃખિતઃ ॥ 17 ॥
નર્દતામસુરાણાં ચ ધ્વનિર્મે શ્રોત્રમાગતઃ ।
નિરસ્તસ્ય ચ સંગ્રામે ક્રોશતોનિસ્સ્વનો ગુરોઃ ॥ 18 ॥
અહં ત્વવગતો બુદ્ધ્યા ચિહ્નૈસ્તૈર્ભ્રાતરં હતમ્ ।
પિધાય ચ બિલદ્વારં શિલયા ગિરિમાત્રયા ॥ 19 ॥
શોકાર્તશ્ચોદકં કૃત્વા કિષ્કિંધામાગતસ્સખે ।
ગૂહમાનસ્ય મે તત્ત્વં યત્નતો મંત્રિભિશ્શ્રુતમ્ ॥ 20 ॥
તતોઽહં તૈસ્સમાગમ્ય સમ્મતૈરભિષેચિતઃ ।
રાજ્યં પ્રશાસતસ્તસ્ય ન્યાયતો મમ રાઘવ ॥ 21 ॥
આજગામ રિપું હત્વા વાલી તમસુરોત્તમમ્ ।
અભિષિક્તં તુ માં દૃષ્ટ્વા વાલી સંરક્તલોચનઃ ।
મદીયાન્મંત્રિણો બદ્ધ્વા પરુષં વાક્યમબ્રવીત્ ॥ 22 ॥
નિગ્રહેઽપિ સમર્થસ્ય તં પાપં પ્રતિ રાઘવ ।
ન પ્રાવર્તત મે બુદ્ધિર્ભ્રાતુર્ગૌરવયંત્રિતા ॥ 23 ॥
હત્વા શત્રું સ મે ભ્રાતા પ્રવિવેશ પુરં તદા ॥ 24 ॥
માનયંસ્તં મહાત્માનં યથાવચ્ચાભ્યવાદયમ્ ।
ઉક્તાશ્ચ નાશિષસ્તેન સંતુષ્ટેનાંતરાત્મના ॥ 25 ॥
નત્વા પાદાવહં તસ્ય મકુટેનાસ્પૃશં પ્રભો અપિ વાલી મમ ક્રોધાન્ન પ્રસાદં ચકાર સઃ ॥ 26 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે નવમસ્સર્ગઃ ॥
