śrīmadvālmīkīya rāmāyaṇē kiṣkindhākāṇḍam ।
atha navamassargaḥ ।
vālī nāma mama bhrātā jyēṣṭhaśśatruniṣūdanaḥ ।
piturbahumatō nityaṃ mamāpi cha tathā purā ॥ 1 ॥
pitaryuparatē'smākaṃ jyēṣṭhō'yamiti mantribhiḥ ।
kapīnāmīśvarō rājyē kṛtaḥ paramasammataḥ ॥ 2 ॥
rājyaṃ praśāsatastasya pitṛpaitāmahaṃ mahat ।
ahaṃ sarvēṣu kālēṣu praṇataḥ prēṣyavat sthitaḥ ॥ 3 ॥
māyāvī nāma tējasvī pūrvajō dundubhēḥ sutaḥ ।
tēna tasya mahadvairaṃ strīkṛtaṃ viśśrutaṃ purā ॥ 4 ॥
sa tu suptajanē rātrau kiṣkindhādvāramāgataḥ ।
nardati sma susaṃrabdhō vālinaṃ chāhvayadraṇē ॥ 5 ॥
prasuptastu mama bhrātā narditaṃ bhairavasvanam ।
śrutvā na mamṛṣē vālī niṣpapāta javāttadā ॥ 6 ॥
sa tu vai nissṛtaḥ krōdhāttaṃ hantumasurōttamam ।
vāryamāṇastata strībhirmayā cha praṇatātmanā ॥ 7 ॥
sa tu nirdhūya tāḥ sarvā nirjagāma mahābalaḥ ।
tatō'hamapi sauhārdānnissṛtō vālinā saha ॥ 8 ॥
sa tu mē bhrātaraṃ dṛṣṭvā māṃ cha dūrādavasthitam ।
asurō jātasantrāsaḥ pradudrāva tatō bhṛśam ॥ 9 ॥
tasmin dravati santrastē hyāvāṃ drutataraṃ gatau ।
prakāśaścha kṛtō mārgaśchandrēṇōdgachChatā tadā ॥ 10 ॥
sa tṛṇairāvṛtaṃ durgaṃ dharaṇyā vivaraṃ mahat ।
pravivēśāsurō vēgādāvāmāsādya viṣṭhitau ॥ 11 ॥
taṃ praviṣṭaṃ ripuṃ dṛṣṭvā bilaṃ rōṣavaśaṃ gataḥ ।
māmuvācha tadā vālī vachanaṃ kṣubhitēndriyaḥ ॥ 12 ॥
iha tvaṃ tiṣṭha sugrīva biladvāri samāhitaḥ ।
yāvattatra praviśyāhaṃ nihanmi sahasā ripum ॥ 13 ॥
mayā tvētadvachaśśrutvā yāchitassa parantapaḥ ।
śāpayitvā tu māṃ padbhyāṃ pravivēśa bilaṃ mahat ॥ 14 ॥
tasya praviṣṭasya bilaṃ sāgrassaṃvatsarō gataḥ ।
sthitasya mama biladvāri sa kālō vyatyavartata ॥ 15 ॥
ahaṃ tu naṣṭaṃ jñātvā taṃ snēhādāgatasambhramaḥ ।
bhrātaraṃ na cha paśyāmi pāpāśaṅki cha mē manaḥ ॥ 16 ॥
atha dīrghasya kālasya bilāttasmādvinissṛtam ।
saphēnaṃ rudhiraṃ raktamahaṃ dṛṣṭvā suduḥkhitaḥ ॥ 17 ॥
nardatāmasurāṇāṃ cha dhvanirmē śrōtramāgataḥ ।
nirastasya cha saṅgrāmē krōśatōnissvanō gurōḥ ॥ 18 ॥
ahaṃ tvavagatō buddhyā chihnaistairbhrātaraṃ hatam ।
pidhāya cha biladvāraṃ śilayā girimātrayā ॥ 19 ॥
śōkārtaśchōdakaṃ kṛtvā kiṣkindhāmāgatassakhē ।
gūhamānasya mē tattvaṃ yatnatō mantribhiśśrutam ॥ 20 ॥
tatō'haṃ taissamāgamya sammatairabhiṣēchitaḥ ।
rājyaṃ praśāsatastasya nyāyatō mama rāghava ॥ 21 ॥
ājagāma ripuṃ hatvā vālī tamasurōttamam ।
abhiṣiktaṃ tu māṃ dṛṣṭvā vālī saṃraktalōchanaḥ ।
madīyānmantriṇō baddhvā paruṣaṃ vākyamabravīt ॥ 22 ॥
nigrahē'pi samarthasya taṃ pāpaṃ prati rāghava ।
na prāvartata mē buddhirbhrāturgauravayantritā ॥ 23 ॥
hatvā śatruṃ sa mē bhrātā pravivēśa puraṃ tadā ॥ 24 ॥
mānayaṃstaṃ mahātmānaṃ yathāvachchābhyavādayam ।
uktāścha nāśiṣastēna santuṣṭēnāntarātmanā ॥ 25 ॥
natvā pādāvahaṃ tasya makuṭēnāspṛśaṃ prabhō api vālī mama krōdhānna prasādaṃ chakāra saḥ ॥ 26 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē navamassargaḥ ॥
