শ্রীমদ্বাল্মীকীয় রামাযণে সুংদরকাংডম্ ।
অথ ষড্বিংশস্সর্গঃ ।
প্রসক্তাশ্রুমুখীত্যবং ব্রুবংতী জনকাত্মজা ।
আধোগতমুখী বালা বিলপ্তুমুপচক্রমে ॥ 1 ॥
উন্মত্তেব প্রমত্তেব ভ্রাংতচিত্তেব শোচতী ।
উপাবৃত্তা কিশোরীব বিবেষ্টংতী মহীতলে ॥ 2 ॥
রাঘবস্য় প্রমত্তস্য় রক্ষসা কামরূপিণা ।
রাবণেন প্রমথ্য়াহমানীতা ক্রোশতী বলাত্ ॥ 3 ॥
রাক্ষসীবশমাপন্না ভর্ত্স্যমানা সুদারুণম্ ।
চিংতয়ংতী সুদুঃখার্তা নাহং জীবিতুমুত্সুহে ॥ 4 ॥
ন হি মে জীবিতেনার্থো নৈবার্থের্ন চ ভূষণৈঃ ।
বসংত্য়া রাক্ষসীমধ্য়ে বিনা রামং মহারথম্ ॥ 5 ॥
অশ্মসারমিদং নূনমথবাপ্যজরামরম্ ।
হৃদয়ং মম যেনেদং ন দুঃখেনাবশীর্যতে ॥ 6 ॥
ধিঙ্মামনার্য়ামসতীং যাহং তেনা বিনা কৃতা ।
মুহূর্তমপি রক্ষামি জীবিতং পাপজীবিতা ॥ 7 ॥
কা চ মে জীবিতে শ্রদ্ধা সুখে বা তং প্রিয়ং বিনা ।
ভর্তারং সাগরাংতায়া বসুধায়াঃ প্রিয়ংবদম্ ॥ 8 ॥
ভিদ্যতাং ভক্ষ্যতাং বাপি শরীরং বিসৃজাম্যহম্ ।
ন চাপ্যহং চিরং দুঃখং সহেয়ং প্রিযবর্জিতা ॥ 9 ॥
চরণেনাপি সব্য়েন ন স্পৃশেয়ং নিশাচরম্ ।
রাবণং কিং পুনরহং কামমেয়ং বিগর্হিতম্ ॥ 10 ॥
প্রত্য়াখ্য়াতং ন জানাতি নাত্মানং নাত্মনঃ কুলম্ ।
যো নৃশংসস্বভাবেন মাং প্রার্থয়িতুমিচ্ছতি ॥ 11 ॥
ছিন্না ভিন্না বিভক্তা বা দীপ্তেবাগ্নৌ প্রদীপিতা ।
রাবণং নোপতিষ্ঠেয়ং কিং প্রলাপেন বশ্চিরম্ ॥ 12 ॥
খ্য়াতঃ প্রাজ্ঞঃ কৃতজ্ঞশ্চ সানুক্রোশশ্চ রাঘবঃ ।
সদ্বৃত্তো নিরনুক্রোশশ্শংকে মদ্ভাগ্যসংক্ষয়াত্ ॥ 13 ॥
রাক্ষসানাং সহস্রাণি জনস্থানে চতুর্দশ ।
যেনৈকেন নিরস্তানি স মাং কিং নাভিপদ্যতে ॥ 14 ॥
নিরুদ্ধা রাবণেনাহমল্পবীর্য়েণ রক্ষসা ।
সমর্থঃ খলু মে ভর্তা রাবণং হংতুমাহবে ॥ 15 ॥
বিরাধো দংডকারণ্য়ে যেন রাক্ষসপুংগবঃ ।
রণে রামেণ নিহতস্স মাং কিং নাভিপদ্যতে ॥ 16 ॥
কামং মধ্য়ে সমুদ্রস্য় লংকেয়ং দুষ্প্রধর্ষণা ।
ন তু রাঘববাণানাং গতিরোধো ভবিষ্যতি ॥ 17 ॥
কিন্নু তত্কারণং যেন রামো দৃঢপরাক্রমঃ ।
রক্ষসাপহৃতাং ভার্য়ামিষ্টাং নাভ্যবপদ্যতে ॥ 18 ॥
ইহস্থাং মাং ন জানীতে শংকে লক্ষ্মণপূর্বজঃ ।
জানন্নপি হি তেজস্বী ধর্ষণং মর্ষয়িষ্যতি ॥ 19 ॥
হৃতেতি যোঽধিগত্বা মাং রাঘবায় নিবেদয়েত্ ।
গৃধ্ররাজোঽপি স রণে রাবণেন নিপাতিতঃ ॥ 20 ॥
কৃতং কর্ম মহত্তেন মাং তথাঽভ্যবপদ্যতা ।
তিষ্ঠতা রাবণদ্বংদ্বে বৃদ্ধেনাপি জটায়ুষা ॥ 21 ॥
যদি মামিহ জানীয়াদ্বর্তমানাং স রাঘবঃ ।
অদ্য় বাণৈরভিক্রুদ্ধঃ কুর্য়াল্লোকমরাক্ষসম্ ॥ 22 ॥
বিধমেচ্চ পুরীং লংকাং শোষয়েচ্চ মহোদধিম্ ।
রাবণস্য় চ নীচস্য় কীর্তিং নাম চ নাশয়েত্ ॥ 23 ॥
ততো নিহতনাথানাং রাক্ষসীনাং গৃহে গৃহে ।
যথাহমেবং রুদতী তথা ভূয়ো ন সংশয়ঃ ॥ 24 ॥
অন্বিষ্য় রক্ষসাং লংকাং কুর্য়াদ্রামস্সলক্ষ্মণঃ ।
ন হি তাভ্য়াং রিপুর্দৃষ্টো মুহূর্তমপি জীবতি ॥ 25 ॥
চিতাধূমাকুলপথা গৃধ্রমংডলসংকুলা ।
অচিরেণ তু লংকেয়ং শ্মশানসদৃশী ভবেত্ ॥ 26 ॥
অচিরেণৈব কালেন প্রাপ্স্য়াম্য়েব মনোরথম্ ।
দুষ্প্রস্থানোঽয়ামাখ্য়াতি সর্বেষাং বো বিপর্যযম্ ॥ 27 ॥
যাদৃশানীহ দৃশ্য়ংতে লংকায়ামশুভানি বৈ ।
অচিরেণৈব কালেন ভবিষ্যতি হতপ্রভা ॥ 28 ॥
নূনং লংকা হতে পাপে রাবণে রাক্ষসাধমে ।
শোষং যাস্যতি দুর্ধর্ষা প্রমদা বিধবা যথা ॥ 29 ॥
পুণ্য়োত্সবসমুত্থা চ নষ্টভর্ত্রী সরাক্ষসী ।
ভবিষ্যতি পুরী লংকা নষ্টভর্ত্রী যথাংগনা ॥ 30 ॥
নূনং রাক্ষসকন্য়ানাং রুদংতীনাং গৃহে গৃহে ।
শ্রোষ্য়ামি নচিরাদেব দুঃখার্তানামিহ ধ্বনিম্ ॥ 31 ॥
সাংথকারা হতদ্য়োতা হতরাক্ষসপুংগবা ।
ভবিষ্যতি পুরী লংকা নির্দগ্ধা রামসাযকৈঃ ॥ 32 ॥
যদি নাম স শূরো মাং রামো রক্তাংতলোচনঃ ।
জানীয়াদ্বর্তমানাং হি রাবণস্য় নিবেশনে ॥ 33 ॥
অনেন তু নৃশংসেন রাবণেনাধমেন মে ।
সময়ো যস্তু নির্দিষ্টস্তস্য় কালোঽযমাগতঃ ॥ 34 ॥
স চ মে বিহিতো মৃত্য়ুরস্মিন্ দুষ্টে ন বর্ততে ।
অকার্য়ং যে ন জানংতি নৈরৃতাঃ পাপকারিণঃ ॥ 35 ॥
অধর্মাত্তু মহোত্পাতো ভবিষ্যতি হি সাংপ্রতম্ ।
নৈতে ধর্মং বিজানংতি রাক্ষসাঃ পিশিতাশনাঃ ॥ 36 ॥
ধ্রুবং মাং প্রাতরাশার্থে রাক্ষসঃ কল্পয়িষ্যতি ।
সাহং কথং করিষ্য়ামি তং বিনা প্রিযদর্শনম্ ॥ 37 ॥
ক্ষিপ্রং বৈবস্বতং দেবং পশ্য়েয়ং পতিনা বিনা ।
নাজানাজ্জীবতীং রামস্স মাং লক্ষ্মণপূর্বজঃ ॥ 38 ॥
জানংতৌ তৌ ন কুর্য়াতাং নোর্য়্বাং হি মম মার্গণম্ ।
নূনং মমৈব শোকেন স বীরো লক্ষ্মণাগ্রজঃ ॥ 39 ॥
দেবলোকমিতো যাতস্ত্যক্ত্বা দেহং মহীতলে ।
ধন্য়া দেবাস্সগংধর্বাঃ সিদ্ধাশ্চ পরমর্ষয়ঃ ॥ 40 ॥
মম পশ্য়ংতি যে নাথং রামং রাজীবলোচনম্ ।
অথবা ন হি তস্য়ার্থো ধর্মকামস্য় ধীমতঃ ॥ 41 ॥
ময়া রামস্য় রাজর্ষের্ভার্যয়া পরমাত্মনঃ ।
দৃশ্যমানে ভবেত্প্রীতি স্সৌহৃদং নাস্ত্যপশ্যতঃ ॥ 42 ॥
নাশয়ংতি কৃতঘ্নাস্তু ন রামো নাশয়িষ্যতি ।
কিং নু মে ন গুণাঃ কেচিত্কিং বা ভাগ্যক্ষয়ো মম ॥ 43 ॥
যাহং সীদামি রামেণ হীনা মুখ্য়েন ভামিনী ।
শ্রেয়ো মে জীবিতান্মর্তুং বিহীনায়া মহাত্মনঃ ॥ 44 ॥
রামাদক্লিষ্টচারিত্রাচ্ছূরাচ্ছত্রুনিবর্হণাত্ ।
অথবা ন্যস্তশত্রৌ তৌ বনে মূলফলাশিনৌ ॥ 45 ॥
ভ্রাতরৌ হি নরশ্রেষ্ঠৌ সংবৃত্তৌ বনগোচরৌ ।
অথবা রাক্ষসেংদ্রেণ রাবণেন দুরাত্মনা ॥ 46 ॥
ছদ্মনা ঘাতিতৌ শূরৌ ভ্রাতরৌ রামলক্ষ্মণৌ ।
সাঽহমেবংগতে কালে মর্তুমিচ্ছামি সর্বথা ॥ 47 ॥
ন চ মে বিহিতো মৃত্য়ুরস্মিন্ দুঃখেঽপি বর্ততে ।
ধন্য়াঃ খলু মহাত্মানো মুনযস্ত্যক্তকিল্বিষাঃ ॥ 48 ॥
জিতাত্মনো মহাভাগা যেষাং ন স্তঃ প্রিয়াপ্রিয়ে ।
প্রিয়ান্ন সংভবেদ্দুঃখমপ্রিয়াদধিকং ভযম্ ॥ 49 ॥
তাভ্য়াং হি যে বিয়ুজ্য়ংতে নমস্তেষাং মহাত্মনাম্ ।
সাহং ত্যক্তা প্রিয়ার্হেণ রামেণ বিদিতাত্মনা ॥ 50 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে ষড্বিংশস্সর্গঃ ॥
