ශ්රීමද්වාල්මීකීය රාමායණේ සුංදරකාංඩම් ।
අථ ත්රයෝදශස්සර්ගඃ ।
විමානාත්තු සුසම්ක්රම්ය ප්රාකාරං හරියූථපඃ ।
හනුමාන්වේගවානාසීද්යථා විද්යුද්ඝනාංතරේ ॥ 1 ॥
සංපරික්රම්ය හනුමාන්රාවණස්ය නිවේශනාත් ।
අදෘෂ්ට්වා ජානකීං සීතාමබ්රවීද්වචනං කපිඃ ॥ 2 ॥
භූයිෂ්ඨං ලෝලිතා ලංකා රාමස්ය චරතා ප්රියම් ।
න හි පශ්යාමි වෛදේහීං සීතාං සර්වාංගශෝභනාම් ॥ 3 ॥
පල්වලානි තටාකානි සරාංසි සරිතස්තථා ।
නද්යෝऽනූපවනාංතාශ්ච දුර්ගාශ්ච ධරණීධරාඃ ॥ 4 ॥
ලෝලිතා වසුධා සර්වා න තු පශ්යාමි ජානකීම් ।
ඉහ සංපාතිනා සීතා රාවණස්ය නිවේශනේ ॥ 5 ॥
ආඛ්යාතා ගෘධ්රරාජේන න ච පශ්යාමි තාමහම් ।
කිං නු සීතාऽථ වෛදේහී මෛථිලී ජනකාත්මජා ॥ 6 ॥
උපතිෂ්ඨේත විවශා රාවණං දුෂ්ටචාරිණම් ।
ක්ෂිප්රමුත්පතතෝ මන්යේ සීතාමාදාය රක්ෂසඃ ॥ 7 ॥
බිභ්යතෝ රාමබාණානාමංතරා පතිතා භවේත් ।
අථවා හ්රියමාණායාඃ පථි සිද්ධනිෂේවිතේ ॥ 8 ॥
මන්යේ පතිතමාර්යායා හෘදයං ප්රේක්ෂ්ය සාගරම් ।
රාවණස්යෝරුවේගේන භුජාභ්යාං පීඩිතේන ච ॥ 9 ॥
තයා මන්යේ විශාලාක්ෂ්යා ත්යක්තං ජීවිතමාර්යයා ।
උපර්යුපරි වා නූනං සාගරං ක්රමතස්තදා ॥ 10 ॥
විවේෂ්ටමානා පතිතා සාගරේ ජනකාත්මජා ।
අහෝ ක්ෂුද්රේණ වාऽනේන රක්ෂංතී ශීලමාත්මනඃ ॥ 11 ॥
අබංධුර්භක්ෂිතා සීතා රාවණේන තපස්විනී ।
අථවා රාක්ෂසේංද්රස්ය පත්නීභිරසිතේක්ෂණා ॥ 12 ॥
අදුෂ්ටා දුෂ්ටභාවාභිර්භක්ෂිතා සා භවිෂ්යති ।
සංපූර්ණචංද්රප්රතිමං පද්මපත්රනිභේක්ෂණම් ॥ 13 ॥
රාමස්ය ධ්යායතී වක්ත්රං පංචත්වං කෘපණා ගතා ।
හා රාම ලක්ෂ්මණේත්යේවං හාऽයෝධ්යේ චේති මෛථිලී ॥ 14 ॥
විලප්ය බහු වෛදේහී න්යස්තදේහා භවිෂ්යති ।
අථවා නිහිතා මන්යේ රාවණස්ය නිවේශනේ ॥ 15 ॥
නූනං ලාලප්යතේ සීතා පංජරස්ථේව ශාරිකා ।
ජනකස්ය සුතා සීතා රාමපත්නී සුමධ්යමා ॥ 16 ॥
කථමුත්පලපත්රාක්ෂී රාවණස්ය වශං ව්රජේත් ।
විනෂ්ටා වා ප්රණෂ්ටා වා මෘතා වා ජනකාත්මජා ॥ 17 ॥
රාමස්ය ප්රියභාර්යස්ය න නිවේදයිතුං ක්ෂමම් ।
නිවේද්යමානේ දෝෂස්ස්යාද්දෝෂස්ස්යාදනිවේදනේ ॥ 18 ॥
කථං නු ඛලු කර්තව්යං විෂමං ප්රතිභාති මේ ।
අස්මින්නේවංගතේ කාර්යේ ප්රාප්තකාලං ක්ෂමං ච කිම් ॥ 19 ॥
භවේදිති මතං භූයෝ හනුමාන්ප්රවිචාරයත් ।
යදි සීතාමදෘෂ්ට්වාऽහං වානරේංද්රපුරීමිතඃ ॥ 20 ॥
ගමිෂ්යාමි තතඃ කෝ මේ පුරුෂාර්ථෝ භවිෂ්යති ।
මමේදං ලංඝනං ව්යර්ථං සාගරස්ය භවිෂ්යති ॥ 21 ॥
ප්රවේශශ්චෛව ලංකායාඃ රාක්ෂසානාං ච දර්ශනම් ।
කිං මාං වක්ෂ්යති සුග්රීවෝ හරයෝ වා සමාගතාඃ ॥ 22 ॥
කිෂ්කිංධාං සමනුප්රාප්තං තෞ වා දශරථාත්මජෞ ।
ගත්වා තු යදි කාකුත්ස්ථං වක්ෂ්යාමි පරමප්රියම් ॥ 23 ॥
න දෘෂ්ටේති මයා සීතා තතස්තක්ෂ්යති ජීවිතම් ।
පරුෂං දාරුණං ක්රූරං තීක්ෂ්ණමිංද්රියතාපනම් ॥ 24 ॥
සීතානිමිත්තං දුර්වාක්යං ශ්රුත්වා ස න භවිෂ්යති ।
තං තු කෘච්ඡ්රගතං දෘෂ්ට්වා පංචත්වගතමානසම් ॥ 25 ॥
භෘශානුරක්තෝ මේධාවී න භවිෂ්යති ලක්ෂ්මණඃ ।
විනෂ්ටෞ භ්රාතරෞ ශ්රුත්වා භරතෝऽපි මරිෂ්යති ॥ 26 ॥
භරතං ච මෘතං දෘෂ්ට්වා ශත්රුඝ්නෝ න භවිෂ්යති ।
පුත්රාන්මෘතාන්සමීක්ෂ්යාථ න භවිෂ්යංති මාතරඃ ॥ 27 ॥
කෞසල්යා ච සුමිත්රා ච කෛකේයී ච න සංශයඃ ।
කෘතජ්ඤස්සත්යසංධශ්ච සුග්රීවඃ ප්ලවගාධිපඃ ॥ 28 ॥
රාමං තථා ගතං දෘෂ්ට්වා තතස්ත්යක්ෂ්යති ජීවිතම් ।
දුර්මනා ව්යථිතා දීනා නිරානංදා තපස්විනී ॥ 29 ॥
පීඩිතා භර්තෘශෝකේන රුමා ත්යක්ෂ්යති ජීවිතම් ।
වාලිජේන තු දුඃඛේන පීඩිතා ශෝකකර්ශිතා ॥ 30 ॥
පංචත්වං ච ගතේ රාජ්ඤි තාරාऽපි න භවිෂ්යති ।
මාතාපිත්රෝර්විනාශේන සුග්රීවව්යසනේන ච ॥ 31 ॥
කුමාරෝऽප්යංගදඃ කස්මාද්ධාරයිෂ්යති ජීවිතම් ।
භර්තෘජේන තු දුඃඛේන හ්යභිභූතා වනෞකසඃ ॥ 32 ॥
ශිරාංස්යභිහනිෂ්යංති තලෛර්මුෂ්ටිභිරේව ච ।
සාංත්වේනානුප්රදානේන මානේන ච යශස්විනා ॥ 33 ॥
ලාලිතාඃ කපිරාජේන ප්රාණාංස්ත්යක්ෂ්යංති වානරාඃ ।
න වනේෂු න ශෛලේෂු න නිරෝධේෂු වා පුනඃ ॥ 34 ॥
ක්රීඩාමනුභවිෂ්යංති සමේත්ය කපිකුංජරාඃ ।
සපුත්රදාරාස්සාමාත්යා භර්තෘව්යසනපීඩිතාඃ ॥ 35 ॥
ශෛලාග්රේභ්යඃ පතිෂ්යංති සමේෂු විෂමේෂු ච ।
විෂමුද්බංධනං වාපි ප්රවේශං ජ්වලනස්ය වා ॥ 36 ॥
උපවාසමථෝ ශස්ත්රං ප්රචරිෂ්යංති වානරාඃ ।
ඝෝරමාරෝදනං මන්යේ ගතේ මයි භවිෂ්යති ॥ 37 ॥
ඉක්ෂ්වාකුකුලනාශශ්ච නාශශ්චෛව වනෞකසාම් ।
සෝऽහං නෛව ගමිෂ්යාමි කිෂ්කිංධාං නගරීමිතඃ ॥ 38 ॥
න ච ශක්ෂ්යාම්යහං ද්රෂ්ටුං සුග්රීවං මෛථිලීං විනා ।
මය්යගච්ඡති චේහස්ථේ ධර්මාත්මානෞ මහාරථෞ ॥ 39 ॥
ආශයා තෞ ධරිෂ්යේතේ වානරාශ්ච මනස්විනඃ ।
හස්තාදානෝ මුඛාදානෝ නියතෝ වෘක්ෂමූලිකඃ ॥ 40 ॥
වානප්රස්ථෝ භවිෂ්යාමි හ්යදෘෂ්ට්වා ජනකාත්මජාම් ।
සාගරානූපජේ දේශේ බහුමූලඵලෝදකේ ॥ 41 ॥
චිතාං කෘත්වා ප්රවේක්ෂ්යාමි සමිද්ධමරණීසුතම් ।
උපවිෂ්ටස්ය වා සම්යග්ලිංගිනීං සාධයිෂ්යතඃ ॥ 42 ॥
ශරීරං භක්ෂයිෂ්යංති වායසාඃ ශ්වාපදානි ච ।
ඉදං මහර්ෂිභිර්දෘෂ්ටං නිර්යාණමිති මේ මතිඃ ॥ 43 ॥
සම්යගාපඃ ප්රවේක්ෂ්යාමි න චේත්පශ්යාමි ජානකීම් ।
සුජාතමූලා සුභගා කීර්තිමාලා යශස්විනී ॥ 44 ॥
ප්රභග්නා චිරරාත්රීයං මම සීතාමපශ්යතඃ ।
තාපසෝ වා භවිෂ්යාමි නියතෝ වෘක්ෂමූලිකඃ ॥ 45 ॥
නේතඃ ප්රතිගමිෂ්යාමි තාමදෘෂ්ට්වාසිතේක්ෂණාම් ।
යදීතඃ ප්රතිගච්ඡාමි සීතාමනධිගම්ය තාම් ॥ 46 ॥
අංගදස්සහ තෛස්සර්වෛර්වානරෛර්න භවිෂ්යති ।
විනාශේ බහවෝ දෝෂා ජීවන් භද්රාණි පශ්යති ॥ 47 ॥
තස්මාත්ප්රාණාන් ධරිෂ්යාමි ධ්රුවෝ ජීවිතසංගමඃ ।
ඒවං බහුවිධං දුඃඛං මනසා ධරායන්මුහුඃ ॥ 48 ॥
නාධ්යගච්ඡත්තදා පාරං ශෝකස්ය කපිකුංචරඃ ।
රාවණං වා වධිෂ්යාමි දශග්රීවං මහාබලම් ॥ 49 ॥
කාමමස්තු හෘතා සීතා ප්රත්යාචීර්ණං භවිෂ්යති ।
අථවෛනං සමුත්ක්ෂිප්ය උපර්යුපරි සාගරම් ॥ 50 ॥
රාමායෝපහරිෂ්යාමි පශුං පශුපතේරිව ।
ඉති චිංතාං සමාපන්නඃ සීතාමනධිගම්ය තාම් ॥ 51 ॥
ධ්යානශෝකපරීතාත්මා චිංතයාමාස වානරඃ ।
යාවත්සීතාං හි පශ්යාමි රාමපත්නීං යශස්විනීම් ॥ 52 ॥
තාවදේතාං පුරීං ලංකාං විචිනෝමි පුනඃ පුනඃ ।
සංපාතිවචනාච්චාපි රාමං යද්යානයාම්යහම් ॥ 53 ॥
අපශ්යන් රාඝවෝ භාර්යාං නිර්ධහේත්සර්වවානරාන් ।
ඉහෛව නියතාහාරෝ වත්ස්යාමි නියතේංද්රියඃ ॥ 54 ॥
න මත්කෘතේ විනශ්යේයුඃ සර්වේ තේ නරවානරාඃ ।
අශෝකවනිකා චේයං දෘශ්යතේ යා මහාද්රුමා ॥ 55 ॥
ඉමාමධිගමිෂ්යාමි න හීයං විචිතා මයා ।
වසූන්රුද්රාංස්තථාऽදිත්යානශ්විනෞ මරුතෝऽපි ච ॥ 56 ॥
නමස්කෘත්වා ගමිෂ්යාමි රක්ෂසාං ශෝකවර්ධනඃ ।
ජිත්වා තු රාක්ෂසාන් සර්වානික්ෂ්වාකුකුලනංදිනීම් ॥ 57 ॥
සංප්රදාස්යාමි රාමාය යථා සිද්ධිං තපස්විනේ ।
සඃ මුහූර්තමිව ධ්යාත්වා චිංතාවග්රථිතේංද්රියඃ ॥ 58 ॥
උදතිෂ්ඨන්මහාතේජා හනුමාන් මාරුතාත්මජඃ ।
නමෝऽස්තු රාමාය සලක්ෂ්මණාය දේව්යෛ ච තස්යෛ ජනකාත්මජායෛ ।
නමෝऽස්තු රුද්රේංද්රයමානිලේභ්යෝ නමෝऽස්තු චංද්රාර්කමරුද්ගණේභ්යඃ ॥ 59 ॥
ස තේභ්යස්තු නමස්කෘත්ය සුග්රීවාය ච මාරුතිඃ ।
දිශස්සර්වාස්සමාලෝක්ය හ්යශෝකවනිකාං ප්රති ॥ 60 ॥
ස ගත්වා මනසා පූර්වමශෝකවනිකාං ශුභාම් ।
උත්තරං චිංතයාමාස වානරෝ මාරුතාත්මජඃ ॥ 61 ॥
ධ්රුවං තු රක්ෂෝබහුලා භවිෂ්යති වනාකුලා ।
අශෝකවනිකා පුණ්යා සර්වසංස්කාරසංස්කෘතා ॥ 62 ॥
රක්ෂිණශ්චාත්ර විහිතා නූනං රක්ෂංති පාදපාන් ।
භගවානපි සර්වාත්මා නාතික්ෂෝභං ප්රවාති වෛ ॥ 63 ॥
සංක්ෂිප්තෝऽයං මයාऽත්මා ච රාමාර්ථේ රාවණස්ය ච ।
සිද්ධිං මේ සංවිධාස්යංති දේවාඃ සර්ෂිගණාස්ත්විහ ॥ 64 ॥
බ්රහ්මා ස්වයංභූර්භගවාන් දේවාශ්චෛව දිශංතු මේ ।
සිද්ධිමග්නිශ්ච වායුශ්ච පුරුහූතශ්ච වජ්රභෘත් ॥ 65 ॥
වරුණඃ පාශහස්තශ්ච සෝමාදිත්යෞ තථෛව ච ।
අශ්විනෞ ච මහාත්මානෞ මරුතඃ ශර්ව ඒව ච ॥ 66 ॥
සිද්ධිං සර්වාණි භූතානි භූතානාං චෛව යඃ ප්රභුඃ ।
දාස්යංති මම යේ චාන්යේ හ්යදෘෂ්ටාඃ පථි ගෝචරාඃ ॥ 67 ॥
තදුන්නසං පාංඩුරදංතමව්රණං ශුචිස්මිතං පද්මපලාශලෝචනම් ।
ද්රක්ෂ්යේ තදාර්යාවදනං කදාන්වහං ප්රසන්නතාරාධිපතුල්යදර්ශනම් ॥ 68 ॥
ක්ෂුද්රේණ පාපේන නෘශංසකර්මණා සුදාරුණාලංකෘතවේෂධාරිණා ।
බලාභිභූතා හ්යබලා තපස්විනී කථං නු මේ දෘෂ්ටිපථේऽද්ය සා භවේත් ॥ 69 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ත්රයෝදශස්සර්ගඃ ॥
