ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ତ୍ରୟୋଦଶସ୍ସର୍ଗଃ ।
ଵିମାନାତ୍ତୁ ସୁସମ୍କ୍ରମ୍ୟ ପ୍ରାକାରଂ ହରିୟୂଥପଃ ।
ହନୁମାନ୍ଵେଗଵାନାସୀଦ୍ୟଥା ଵିଦ୍ୟୁଦ୍ଘନାଂତରେ ॥ 1 ॥
ସଂପରିକ୍ରମ୍ୟ ହନୁମାନ୍ରାଵଣସ୍ୟ ନିଵେଶନାତ୍ ।
ଅଦୃଷ୍ଟ୍ଵା ଜାନକୀଂ ସୀତାମବ୍ରଵୀଦ୍ଵଚନଂ କପିଃ ॥ 2 ॥
ଭୂୟିଷ୍ଠଂ ଲୋଲିତା ଲଂକା ରାମସ୍ୟ ଚରତା ପ୍ରିୟମ୍ ।
ନ ହି ପଶ୍ୟାମି ଵୈଦେହୀଂ ସୀତାଂ ସର୍ଵାଂଗଶୋଭନାମ୍ ॥ 3 ॥
ପଲ୍ଵଲାନି ତଟାକାନି ସରାଂସି ସରିତସ୍ତଥା ।
ନଦ୍ୟୋଽନୂପଵନାଂତାଶ୍ଚ ଦୁର୍ଗାଶ୍ଚ ଧରଣୀଧରାଃ ॥ 4 ॥
ଲୋଲିତା ଵସୁଧା ସର୍ଵା ନ ତୁ ପଶ୍ୟାମି ଜାନକୀମ୍ ।
ଇହ ସଂପାତିନା ସୀତା ରାଵଣସ୍ୟ ନିଵେଶନେ ॥ 5 ॥
ଆଖ୍ୟାତା ଗୃଧ୍ରରାଜେନ ନ ଚ ପଶ୍ୟାମି ତାମହମ୍ ।
କିଂ ନୁ ସୀତାଽଥ ଵୈଦେହୀ ମୈଥିଲୀ ଜନକାତ୍ମଜା ॥ 6 ॥
ଉପତିଷ୍ଠେତ ଵିଵଶା ରାଵଣଂ ଦୁଷ୍ଟଚାରିଣମ୍ ।
କ୍ଷିପ୍ରମୁତ୍ପତତୋ ମନ୍ୟେ ସୀତାମାଦାୟ ରକ୍ଷସଃ ॥ 7 ॥
ବିଭ୍ୟତୋ ରାମବାଣାନାମଂତରା ପତିତା ଭଵେତ୍ ।
ଅଥଵା ହ୍ରିୟମାଣାୟାଃ ପଥି ସିଦ୍ଧନିଷେଵିତେ ॥ 8 ॥
ମନ୍ୟେ ପତିତମାର୍ୟାୟା ହୃଦୟଂ ପ୍ରେକ୍ଷ୍ୟ ସାଗରମ୍ ।
ରାଵଣସ୍ୟୋରୁଵେଗେନ ଭୁଜାଭ୍ୟାଂ ପୀଡିତେନ ଚ ॥ 9 ॥
ତୟା ମନ୍ୟେ ଵିଶାଲାକ୍ଷ୍ୟା ତ୍ୟକ୍ତଂ ଜୀଵିତମାର୍ୟୟା ।
ଉପର୍ୟୁପରି ଵା ନୂନଂ ସାଗରଂ କ୍ରମତସ୍ତଦା ॥ 10 ॥
ଵିଵେଷ୍ଟମାନା ପତିତା ସାଗରେ ଜନକାତ୍ମଜା ।
ଅହୋ କ୍ଷୁଦ୍ରେଣ ଵାଽନେନ ରକ୍ଷଂତୀ ଶୀଲମାତ୍ମନଃ ॥ 11 ॥
ଅବଂଧୁର୍ଭକ୍ଷିତା ସୀତା ରାଵଣେନ ତପସ୍ଵିନୀ ।
ଅଥଵା ରାକ୍ଷସେଂଦ୍ରସ୍ୟ ପତ୍ନୀଭିରସିତେକ୍ଷଣା ॥ 12 ॥
ଅଦୁଷ୍ଟା ଦୁଷ୍ଟଭାଵାଭିର୍ଭକ୍ଷିତା ସା ଭଵିଷ୍ୟତି ।
ସଂପୂର୍ଣଚଂଦ୍ରପ୍ରତିମଂ ପଦ୍ମପତ୍ରନିଭେକ୍ଷଣମ୍ ॥ 13 ॥
ରାମସ୍ୟ ଧ୍ୟାୟତୀ ଵକ୍ତ୍ରଂ ପଂଚତ୍ଵଂ କୃପଣା ଗତା ।
ହା ରାମ ଲକ୍ଷ୍ମଣେତ୍ୟେଵଂ ହାଽୟୋଧ୍ୟେ ଚେତି ମୈଥିଲୀ ॥ 14 ॥
ଵିଲପ୍ୟ ବହୁ ଵୈଦେହୀ ନ୍ୟସ୍ତଦେହା ଭଵିଷ୍ୟତି ।
ଅଥଵା ନିହିତା ମନ୍ୟେ ରାଵଣସ୍ୟ ନିଵେଶନେ ॥ 15 ॥
ନୂନଂ ଲାଲପ୍ୟତେ ସୀତା ପଂଜରସ୍ଥେଵ ଶାରିକା ।
ଜନକସ୍ୟ ସୁତା ସୀତା ରାମପତ୍ନୀ ସୁମଧ୍ୟମା ॥ 16 ॥
କଥମୁତ୍ପଲପତ୍ରାକ୍ଷୀ ରାଵଣସ୍ୟ ଵଶଂ ଵ୍ରଜେତ୍ ।
ଵିନଷ୍ଟା ଵା ପ୍ରଣଷ୍ଟା ଵା ମୃତା ଵା ଜନକାତ୍ମଜା ॥ 17 ॥
ରାମସ୍ୟ ପ୍ରିୟଭାର୍ୟସ୍ୟ ନ ନିଵେଦୟିତୁଂ କ୍ଷମମ୍ ।
ନିଵେଦ୍ୟମାନେ ଦୋଷସ୍ସ୍ୟାଦ୍ଦୋଷସ୍ସ୍ୟାଦନିଵେଦନେ ॥ 18 ॥
କଥଂ ନୁ ଖଲୁ କର୍ତଵ୍ୟଂ ଵିଷମଂ ପ୍ରତିଭାତି ମେ ।
ଅସ୍ମିନ୍ନେଵଂଗତେ କାର୍ୟେ ପ୍ରାପ୍ତକାଲଂ କ୍ଷମଂ ଚ କିମ୍ ॥ 19 ॥
ଭଵେଦିତି ମତଂ ଭୂୟୋ ହନୁମାନ୍ପ୍ରଵିଚାରୟତ୍ ।
ୟଦି ସୀତାମଦୃଷ୍ଟ୍ଵାଽହଂ ଵାନରେଂଦ୍ରପୁରୀମିତଃ ॥ 20 ॥
ଗମିଷ୍ୟାମି ତତଃ କୋ ମେ ପୁରୁଷାର୍ଥୋ ଭଵିଷ୍ୟତି ।
ମମେଦଂ ଲଂଘନଂ ଵ୍ୟର୍ଥଂ ସାଗରସ୍ୟ ଭଵିଷ୍ୟତି ॥ 21 ॥
ପ୍ରଵେଶଶ୍ଚୈଵ ଲଂକାୟାଃ ରାକ୍ଷସାନାଂ ଚ ଦର୍ଶନମ୍ ।
କିଂ ମାଂ ଵକ୍ଷ୍ୟତି ସୁଗ୍ରୀଵୋ ହରୟୋ ଵା ସମାଗତାଃ ॥ 22 ॥
କିଷ୍କିଂଧାଂ ସମନୁପ୍ରାପ୍ତଂ ତୌ ଵା ଦଶରଥାତ୍ମଜୌ ।
ଗତ୍ଵା ତୁ ୟଦି କାକୁତ୍ସ୍ଥଂ ଵକ୍ଷ୍ୟାମି ପରମପ୍ରିୟମ୍ ॥ 23 ॥
ନ ଦୃଷ୍ଟେତି ମୟା ସୀତା ତତସ୍ତକ୍ଷ୍ୟତି ଜୀଵିତମ୍ ।
ପରୁଷଂ ଦାରୁଣଂ କ୍ରୂରଂ ତୀକ୍ଷ୍ଣମିଂଦ୍ରିୟତାପନମ୍ ॥ 24 ॥
ସୀତାନିମିତ୍ତଂ ଦୁର୍ଵାକ୍ୟଂ ଶ୍ରୁତ୍ଵା ସ ନ ଭଵିଷ୍ୟତି ।
ତଂ ତୁ କୃଚ୍ଛ୍ରଗତଂ ଦୃଷ୍ଟ୍ଵା ପଂଚତ୍ଵଗତମାନସମ୍ ॥ 25 ॥
ଭୃଶାନୁରକ୍ତୋ ମେଧାଵୀ ନ ଭଵିଷ୍ୟତି ଲକ୍ଷ୍ମଣଃ ।
ଵିନଷ୍ଟୌ ଭ୍ରାତରୌ ଶ୍ରୁତ୍ଵା ଭରତୋଽପି ମରିଷ୍ୟତି ॥ 26 ॥
ଭରତଂ ଚ ମୃତଂ ଦୃଷ୍ଟ୍ଵା ଶତ୍ରୁଘ୍ନୋ ନ ଭଵିଷ୍ୟତି ।
ପୁତ୍ରାନ୍ମୃତାନ୍ସମୀକ୍ଷ୍ୟାଥ ନ ଭଵିଷ୍ୟଂତି ମାତରଃ ॥ 27 ॥
କୌସଲ୍ୟା ଚ ସୁମିତ୍ରା ଚ କୈକେୟୀ ଚ ନ ସଂଶୟଃ ।
କୃତଜ୍ଞସ୍ସତ୍ୟସଂଧଶ୍ଚ ସୁଗ୍ରୀଵଃ ପ୍ଲଵଗାଧିପଃ ॥ 28 ॥
ରାମଂ ତଥା ଗତଂ ଦୃଷ୍ଟ୍ଵା ତତସ୍ତ୍ୟକ୍ଷ୍ୟତି ଜୀଵିତମ୍ ।
ଦୁର୍ମନା ଵ୍ୟଥିତା ଦୀନା ନିରାନଂଦା ତପସ୍ଵିନୀ ॥ 29 ॥
ପୀଡିତା ଭର୍ତୃଶୋକେନ ରୁମା ତ୍ୟକ୍ଷ୍ୟତି ଜୀଵିତମ୍ ।
ଵାଲିଜେନ ତୁ ଦୁଃଖେନ ପୀଡିତା ଶୋକକର୍ଶିତା ॥ 30 ॥
ପଂଚତ୍ଵଂ ଚ ଗତେ ରାଜ୍ଞି ତାରାଽପି ନ ଭଵିଷ୍ୟତି ।
ମାତାପିତ୍ରୋର୍ଵିନାଶେନ ସୁଗ୍ରୀଵଵ୍ୟସନେନ ଚ ॥ 31 ॥
କୁମାରୋଽପ୍ୟଂଗଦଃ କସ୍ମାଦ୍ଧାରୟିଷ୍ୟତି ଜୀଵିତମ୍ ।
ଭର୍ତୃଜେନ ତୁ ଦୁଃଖେନ ହ୍ୟଭିଭୂତା ଵନୌକସଃ ॥ 32 ॥
ଶିରାଂସ୍ୟଭିହନିଷ୍ୟଂତି ତଲୈର୍ମୁଷ୍ଟିଭିରେଵ ଚ ।
ସାଂତ୍ଵେନାନୁପ୍ରଦାନେନ ମାନେନ ଚ ୟଶସ୍ଵିନା ॥ 33 ॥
ଲାଲିତାଃ କପିରାଜେନ ପ୍ରାଣାଂସ୍ତ୍ୟକ୍ଷ୍ୟଂତି ଵାନରାଃ ।
ନ ଵନେଷୁ ନ ଶୈଲେଷୁ ନ ନିରୋଧେଷୁ ଵା ପୁନଃ ॥ 34 ॥
କ୍ରୀଡାମନୁଭଵିଷ୍ୟଂତି ସମେତ୍ୟ କପିକୁଂଜରାଃ ।
ସପୁତ୍ରଦାରାସ୍ସାମାତ୍ୟା ଭର୍ତୃଵ୍ୟସନପୀଡିତାଃ ॥ 35 ॥
ଶୈଲାଗ୍ରେଭ୍ୟଃ ପତିଷ୍ୟଂତି ସମେଷୁ ଵିଷମେଷୁ ଚ ।
ଵିଷମୁଦ୍ବଂଧନଂ ଵାପି ପ୍ରଵେଶଂ ଜ୍ଵଲନସ୍ୟ ଵା ॥ 36 ॥
ଉପଵାସମଥୋ ଶସ୍ତ୍ରଂ ପ୍ରଚରିଷ୍ୟଂତି ଵାନରାଃ ।
ଘୋରମାରୋଦନଂ ମନ୍ୟେ ଗତେ ମୟି ଭଵିଷ୍ୟତି ॥ 37 ॥
ଇକ୍ଷ୍ଵାକୁକୁଲନାଶଶ୍ଚ ନାଶଶ୍ଚୈଵ ଵନୌକସାମ୍ ।
ସୋଽହଂ ନୈଵ ଗମିଷ୍ୟାମି କିଷ୍କିଂଧାଂ ନଗରୀମିତଃ ॥ 38 ॥
ନ ଚ ଶକ୍ଷ୍ୟାମ୍ୟହଂ ଦ୍ରଷ୍ଟୁଂ ସୁଗ୍ରୀଵଂ ମୈଥିଲୀଂ ଵିନା ।
ମୟ୍ୟଗଚ୍ଛତି ଚେହସ୍ଥେ ଧର୍ମାତ୍ମାନୌ ମହାରଥୌ ॥ 39 ॥
ଆଶୟା ତୌ ଧରିଷ୍ୟେତେ ଵାନରାଶ୍ଚ ମନସ୍ଵିନଃ ।
ହସ୍ତାଦାନୋ ମୁଖାଦାନୋ ନିୟତୋ ଵୃକ୍ଷମୂଲିକଃ ॥ 40 ॥
ଵାନପ୍ରସ୍ଥୋ ଭଵିଷ୍ୟାମି ହ୍ୟଦୃଷ୍ଟ୍ଵା ଜନକାତ୍ମଜାମ୍ ।
ସାଗରାନୂପଜେ ଦେଶେ ବହୁମୂଲଫଲୋଦକେ ॥ 41 ॥
ଚିତାଂ କୃତ୍ଵା ପ୍ରଵେକ୍ଷ୍ୟାମି ସମିଦ୍ଧମରଣୀସୁତମ୍ ।
ଉପଵିଷ୍ଟସ୍ୟ ଵା ସମ୍ୟଗ୍ଲିଂଗିନୀଂ ସାଧୟିଷ୍ୟତଃ ॥ 42 ॥
ଶରୀରଂ ଭକ୍ଷୟିଷ୍ୟଂତି ଵାୟସାଃ ଶ୍ଵାପଦାନି ଚ ।
ଇଦଂ ମହର୍ଷିଭିର୍ଦୃଷ୍ଟଂ ନିର୍ୟାଣମିତି ମେ ମତିଃ ॥ 43 ॥
ସମ୍ୟଗାପଃ ପ୍ରଵେକ୍ଷ୍ୟାମି ନ ଚେତ୍ପଶ୍ୟାମି ଜାନକୀମ୍ ।
ସୁଜାତମୂଲା ସୁଭଗା କୀର୍ତିମାଲା ୟଶସ୍ଵିନୀ ॥ 44 ॥
ପ୍ରଭଗ୍ନା ଚିରରାତ୍ରୀୟଂ ମମ ସୀତାମପଶ୍ୟତଃ ।
ତାପସୋ ଵା ଭଵିଷ୍ୟାମି ନିୟତୋ ଵୃକ୍ଷମୂଲିକଃ ॥ 45 ॥
ନେତଃ ପ୍ରତିଗମିଷ୍ୟାମି ତାମଦୃଷ୍ଟ୍ଵାସିତେକ୍ଷଣାମ୍ ।
ୟଦୀତଃ ପ୍ରତିଗଚ୍ଛାମି ସୀତାମନଧିଗମ୍ୟ ତାମ୍ ॥ 46 ॥
ଅଂଗଦସ୍ସହ ତୈସ୍ସର୍ଵୈର୍ଵାନରୈର୍ନ ଭଵିଷ୍ୟତି ।
ଵିନାଶେ ବହଵୋ ଦୋଷା ଜୀଵନ୍ ଭଦ୍ରାଣି ପଶ୍ୟତି ॥ 47 ॥
ତସ୍ମାତ୍ପ୍ରାଣାନ୍ ଧରିଷ୍ୟାମି ଧ୍ରୁଵୋ ଜୀଵିତସଂଗମଃ ।
ଏଵଂ ବହୁଵିଧଂ ଦୁଃଖଂ ମନସା ଧରାୟନ୍ମୁହୁଃ ॥ 48 ॥
ନାଧ୍ୟଗଚ୍ଛତ୍ତଦା ପାରଂ ଶୋକସ୍ୟ କପିକୁଂଚରଃ ।
ରାଵଣଂ ଵା ଵଧିଷ୍ୟାମି ଦଶଗ୍ରୀଵଂ ମହାବଲମ୍ ॥ 49 ॥
କାମମସ୍ତୁ ହୃତା ସୀତା ପ୍ରତ୍ୟାଚୀର୍ଣଂ ଭଵିଷ୍ୟତି ।
ଅଥଵୈନଂ ସମୁତ୍କ୍ଷିପ୍ୟ ଉପର୍ୟୁପରି ସାଗରମ୍ ॥ 50 ॥
ରାମାୟୋପହରିଷ୍ୟାମି ପଶୁଂ ପଶୁପତେରିଵ ।
ଇତି ଚିଂତାଂ ସମାପନ୍ନଃ ସୀତାମନଧିଗମ୍ୟ ତାମ୍ ॥ 51 ॥
ଧ୍ୟାନଶୋକପରୀତାତ୍ମା ଚିଂତୟାମାସ ଵାନରଃ ।
ୟାଵତ୍ସୀତାଂ ହି ପଶ୍ୟାମି ରାମପତ୍ନୀଂ ୟଶସ୍ଵିନୀମ୍ ॥ 52 ॥
ତାଵଦେତାଂ ପୁରୀଂ ଲଂକାଂ ଵିଚିନୋମି ପୁନଃ ପୁନଃ ।
ସଂପାତିଵଚନାଚ୍ଚାପି ରାମଂ ୟଦ୍ୟାନୟାମ୍ୟହମ୍ ॥ 53 ॥
ଅପଶ୍ୟନ୍ ରାଘଵୋ ଭାର୍ୟାଂ ନିର୍ଧହେତ୍ସର୍ଵଵାନରାନ୍ ।
ଇହୈଵ ନିୟତାହାରୋ ଵତ୍ସ୍ୟାମି ନିୟତେଂଦ୍ରିୟଃ ॥ 54 ॥
ନ ମତ୍କୃତେ ଵିନଶ୍ୟେୟୁଃ ସର୍ଵେ ତେ ନରଵାନରାଃ ।
ଅଶୋକଵନିକା ଚେୟଂ ଦୃଶ୍ୟତେ ୟା ମହାଦ୍ରୁମା ॥ 55 ॥
ଇମାମଧିଗମିଷ୍ୟାମି ନ ହୀୟଂ ଵିଚିତା ମୟା ।
ଵସୂନ୍ରୁଦ୍ରାଂସ୍ତଥାଽଦିତ୍ୟାନଶ୍ଵିନୌ ମରୁତୋଽପି ଚ ॥ 56 ॥
ନମସ୍କୃତ୍ଵା ଗମିଷ୍ୟାମି ରକ୍ଷସାଂ ଶୋକଵର୍ଧନଃ ।
ଜିତ୍ଵା ତୁ ରାକ୍ଷସାନ୍ ସର୍ଵାନିକ୍ଷ୍ଵାକୁକୁଲନଂଦିନୀମ୍ ॥ 57 ॥
ସଂପ୍ରଦାସ୍ୟାମି ରାମାୟ ୟଥା ସିଦ୍ଧିଂ ତପସ୍ଵିନେ ।
ସଃ ମୁହୂର୍ତମିଵ ଧ୍ୟାତ୍ଵା ଚିଂତାଵଗ୍ରଥିତେଂଦ୍ରିୟଃ ॥ 58 ॥
ଉଦତିଷ୍ଠନ୍ମହାତେଜା ହନୁମାନ୍ ମାରୁତାତ୍ମଜଃ ।
ନମୋଽସ୍ତୁ ରାମାୟ ସଲକ୍ଷ୍ମଣାୟ ଦେଵ୍ୟୈ ଚ ତସ୍ୟୈ ଜନକାତ୍ମଜାୟୈ ।
ନମୋଽସ୍ତୁ ରୁଦ୍ରେଂଦ୍ରୟମାନିଲେଭ୍ୟୋ ନମୋଽସ୍ତୁ ଚଂଦ୍ରାର୍କମରୁଦ୍ଗଣେଭ୍ୟଃ ॥ 59 ॥
ସ ତେଭ୍ୟସ୍ତୁ ନମସ୍କୃତ୍ୟ ସୁଗ୍ରୀଵାୟ ଚ ମାରୁତିଃ ।
ଦିଶସ୍ସର୍ଵାସ୍ସମାଲୋକ୍ୟ ହ୍ୟଶୋକଵନିକାଂ ପ୍ରତି ॥ 60 ॥
ସ ଗତ୍ଵା ମନସା ପୂର୍ଵମଶୋକଵନିକାଂ ଶୁଭାମ୍ ।
ଉତ୍ତରଂ ଚିଂତୟାମାସ ଵାନରୋ ମାରୁତାତ୍ମଜଃ ॥ 61 ॥
ଧ୍ରୁଵଂ ତୁ ରକ୍ଷୋବହୁଲା ଭଵିଷ୍ୟତି ଵନାକୁଲା ।
ଅଶୋକଵନିକା ପୁଣ୍ୟା ସର୍ଵସଂସ୍କାରସଂସ୍କୃତା ॥ 62 ॥
ରକ୍ଷିଣଶ୍ଚାତ୍ର ଵିହିତା ନୂନଂ ରକ୍ଷଂତି ପାଦପାନ୍ ।
ଭଗଵାନପି ସର୍ଵାତ୍ମା ନାତିକ୍ଷୋଭଂ ପ୍ରଵାତି ଵୈ ॥ 63 ॥
ସଂକ୍ଷିପ୍ତୋଽୟଂ ମୟାଽତ୍ମା ଚ ରାମାର୍ଥେ ରାଵଣସ୍ୟ ଚ ।
ସିଦ୍ଧିଂ ମେ ସଂଵିଧାସ୍ୟଂତି ଦେଵାଃ ସର୍ଷିଗଣାସ୍ତ୍ଵିହ ॥ 64 ॥
ବ୍ରହ୍ମା ସ୍ଵୟଂଭୂର୍ଭଗଵାନ୍ ଦେଵାଶ୍ଚୈଵ ଦିଶଂତୁ ମେ ।
ସିଦ୍ଧିମଗ୍ନିଶ୍ଚ ଵାୟୁଶ୍ଚ ପୁରୁହୂତଶ୍ଚ ଵଜ୍ରଭୃତ୍ ॥ 65 ॥
ଵରୁଣଃ ପାଶହସ୍ତଶ୍ଚ ସୋମାଦିତ୍ୟୌ ତଥୈଵ ଚ ।
ଅଶ୍ଵିନୌ ଚ ମହାତ୍ମାନୌ ମରୁତଃ ଶର୍ଵ ଏଵ ଚ ॥ 66 ॥
ସିଦ୍ଧିଂ ସର୍ଵାଣି ଭୂତାନି ଭୂତାନାଂ ଚୈଵ ୟଃ ପ୍ରଭୁଃ ।
ଦାସ୍ୟଂତି ମମ ୟେ ଚାନ୍ୟେ ହ୍ୟଦୃଷ୍ଟାଃ ପଥି ଗୋଚରାଃ ॥ 67 ॥
ତଦୁନ୍ନସଂ ପାଂଡୁରଦଂତମଵ୍ରଣଂ ଶୁଚିସ୍ମିତଂ ପଦ୍ମପଲାଶଲୋଚନମ୍ ।
ଦ୍ରକ୍ଷ୍ୟେ ତଦାର୍ୟାଵଦନଂ କଦାନ୍ଵହଂ ପ୍ରସନ୍ନତାରାଧିପତୁଲ୍ୟଦର୍ଶନମ୍ ॥ 68 ॥
କ୍ଷୁଦ୍ରେଣ ପାପେନ ନୃଶଂସକର୍ମଣା ସୁଦାରୁଣାଲଂକୃତଵେଷଧାରିଣା ।
ବଲାଭିଭୂତା ହ୍ୟବଲା ତପସ୍ଵିନୀ କଥଂ ନୁ ମେ ଦୃଷ୍ଟିପଥେଽଦ୍ୟ ସା ଭଵେତ୍ ॥ 69 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ତ୍ରୟୋଦଶସ୍ସର୍ଗଃ ॥
