శ్రీమద్వాల్మీకీయ రామాయణే కిష్కింధాకాండమ్ ।
అథ నవమస్సర్గః ।
వాలీ నామ మమ భ్రాతా జ్యేష్ఠశ్శత్రునిషూదనః ।
పితుర్బహుమతో నిత్యం మమాపి చ తథా పురా ॥ 1 ॥
పితర్యుపరతేఽస్మాకం జ్యేష్ఠోఽయమితి మంత్రిభిః ।
కపీనామీశ్వరో రాజ్యే కృతః పరమసమ్మతః ॥ 2 ॥
రాజ్యం ప్రశాసతస్తస్య పితృపైతామహం మహత్ ।
అహం సర్వేషు కాలేషు ప్రణతః ప్రేష్యవత్ స్థితః ॥ 3 ॥
మాయావీ నామ తేజస్వీ పూర్వజో దుందుభేః సుతః ।
తేన తస్య మహద్వైరం స్త్రీకృతం విశ్శ్రుతం పురా ॥ 4 ॥
స తు సుప్తజనే రాత్రౌ కిష్కింధాద్వారమాగతః ।
నర్దతి స్మ సుసంరబ్ధో వాలినం చాహ్వయద్రణే ॥ 5 ॥
ప్రసుప్తస్తు మమ భ్రాతా నర్దితం భైరవస్వనమ్ ।
శ్రుత్వా న మమృషే వాలీ నిష్పపాత జవాత్తదా ॥ 6 ॥
స తు వై నిస్సృతః క్రోధాత్తం హంతుమసురోత్తమమ్ ।
వార్యమాణస్తత స్త్రీభిర్మయా చ ప్రణతాత్మనా ॥ 7 ॥
స తు నిర్ధూయ తాః సర్వా నిర్జగామ మహాబలః ।
తతోఽహమపి సౌహార్దాన్నిస్సృతో వాలినా సహ ॥ 8 ॥
స తు మే భ్రాతరం దృష్ట్వా మాం చ దూరాదవస్థితమ్ ।
అసురో జాతసంత్రాసః ప్రదుద్రావ తతో భృశమ్ ॥ 9 ॥
తస్మిన్ ద్రవతి సంత్రస్తే హ్యావాం ద్రుతతరం గతౌ ।
ప్రకాశశ్చ కృతో మార్గశ్చంద్రేణోద్గచ్ఛతా తదా ॥ 10 ॥
స తృణైరావృతం దుర్గం ధరణ్యా వివరం మహత్ ।
ప్రవివేశాసురో వేగాదావామాసాద్య విష్ఠితౌ ॥ 11 ॥
తం ప్రవిష్టం రిపుం దృష్ట్వా బిలం రోషవశం గతః ।
మామువాచ తదా వాలీ వచనం క్షుభితేంద్రియః ॥ 12 ॥
ఇహ త్వం తిష్ఠ సుగ్రీవ బిలద్వారి సమాహితః ।
యావత్తత్ర ప్రవిశ్యాహం నిహన్మి సహసా రిపుమ్ ॥ 13 ॥
మయా త్వేతద్వచశ్శ్రుత్వా యాచితస్స పరంతపః ।
శాపయిత్వా తు మాం పద్భ్యాం ప్రవివేశ బిలం మహత్ ॥ 14 ॥
తస్య ప్రవిష్టస్య బిలం సాగ్రస్సంవత్సరో గతః ।
స్థితస్య మమ బిలద్వారి స కాలో వ్యత్యవర్తత ॥ 15 ॥
అహం తు నష్టం జ్ఞాత్వా తం స్నేహాదాగతసంభ్రమః ।
భ్రాతరం న చ పశ్యామి పాపాశంకి చ మే మనః ॥ 16 ॥
అథ దీర్ఘస్య కాలస్య బిలాత్తస్మాద్వినిస్సృతమ్ ।
సఫేనం రుధిరం రక్తమహం దృష్ట్వా సుదుఃఖితః ॥ 17 ॥
నర్దతామసురాణాం చ ధ్వనిర్మే శ్రోత్రమాగతః ।
నిరస్తస్య చ సంగ్రామే క్రోశతోనిస్స్వనో గురోః ॥ 18 ॥
అహం త్వవగతో బుద్ధ్యా చిహ్నైస్తైర్భ్రాతరం హతమ్ ।
పిధాయ చ బిలద్వారం శిలయా గిరిమాత్రయా ॥ 19 ॥
శోకార్తశ్చోదకం కృత్వా కిష్కింధామాగతస్సఖే ।
గూహమానస్య మే తత్త్వం యత్నతో మంత్రిభిశ్శ్రుతమ్ ॥ 20 ॥
తతోఽహం తైస్సమాగమ్య సమ్మతైరభిషేచితః ।
రాజ్యం ప్రశాసతస్తస్య న్యాయతో మమ రాఘవ ॥ 21 ॥
ఆజగామ రిపుం హత్వా వాలీ తమసురోత్తమమ్ ।
అభిషిక్తం తు మాం దృష్ట్వా వాలీ సంరక్తలోచనః ।
మదీయాన్మంత్రిణో బద్ధ్వా పరుషం వాక్యమబ్రవీత్ ॥ 22 ॥
నిగ్రహేఽపి సమర్థస్య తం పాపం ప్రతి రాఘవ ।
న ప్రావర్తత మే బుద్ధిర్భ్రాతుర్గౌరవయంత్రితా ॥ 23 ॥
హత్వా శత్రుం స మే భ్రాతా ప్రవివేశ పురం తదా ॥ 24 ॥
మానయంస్తం మహాత్మానం యథావచ్చాభ్యవాదయమ్ ।
ఉక్తాశ్చ నాశిషస్తేన సంతుష్టేనాంతరాత్మనా ॥ 25 ॥
నత్వా పాదావహం తస్య మకుటేనాస్పృశం ప్రభో అపి వాలీ మమ క్రోధాన్న ప్రసాదం చకార సః ॥ 26 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కింధాకాండే నవమస్సర్గః ॥
